Read Casuarina Coast Asmat MARKUS 10 Bible Online

MARKUS 10 - Casuarina Coast Asmat bible

MARKUS 10

¹Emesare. Yesus era asan beken ajiose, wanam Yudea tapirmi aesosen. Are Yordan ju poman tapirmi aesosen. Owe tananeam Armat Ipitpu ambaremesen. Armat Ipitam atakam era owe aememtamen. Are era samaniin samaniin emes taka aema ajaien.

²Parisi oweam Armat Ipitpu ambaremesen. Are Armat Ipit jaos atakam bakore apaye baempor aren. Erarawa are Armat Ipit ajateporesen. “Jipit aremo batuumjisim akot ape? Me daagama Basakamtam Atakam, emes atii bata ape?” Emes atakam aesimesen.

³Yesus arawa, “Musa tare wama tamen atakam sakamtamen?” Emes atakam aesimen.

⁴Era oweam, “Musaam, ‘Jipit aremo batuumjisim akot aporto, are era aremo batuumjisim buku baetamto.’ Musa emes atakam asakamtamero.” Parisi owe emes atakam aesimesen.

⁵Me Yesus ere, “Musa tare jane sake owe apore, ararawa are emes atakam, buku aeapome.

⁶Me, bonaknak ere, Allah pakiin pakiin akenemapome. Are jipit anama taot akenemapome.

⁷Erarawa, jipit, aritipit anama arsoot beken ajiostem, wanam aremotin takan aemaptem.

⁸Erarawa, armo ipitam, aremoam damo taka aememtemamis. Are owe jamnuk boemap apok aemtemamis. Are owe taka tamen aemaptemamis.

⁹Emesare, Allah era owe takan akaimapome. Erarawa Asamot owe, era owe batuumjisim bas.” Yesus emes atakam aesimen.

¹⁰Erarawa, Yesusam, abajamkai oweam, tame ajiesen. Tame ajiies arawa, abajamkai owerawa, Yesus akore atakam, aojateporesen.

¹¹Armat Ipitam atakam era owe akoromen. “Jipit aremo beken ajiosto, erarawa wan taot aojiemto, are bonak aremo bipu pere ambem. Anom bajirisem ipit aememem.

¹²Taotam armo ipit beken ajiejisto, wan ipit aojuutto, ere era taot pere bambe taot aemapem. Anom bajirisap taot aemapem.”

¹³Emesare. Owe jii Yesuspu atuomastamesen. Yesus ere, era jii ban baosompor aren. Yesus bajamkai owerawa, atii atesen.

¹⁴Yesus emes apore, Are jak ambapnak aememen. Are atakam abajamkai owe akoromen. “Ara jii dedamopu emes bajinaotas. Atii bata bas. Ara jii tamen awar owe Allah aobaomep owe aememmas.

¹⁵Ara atakam atakamnak, era jii tamen awar baemem apok owe, Allah aobaomep owe baemeemem asan apoknak.” Emes atakam aesimen.

¹⁶Emesare, Yesus era jii batir ajipiromen. Are ban era jii damo ten ataetiie wanam, Allah, asan akot era jii boem, atakam ajanimen.

¹⁷Emesare. Yesus era asan aotaseremen. Jipit taka Armat Ipit bipu ja akukomdaen. Erarawa Yesuspu jindi andaepuapen. Are atakam Yesus akoromen. “Guru akotnak! Dere jiinenak baememaar akot, erarawa dere wama pak oemtey?” Emes atakam aesimen.

¹⁸Yesus arawa, “Wore ‘Guru akotnak’ ajimanim ere, wama tamenem? Akot owe ere, apoknak. Allah taka ere akote.

¹⁹Wore Musa Basakamtam Atakam womsam. Era Musa Basakamtam Atakam: ‘Owe tatiitem. Tani tamane bajamdamat bas. Pak wosom etem. Pote atakam koretamtem. Potet batutum bas. Worsoot anama wuritipit afaimaarey’ Emesa.” Yesus emes atakam aesimen.

²⁰Era ipitam, “Guru! Dere jii kope aeememaaru, dere era atakam ji takes aeaaru.” Emes atakam aesimen.

²¹Yesusam era ipit banamek apeomen. Are seekotnak aporen. Are atakam era ipit aokoromen. “Emesare. Wore pak takakope baem apoknak aemem. Emesare, baesosey! Wopak takes bajititkoromtas, era uang arawa, pak apok owe asaietamey. Wore Surga oup pak daytu aotaettemarem. Era pak aemtem, erarawa bofasiey. Wanam Dera jamkaian.” Emes atakam aesimen.

²²Era ipit pak daytinak aemomen. Erarawa are emes atakam jane ajie, are bimak wuturu atemen. Anom jak pota aememe wanam aesosen.

²³Erarawa, Yesus banamek abajamkai owe aooromen. Atakam aesimtamen. “Pak daytu owe, ere Allah aobaomep owe baemem, ere asan pota daytinak.” Emes atakam aesimen.

²⁴Abajamkai owe emes atakam jane ajies, jinim bay aeesen. Me, Yesus atakam aokoromen. “Tiparais! Owe, Allah aobaomep owe baemem, asan pota daytinak.

²⁵Unta, jarum jafa baemtuk, asan pota ere, kope tamen. Me, pak daytu owe Allah aobaomep owe baemem ere, asan pota daytinak.” Emes atakam aesimen.

²⁶Erarawa Yesus bajamkai owe jinim bay aeesen. Atakamam armamon ajamkoramesen. “Emes era wama tamenem? Me, ajoremtas owe ere wama tamen oweem?” Emes atakam aesimesen.

²⁷Yesus banamek era owe aoorome, wanam atakam akoromen. “Asamot owe emes pak baemeem asan apok. Allah ere, era pak takes baem, karao apok. Are pakiin pakiin takes baem, emes fiak pak aoemommar.” Emes atakam aesimen.

²⁸Emesare, Petrusam atakam Yesus akoromen. “Dare dapak takes beken ajiom, wanam Wora ajamkaiom.” Emes atakam aesimen.

²⁹Yesus arawa, “Wan owe, atame apaye, areotais apaye, ataratapes apaye, arisare apaye, arereis apaye, apak taso apaye, beken ajioses. Are apak takes, karai Dera baetam beken ajioses. Are Allah Akot Atakam akoretames. Atakamnak, emes aemes owe, era beken ajioses pak, era pak takes daytinak aotaettemas. Are tame tananenakam, areotais tananenakam, ataratapes tananenakam, jii tananeam, pak taso tananenakam, aotaetemas. Era owe era pak takes ara aemansa tapirmi aemtemas. Oweam era owe ajurusumtemas. Era andaeto barerawa, era pak takes aemtas owe, jiinenak aememaartemas.

³⁰

³¹Me, juas aptam owe tanane, ere juas apok owe aoememtemas. Juas apok owe tanane ere, juas aptam owe aoememtemas.”

³²Emesare. Yesusam, abajamkai oweam, Yerusalem baesos bin aojiemesen. Yesusam bonak aememen. Abajamkai owe ombare jak akumemesen. Me wan fe asarames oweam ombare aememesen. Yesus arawa, abajamkai owe 12 apa asan ajatetaaen. Are aemto pak atakam era owe akoromen.

³³“Dare Yerusalem aesosmarom. Era asan, jipit taka, Asamot Anakot Ajaoreme Ipit, Allah Tame pak baem owe daytu aotasimemomtamtem. Are Armat Ipit era Musa Basakamtam Atakam baememtam owe aotasimemomtamtem. Era owerawa, Armat Ipit batatii atakam asakamtiitemas. Are Armat Ipit Yahudi apok saman owe aotasimemomtamtemas.

³⁴Era owerawa, Armat Ipit wote awotomtemas. Are besa Armat Ipit damo asampirimtemas. Are Armat Ipit wusup atetemas, wanam atatiitemas. Bare bamintep arawa ajaorwasittem.” Emes atakam aesimen.

³⁵Emesare. Yakobus anama Yohanes Yesuspu ambarememisen. Are Sebedeus andep amnuken. Are atakam Yesus akoromemisen. “Guru! Ara atakam ajanimamum pak baemtamaro.” Emes atakam aesimemisen.

³⁶Yesus arawa, “Dere tare wama pak emtamtey?” Emes atakam aesimen.

³⁷Era ipit amnukam, “Wore woowe aomepkoromtem bare, Wore woakotipitnak asan aemaptemarem. Era bare, dare wan ipit taka wobo poman baemap, wanam dare wan ipit taka wotamo poman baemap, emes atakam ajanimamum.” Emes atakam aesimemisen.

³⁸Me Yesusam, “Era atakam ajanimmankum pak tamsam apok. Emesare, asep bare Dere ajirisemtemin. Tare era ajirisemtey pak emes tamen bajirisem akot ape?” Emes atakam aesimen.

³⁹Era ipit amnuk arawa, “Ere akot.” Emes atakam aesimemisen. Yesus arawa, “Emesare, tare era ajirisemtey pak emes tamen ajirisemtemakam.

⁴⁰Me, debo poman baemap oweam, detamo poman baemap oweam, emes baereremartaa, ere depak apok. Allah era asan aokenemapome. Are era asan aemaptas owe aoereremartaae.” Emes atakam aesimen.

⁴¹Emesare, wan Yesus bajamkai owe ban amnuk, era ipit amnuk atakam ajanimemis pak, atakam jane ajiesen. Are jak ambap aememes, wanam atakam Yakobus anama Yohanes asiiresen.

⁴²Yesus arawa era owe ajate, atakam akoromen. “Allah bajamkai amsam apok samaniin samaniin owe aomepmas owe, atakam fiak bap aemapmas owe asakamtamemas. Are bap owe aomepmas owe, atakam fiaknak bambi owe asakamtamemas. Tare emes tamsam.

⁴³Me, tarmamon emes bas. Me tarmamon, wan owe juas aptam owe baemem akot aportas, are karai wan owe baetamtas.

⁴⁴Wanam, tarmamon wan owe, bonak owe baemem akot aportas, are wan owe takes bambi karai baetamtas.

⁴⁵Asamot Anakot Ajaoreme Ipit, bambi karai owe Ara baetam bandae apok. Me, Are bambi karai owe baetam andae. Are owe tanane bajortaer dambir batem andae.” Emes atakam aesimen.

⁴⁶Emesare. Are kota Yeriko ambaremesen. Wanam Yesusam, abajamkai oweam, wan owe tananeam, Yeriko aejises, banamek kapie ipit juas Bartimeus bokot dasman aemapen. Are Timeus andepen. Are uang atakam bajanimaar ipitin.

⁴⁷Are atakam jane ajien. “Era aokorefemar Ipit Nasaret Ipit juas Yesus.” Emes atakam jane ajien. Emes atakam jane ajierawa, atakam afaketaeren. “Yesus! Daut Wurpise! Seekot aoorporan.” Emes atakam aesimen.

⁴⁸Owe tanane era ipit asiiresen. “Wore atakam bas.” Emes atakam aesimesen. Me, era ipitam atakam daytu aofaketaeren, “Daut Wurpise! Seekot aoorporan.” Emes atakam aesimen.

⁴⁹Erarawa, Yesus asemen. “Era ipit bajateay.” Emes atakam aesimen. Era owerawa, era ipit ajatesen. “Wore jak fiaka! Bawasitey! Armat Ipit wora jateman.” Emes atakam aesimesen.

⁵⁰Erarawa era banamek kapie ipit abaju bipare akoromtiosen. Are fef awasiten, wanam Yesuspu ambaremen.

⁵¹Yesusam era ipit ajateporen. “Dere wore wama pak emtamtey?” Emes atakam aesimen. Era banamek kapie ipit arawa, “Guru! Debanamek bandimemomtaman.” Emes atakam aesimen.

⁵²Yesus arawa, “Emesare. Baesosey! Wore Dera ambesemmanim. Erarawa wobanamek andimemommin.” Emes atakam aesimen. Erarawa, era ipit banamek fef andimemomen. Ararawa Yesus bokotpu fe asaramomasen.