Read Casuarina Coast Asmat MATIUS 22 Bible Online

MATIUS 22 - Casuarina Coast Asmat bible

MATIUS 22

¹Emesare. Yesus baetaa atakam era owe aokorome.

²“Me Allah aowe aomepto atakam, ere raja ipit, ooreysai pakambwi, andep aemtame emes tamen are.

³Armat ipit, atakam akarai baetam owe asakamtamen. ‘Tare, pakambwi takan banda ajateo owe, ainam bajinao, atakam baesimtamay.’ Emes atakam aesimen. Era ajate owe ere, bajinao potan.

⁴Armat ipit arawa, atakam, wan karai baetam owe aosakamtamen. ‘Tare emes atakam era ajateo owe baesimtamay. “Baporay! Armat ipitam, ‘Depekambwi pak emefaafetiikoromarom. Me desapiam, wan ajumaaru binatangam, emetatiiarom. Era pak takes aapeta. Tanom ara pakambwi asan ainam ajinaoay.’ ” Emes atakam aesimay.’ Armat ipit emes atakam aesimen.

⁵Me ajate owe ere, era atakam jane bajie apok tamen aememesen. Wan ipit akebun asan aesosen. Wan ipit ere, aapak jow bauumamtaat asan aesosen.

⁶Me wan owe takes arawa, armat ipit karai baetam owe, ajipirtaeresen. Are tame era owe atesen. Wanam atatiiesen.

⁷Emesare, era raja ipit jak ambap apumapen. Are atentara owe ambirimemomen. Me tentara owerawa, raja ajoo owe atatiies owe, atatiiesen. Are era owe akota tame takesam, jisimak ambomkoromesen.

⁸Me raja ipit arawa, atakam akarai baetam owe akoromen. ‘Ara pakambwi pak emefaafetiikoromarom. Me, era ajateo owe, ere owe pota. Are ara pakambwi banda, ere awar apok.

⁹Erarawa tare ara kota afojimes tiri jimsappu aesosay. Era aportakam owe takes, ara pakambwi takan banda ajateay.’ Emes atakam aesimen.

¹⁰Era karai baetam oweam era bokot takes aesosesen. Are era apores owe takes atakam ajanimesen. Are era turu oweam, jaos oweam, takes atakam ajanimesen. Emesare, era ooreysai pakambwi tame, jaki owe baemap asan apok aemapen.

¹¹Era raja ipitam, era jaki owe bi bapor ajisemen. Are era asan jipit taka ooreysai pakambwi pakaian apok aporen.

¹²Armat ipit arawa, ‘Wore ooreysai pakambwi pakaian apok, ara tame ajiiaparem wama tamenem?’ Emes atakam aesimen. Era ipit ere, atakam apok aemapen.

¹³Me raja ipit arawa, atakam akarai baetam owe akoromen. ‘Ara aemema ipit aban anama abai banam ajikapomay. Wanam ara ipit era jiitinak asan akoromjiimay.’ Emes atakam aesimen. Era asan, owe bate ambattemas. Are damo jende atawuomtemas.

¹⁴Allah, owe tanane ajatem. Me, are aereremartaamar owe, ere tanane apok.” Yesus emes atakam aesime.

¹⁵Emesare, Parisi owe aesoses. Are Armat Ipit, jaos atakam ape baempor, atakam ajamkorames.

¹⁶Me Parisi owe, abajamkai oweam, Herodes atakam bajamkai oweam, Yesuspu ambirimemomes. Era owerawa, “Guru! Wore turu ipit apormarom. Wonom Allah bokotpu atakam atakamnak aememtamemarem. Wonom owe era akoremas atakam ombare apok. Wonom, ‘Wan owe, juas aptam owe. Wan owe, juas apok owe,’ bajie apok.

¹⁷Wonom atakam aesimtamaro. Me Kaisar, uang ara batetam atakam asakamtamero. Dare era uang ara batetam akot ape? Era pak baem, Musa Basakamtam Atakam baoo ape? Wore wama bimak binipim?” Emes atakam aesimes.

¹⁸Yesus ere, era owe ajaos pak apore. Ararawa, “Tare pir bae owe. Tare wama tamen empormankum?

¹⁹Me Kaisar batetam uang takakope Dera poromtamani.” Emes atakam aesime. Era owerawa, uang perak taka Armat Ipit atoomtines.

²⁰Armat Ipit arawa, “Ara aemapa gambar ta bim? Ara aemapa wao ta juasem?” Emes atakam aesime.

²¹“Are Kaisar bi. Are Kaisar juas.” Emes atakam aesimes. Yesus arawa, “Emesare, tare Kaisar pak, Kaisar atetamay. Tanom, Allah pak, Allah atetamay.” Emes atakam aesime.

²²Emesare, era owe emes atakam jane ajies, jinim aees. Are Armat Ipit beken ajies. Are aesoses.

²³Emesare. Era baream Saduki owe, Armat Ipit ambaromes. Era Saduki owe abimak binip ere, “Dambir aemes owe bojaorwasit apok.” Emes bimak binip atetaramemas.

²⁴Are Armat Ipit ajatepores, “Guru! Musa atakam akore, ‘Jipit, jii bafim apok dambir atemto apaye, areot, era dambir ipit aremo bojiemto. Are jii arepot bafimtamto.’ Emes atakam aesimesen.

²⁵Emesare, dajoo ipit oorey jii poman ban jamnuk. Me biiti ipit petae ajieme. Emesare, armat ipit jii bafim apok dambir ateme. Me are, aremo abeak ipit botaet, beken ajiamse.

²⁶Me aykun ipitam emes taka aeme. Me wan aykun ipitam emes taka aeme. Emesare, era owe poman ban jamnuk takes emes aemteteres.

²⁷Asep arawa, era taotam dambir aeme.

²⁸Emesare, era owe takes era taot ajiema ajaies. Erarawa, era dambir aemes owe ajaorwasittas bare, era owe poman ban jamnuk, era taot ta ipit aremo emapto?” Emes atakam aesimes.

²⁹Yesus arawa, “Tare Alkitab atakam tamsam apok. Tanom Allah afiak pak tamsam apok. Erarawa tare bimak binip jiiti aomatukuma.

³⁰Emesare, era dambir aemes owe ajaorwasittas bare, oorey petae bojiem, apok aemtemas. Tapesam oorey bojuut apok aemtemas. Me, are Surga oup malaikat owe emes tamen aememtemas.

³¹Allah, dambir owe ajaorwasittas pak, atakam tara akoromen. Tanom era atakam baca emeemekem apaye.

³²Aatakam, ‘Dere Abraham aAllah. Denom Ishak aAllah. Denom Yakub aAllah.’ Emes atakam aesimen. Emesare, Armat Ipit dambir owe aAllah apok. Are jatiaptam owe aAllah.” Yesus emes atakam aesime.

³³Era owe tanane, Armat Ipit akore atakam jane ajies, jinim aees.

³⁴Emesare. Yesus Saduki owe atakam baemekore asan apok aemapome. Me Parisi owe emes atakam jane ajies ere, are ajarisiemes.

³⁵Me ajarisiemes wan Parisi ipit, Musa Basakamtam Atakam baememtam ipit. Armat ipit, Yesus baempor aememe. Erarawa are Yesus ajatepore.

³⁶“Guru! Musa aepome Basakamtam Atakam bomon, daytinak atakam wama atakam sakamtamar?” Emes atakam aesime.

³⁷Yesus arawa, “Era daytinak basakamtam atakam emes are: ‘WoTuhan Allah daytinak afaimkoromey. Wore wojak aptamam, wobimak binip aptamam, Armat Ipit afaimkoromey.’

³⁸Emesare, era basakamtam atakam daytinak basakamtam atakam erare. Are basakamtam atakam anakotnak.

³⁹Me wan daytu basakamtam atakam, basakamtam atakam awar. Era basakamtam atakam, ‘Wojoo owe afaimjiimey— wore wodamo womba afaimememarem emes tamen awara.’ Me wan daytu basakamtam atakam emes are.

⁴⁰Me Musa aeapome buku takesam, Allah atakam bakoretam owe aeapomes buku takesam, era basakamtam atakam amnuk jipu.” Yesus emes atakam aesime.

⁴¹Me Parisi owe ajarisiemes ere, Yesus era owe ajatepore.

⁴²“Tare, Allah Aeremtaere Ipit, wama bimak binip tetarammakam? Me Armat Ipit ta wurpisim?” Emes atakam aesime. Me Parisi owerawa, “Are Daut wurpis ipit.” Emes atakam aesimes.

⁴³Me Yesus arawa, “Allah Jip ere, atakam bimak binip Daut atetame. Daut ere, ‘Allah Aeremtaere Ipit, Tuhan.’ Emes atakam aesime. Me Dautam,

⁴⁴‘Tuhan atakam deTuhan akorome: “Wore debo poman aemapey— dere wojii owe akumimosomkoromtey bare ajiire.’ Tuhan emes atakam akore. Armat Ipit emes atakam akore ere, wama tamenem?

⁴⁵Me, Daut Allah Aeremtaere Ipit, atakam akore, ‘Are deTuhan.’ Emes atakam aesimen. Emesare, Allah Aeremtaere Ipit, Daut wurpis ipit aememe ere, wama tamenem?” Yesus emes atakam aesime.

⁴⁶Emesare, era owe Yesus atep baemejit asan apoknak. Era bare ajiire, owe Armat Ipit baemejatepor asan apoknak. Are ombare aememes.