Read Casuarina Coast Asmat MATIUS 21 Bible Online

MATIUS 21 - Casuarina Coast Asmat bible

MATIUS 21

¹Emesare. Armat owe Yerusalem setep ambaresisiemes ere, are kota Betfage ambaremes. Era kota fami juas Saitun aemanse, Yesusam atakam abajamkai ipit amnuk asakamtame.

²“Tare bonak aemansa tamsan aesosami. Era tamsan ambaremtankum, tare keledai tima pak aptamam, keledai jiiam, banamek ametesieatemtemankum. Emesare, era keledai jamnuk tima pak asurumami, wanam atoomtinaotamanimi.

³Owe atakam tara bakorom apaye, tararawa, ‘Tuhan ere keledai beak ten bajaren. Armat ipitam era keledai ametetamteman.’ Emes atakam aesimami.” Yesus emes atakam aesime.

⁴Emesare, era pak aemes ere, Allah atakam bakoretam ipit era aesimtame atakam jipu baem are:

⁵“Era kota Sion owe emes atakam akoromay: ‘Baporay! Taraja Ipit adamo bimak binip daytu apok ipit. Are tara ambaromemman. Armat Ipit keledai anama keledai jii beak ten atawejarmara.’ Emes atakam aesimay.” Me Allah atakam bakoretam ipit emes atakam aesimen.

⁶Emesare, Yesus bajamkai ipit amnuk aesosemis. Are armat ipit atakam asakamtame atakam ji aeemis.

⁷Are era keledaiam, era ai keledaiam, atoomtinemis. Are abaju bamintep keledai jamnuk beak ten atemetebuitiiemis. Yesus arawa, abeak ten atemetape.

⁸Owe tananenakam abaju era bokotpu ambuitiia ajaies. Wan oweam wus ao aptam asesakamdaemteteres, wanam era wus ao aptam era bokotpu ambuitiia ajaies.

⁹Me armat ipit bonak ajares owe tananeam, fe asarames owe tananeam, afakea ajaies. “Daut Wurpis, tere aeomamo! Tuhan, asan akot ataendaemmar Ipit baemto! Owe Ju Armat Ipit Allah, basitimtas!” Emes atakam aesima ajaies.

¹⁰Emesare, Armat Ipit Yerusalem ambareme. Yerusalem ambaremerawa, era kota owe takes asawuames. “Armat ipit tanam?” Emes atakam aesimes.

¹¹Era owe tananerawa, “Armat Ipit Allah atakam bakoretam ipit juas Yesus. Are Galilea tapirmi kota juas Nasaret Ipit.” Emes atakam aesimes.

¹²Emesare, Yesus, Allah Tame ajiieme. Are pak jow bauumamtaa owe takes ambirimjisimkorome. Are uang jow bauumamtaa owe ameja bipare wasimtaera apatakumosoma ajaie. Are pari sakao jow bauumamtaa owe akursiam bipare wasimtaera apatakumosoma ajaie.

¹³Are atakam era owe akorome. “Alkitabam, ‘Detame, atakam Dera bajanim tame aemamestem.’ Emes atakam akorem. Tare ere, ara tame, wosom owe bajarisiap asan, aemapommakam.” Yesus emes atakam aesime.

¹⁴Me Allah Tame bomon, banamek kapie oweam, afafasiejares oweam, Yesus ambaromes. Armat Ipitam era owe damo ajaoromtaae.

¹⁵Me Allah Tame pak baem owe daytuam, Musa Basakamtam Atakam baememtam oweam, Yesus akotnak pak aeme apores. Wanam, jii Allah Tame bomon afakea ajaies. “Daut Wurpis, tere aeomamo!” Emes atakam aesimes. Era owe emesam apores. Ararawa, jak ambap apumapes.

¹⁶Era owerawa, atakam Armat Ipit akoromes. “Wore era jii era akoremas atakam jane ajimaremi?” Emes atakam aesimes. Yesus arawa, “Jane ajimin. Emesare, Alkitabam, ‘Wore jiiam, ao andamas jiiam, wora basitimnak aememtamem.’ Emes atakam akorem. Tare ere, era atakam baca baem apoke?” Emes atakam aesime.

¹⁷Emesare, Armat Ipit era owe beken ajie. Are era kota beken ajie. Ararawa, kota Betania aesose. Ise era asan aesite.

¹⁸Ajofe tomnak ere, Armat Ipit kota Yerusalem aofasieme. Are amosto aememe.

¹⁹Ararawa, wus juas “ara” era bokot pima apore. Are wuspu ambareme. Era wuspu ambaremerawa, eek apoknak apore. Wus takakope apore. Armat Ipit arawa, atakam era wus akorome. “Wore eek oopeaartem.” Emes atakam aesime. Emesare, era wus sa ameteseme.

²⁰Era bajamkai owe emes apores are jinim aees. “Era wus sa ametesemmar wama tamenem?” Emes atakam aesimes.

²¹Yesus arawa, “Atakamnak, tare Allah eemnak ambesemkoromtakam, wanam bimak binip arke apok aemtakam, tanom era wus juas “ara” aemmin pak aemtemakam. Me, era taka apok. Tanom atakam ara fami akoromtakam, ‘Baesosey! Era itimbup bwi womba ajurpuey,’ emes atakam aesimtakam, ere ara fami emes taka aemtem.

²²Tare atakam Allah ajanimtakam, tanom, ‘Allah era atakam ajanimtam pak aemtamtemaro,’ emes atakam eemnak ambesemkoromay. Armat Ipit arawa, era atakam ajanimtakam pak takes atetamteman.” Emes atakam aesime.

²³Emesare. Armat Ipit Allah Tame ajiie. Are atakam aememtame. Era atakam aememtame damon, Allah Tame pak baem owe daytuam, Yahudi owe duturuam, Armat Ipit ambaromes, “Era akoremmarem atakam ere, atakam tao esimtamen? Era fiak pak tao tetamen?” Emes atakam aesimes.

²⁴Yesus arawa, atakam era owe akorome. “Denom tara bojatepor aemin. Tare atep ajitani, Denom era aemmin pak atakam aesimtamen Ipit, atakam tara aoesimtamtemin.

²⁵Me Yohanes owe bwi akupimtaere, atakam tao sakamtame? Allah ape? Asamot owe ape?” Emes atakam aesime. Era owerawa, era atakam armamon atakam ajamkorames. “Dare atep ajitam, ‘Allah, atakam aosakamtame,’ emes atep ajitam, Armat Ipit arawa, ‘Tare Yohanes atakam bamesem apok ere, wama tamenem?’ Emes atakam aesimtemaro.

²⁶Dare ere, ‘Asamot owe atakam aosakamtames,’ emes atep ajitam, dare ombare era owe tanane aemtas pak ambartemarom. Era owe tanane abimak binip ere, ‘Yohanes, Allah atakam bakoretam ipit,’ emes bimak binip atetarammas.” Emes atakam aesimes.

²⁷Emesare, era owe atep Yesus ajites. “Yohanes owe bwi akupimtaere, atakam tao pasakamtameye? Danom damsam apok.” Emes atakam aesimes. Armat Ipit arawa, “Emesare, Denom era aememmin pak atakam asakamtamen ipit, atakam tara boesimtam apok.”

²⁸“Tare wama bimak binip tetarammakam? Emesare, jipit taka oorey jii jamnuken. Armat Ipit, era biiti ipit ambaromen. ‘Detii! Wore waa era anggur kebun karai aeey.’ Emes atakam aesimen.

²⁹Era biiti ipit ere, ‘Dere potanak,’ Emes atakam aesimen. Asep arawa, ai bimak binip atetaramen. Wanam era kebun karai aesosen.

³⁰Me aritipit arawa, era aykun ipitam ambaromen. Are era kebun karai baetam, atakam taka era aykun ipitam aesimtamen. Era aykun ipit arawa, ‘Dot! Emesare, akot.’ Emes atakam aesimen. Me, are era kebun karai baesos apoknaken.

³¹Me jii jamnuk, aritipit atakam ji aee ipit tanam?” Yesus emes atakam aesime. Era owerawa, “Era biiti ipit are.” Emes atakam aesimes. Yesus arawa, “Atakamnak, pemerintah uang bajanimtaatam karai owe anama jasipar tapes Allah aobaomep owe bonak aememtemas. Tare ere asep are.

³²Emesare, Yohanes tara ajinaomen. Are era bokot anakot tara aporomtamen. Tare ere, armat ipit atakam bamesem apoknak. Me, pemerintah uang bajanimtaatam karai owe anama jasipar tapes Yohanes atakam ambesemes. Tanom emes aporekem. Me, asep baream, tare dosa bamakem apok aemekem. Tanom armat ipit atakam bamesem apok aemekem.”

³³“Tanom wan baetaa atakam jane pajiay. Jipit taka, tapirmi aemomemen. Are anggur kebun ajapomen. Are tiri era kebun afojimapomen. Are anggur bwi bafamjisim jipa era kebun asisiapomen. Tameam oupnak aeapomen. Are era kebun, kebun karai baetam aotasimtiitamen. ‘Tare deanggur kebun karai aetamtankum, dere wan anggur eek tara atetamtemin. Me wan ere, dos.’ Emes ataaji aeen. Ararawa, wan ju tapirmi aesosen.

³⁴Kebun armat ipit, anggur eek bakokomtaa bwi setep apore, are wan karai baetam owe, era kebun karai baetam owepu, ambirimemomen. Are era owe era anggur eek bamartaa ambirimemomen.

³⁵Era kebun karai baetam owerawa, wan karai baetam owe, ajipirtaeresen. Are wan ipit taka wusup atesen. Are wan ipit taka atatiiesen. Are eka, wan ipit taka, asampirimesen.

³⁶Era kebun armat ipit arawa, wan karai baetam owe ambirimemomen. Me bonak ambirimemome owe, tanane apoken. Me asep ambirimemome owe ere, tananenaken. Me, era kebun karai baetam owe, bonak aemes pak taka, aoemesen.

³⁷Asep arawa, era kebun armat ipit, andep era owepu ambirimemomen. ‘Era owe, detii, atakam ji taka aetemas.’ Emes atakam aesimen.

³⁸Era kebun karai baetam owe ere, andep aporesen. Ararawa, armamon atakam ajamkoramesen. ‘Ara aemema ipit, aritipit pak takes atoomemto ipit arare. De! Era ipit batatiiamo. Me aapak takes dama baporetoomem.’ Emes atakam aesimesen.

³⁹Emesare, are era ipit ajipirtaeresen. Are era ipit era kebun awotapemjisimes, wanam atatiiesen.”

⁴⁰“Emesare, era kebun armat ipit aofasito, are era kebun karai baetam owe wama tamen emto?” Yesus emes atakam aesime.

⁴¹Era owerawa, “Armat ipit, era jokoman owe, asan pota atatiitetertem. Are era anggur kebun, wan karai baetam owe aootasimtiitamtem. Erarawa wan karai baetam owe era anggur eek kebun armat ipit atetamtemas.” Emes atakam aesimes.

⁴²Yesus arawa, “Tare Alkitab atakam baca baepor ape? ‘Tame baeapom owe, eka taka pota apores, wanam era eka aeremtiies. Era eka ere, tame eka anakotnak aemanse. Emesare, Tuhan era pak aeme. Danom era aeme pak akotnak apormarom.’ Alkitab emes atakam akorem.

⁴³Emesare, tanom baporay! Allah tare aobaomep owe baemem, atii atetem. Armat Ipit arawa, wan saman ataertem— era saman, Allah karai baetamnak saman are. [

⁴⁴Era eka ten andaebuamestas owe, andanaesuamestemas. Wanam era eka, owe andaekamimomepto, are era owe apeamtiitem.]” Yesus emes atakam aesime.

⁴⁵Me Allah Tame pak baem owe daytu anama Parisi owe Yesus era baetaa atakam akoretame, jane ajies. Jane ajies ere, are Armat Ipit aatakam akoretame apores.

⁴⁶Are Armat Ipit bajipirtaer aempores. Me, are era owe tanane ombare aememes. Era owe tanane abimak binip ere, “Armat Ipit, Allah atakam bakoretam ipit,” emes bimak binip atetarames. Era bajipirtaerpor oweam, era owe abimak binip apores.