Read Casuarina Coast Asmat MATIUS 28 Bible Online

MATIUS 28 - Casuarina Coast Asmat bible

MATIUS 28

¹Emesare. Yahudi Owe Samayen Bare aofeosen. Ajofe tom arawa, jee asaramtiien. Ere Hari Minggu aren. Me Maria Magdalena anama wan Maria, era dambir asan bapor, aesosemisen.

²Tuhan malaikat takaam Surga oup aendaen. Are era dambir asan jimsap eka apaparamosome, wanam era eka ten aemapen. Erarawa ajie daytinak asimen.

³Era malaikat bi, ere bwer sare daytinak tamen aemen. Apakaianam salju fasarnak tamen aren.

⁴Era dambir asan banamek batai owe ombare daytinak ambaresen. Erarawa damo di tamen diesen. Are dambir aememas owe tamen aememesen.

⁵Me malaikatam atakam era tapes akoromen. “Tare ombare bas. Tare Yesus andimarmakam apormin. Owe Armat Ipit salib wus oup atatopomes.

⁶Me, Are etejaorwasita. Erarawa era dambir ipit ara asan apok. Me ere aokore atakam jipu. Tare ere, de! Era aemanse asan baporami.

⁷Tararawa, ameteesosami. Atakam abajamkai owe aesimtamami. ‘Armat Ipit etejaorwasita. Are Galilea tapirmi bonak atakamesostem. Tararawa, era asan asep aesostemakam. Tare Armat Ipit bi era asan aportemakam.’ Emes atakam aesimtamami. Emesare, dere ara atakam tara aesimtammin.” Emes atakam aesimen.

⁸Era taot amnuk arawa, ombare aemememisen. Are jak akotnak aemememisen. ara dambir asan beken ametejiosemisen. Are, Yesus bajamkai owe baesimtam, ja akukosemisen.

⁹Yesus arawa, era taot amnuk bimnuk ameteemamtaeren. Armat Ipitam “Selamato,” emes atakam aesimen. Era taot amnuk arawa, Armat Ipit bipu ambarememisen. Are Armat Ipit kamtan batir ajipiromemis, wanam Armat Ipit asitimemisen.

¹⁰Yesus arawa, atakam era taot amnuk akoromen. “Ombare bas! Tare te! Dejoo owe, Galilea baesos, atakam aesimtamami. Are debi era asan aportemanis.” Emes atakam aesimen.

¹¹Emesare. Era taot amnuk waut taojarmapemis, era dambir asan banamek batai wan owe, era kota aesosesen. Are era apores pak takes, atakam, Allah Tame pak baem owe daytu, aesimtamesen.

¹²Wanam, Allah Tame pak baem owe daytuam, duturu oweam, ajarisiemesen. Ararawa, atakam ajamsakamamtiies, wanam uang daytu era tentara owe atetamesen.

¹³Are atakam era tentara owe aesimtamesen. “Tare emes atakam aesimtamay. ‘Eam ise taojamsismarom, Yesus bajamkai owe ajinaoismas. Wanam adambir ipit wosom aetaerismas.’ Emes atakam aesimay.

¹⁴Me gubernuram emes atakam jane ajito, dare atakam armat ipit akoromtemarom. Erarawa tare bajirisem apok.” Emes atakam aesimesen.

¹⁵Era tentara owerawa, era uang ataeresen. Are era owe, era akoromes atakam jipu aemesen. Emesare, waa ajiiream, Yahudi owe, era atakam akoreemas.

¹⁶Emesare. Yesus bajamkai owe 11, Galilea tapirmi famipu aesoses. Ere Yesus atakam asakamtame asan are.

¹⁷Era owe Yesus bi apores, are Armat Ipit asitimes. Me wan owe ere, bimak binip arke atetarames.

¹⁸Yesusam era owepu ambareme, wanam atakam akoromen. “Allah, Dere era Surga oup pak takes baemomemkoromam, ara aemansa tapirmi pak takes baemomemkoromam, emes fiak pak Dera tetamen.

¹⁹Emesare, tare era samaniin samaniin aesosay. Era owe Dera bajamkai aememtama ajaiay. Tare Deritipit juasam, Andep juasam, Allah Jip juasam, ajiema ajaiay, wanam era owe bwi akupimtaera ajaiay.

²⁰Tanom era owe era asakamtamin atakam takes ji bae, aememtama ajiay. Tanom baporay! Dere juiin afaafeaarto tara ajamememaartemin— era ju ajiirenak.” Emes atakam aesime.