Read Casuarina Coast Asmat MARKUS 11 Bible Online

MARKUS 11 - Casuarina Coast Asmat bible

MARKUS 11

¹Emesare. Armat owe Yerusalem setep asisiemes, kota Betfageam, kota Betaniaam, ambaremesen. Are kota jamnuk fami juas Saitun aemansen. Are Yerusalem setep aren. Yesusam atakam abajamkai ipit amnuk aesimtamen.

²“Tare bonak aemansa tamsan aesosami. Era tamsan amberemtankum, keledai jii taka tima pak aptam aportemankum. Waaam era keledai owe beak ten baemappor apok. Tare era tima pak basurumami. Erarawa keledai ara asan atoomdaeami.

³Oweam tara bajatepor apaye, ‘Tare ara keledai tima pak apa surummankum?’ Emes atakam aesimtan, tare emes atakam aesimami, ‘Tuhan ara keledai beak ten baapejaren. Armat Ipitam ara keledai fef aofasimtamteman.’ Emes atakam aesimami.” Yesus emes atakam aesimen.

⁴Erarawa, era ipit amnuk aesosemisen. Are ai keledai andimartaeremisen. Era keledai bokot dasman aememen. Are tame jimsappu tima pak aptam, aememen. Era ipit amnuk tima pak basurum aememis,

⁵erapu aememes owe ajateporesen. “Tare ara keledai tima pak apa surummankum?” Emes atakam aesimesen.

⁶Era ipit amnuk arawa Yesus akoretame atakam era owe akoretamemisen. Era owerawa, “Emesare. Paknak apok. Emes ataerami.” Emes atakam aesimesen.

⁷Era ai keledai Yesuspu atomasemisen. Wanam abaju jirao era keledai beak ten atemetembuitiiemisen. Yesus arawa, era keledai beak ten atemetapen.

⁸Owe tananeam abaju bokotpu ambuitiiteteresen. Wan owe ere, wus efe asasakamtaa ajaies, erarawa bokot bup ametebuitiia ajaiesen.

⁹Yesus arawa ai keledai beak ten ajaren. Wan owe ere bonak aemesen. Wan owe ere asep aemesen. Era owe takes sia akesen. “Dare Tuhan tere aeomamo. Tuhan asan akot ara ataendaemar Ipit baemto!

¹⁰Daut, darerokor, ere owe akot aompaaririn. Ara aemema Ipit emes owe baomep Ipit tamen aememtem. Emesare, Allah asan akot ara aemema Ipit baemto. Tuhan tere aeomamo!” Emes atakam aesimesen.

¹¹Yesus Yerusalem ambaremen. Ararawa Allah Tame ajiiemen. Ajiiemerawa, pak takes aporkoromen. Ju atie aporen. Erarawa abajamkai owe 12am, Betani aesosesen.

¹²Ajoferawa, are Betani aejisesen. Yesusam amosto aememen.

¹³Armat Ipit wus juas “ara” setep apok aemeporen. Are era wus, enese daytu aporen. Armat Ipit arawa, era wus, eek epe bapor, ajapendaen. Me, Are era wus eek taka apoknak aporen. Are era wus enese taka aporen. Emesare, era wus eek bapeomtep bwi apoken.

¹⁴Yesusam atakam era wus akoromen. “Waa owe woeek bonda apoknak aemtemanis.” Emes atakam aesimen. Abajamkai oweam emes atakam jane ajiesen.

¹⁵Emesare. Are Yerusalem ambaremesen. Yesusam Allah Tame ajiiemen. Ajiiemerawa, Are era tame bomon pak jow bauumamtaa owe ambirimjisimen. Are uang jow bauumamtaateter owe ameja takes bipare awasimtaera awaimosoma ajaien. Are pari sakao jow bauumamtaa owe akursi takes awasimtaera awaimosoma ajaien.

¹⁶Are owe, pak Allah Tame botoomjiiam, botoomjisam, atii aten.

¹⁷Are atakam era asan aememes owe aememtamen. “Alkitabam, ‘Detame era samaniin samaniin takes atakam Dera bajanim tame asan aemamestem.’ Emes atakam akorem. Tararawa, ara tame wosom owe bajarisiap asan aemapommakam.” Yesus emes atakam aesimen.

¹⁸Era owe tanane, Yesus aememtame atakam jane ajiesen. Erarawa are jinim bay aeesen. Allah Tame pak baem owe daytuam, Musa Basakamtam Atakam baememtam oweam, era owe jinim daytu aees aporesen. Emesare, are ombare aememesen. Are Yesus batatii atakam akukuramtiiesen.

¹⁹Emesare. Juam atien. Erarawa Yesusam, abajamkai oweam, era kota ajisesen.

²⁰Ajofe tom arawa, ajaresen. Are era wus juas “ara” aoporesen. Erarawa, era wus sa taka aporesen.

²¹Petrusam Yesus bonak aeme pak bimak binip ajanimomen. Ararawa atakam Yesus akoromen. “Guru! Wore era wus juas “ara” basem atakam asakamtamem. Me era wus asemem.” Emes atakam aesimen.

²²Yesus arawa atakam era owe akoromen. “Emesare, Allah ambesemay.

²³Atakamnak, owe atakam ara fami akoretamtas, ‘Fami, wore baesosey. Era itimbup bwi womba ajurpuey,’ emes atakam aesimtas, ere ara fami aatakam jipu taka aemtem— era owe bimak binip arke apok aememtas are. Are ‘Ara fami daatakam jipu taka aemtem,’ emes atakam ambesemkoromtas, ere fami era itimbup bwi ajurpuutem.

²⁴Tare atakam Allah ajanima ajitakam, tare, ‘Emesare, Allah ajanima ajitam pak aemtamtemaro,’ emes jiirey aeekoromay. Allah rawa ajanimtakam pak atetamteman.

²⁵Tare atakam Allah ajanimtakam, me wan owe bifane afeomemtakam, ere tare era owe pota pak aemtan, bimak binip ato takamjanimemtamay. Allahrawa, era aemakam pota pak, bimak binip ajanimemtamteman.

²⁶(Tare owe pota pak aemen, bimak binip bajanimemtam apok aemtakam, Allah tapota pak bimak binip bajanimemtam apok aemtem.)”

²⁷Emesare are Yerusalem aofasiesen. Yesusam Allah Tame bomon afafasijiiemen. Erarawa Allah Tame pak baem owe daytu, me Musa Basakamtam Atakam baememtam oweam, Yahudi owe daytuam Armat Ipit ambaromesen.

²⁸Era owe Yesus ajateporesen. “Ara aememarem fiak pak tao tetamen? Atakam tao esimtamen?” Emes atakam aesimesen.

²⁹Yesus arawa, “Denom atakam taka tara bajatepor aemin. Tare atep ajitani. Derarawa era aememmin pak atakam aesimtamen Ipit, tara aosimtamtemin.

³⁰Yohanes owe bwi akupimtaeraye, atakam tao sakamtame? Allah ape? Asamot owe ape? Era atakam atep Dera ojitani.” Emes atakam aesimen.

³¹Era owerawa, ara atakam armamon ajamkoramesen. “Dare atep ajitam, ‘Era atakam Allah aosakamtame,’ emes atep ajitam, Armat ipit arawa, ‘Tare ere, Yohanes atakam bamesem apok ere, wama tamenem?’ Emes atakam aesimtem.

³²Dare ere, ‘Asamot owe aosakamtames,’ emes atep ajitam, era owe takes atakam dara aokoromtemaroas.” Emes atakam aesimesen. Emesare, era owe tanane abimak binip atetarames, “Yohanes, Allah atakam bakoretam ipit,” emes bimak binip atetarames. Emesare, are ombare era owe tanane baresen.

³³Erarawa are era atakam atep Yesus ajitesen, “Yohanes owe bwi akupimtaere, atakam tao pasakamtameye? Dare damsam apok.” Emes atakam aesimesen. Yesus arawa, “Emesare, Denom ara aememin pak atakam aesimtamen Ipit, tara baesimtam apok.” Emes atakam aesimen.