Read Casuarina Coast Asmat MATIUS 3 Bible Online

MATIUS 3 - Casuarina Coast Asmat bible

MATIUS 3

¹Emesare. Era barerawa, Yohanes Owe Bwi Bakupimtaer Ipit Yudea tapirmi tame apok asan aesosen.

²Are atakam akoretamen. “Allah owe aobaomep bare ere, setepnak asisiamesmara. Erarawa tare tadosa takes bamakemteteray, wanam Allah atakam ji aeay.” Emes atakam aesimen.

³Bonaknak ere, Allah atakam bakoretam ipit juas Yesaya atakam aesimtamen: “Jipit taka, tame apok asan atakam afaketaatem. ‘Tuhan ajarto bokotpu ajasosotiiay. Era bokotam imtuuar.’ Emes atakam aesimtem.” Yesaya emes atakam aesimen. Me Yesaya atakam akore ipit, ere Yohanes aren.

⁴Me Yohanes ajiimome pakaian, binatang juas unta fini pakaianen. Aasemak banam pak ere, binatang pitiniin. Me abanda pak, pikamo anama embore bwiin.

⁵Me Yerusalem oweam, Yudea tapirmi owe takesam, ju juas Yordan owe takesam, armat ipitpu ajukusiromesen.

⁶Era oweam adosa afafasimteteresen. Me Yohanesam era owe Yordan bwi akupimtaeren.

⁷Armat ipit, Parisi owe tananeam, Saduki owe tananeam, ajukusiromdaes aporen. Era owe, Yohanes, bwi ara bakupimtaer ajukusiromdaesen. Me Yohanes arawa, “Amber jii kosere! Tare Allah ajurusumto pak ombare baesos atakam tao esimtamen?

⁸Tare tadosa ambakemmakam apaye, ere Allah atakam ji aemakam, owe aporomtamay.

⁹Tanom, ‘Abraham darerokor,’ emes bimak binip batetaram bas. Allah, ara aemansa eka tanane, Abraham arurupis bajaorom, emes fiak pak aoemommar.

¹⁰Waa, sai, wus tamao setepkope aemapem. Jipit taka, akot eek bape apok wus, ambatiitem. Are era wus jisimak asapimapomtem.

¹¹Dere dosa ambakemmakam owe, wanam Allah atakam ji aeemakam owe, bwi akupimtaerey. Ere tadosa ambakemmakam baporomtam are. Me defe asaramtan Ipit ere, juas aptam. Dere ere, juas apok. Erarawa dere Armat Ipit sendal baemetoomtintam asan apok. Armat Ipit, Allah Jipam, jisimakam, tara akupimtamteman.

¹²Armat Ipit ofepu ajatemapomum. Are amos apimi afamdaemkoromtem. Are amos, tame atoomdaetem. Me, Are era apimi jisimak ambotiitem. Era jisimak ere, baemesapiames asan apok.” Yohanes emes atakam aesimen.

¹³Emesare. Yesus Galilea tapirmi beken ajiose, wanam Yordan ju tapirmi aombaremen. Are Yohanes bwi Ara bakupimtaer akot ajien.

¹⁴Me Yohanes ere, “Dere bwi Wora bakupimtaer bas. Wore bwi dera bakupimtaer, ere erare. Wore ere, dera fomommanim?” Ajiepore apoken.

¹⁵Me Yesus ere, “Emesare, bwi bakupimtaeran. Emes aemtam, dare Allah akot apormar pak jipu aemtemarom.” Emes atakam aesimen. Emesare, Yohanesam Yesus atakam ji aeen.

¹⁶Me Yohanes arawa, bwi Yesus akupimtaeren. Bwi akupimtaererawa, Yesus era bwi ametekuemen. Wonamo oupam ambuemen. Yesusam Allah Jip, sakao saii tamen epiendae aporen. Are Allah Jip adamo ten andaepiape aporen.

¹⁷Allah atakam Surga oup aekorendaemen. “Ara aememar Ipit deTii. Dere Armat Ipit afaimmin. Dere Armat Ipit akotnak.” Emes atakam aesimen.