Read Casuarina Coast Asmat MATIUS 27 Bible Online

MATIUS 27 - Casuarina Coast Asmat bible

MATIUS 27

¹Emesare. Tomnak ere, Allah Tame pak baem owe daytu takesam, era Yahudi duturu oweam, Yesus batatii atakam asakamtiiesen.

²Are Armat Ipit banam ajikapomes, wanam atomasesen. Are Armat Ipit gubernur ipit juas Pilatus aotasimemomtamesen.

³Emesare. Era owe Yesus batatii atakam ajamsakamamtiiesen. Me Yesus, era jokoman owe aotasimemomtame ipit juas Yudas, emes aporen. Armat Ipit arawa, ai bimak binip atetaramen. Are uang perak 30, Allah Tame pak baem owe daytu anama duturu owe aofasimtamen.

⁴Me Yudasam, “Dere turunak Ipit, owe Ara batatii aotasimemomtamo. Emesare dosa aemo.” Emes atakam aesimen. Era owerawa, “Era wopak. Dapak apok.” Emes atakam aesimesen.

⁵Emesare, armat ipit, era uang perak, Allah Tame bomon bipare akoromjiimtamen. Ararawa, aoesosen. Are dim afemak ajikapome, wanam amba sanao aeamsen.

⁶Me Allah Tame pak baem owe daytu, era uang perak ataeresen. Are, “Era uang owe batatii uang. Erarawa dare era uang Allah Tame uang asan bataapom karao.” Emes atakam aesimesen.

⁷Ararawa, atakam ajamsakamamtiiesen. Wanam are era uang, tapirmi juas “Sekumkum Mbok Bakenem Asan” ajititesen. Are era tapirmi jii dambir owe bawuapom asan, akoten.

⁸Erarawa waa bare ajiire ere, owe, era tapirmi juas “Esee Tapirmi” ajimas.

⁹Era aemes pak Allah atakam bakoretam ipit juas Yeremia era akoretame atakam jipu. Bonak ere, armat ipitam, “Me owe era uang perak 30 ataeres. Me Israel owe, emes uang, Armat Ipit baotasimemomtam ipit batetam, atakam ajamsakamamtiies.

¹⁰Ararawa, era Sekumkum Mbok Bakenem Asan tapirmi ajitites. Ere Tuhan atakam asakamtamenim atakam jipu.” Emes atakam aesimen.

¹¹Emesare. Owe, Yesus, gubernur bipu atoomtines. Me gubernur arawa, Armat Ipit ajateporen. “Wore Yahudi owe araja ipit ape?” Emes atakam aesimen. Me Yesus arawa, “Emesare, era akoremarem atakam ere, atakamnak.” Emes atakam aesimen.

¹²Me Allah Tame pak baem owe daytu anama duturu oweam, “Yesus jaos,” emes atakam aesimesen. Armat Ipit ere, atep bajit apoken.

¹³Me Pilatus arawa, atakam Armat Ipit akoromen. “Era owe, Wore potanak pak tanane atakam akoremas. Wore era atakam jane bajie apok apaye.” Emes atakam aesimen.

¹⁴Armat Ipit ere, atep bajit apoken. Erarawa gubernur jinim daytu aeen.

¹⁵Emesare. Era Paskah Bare Pakambwiin Pakambwiin, gubernur, buji tame baemap ipit taka asurumjisimtama ajaien— era owe tanane era aeremtaera ajaies ipit jipu araren.

¹⁶Era baream, owe juas Barabas buji tame bomon aemapen. Era ipitam andi afufuosen.

¹⁷Emesare, owe tanane itim akeomesen. Bonak ere, are Yesus Pilatus aotasimemomtamesen. Me Pilatusam era itim akemes aporen. Erarawa era owe tanane ajarisiemes ere, armat ipit era owe ajateporen. “Dere ete ipita surumtamtey? Barabas ape? Yesus ape? Me wan owe ere, ‘Yesus Allah Aeremtaere Ipitar,’ emes atakam aesimmas.” Pilatus emes atakam aesimen.

¹⁸

¹⁹Emesare. Pilatus, owe baoorpor asan aemapen. Me aremorawa, atakam wan ipit akoromen. “Wore Pilatus aesimtamey: ‘Dere waa era turunak Ipit ise atamwitey. Derarawa, jak pota daytu aemapmin. Erarawa wore era Ipit baem bas.’ Emes atakam aesimtamey.” Pilatus aremo emes atakam aesimen. Emesare, era ipit era atakam aesimtamen.

²⁰Me, Allah Tame pak baem owe daytu anama owe duturu, owe tanane atatapimamtaaesen. Are era owe, Pilatus, Barabas basurumtam anama Yesus batatiitam emes atakam bajanim atatapimamtaaesen.

²¹Me gubernur arawa, era owe ajateporen. “Ara aememamis ipit amnuk, dere ta ipita surumtamtey?” Emes atakam aesimen. Era owerawa, “Barabas,” Emes asawuamesen.

²²Me Pilatus ere, “Wan owe, ‘Yesus, Allah Aeremtaere Ipit,’ emes atakam aesimmas. Dere era Ipit apa pak emtey?” Emes atakam aesimen. Era owe takes arawa, “Era Ipit salib wus oup atatopomey!” Emes atakam aesimesen.

²³Pilatus arawa, “Armat Ipit ere, wama pota pak eme?” Emes atakam aesimen. Era owe ere, atakam daytinak afaketaaesen. “Era Ipit Salib wus oup atatopomey!” Emes awuamesen.

²⁴Me Pilatus, atakam era owe bokorom aempore apoken. Era oweam asawuames wan oweam betema betema ajiesen. Armat ipitam emes aporen. Ararawa, bwi ataeren. Are ban bwi era owe tanane bipu aeosomen, wanam. “Ara Ipit dambir atemto, ere depak apok. Tanom tapak.” Emes atakam aesimen.

²⁵Era owe takes arawa, “Ijee! Era Ipit dambir atemto ere, dapak. Allah, danom, dajiiam, bajurusumtaro.” Emes atakam aesimesen.

²⁶Emesare, Pilatus, Barabas, era owe asurumtamen. Are owe Yesus wusup bita atakam asakamtame, wanam Armat Ipit era owe salib wus oup batatopom aotasimemomtamen.

²⁷Emesare. Gubernur atentara owe, Yesus gubernur tame bomon atoomjiiesen. Are wan tentara owe takes, Yesuspu bamaromem, ajatesen.

²⁸Are Armat Ipit pakaian afamtaeresen. Wanam baju jirao esakam, Armat Ipit ajimemomesen.

²⁹Are fa aptam sinim ataeres, wanam kuus bajiimapom pi asiapomesen. Ararawa, era pi, Armat Ipit kuus ajiimapomesen. Are waku wus Armat Ipit bo ban ataapomesen. Ararawa, Armat Ipit bipu jindi andaepuapteteresen. Are Armat Ipit wote awotomesen. “Yahudi owe aRaja Ipit akotnak! Selamato!” Emes atakam aesima ajaiesen.

³⁰Are besa Yesus damo ajiepirimesen. Are wus kope ataeres, wanam Yesus kuus wusup atesen.

³¹Era oweam, Armat Ipit wote awotomesen. Wote awotomes arawa, era baju aofortaeresen. Are Yesus apakaian aojiimemomesen. Are Armat Ipit salib wus oup batatopom atomasesen.

³²Ajises ere, kota Kirene ipit juas Simon aporesen. Are armat ipit Yesus salib bataer andanesen.

³³Are asan juas Golgota ambaremesen. “Golgota” da atakam jow bauumtaer, “Dambir Owe Kuus Emak Asan”.

³⁴Bonak ere, owe anggur bwi anama jira takan ambetemesemesen. Ararawa, era bwi Yesus andamesen. Yesus era bwi andapore, wanam are era bwi banda pota ajien.

³⁵Are Armat Ipit salib wus oup ataetopomesen. Are eka koser andaetaatiiesen. Era eka koser era aemtas pak baporomtam pak. Erarawa are Armat Ipit apakaian, era eka koser aporomtame pak jipu, asaiamotesen.

³⁶Are era asan Armat Ipit banamek ataiomesen.

³⁷Owe Armat Ipit pota aeme pak aeapomesen. “Ara ipit Yesus. Are Yahudi Owe Raja Ipit.” Emes atakam aeapomesen. Are, era aeapomes atakam, Yesus kuuspu atemetetaapomesen.

³⁸Are pak tasa bae jipit amnuk salib wus oup ataetopomesen. Are wan ipit Yesus bo poman apa salib wus oup ataetopomesen. Are wan ipit Yesus tamo poman apa salib wus oup ataetopomesen.

³⁹Era asan aokorefea ajaies owe, kuus apapaia ajaiesen. Are tame atakam Yesus akoroma ajaiesen.

⁴⁰“Wore atakam akorem, ‘Dere Allah Tame atietiitemin, wanam bare bamintep Dere era tame aoeapomtemin,’ emes atakam aesimem. Wore ere, Allah Andep apaye, Womba ajoremey. Wore salib wus oup emes akorndaey.” Emes atakam aesimesen.

⁴¹Me Allah Tame pak baem owe daytuam, Allah atakam baememtam oweam, duturu oweam, Armat Ipit emes wote awotomesen.

⁴²“Are wan owe ajortaere. Me, Are Amba baemejorem asan apok. Are Israel owe raja Ipit apaye? Are waa salib wus oup akorndaeto, dare Armat Ipit ambesemkoromtemarom.

⁴³Armat Ipitam, ‘Dere Allah Andep,’ emes atakam aesime. Are Allah jiirey aeem. Erarawa Allah Ara afaimar apaye, Are Armat Ipit bajortaerto.” Emes atakam aesimesen.

⁴⁴Me Yesus salib wus oup takan ajamemtepemis pak tasa bae ipit amnukam, Armat Ipit emes pota atakam akoromemisen.

⁴⁵Emesare. Jok jam 12 aememes ere, tapirmi takes jiiti atamtiien. Jam 3rawa, sare aosaramen.

⁴⁶Jam 3 apaye, Yesus atakam afaketaaen. “Eli, Eli lama sabaktani?” Emes atakam aesimen. Era atakam da atakam jow bauumamtaer, “DeAllah! DeAllah! Wore beken apa jiosmanim?” Emes atakam aesimen.

⁴⁷Me wan asan aememes owe, emes atakam jane ajiesen. Ararawa, “Armat Ipit Elia jatem,” emes atakam aesimesen.

⁴⁸Me wan ipit takarawa, ja ametekukosen. Are bwi baemesem pak ataere, wanam era pak asesa anggur bwi aemesemen. Are era pak, kaer aip ametesimapomen. Ararawa, era pak, bwi Yesus okone baokokomtukum, ataesumtemetemen.

⁴⁹Me wan owerawa, “Atokomey! Elia, Armat Ipit bajortaer bandae apaye atoporamo.” Emes atakam aesimesen.

⁵⁰Emesare, Yesus atakam daytu aofaketaae, wanam dambir aemen.

⁵¹Emesare, Allah Tame jimsap kain oup aekendae, wanam bap ajiire akorjisen. Ajieam asimen. Daytu eka tananeam atataresen.

⁵²Dambir owe asan ambumbuesen. Dambir aemes turunak owe tananerawa, ajaorwasitesen.

⁵³Are era dambir asan awarimwasitesen. Wanam Yesus ajaorwasite ere, era owe, Akotnak Kota ambaremesen. Are owe tanane bipu ajateomesen.

⁵⁴Emesare. Era tentara komandan ipitam, era takan aememes oweam, Yesus banamek asiromesen. Are era ajie asime aporesen. Are wan pak aporesen. Erarawa ombarenak ajasipiemesen. “Ara aememe Ipit, Allah Andepnak.” Emes atakam aesimesen.

⁵⁵Tapesam tanane banamek batai setep apok aemeporesen. Bonak ere, are Yesus, Galilea tapirmi, takan aejinaoesen. Are, pak, Armat Ipit afaafetamaaris tapes araren.

⁵⁶Era aememes tapes damon ere, Maria Magdalena. Yakobus anama Yusuf arsoot juas Maria. Me Sebedeus ajii arsoot are. Emes tapes aren.

⁵⁷Pororowa, Arimatea tapirmi ipit juas Yusuf andaen. Armat ipit pak daytu aemomen. Are Yesus bajamkai ipit aememen.

⁵⁸Armat ipit Pilatus bipu ambaremen. Ararawa, Yesus dambir ipit bataer atakam Pilatus ajanimen. Pilatusam, owe dambir ipit, armat ipit batetam, atakam asakamtamen.

⁵⁹Yusufam dambir ipit ataere, wanam ai kain akot, biramo ajikitiien.

⁶⁰Ararawa, dambir ipit aai eka jipa dambir asan ajitaetiien. Bonak ere, are fami eka jipa dambir asan asisien. Emesare, are dambir ipit era dambir asan ajitaetiierawa, wan eka daytu era dambir asan jipa iimpu apaparamomtine, wanam era eka jipa iim akapimapomen.

⁶¹Maria Magdalena anama wan Maria era dambir asan jamimin aemapemisen.

⁶²Ajoferawa, Allah Tame pak baem owe daytuam, Parisi oweam, Pilatuspu aajambaremesen. Ere Yahudi Owe Samayen Bareen.

⁶³Are atakam akoromesen. “Dot! Dare bimak binip ajanimommarom. Era potet batutum ipit jatiaptam aememe ere, are, ‘Dere dambir aemtey, bare bamintep aojaorwasittemin.’ Emes atakam aesime.

⁶⁴Emesare, wore, owe, era dambir asan, bare bamintep banamek bataiomem, atakam pasakamtamey. Abajamkai owe era asan bajinao, wanam dambir ipit wosom baetaer-ombar. Are, ‘Armat Ipit ajaorwasita,’ emes pote atakam bakore-ombar. Me abajamkai owe emes atakam aesimtas, asep potet botutum daytinak aemamestem. Bonak potet batutum atakam, kope aemamestem.” Emes atakam aesimesen.

⁶⁵Pilatus arawa, “Banamek bataiomem owe pataeray. Tare te! Era dambir asan jimsap fiak aemapomay. Tanom tamsam.” Emes atakam aesimen.

⁶⁶Emesare, era owe aesosesen. Are era banamek batai oweam, pakkari, era dambir asan jimsap, takan aeapomesen. Era oweam era dambir asan banamek ataiesen.