Read Casuarina Coast Asmat MARKUS 6 Bible Online

MARKUS 6 - Casuarina Coast Asmat bible

MARKUS 6

¹Emesare. Yesus era tapirmi aotaemen. Are atamsan afasiemen. Abajamkai oweam takan aesosesen.

²Yahudi Owe Samayen Bare aemanse, Armat Ipit Yahudi Owe samayen tame bomon, atakam aememtamen. Aatakam jane ajies owe jinim daytu aeesen. “Armat Ipit, ara akoremar atakam jane etepu jie? Ara basonak bimak binip atetaramar ere wama tamenem? Are ara jinim bae daytu pak aememar, era wama tamenem?

³Ara aemapa Ipit wus tukang ipitu. Are Maria andep. Are Yakobuse, Yosese, Yudase, Simone, arepotu. Me ataratapesam dare takan ara aemapom.” Emes atakam aesimesen. Emesare, are bifane Yesus afeomesen.

⁴Yesus anom atakam era owe akoromen. “Wan owe, Allah atakam bakoretam ipit tere aeomemas. Me, asaman oweam, ajoo oweam, atame oweam, Allah atakam bakoretam ipit tere baeom apok aememas.” Emes atakam aesimen.

⁵Emesare, Armat Ipitam, era asan jinim bae pak daytu baemeem asan apoken. Erarawa, Are aban, damo pota owe bamintep damo ten ataetiie, wanam era owe damo ajaoromtaeren.

⁶Era asan owe Yesus bamesem apok aemesen. Armat Ipitam emes aporen. Ararawa, jinim daytu aeen. Emesare. Yesus era dasman samaniin samaniin afafasiejare, wanam, atakam aememtamen.

⁷Are abajamkai owe 12 ajatetaeren. Ararawa, Are era owe ambirimemomen. Are ipit amnuk wan asan esosa, ipit amnuk wan asan esosa, emes ambirimemomen. Are bii bamirimjisim fiak pak era owe atetamteteren.

⁸Are atakam era owe aesimtamen. “Aesostakam, pak bataer bas. Waku wus taka pataeray. Me banda pak apaye, ese apaye, uangam taertakam.

⁹Bai sendal bajiimomay. Baju jamnuk batoomas bas. Takakopa.” Emes atakam aesimen.

¹⁰Wanam, “Tare tame ajiiaptakam, tare emes aemapay— era tapirmi beken ajiostakam bare ajiire.

¹¹Wan saman tara batoomjii apok aportakam, wanam taatakam jane bajie apok aportakam, era owe beken ajiosay, wanam atakam era owe akoromay. ‘Tare daatakam jane bajie apok aemmakam. Emesare tare Allah bipu atep tamba ajitemakam.’ Emes atakam aesimay.” Yesus emes atakam aesimtamen.

¹²Emesare. Are aesosesen. Are owe adosa takes bamakem, emes atakam akoretamesen.

¹³Are bii tanane ambirimjisimesen. Are minyak, damo pota owe tanane damo ten ajarames, wanam ara owe ajaoromtaeresen.

¹⁴Emesare, Yesus andi afufuosen. Erarawa, Raja Herodesam, Armat Ipit aeme pak atakam jane ajien. Wan oweam atakam akoresen. “Yohanes Owe Bwi Bakupimtaer Ipit eteojaorwasite. Are Yesus aipit. Erarawa are jinim bae pak daytu aememe.” Emes atakam aesimesen.

¹⁵Me, wan owe ere, “Armat Ipit, ere Elia.” Emes atakam aesimesen. Me wan owe ere, “Armat Ipit, Allah atakam bakoretam ipitkor arare. Are bonaknak Allah atakam bakoretam ipit taka tamen.” emes atakam aesimesen.

¹⁶Me, Herodes era atakam jane ajie, are atakam akoren. “Armat Ipit Yohanes Owe Bwi Bakupimtaer Ipit arare. Bonaknak ere, dere Yohanes kuus asakamtaero. Me, armat ipit bajaorwasite peno?” Emes atakam aesimen.

¹⁷Emesare. Bonak ere, Herodes, areot juas Filipus aremo aotaete taot juas Herodiasen. Yohanesam atakam Herodes ajatemotaera ajaien. “Wore ara taot aotaetem, ere Allah atakam jipu apok.” Emes atakam aesimtama ajaien. Horodes emes apore ere, erarawa owe Yohanes bajipirtaer, banam bajikapom, buji tame bomon bajiitaapom, emes atakam asakamtamen.

¹⁸

¹⁹Herodiasam Yohanes biti bajie bimak binip taka atetaramen. Are Armat Ipit batatii ere akoten. Me, Herodes Yohanes, owe akot, owe turu, emes aporen. Ararawa armat ipit ombare aememen. Are owe armat ipit banamek fiak batai atakam asakamtamen. Wan owe botejurusum-ombaren. Erarawa Herodias Yohanes baemetatii asan apoken. Herodesam, Yohanes atakam jane ajie ere, are jak pota aemapa ajaien. Me, are aatakam jane bajiekorom akoten.

²⁰

²¹Asep barerawa, Herodias Yohanes batatii asan akot aporen. Herodes ajisamse bare aemansen. Herodes, pemerintah karai baetam owe daytu, tentara kapar oweam, me Galilea duturu oweam, pakambwi aemtamen.

²²Herodias arerepam, pakambwi tame ajiiemen. Are di andien. Herodesam, era jaki oweam, era di andie akot aporesen. Erarawa, Herodes atakam era taot akoromen. “Pak ateen dera paean. Dere era pak wora batetam.” Emes atakam aesimen.

²³Armat Ipitam ataaji fiaknak era taot aeetamen. “Era ateen aemmanim pak wora atetamtemin. Dere owe aompo wan pak daytu wora atetamtemin.” Emes atakam aesimen.

²⁴Ararawa, era taotam ajisemen. Are arsoot ajateporen. “Dere wama tamen pak atakam janimtey?” Emes atakam aesimen. Arsoot arawa, “Wore Yohanes Owe Bwi Bakupimtaer Ipit kuus atakam ajanimey.” Emes atakam aesimtamen.

²⁵Era taotam raja bipu afemebaromen. Are ateen aeetamen. “Yohanes Owe Bwi Bakupimtaer Ipit kuus aone bomon ainam atetaman.” Emes atakam aesimen.

²⁶Emesare. Raja era taot ateen aeetame pak jane ajiemen. Ararawa, jak potanak aemapen. Me, aataaji fiak atamjanime pak aporen. Are pakambwi jaki owe aporen. Erarawa are era taot ateen aee pak baemejanimtii asan apoken.

²⁷Erarawa armat ipit, tentara taka, Yohanes kuus basakamtaer atakam ametesakamtamen. Tentararawa, buji tame aesose, wanam Yohanes kuus asakamtaeren.

²⁸Are era kuus aone bomon atoomdae, era taot atetamen. Era taot arawa, kuus arsoot aotetamen.

²⁹Yohanes ajamkaies owe emes atakam jane ajies arawa, are armat ipit kuus asakamtaeres, damo anakot ambartaeresen. Erarawa awuapomesen.

³⁰Emesare. Yesus atakam bakoretam ambirimemome owe Armat Ipitpu aojarisiendaesen. Are aemes pakam, aememtames atakamam, Armat Ipit aotaakoretamesen.

³¹Era asanam owe tananenak jow bambi aouuamesen. Erarawa Yesus bajamkai owe amos baemenda asan apoken. Armat Ipitam emes apore, wanam atakam abajamkai owe akoromen. “De! Tame apok asan dapa esosamo. Tanom kais era asana panday.” Emes atakam aesimen.

³²Emesare, ti andaejuuesen. Are tame apok asan aesosesen.

³³Andaejuues arawa, owe tananeam, era owe aporesen. Are era owe bi amsamen. Era owe tananeam akota takes beken ajiesen. Are ja akukoses, wanam are Yesusam, me takan andaejuues oweam, asetes asan, bonak atakambarapesen.

³⁴Emesare, Yesus asete, Are era owe tanane aporen. Era owe bambi domba tamen aememes aporen. Era owe banamek bataitam owe apok domba tamen aememesen. Erarawa Yesus era owe seis akot aoorporen. Ararawa atakam tanane era owe aememtamen.

³⁵Pororawa, Yesus bajamkai owe Armat Ipitpu ambaremesen. “Ara asan tame apok asan arare. Juam batim.

³⁶Wonom ara owe setep kebunam, me setep tansanam, baesos atakam asakamtamey. Era asan banda pak bajitintas.” Emes atakam aesimesen.

³⁷Me Yesusam, “Tare banda pak ara owe tamba atetamay.” Emes atakam aesimen. Era owerawa, “Dare uang perak 200 ara owe banda pak bajitittam ape?” Emes atakam aesimesen.

³⁸Yesus arawa, “Me atoommakam amos jise wama tamenem? Tanom baporay.” Emes atakam aesimen. Erarawa are aporesen. “Dare amos jise ban taka atoommarom. Enamoam jamnuk atoommarom.” Emes atakam aesimesen.

³⁹Me Yesus arawa atakam era owe tanane akoromen. “Tare takapin ten, asan taka ajaniapa, asan taka ajaniapa, emes aemay.” Emes atakam asakamtamen.

⁴⁰Erarawa era owe ajaniapa ajaniapa, ajiesen. Are owe 100 ajaniapa, owe 50 ajaniapa, ajiesen.

⁴¹Yesus amos jise ban taka me enamo jamnukam ataeren. Are banamek oup apemtemetemen. “Dot! Wore ara banda pak atetamemaroam. Terima kasih!” Emes atakam aesimen. Ararawa, Are amos jise akookome, wanam abajamkai owe atetamen. Ere era owe takes sai basaietam pak. Armat Ipitam enamo jamnuk era owe takes sai asaietamen.

⁴²Emesare, era owe takes era amos andesen. Are jak andatukuapesen.

⁴³Me Yesus bajamkai owe ara owe tanane andaeremtiies amos anama enamo, ese 12 aoweapomesen.

⁴⁴Emesare, era banda pak andes owe, oorey owe taka, 5.000 apayeen.

⁴⁵Emesare. Yesus atakam abajamkai owe atakam fef asakamtamen. “Tare bandaejuuay. Betsaida tapirmi bonak atakamjiriteay. Dere asep bajinao.” Emes atakam aesimen. Ararawa era owe tanane, tame poreesosa bajie, atakam asakamtamen.

⁴⁶“Dere aake.” Emes atakam aesimen. Erarawa Armat Ipit atakam Allah bajanim, fami oup aesosen.

⁴⁷Emesare. Ju atien. Ju atierawa, abajamkai owe aemeses ti itimbup aemesesen. Yesus arawa fikin apa aememen.

⁴⁸Erarawa, kuuram abajamkai owe ti timen afekepepemomsen. Era owe po ajiepores apoken. Yesusam era pak aporen. Eamnak arawa Armat Ipit bwi ten ajaren. Are aoemesespu ataejien. Me, Are baofe tamen aemen.

⁴⁹Abajamkai owe takes arawa Armat Ipit bwi ten ajare aporesen. Are tasir ipit tamen awaren. Are ombarenak ajasipieses, wanam auuesen. Armat Ipit arawa, atakam era owe fef ameteesimtamen. “Tare jak fiakar! Dere Yesus. Ombare bas.” Emes atakam aesimen.

⁵⁰

⁵¹Erarawa, Yesusam ti asojuuen. Kuur arawa akarien. Bonak ere, Yesus amos kope, amos daytinak ajaoromtiien. Abajamkai owerawa, Yesus jinim bae pak aeme bimak binip baso batetaram apok aemesen. Are jane sake aememesen. Erarawa era kuur akarie, are jinim daytu aeesen.

⁵²

⁵³Emesare, are poman apiiresen. Poman apiires arawa Genesaret tapirmi ajiritesen. Are ti tima ambatapomesen.

⁵⁴Asokues era tapirmi oweam atakam fef ametekoresen. “Ara akunaomar ipit Yesuse.” Emes atakam aesimesen.

⁵⁵Era oweam apakeoses samaniin samaniin takes ja akukosesen. Are era damo pota owe tapini aptam Yesuspu atuomasa ajiesen. Are, “Yesus ara asan aometa.” Emes atakam jane ajies, are damo pota owe era asan atuomasa ajaiesen.

⁵⁶Armat Ipitam samane tanane atamsan ajarema ajaien. Kota tananepu ajarema ajaien. Tame tanane apok tapirmipuam ajarema ajaien. Me ajare asan takes, are era damo pota owe pasar asanpu atuomasa ajaiesen. Are era damo pota owe Yesus baju jirao aip ban bi bakurum, atakam fiak Armat Ipit ajanimesen. Me abaju jirao aip ban bi akuruma ajaies owe takes ere, ajaoremesen.