Read Casuarina Coast Asmat MARKUS 16 Bible Online

MARKUS 16 - Casuarina Coast Asmat bible

MARKUS 16

¹Emesare. Yahudi owe Samayen Bare aofeosen. Maria Magdalena, Salomeam, Yakobus arsoot juas Mariaam, pinim akot pak ajitesen. Are era pak Yesus dambir ipit damo baokokomdaem aemesen.

²Are Hari Minggu tomnak aren. Jo apue, era tapes eka jipa dambir ipit awuapomespu aesosesen.

³Era waut aememes atakam armamon akoramesen. “Ara eka jipa iim akapimapomes eka pwe, tao paramosomtamtaro?” Emes atakam aesimesen.

⁴Erarawa, banamek setep apok aemepemes, eka pwe aparamosomes aporesen. Eka pwe dasman aememe aporesen. Era eka daytun.

⁵Erarawa, era tapes era eka jipa bomon ajiiesen. Ararawa, ai ipit taka bo poman aemape aporesen. Era ai ipit baju fasar jirao ajiimompen. Era tapes ombare ambaresen.

⁶Era ai ipit arawa, “Ombare bas! Tare Nasaret Ipit juas Yesus andimarmakam. Owe Armat Ipit salib wus oup atatopomes. Me, Are etejaorwasita. Yesus dambir ipit arapu apok. Tanom owe Yesus dambir ateme ataetiies asan baporay.

⁷Tare baesosay. Atakam Yesus bajamkai owe aesimtamay. Wanam Petrus are. ‘Yesus Galilea tapirmi bonak aesostem. Tare ere, era asan asep aesostemakam. Tare Armat Ipit bi era asan aportemakam. Armat Ipit jaka aesimtamen atakam jipu taka are.’ Emes atakam aesimtamay.” Era ai ipit emes atakam aesimtamen.

⁸Erarawa, era tapes, era eka jipa aejisesen. Are ombare daytu ambaresen. Bimak binipam tanane atetaramesen. Wanam aesosesen. Era aesimtame atakam owe boesimtam apoken.

⁹[Emesare. Yesus Hari Minggu tomnak ajaorwasiten. Armat Ipit arawa, Maria Magdalenapu baso bonak ajateomen. Bonaknak, Armat Ipit bii poman ban jamnuk era taot jak bomon ambirimjisimen.

¹⁰Emesare, armat taot, atakam Yesus takan aememaaris owe, akoromen. “Dere Yesus bi emepore.” Emes atakam aesimen. Era owerawa, jak pota aemapesen. Are bate ambatesen.

¹¹Are era taot akore atakamam, “Yesus jati aemeta. Dere abi emepore,” emes atakam jane ajies, are era atakam, atakamnak apok jiraoemesen.

¹²Emesare. Asep ere, wan Yesus bajamkai ipit amnuk kota tasan ajarememisen. Yesusam wan bi ajaoreme, wanam era ipit amnukpu baso ajateomen.

¹³Era ipit amnuk arawa, era kota aofasiememisen. Are atakam wan owe aoesimtamemisen. “Dare Yesus bi eteporamum.” Emes atakam aesimemisen. Era owerawa, ara atakam, atakamnak apok jiraoemesen.

¹⁴Emesare. Asep ere, Yesus bajamkai owe 11 amos banda aemapesen. Yesusam era owe bipu baso ajateomen. Bonak ere, era owe Yesus ajaorwasite atakam, jane ajies, are atakamnak apok jiraoemesen. Are jane sake aemapesen. Yesusam emes apore, atakam ajatemotaeren.

¹⁵Armat Ipit arawa, atakam era owe akoromen. “Tare era tapirmiin tapirmiin takes aesosay. Ara Allah Akot Atakam era owe takes apatomasay.

¹⁶Owe Allah Akot Atakam ambesemtas, wanam owe era owe bwi akupimtaertas, erarawa ajoremtemas. Me, Allah aAkot Atakam bamesem apok owe adosa bimak binip bajanimemtam apok aemtem.

¹⁷Allah Akot Atakam eemnak ambesemkoromtas owe emes jinim bae pak aemtemas: Are dejuas ajietaertas, wanam owe jak bomon bii ambirimjisimtemas. Are era amsam apok kaaowe samaniin samaniin atakam kupis akoretetertemas.

¹⁸Are amber ataertas apaye, dambir baem bwi andetas apaye, are bajirisem apok aememtemas. Are ban, damo pota owe, damo ten ataetiitas apaye, era damo pota owe ajaoremtemas.” Yesus emes atakam aesimen.

¹⁹Tuhan Yesus emes atakam ara owe akoromerawa, Allah Armat Ipit Surga oup atoomtemeten. Yesusam Allah bo poman takan andaeapen. Era asan ere, Are pak takes Allah takan aomepmamis.

²⁰Yesus bajamkai oweam aesoses, wanam samaniin samaniin takes apatomasteteresen. Are Allah Akot Atakam akoretamesen. Tuhanam era owe takan ajamememen. Are jinim bae pak aemen. Erarawa era atakam jane ajies owe, atakamnak aporesen.]