Read Casuarina Coast Asmat MATIUS 24 Bible Online

MATIUS 24 - Casuarina Coast Asmat bible

MATIUS 24

¹Emesare. Yesus Allah Tame daytu ajise. Armat Ipit taojismape, abajamkai owe, ambaromes. Are Allah Tame takes, Yesus aporomtames.

²Armat Ipit arawa, atakam era owe akorome. “Tare ara pak takes apormakam apaye? Atakamnak, asep bare ara tame eka bomonapas teneapas baemames apok aemtemas. Jii owe ere, era eka takes ajumdaemkoromtemas.” Emes atakam aesime.

³Emesare. Armat Ipit fami juas Saitun oup taomape, abajamkai owe, Armat Ipitpu apa ambaromes. “Atakam paesimtamaro era aesimtamaroam atakam ete bare emto? Me aofasitem baream, era asepnak baream, setep aemamesto, Allah wama jinim bae pak poromtamto?” Emes atakam aesimes.

⁴Yesus arawa, atakam era owe akorome. “Tanom turunaka! Owe potet tara batutum-ombar.

⁵Owe tanane ajinaotemas, wanam, ‘Allah Aeremtaere Ipit, ere derare,’ emes atakam aesimtetertemas. Are potet owe tanane atutumtemas.

⁶Tanom owe jii bajamom aportemakam. Owe jii bajamom atakamam jane ajitemakam. Tare ere, ombare bas. Emesare, owe jii ajamomtemas. Me, era asepnak bare setepnak apok.

⁷Wan samane tanane jii wan samane tanane ajamoma ajitemas. Wan pemerintah tanane jii wan pemerintah tanane ajamoma ajitemas. Asan tananeam, owe amosto dambir aema ajitemas. Asan tananeam ajie asisima ajaitem.

⁸Era pak takes ere, bonak bajirisem are. Wan daytinak bajirisem pak arawa, asep are.

⁹Erarawa, owe tara ajipirtaerteman. Are owe, tara bajurusum aotasimemomtamteman. Are tara atatiiteman. Era samaniin samaniin takes, tare Dera bajamkai owe aporteman. Ararawa, bifane tara afeomemteman.

¹⁰Owe tananeam Dera bajamkai ambompimtemas. Era owe tananeam armamon ajamotasimemomtamtemas. Are bifane armamon ajamfeamemtemas.

¹¹Allah atakam bakoretam pote owe tananeam ajateemtemas. Are owe tanane potet atutumtemas.

¹²Owe Allah atakam baoo betema betema ajitemas. Erarawa owe, owe bofaim apok, aemtemas.

¹³Me, owe era asepnak bare ajiire Dera bajamkai bamompim apok aemtas, are ajoremtemas.

¹⁴Owe, Allah aowe baomep Akot Atakam era tapirmiin tapirmiin akoretamtemas. Era ateman atakam samaniin samaniin jane bajie are. Erarawa, era asepnak bare aemamestem.” Yesus emes atakam aesime.

¹⁵“Me Allah atakam bakoretam ipit juas Daniel, ‘Owe Danais Baemtii Potanak Pak’ bajinao, atakam aesimtamen. Tanom era Owe Danais Baemtii Potanak Pak Allah Turunak kamar baemem aportakam, Yudea tapirmi aememas owe, ombare era famipu baesostas. (Emesare, ara atakam baca baem owe, ara atakam jane bajiekoromtas.)

¹⁶

¹⁷Tameo aemamesteterayes tame oup kais banda asan aemaptas owe, aapak ato batakamjiitaer bas.

¹⁸Kebun karai aetas oweam, abaju bofasietaer bas.

¹⁹Emesare era bare jak aptam tapesam, jii aoo andamtas tapesam, asan potanak aemaptemas.

²⁰Tanom atakam Allah ajanimay. Era ombare aesostakam bare, jufu bwi aemtepto bare bas. Anom Yahudi Owe Samayen Bare bas. Emes atakam ajanimay.

²¹Emesare, era bare, owe bajirisem daytinak aemtemas. Allah ara tapirmi akenemtiie baream, waa ajiiream, emes daytinak bojirisem apok aemtemas. Anom bojinao apoknak aemtem.

²²Allah ere, atakam asakamtiie. ‘Era owe ajirisemtas pak, jirao bas.’ Emes atakam aesime. Are emes atakam basakamtii apok ere, owe takes dambir aemtemas. Me, Allah aoereremartaae owe seis akot aoorpore. Erarawa Are era owe ajirisemtas pak, jirao bas, emes atakam asakamtiie.

²³Owe atakam tara akoromtan, ‘Baporay! Allah Aeremtaere Ipit ara asan are,’ wanam, ‘Allah Aeremtaere Ipit era asan are,’ emes atakam aesimtan apaye, tare era atakam jane bajie bas.

²⁴Emesare, wan owe, ‘Dere Allah Aeremtaere Ipit derare,’ emes pote atakam akoretetertemas. Allah atakam bakoretam pote oweam aememtemas. Era owe potet Allah aereremartaae oweam atutumportemas. Erarawa are jinim bae pak aemtemas.

²⁵Baporay! Dere ara atakam bonak tara akoromo.

²⁶Emesare, owe atakam tara akoromtan, ‘Baporay! Armat Ipit era tame apok asan aemeta,’ emes atakam aesimtan, tare era asan baesos bas. Wanam, ‘Armat Ipit era tame bomon aapeta,’ emes atakam aesimtan, tare era atakam jane bajie bas.

²⁷Bwer aran aekajararemar, wanam eman andaekajarareapem. Emesare, asamot Anakot Ajaoreme Ipit emes fef tamen andaetem.

²⁸Wuru sakao, era dambir pak asan ajukusiromaaremas.”

²⁹“Era bare ere, owe ajirisemtemas. Ajirisemtas arawa, jee jiiti ametetamtiitem. Piram bandaesaramtii apok aemtem. Baetam, baisam, akookosendaetem. Allaham era wonamo oup pak tayiepota aemtopomtem.

³⁰Era barerawa, owe Asamot Anakot Ajaoreme Ipit bandae bapor pak ajateemto, era wonamo oup aportemas. Ara aemansa tapirmi samaniin samaniin arawa, bate daytinak ambattemas. Asamot Anakot Ajaoreme Ipit, wonamo oup ten baemem andaetem. Armat Ipit, fiak pak aptamam, akotipitnak aememeam, andaetem. Era samaniin samaniin emes aportemas.

³¹Malaikatam fwi daytinak ajamtem. Ere Allah malaikat owe bamirimemom are. Era malaikat owerawa, Allah era samaniin samaniin aereremartaae owe, ajarisimapomtemas.”

³²“Wus juas ‘ara’ aememar pak, bimak binip atetaramay. Era wus jini atakuomemto aportakam, ‘Ere jusue bwi setep,’ emes atakam aesimemakam.

³³Tanom are, Tare era atakam akoremin pak takes aportakam, tare Asamot Anakot Ajaoreme Ipit andaeto bare setepnak aportemakam. Armat Ipit fefnak bandae aportemakam.

³⁴Atakamnak, ara tapirmi aememes owe dambir baem apok ere, era atakam akoremin pak takes bonak ato takamemkoromtem.

³⁵Era wonamo oupam, ara tapirmiam, ajaniostem. Deatakam ere, emes aemansaartem.”

³⁶“Me, asamot owe ere, Armat Ipit aondaeto baream, jamam, amsam apok. Surga oup malaikat owe takesam amsam apok. Allah Andepam amsam apok. Me, Aritipit taka ere amsam.

³⁷Me Asamot Anakot Ajaoreme Ipit andaeto pak, Nuh bonaknak aemaarir bare atakam awar aemtem.

³⁸Era bare, bwi daytu bajinao apok, owe amos anama bwi, andamataaris. Oorey oweam petae ajiema ajiaaris. Tapesam oorey ajuuta ajiaaris. Are Nuh era ti daytu tame aptam ajiie bare ajiire, emes pak aemaaris.

³⁹Era owe era ajinaoto pak amsam apok— era bwi daytu ajitime bare ajiire. Era bwi bea daytu bare, era owe takes asoromomase. Emesare, Asamot Anakot Ajaoreme Ipit andaetoam, emes tamen aemtem.

⁴⁰Era bere, owe jamnuk kebun aememtemamis. Malaikat owerawa, jipit taka ataertemas. Me wan takarawa, beken ajiemomtemas.

⁴¹Taot amnukam, wasen, amos takan ajotemamis. Malaikat owerawa, taka ataertemas. Me wan takarawa, beken ajiemomtemas.

⁴²Emesare, banamek ataiaaray. Tare taTuhan andaeto bare tamsam apok.

⁴³Baporay! Tame armat ipit era wosom ipit ambaromemto jam amsam ere, are banamek ataiapem. Era wosom ipit era tame jii jimsap batietii-ombar.

⁴⁴Emesare, tanom banamek emes asirapay! Tare, ‘Asamot Anakot Ajaoreme Ipit waa bandae apok,’ emes bimak binip atetaramtakam bare, ere era bare Armat Ipit andaetem.”

⁴⁵“Era anakot karai baetam ipitam, bimak binip aptam karai baetam ipitam, wama ipitim? Me akarai armat ipit, era ipit, atame kapar ipit ataemum. Me wan karai baetam owe, amos banda aemapa ajitas, era ipitam, banda pak, era owe sai asaietama ajim.

⁴⁶Era karai armat ipit aofasito, wanam are akarai baetam ipit emes baem aporto, ere era karai baetam ipit asan akot aemaptem.

⁴⁷Atakamnak, era karai armat ipit, era ipit, aapak takes, banamek batai ataemomtem.

⁴⁸Me, era ipit, karai baetam ipit pota aememto, wanam, ‘Dekarai armat ipit bofasiendae fef apok aemtem,’ emes bimak binip atetaramto,

⁴⁹wanam are era karai takan baetam owe wusup ateto, wanam are era bir bwi banda jaytu owe amos anama bwi takan ajamdeto,

⁵⁰ere, era bare karai armat ipit aofasitem. Era karai baetam ipitam, ‘Era karai armat ipit, waa bofasi apok apeno.’ Emes atakam aesimtem. Me, era bare taka era karai armat ipit aofasitem.

⁵¹Are era karai baetam ipit atatiitem. Are era ipit pir bae owe asan ataapomtem. Era asan owe bate ambattemas. Are damo jende atawuomtemas.”