Read Casuarina Coast Asmat MARKUS 3 Bible Online

MARKUS 3 - Casuarina Coast Asmat bible

MARKUS 3

¹Emesare, Yesus Yahudi Owe samayen tame aojiien. Era asan, poman ban tapip ipit aemapen.

²Era asan wan owe “Yesus pota pak aemum,” emes atakam bakore, jak aseseromesen. Erarawa era owe, Yesus aeme pak, banamek fiak apeompesen. Are Yesus era ipit Yahudi Owe Samayen Bare damo bajaoromtaer apaye bapor aren.

³Yesus arawa atakam era ban tapip ipit akoromen. “Wore ara aememares owe waut awasiemey.” Emes atakam aesimen.

⁴Erarawa, Yesus era amememes owe ajateporen. “Dare daSamayen Bare basakamtam atakam ji aetam, dare wama tamen emtam? Akot pak baem apaye? Pota pak baem apaye? Owe bajortaer apaye? Owe batatii apaye?” Emes atakam aesimen. Era owe atep bajit apoken.

⁵Yesus arawa afojomes owe takes aoorporen. Are jak ambap aememen. Me, Are era owe jane sakenak aporen. Jakam pota aememen. Yesus arawa atakam ban tapip ipit aokoromen. “Era ban bajiraomey!” Emes atakam aesimen. Era ipit arawa ban ajiraomen. Aban arawa akot aememen.

⁶Erarawa Parisi owe ajisesen. Ajises arawa, are Herodes bajamkai owejie Yesus batatii atakam ajamsakamamtiiesen.

⁷Emesare. Yesus anama abajamkai owe fo daytu juas Galilea jupima aotasiemesen. Owe tananenak Yesus fe asaramomesen. Era owe, Galilea tapirmi owe, Yudea owe,

⁸kota Yerusalem owe, Idumea tapirmi owe, Yordan ju poman owe, kota Tirus anama Sidon dasman owe, emes owe aren. Era owe tananenak Yesus aeme pak, atakam jane ajiesen. Erarawa are Yesuspu ambaromesen.

⁹Yesusam era owe tananenak aporen. Erarawa Are abajamkai owe, ti bajasusuesemtam, atakam aesimtamen. Era owe tananenak Armat Ipit kikenak baemomem-ombaren.

¹⁰Era owe Yesus, damo pota owe tanane ajaoromtaae aporesen. Erarawa era damo pota owe takes Yesus damo ban bakurumtaer aememesen. Are Armat Ipit kikenak aemomesen.

¹¹Jak bomon bii aemapteteres owe Yesus bi aporesen. Apores arawa, are Armat Ipit bipu jimas andaejirapesen. Ararawa atakam afaketaaesen. “Wore Allah Andep!” Emes atakam aesimesen.

¹²Yesus arawa atakam fiak ara bii asakamtamen. “Tare, ‘Ara Ipit Allah Andep,’ emes atakam wan owe boesimtam bas.” Emes atakam aesimen.

¹³Emesare, Yesus fami oup atemeten. Are aereremartaae owe ajaten. Era owerawa, Yesuspu ambaromesen.

¹⁴Are owe 12, aereremartaaen. Are atakam akoromen. “Tare Dera bajamememaar aereremartaamin. Dere ere, tare Allah Akot Atakam wan asan bakoretam ataemomtemin.

¹⁵Dere bii bamirimjisim fiak pak, era owe atetamtetertemin.”

¹⁶Emesare, Yesus aereremartaae owe 12, Simon ere. (Yesus wan juas Petrus ara ipit aememomen.)

¹⁷Yakobusam, areot juas Yohanes are. Are Sebedeus andep amnuk. Yesus ara ipit amnuk juas Boanerges aememomen. “Boanerges” daatakam jow bauumtaer, “Wur Andep”.)

¹⁸Andreas. Filipus. Bartolomeus. Matius. Tomas. Alfeus andep juas Yakobus. Tadeus. Simon. (Armat ipit agama fiak ipit.)

¹⁹Yudas Iskariot are. (Are Yesus jokoman owe baotasimemomtam ipit are.) Yesus emes owe aereremartaaen.

²⁰Emesare. Yesus tame ajiien. Owe tananenak era asan ajarisiemesen. Ararawa Yesus, abajamkai owe, amos banda asan apoken.

²¹Yesus ajoo oweam emes atakam jane ajiesen. Ararawa, are Armat Ipit bamartaer aesosesen. “Armat Ipit jaytu emema.” Emes atakam aesimesen.

²²Emesare, Musa Basakamtam Atakam baememtam owe Yerusalem aejinaoesen. Are atakam akoramesen. “Beelsebul ara aemema Ipit jak aapetar. Abii kapar ipit, fiak pak, ara aemema Ipit atetamum. Erarawa ara aemema Ipit wan bii ambirimjisimum.” Emes atakam aesimesen.

²³Yesus arawa era owe tanane ajaten. Ararawa, baetaa atakam era owe akoretamen. “Bii Kapar Ipit amba bamirimjisim ere wama tamenem?

²⁴Samane taka owentakam armamon ajamomtas, are apatakuostemas.

²⁵Tame oweam anom owentakam armamon ajamomtas, are apatakuostemas. Emes aemtas, are ajaniostemas.”

²⁶Bii Kapar Ipit anama bii owentakam armamon ajamomtas, are apatakuostemas. Emes aemtas are ajaniostemas.

²⁷Owe anom fiak ipit tame bajii, wanam aapak tasa baetaer, ere emes baemeem asan apok. Me, are era fiak ipit banam ato takamjikapomtas, are atame pak tasa baetaer ere, erare.

²⁸“Atakamnak! Allah owe era aememas dosa kupis takes bimak binip ajanimemtamtem. Are owe tame atatetertas atakam takes, anom bimak binip ajanimemtamtem.

²⁹Me, owe tame atakam Allah Jip atetas, Allah era dosa bimak binip bajanimemtam apoknak aemtem. Era owe bakari apok dosa aemmas.” Yesus emes atakam aesimen.

³⁰(Bonak ere, wan oweam, Bii ara aemema ipit jak bomon aemapa. Emes atakam aesimesen. Yesusam emes atakam apore, wanam ara atakam akoren.)

³¹Emesare. Yesus arsoot anama areotais era asan ambaremesen. Are tasan aememes wanam era owe Yesus bajatetam atakam ajanimesen.

³²Owe tananeam Yesus afojompesen. Wan owe ere, atakam akoromesen. “Baporey! Worsoot anama worotais tasana. Are Wora dimarmanis.” Emes atakam aesimesen.

³³Yesus arawa, “Dersoot tanam? Dereotais tanam?” Emes atakam aesimen.

³⁴Armat Ipit arawa Ara afojompes owe bi aoorporen. Ararawa, atakam akoromen. “Baporay! Ara aemapares owe deritapes anama dereotais.

³⁵Allah akot apormar pak jipu aememas owe, ere dereotais, derpitais, deritapes, aememmas.” Yesus emes atakam aesimen.