Read Casuarina Coast Asmat MATIUS 23 Bible Online

MATIUS 23 - Casuarina Coast Asmat bible

MATIUS 23

¹Emesare. Yesus atakam era owe tananeam, abajamkai oweam, akorome.

²“Musa Basakamtam Atakam baememtam owe anama Parisi owe, ere Musa Basakamtam Atakam buku atakam bajomtam owe.

³Erarawa tare era akoremas atakam takes ji aeay. Era atakam jipu aememkoromay. Me, tare era owe aememas pak jipu baem bas. Era owe ir pitin atakam taka akoreemas. Me, are era atakam akoremas pak jipu baem apok.

⁴Are wuturunak pak biramo ajikitiiemas. Wanam era pak owe sep ataetiiemas. Me, are era pak takan bajamtaer, ere apoknak aememas.

⁵Are owe banamek ara basakasim jak aseseromemas. Era aememas pak takes era pak jipu aememas. Erarawa are Alkitab ayat aptam ese koser, abipispu ataetopomteteremas. Are wan ese asep ataajimtopomteteremas. Are abaju jirao aip jinumu tamkain emes tamen pak ataetopomteteremas.

⁶Era pakambwi tame bomonam, Yahudi owe samayen tame bomonam, are era bonak owe baemap asan jak aseseromemas.

⁷Me pasar asan ere, are owe, ‘selamato’ ara bajie jak aseseromemas. Are owe, ‘Guru’ ara bajie jak aseseromemas.

⁸Me, taGuru, ere takakope. Taritipitam takakope. Emesare, owe, ‘Guru’ tara bajie bas.

⁹Tanom ara aemansa tapirmi owe, ‘Dot’ bajie bas. Taritipit ere, takakope. Armat Ipit Surga oup aapeta.

¹⁰Oweam, ‘Kapar’ tara bajie bas. Me taKapar Ipit takakope. Ere Allah Aeremtaere Ipit are.

¹¹Me termamon juas aptam owe, tabambi karai baetam owe baememtas.

¹²Allah, amba baemetemtem owe takes damke akamemomtem. Me, Are amba baemetemtem apok owe asitimtem.”

¹³“Ara aemapakam Musa Basakamtam Atakam baememtam oweam, ara aemapakam Parisi oweam, tare pir bae owe. Tare ajirisemtemakam. Tare owe, Allah aobaomep owe baemem aememmas owe, tare era owe wis tamen aokoromepmakam. Tare ere, Allah aobaomep owe baemem pota ajimakam. Tararawa Allah aobaomep owe baemem akot ajimas owe, bambi baporomem apok aemmakam. [

¹⁴Ara aemapakam Musa Basakamtam Atakam baememtam owe anama ara aemapakam Parisi owe, tare pir bae owe. Tare ajirisemtemakam. Tare tano tapes tame wosom aeemakam. Wanam tare atakam Allah jiraonak ajanimemakam. Me, ere owe banamek tara bapor pak taka. Emesare, Allah daytinak tara ajurusumteman.]

¹⁵Ara aemapakam Musa Basakamtam Atakam baememtam owe anama Parisi owe, tare pir bae owe. Tare ajirisemtemakam. Tare jipit takakopeam taagama bafie batatapimtaa, era tapirmi tanane ajiritea ajiemakam. Tanom era pak baem, asan tanane ajaremakam. Wanam era ipit taagama afito, tare are jokoman baemem aememtamemakam. Emesare, tare jokomannak. Era ipit ere, jokoman daytinak are. Emesare, taraye araye neraka takan ajiitakam owe tarare.

¹⁶Emesare. Tare ajirisemtemakam. Tare bonak aemtakam owe tarare. Me, tare banamek kapie! Tanom, ‘Owe ataaji fiaknak aeetas, wanam, “Dere era ataaji aeemin pak jipu aemtemin. Pote apoknak. Allah Tame ara aemansa,” emes atakam aesimtas, era owe ataaji jipu batawejom apok, ere pota apok. Me, owe ataaji fiaknak aeetas, wanam, “Dere era ataaji aeemin pak jipu aemtemin. Pote apoknak. Allah Tame emas asinta,” emes atakam aesimtas, ere era owe era ataaji bimak binip baemejanimem asan apok.’ Emes atakam aesimemakam.

¹⁷Tare janda owe! Tanom banamek kapie! Era anakotnak pak, wama pakem? Allah Tame emas apaye? Allah tame anakot apaye? Emesare, Allah Tame, era emas, akotnak emas aemapommar.

¹⁸Tanom, ‘Owe ataaji fiaknak aeetas, wanam, “Dere era ataaji aeemin pak jipu aemtemin. Pote apoknak. Allah Tame pak jis bajaatam joo asinta,” emes atakam aesimtas, era owe ataaji bajanimem, ere pota apok. Me, owe ataaji fiaknak aeetas, wanam, “Dere era ataaji aeemin pak jipu aemtemin. Pote apoknak. Allah bataetiitam pak Allah Tame pak jis bajaatam joo asinta,” Emes atakam aesimtas, ere era owe ataaji baemejanimem asan apok.’ Emes atakam aesimemakam.

¹⁹Tare banamek kapie owe! Era anakotnak pak wama pakem? Allah bataetiitam pak apaye? Allah Tame pak jis bajaatam joo apaye? Emesare era pak jis bajaatam joo Allah bataetiitam pak, akotnak pak aemapommar.

²⁰Owe ataaji fiaknak aeetas, wanam, ‘Dere era ataaji aeemin pak jipu aemtemin. Pote apoknak. Allah Tame pak jis bajaatam joo asinta,’ emes atakam aesimtas, are era joo atakam taka apok. Are era joo aemapes pak takes atakamam akoremas.

²¹Owe ataaji fiaknak aeetas, wanam, ‘Dere era ataaji aeemin pak jipu aemtemin. Pote apoknak. Allah Tame asinta,’ emes atakam aesimtas, are era tame atakam taka apok. Are era tame bomon aemapmar Ipit atakamam akoremas. Era ipit, ere Allah.

²²Owe ataaji fiaknak aeetas, wanam, ‘Dere era ataaji aeemin pak jipu aemtemin. Pote apoknak. Era Surga oup tapirmi asinta,’ emes atakam aesimtas, are era Surga oup tapirmi atakam taka apok. Are Allah fe baemap asanam, era fe baemap asan aemapmar Ipit atakamam, akoremas.

²³Emesare. Ara aemapakam Musa Basakamtam Atakam baememtam oweam, Parisi oweam, tare pir bae owe. Tare ajirisemtemakam. Tare seream, iritam, wan pakam, persepuluhan Allah atetamemakam. Me, tare Musa Basakamtam Atakam anakot pak baem apok. Era anakot pak, ere owe turunak baemem are. Owe soro bajiom are. Pota atakam apok owe are. Ere anakot pak erare. Emesare, tare era pak bimak binip atetaramay. Me wan pakam bimak binip bajanimem bas.

²⁴Bonak bajaromat banamek kapie owee! Fokomo, era andetakam bwi andaepiesto, tare era fokomo, ofe pak andaemtaeremakam. Me, tare era andetakam bwi bomon unta, bambi andanaememakam.

²⁵Emesare. Ara aemapakam Musa Basakamtam Atakam baememtam oweam, Parisi oweam, tare pir bae owe. Tare ajirisemtemakam. Tare mbok tasan atet anama piring tasan atet bwi aeosomemakam. Era mbok anama piring bomon atet ere, era tasa aeekem pakam, era paknam pota ataerekem pakam, ere iimkopa.

²⁶Ara aemapakam Parisi owe, banamek kapie owee! Me mbok bomon ato takameosomay. Erarawa tasanam, ere atet apok.

²⁷Emesare. Ara aemapakam Musa Basakamtam Atakam baememtam oweam, Parisi oweam, tare pir bae owe. Tare ajirisemtemakam. Owe, bi, dambir asan tame ajaramemas. Emesare, tare dambir asan tame emes tamen are. Era tame tasan pak ere akotnak. Era tame bomon ere, dambir owe embak tananenakam, atet pak kupis daytinakam, aemapakam.

²⁸Tanom emes are. Owe, tare turunak owe, emes bimak binip atetaramemas. Me, tajak bomon, tare pir bae oweam, Allah atakam baoo oweam, aemapakam.”

²⁹“Emesare, tare ara aemapakam Musa Basakamtam Atakam baememtam oweam, Parisi oweam, tare pir bae owe. Tare ajirisemtemakam. Tare Allah atakam bakoretam dambir owe, adambir asan tame aeapomemakam. Tanom, era turunak owe era dambir asan, tasee pak ajasemapomemakam.

³⁰Tanom, ‘Dare darfaisomar bare aemapom ere, dare darfaisomar Allah atakam bakoretam owe bajamtatii apok aemom.’ Emes atakam aesimemakam.

³¹Emes atakam aesimemakam ere, tare, ‘Dare Allah atakam bakoretam atatiies owe awurpis aememom,’ emes atakam baso akoreemakam.

³²Emesare, era tarfaisomar aemaaris jaos pak aemkoromay.

³³Ambere! Amber jiie! Tare eraneraka bomon asan pota bajirisem pak, ombare baemeesos asan apok.

³⁴Emesare, Dere Allah atakam bakoretam oweam, bimak binip baso oweam, Musa Basakamtam Atakam baememtam oweam, tapu ataendaema ajitemin. Tanom wan owe atatiitemakam. Tanom wan owe salib wus oup atatopomtetertemakam. Tanom wan owe tasamayen tame bomon wusup atetemakam. Tanom era owe wan samaniin samaniin tamsanpu afaatitimomataartemakam.

³⁵Emesare, Allah era jokoman aemekem pak jipu asan pota bajirisem pak tara aemteman. Oweam, turunak owe atatiies. Allah, era owe atatiies owe pak takes, asan pota bajirisem pak tara aemteman. Bonak ere, era owe, era turunak ipit juas Habel atatiies. Asep barerawa, tare Berekya andep juas Sakaria atatiiekem. Tare armat ipit Allah Pitini Tame anama Allah pak jis bajaatam joo waut atatiiekem. Emesare, Allah, era atatiies owe takes, asan pota bajirisem pak tara aemteman.

³⁶Atakamnak, Allah era jokoman pak takes jipu, asan pota bajirisem pak ara ajaniemmas owe aemtem.”

³⁷“Yerusalem owee! Allah, aatakam bakoretam owe, tara ataejinaoma ajiman. Tare ere, era owe atatiia ajimakam. Tanom eka era owe asampirima ajimakam. Ajomo arsoot, ajii, ajaro ajanimapomum. Denom bare tanane, tajii, emes tamen bajanimapom jak aseseroma ajaio. Tararawa, emes pota ajiekem.

³⁸Emesare, Allah tara bojamemem apok aemteman.

³⁹Asep bare tare atakam akoretemakam, ‘Tuhan, asan akot, era Ataendaemmar Ipit baemto!’ Emes atakam aesimtemakam. Tare ere, era bare ajiire, debi bopor apok aemtemakam.” Yesus emes atakam aesime.