Read Casuarina Coast Asmat MARKUS 1 Bible Online

MARKUS 1 - Casuarina Coast Asmat bible

MARKUS 1

¹Ara aemansa atakam ere Yesus Kristus Akot Atakam. Armat Ipit wan juas ere, Allah Andep.

²Ara Allah Akot Atakam ere Allah atakam bakoretam ipit juas Yesaya aeapome atakam jipu. Bonaknak ere, Yesaya Armat Ipit atakam emes atakam aeapomen: “Allaham, ‘Dere debamirimemom ipit taka bonak ambirimemomtemin. Wore ere asep andaetemarem. Armat ipit wodaetem atakam, atakam akoretamtem. Are wobandae, bokotpu ajasosotiitem.’ Allah emes atakam aesimen.

³Jipit taka tame apok asan atakam afaketaatem. ‘Tuhan ajarto bokotpu akenemtiiay. Era bokotpu imtuunaka.’ Emes atakam aesimtem.” Yesaya emes atakam aeapomen.

⁴Emesare, era atakam jipu owe juas Yohanes Owe Bwi Bakupimtaer Ipitin. Are tame apok asan aesosen. Are atakam akoretamen. “Tare tadosa takes ambakemkoromay wanam Allah atakam ji aeay. Owerawa bwi tara bakupimtaertetertan. Ere Allah tadosa bimak binip ajanimemtamteman.” Emes atakam aesimen.

⁵Erarawa Yudea tapirmi owe takes, wanam kota Yerusalem owe takes, ara owerawa Yohanespu aimaroma ajaiesen. Adosa atakam afafasimteteresen. Yohanes arawa, ju juas Yordan, era owe bwi akupimtaera ajaien.

⁶Yohanes ajiime pakaian, binatang juas unta fini pitini jiimomen. Asemak banam pak, ere binatang pitini jikomen. Me abanda pak ere, pikamo anama embore bwin.

⁷Are aikoretama ajien. “Jipit taka defe andaetem. Era Ipit ere, owe juas aptam. Dere juas apok. Emesare, dere bandaeap wanam asendal banam pak, basurumtam, dere emes pak baemeem asan apok.

⁸Dere bwi tare etekupimtaero. Armat Ipit ere, Allah Jip tara akupimtamteman.” Emes atakam aesimen.

⁹Emesare. Yesusam Galilea tapirmi kota juas Nasaret aejinaoen. Yohanes arawa, Yesus Yordan ju bwi akupimtaeren.

¹⁰Yesus arawa bwi aesokunaoemen. Bwi aesokunaoerawa, wonamo oup ataramtopome ameteporen. Allah Jip sakao sai bapiendae tamen andaen. Yesus damo ten andaepiapen.

¹¹Allah atakam Surga oup aekorendaemen. “Wore deTii! Dere Wora afaimommin. Dere Wore akotnak.” Emes atakam aesimen.

¹²Allah Jip ere, Yesus, tame apok asan baesos ametebirimemen.

¹³Yesus arawa tame apok asan ise 40 aemaaririn. Bii Kapar Ipitam Yesus aempore. Era wasen wopiam, era asan ajamememaarisin. Me, malaikat oweam Yesus ajamememaarisin. Are Yesus pak afaafetamaarisin.

¹⁴Emesare. Owe Yohanes buji tame bomon ajiitaapomesen. Yesus arawa Galilea tapirmi aesosen. Ararawa Allah Akot Atakam era asan akoretamen.

¹⁵“Allah akore atakam bare etedayamse. Allah owe aobaomep bare, setep asisimara. Tare tadosa takes, bamakemkoromay wanam Allah atakam ji aeay! Tare Allah Akot Atakam ji aeemay!” Emes atakam aesimen.

¹⁶Emesare, Yesus era fo daytu juas Galilea jupima aemjaren. Erarawa Simon anama areot juas Andreas aporen. Era areotam jimi bapie tastu ipit amnuken. Ararawa jimi apiemisen.

¹⁷Yesus arawa atakam era areotam akoromen, “De! Dera jamkaianimi! Dere, tare asamot owe Dera bajamkai, enamo tamen bapietaa, aememtamtemin.” Yesus emes atakam aesimen.

¹⁸Ara ipit amnuk arawa, ajimi beken ametejiosemisen. Ararawa Yesus ajamkaiemisen.

¹⁹Yesusam aotaseremen. Are Yakobus anama Yohanes aporen. Ara ipit amnuk Sebedeus andep amnuken. Are ajimi jafa bakikim ti bomon aemapemisen.

²⁰Yesus arawa ara ipit amnuk ametejaten. Ara ipit amnuk arawa, aritipit Sebedeusam, wanam akarai baetam oweam, ti bomon beken ajiosemisen. Ara ipit amnuk Yesus ajamkaiemisen.

²¹Emesare. Yesus anama abajamkai owe, kota Kapernaum ambaremesen. Yahudi Owe Samayen Bare aemanse, Yesus Yahudi Owe samayen tame ajiien. Atakam arawa aememtamen.

²²Era atakam jane ajies oweam jinim daytu aeesen. Are Yesus ara Musa Basakamtam Atakam baememtam owe tamen apok aporesen. Me, Armat Ipit atakam aememtame, Are atakam fiaknak akoren.

²³Wan ipit taka ara Yahudi owe samayen tame ajamjiien. Ara ipit jak bomon, bii aemapen. Are atakam afaketaeren.

²⁴“Yesus! Wore Nasaret Ipit. Wore wama tamen pak emtaroam? Wore dara bandanaesumosomkorom andaemi? Wore demsam. Wore Allah ataendaeme turunak Ipit.” Emes atakam aesimen.

²⁵Yesus arawa, bii bajis atakam asakamtamen. “Atakam bakariey! Wore ara ipit jak bomon ajisey.” Emes atakam aesimen.

²⁶Emesare. Bii era ipit jis aopimen. Bii anom damo jende daytu era ipit jak bomon aekejisen.

²⁷Era owe takes jinim daytu aeesen. Ararawa armamon atakam ajamkoramesen. “Wama tamenem? Armat Ipit ai atakam aememtamum! Are atakam fiaknak akoretamum. Are bii bajis atakam asakamtamum. Biirawa aatakam ji aeemas.” Emes atakam aesimesen.

²⁸Emesare, Yesus, Galilea dasman tansan takes andi fefnak afufuosen.

²⁹Emesare. Yesus anama abajamkai owe, Yahudi Owe samayen tame aejisesen. Ajises arawa, Petrus anama Andreas atame akan ajakosesen. Yakobus anama Yohanes anom takan ataemesen.

³⁰Erapuam Simon anapot damo aemansen. Yesus anama abajamkai owe ara asan ambaremes, owerawa damo taot atakam Yesus fef aesimtamesen.

³¹Yesus arawa era taot setep ambaromen. Are era taot ban atapimtaere, wanam awasimapomen. Era taot arawa, fef ajufamapen. Are banda pak era owe atetamen.

³²Pororawa, jee asapiepuen. Jee asapiepuerawa, era saman owe, damo pota owe anama jak bomon bii aemapteteres owe, Yesuspu aituomasa ajaiesen.

³³Era kota owe takes era tamepu ajarisiemesen.

³⁴Armat Ipitam, damo pota owe tanane ajaoromtaeren. Atat kupis damo pota ajaoromtaerteteren. Anom jak bomon bii tanane awutiijisimteteren. Ara bii Yesus amsam. Erarawa Yesus, bii, atakam bakore, atii aten.

³⁵Emesare. Ajofe tomitim, Yesus awasiten. Armat Ipit tame aejiserawa, tame apok asan aesosen. Era asan Allah atakam ajanimen.

³⁶Me, Simon anama wan takan ajamjares owe, Yesus andimaresen.

³⁷Ara owe Yesus andimartaeres, atakam akoromesen. “Owe takes Wora dimarmanis.” Emes atakam aesimesen.

³⁸Yesus arawa, “Dare era pakeosar samaniin samaniin aesosamo. Dere era asan kupis bakoretam. Emesare, Dere emes pak taka baem andaeo.” Emes atakam aesimen

³⁹Emesare, Armat Ipit Galilea tapirmi samaniin samaniin Yahudi Owe samayen tame bomon akoretama ajaien. Are era owe jak bomon aemapes bii awutiijisima ajaien.

⁴⁰Emesare owe ombare bamerem damo pitini potanak ipit Yesuspu ambareme, wanam era ipit Yesus bipu jindi andaepuapen. Are atakam fiak Yesus ajanimen. “Wore akot aportem, Wore damo akot dera batetam Wore erare.” Emes atakam aesimen.

⁴¹Yesus era ipit seekot aoorporen. Armat Ipit ban ataesume, ararawa era ipit damo ten ataetiien. “Dere akot apormin. Wore damo akot aememey.” Emes atakam aesimen.

⁴²Yesus emes akorome, ararawa era damo pitini potanak ametepakapiosen. Era ipit damo akot aememen.

⁴³Yesus atakam fiak era ipit asakamtamen. “Wore ara pak wan owe boesimtam bas. Wore ere, Allah Tame pak baem ipit akan ajakosey. Wanam wodamo akot aememarem atakam armat ipit ajanime. Erarawa wore Musa atakam asakamtame pak, Allah atetamey. Era pak wore damo akot aememem baporomtam pak erare.” Emes atakam aesimen. Emes atakam aesimerawa Yesus era ipit ametebirimosomen.

⁴⁵Era ipit aesosen. Me, are era atakam asamaniin samaniin aikoretama ajaien. Owe tanane Yesus, aeme pak atakam jane ajiesen. Erarawa Yesus kota kupis baso baemejar asan apoken. Me, Are tame apok asan taka aemapen. Era samaniin samaniin oweam Yesuspu aejinaoma ajaiesen.