Read Casuarina Coast Asmat MARKUS 7 Bible Online

MARKUS 7 - Casuarina Coast Asmat bible

MARKUS 7

¹Emesare. Bare taka Parisi owe Yesuspu ajarisiemesen. Wan Musa Basakamtam Atakam baememtam oweam Yerusalem aejinaoemesen. Are Yesuspu ajarisiemesen.

²Are Yesus bajamkai owe amos andes aporesen. Me wan Yesus bajamkai owe amos andes arawa, are Yahudi agama atakam jipu baem apoken. Are Yahudi agama atakam aban bwi bonak batakameosom apoken. Me Yesuspu ajarisiemes owe emes aporesen.

³Erarawa Parisi oweam, me wan Yahudi agama owe takesam ban bwi bonak ato takameosomemas, wanam amos asep andemas. Are arfais owe ataetiostames pak jipu aememas.

⁴Wanam are pasar asan aesostas, are bwi bonak ato takambwiemas, wanam amos asep andemas. Are arfais wan ataetiostames pak tanane jipu aememas. Are mbokam, cerekam, panciam, bwi era atakam jipu aeosomemas.

⁵Parisi oweam, me Musa Basakamtam Atakam baememtam oweam atakam Yesus akoromesen. “Wore bajamkai owe darfais owe ataetiostameroes pak jipu baem apok. Amos banda aemas, are aban bwi bonak batakameosom apok aememas. Ere wama tamenem?” Emes atakam aesimesen.

⁶Me Yesus arawa, “Tare pir bae owe! Bonaknak ere, Yesaya aemmakam pak atakam akoren: ‘Allah atakam ere, “Ara owe tere irpitin taka aeommanis. Me, jak bomon ere Dera bajamkai apoknak.

⁷Are bambi tere aeommanis. Era aememtamtetermas atakam, ere asamot asakamtammas atakam taka. Are debasakamtam atakam apok,” Allah emes atakam aesima.’ Yesaya emes atakam akoren. Emesare, are atakamnak.

⁸Tare Allah asakamtame atakam jane bajie apok tamen aemememakam, wanam asamot ataetiostames pak ji taka aeemakam.” Yesus emes atakam aesimen.

⁹Yesusam wan atakam akoromen. “Tare tastunak. Musa Basakamtam Atakam aooemakam, wanam tarfais owe ataetiostetertamen pak jipu aememakam.

¹⁰Bonaknak ere, Musa atakam akoren. ‘Wuritipitam, worsootam, afaimaarey. Owe tame atakam aritipit apaye, arsoot apaye, aotetas, era tame atakam owe batatiiay.’ Emes atakam aesimen.

¹¹Me, taatakam ere, ‘Owe atakam, arisare akoromtetertas, “Dere wora batetam aemtey uang, Allah emetetamo,’ emes atakam aesimtetertas, ere are uang arisare botetam apok. Emes atakam aesimemakam.

¹³Erarawa tare era tarfais owe ataetiostamen pak jipu aememakam, wanam Allah atakam akoromosomemakam. Tare wan emes pak tanane aememakam.” Yesus emes atakam aesimen.

¹⁴Emesare. Yesus era owe tanane aojaten. Are atakam era owe akoromen. “Ara akoremin atakam jane fero. Emesare, ara atakam jane ajiekoromay.

¹⁵Banda pak, okone ajiito, era pak, era owe dosa baem pak apok. Me, era okone ajisto atakamam, owe aememas pakam, ere era pak owe, dosa baem pak.

¹⁶[Jane fero owe ara atakam jane bajitas.]” Emes atakam aesimen.

¹⁷Emesare, Yesus era owe tanane beken ajiemen. Are tame ajiiemen. Tame ajiiemerawa, abajamkai owe ara baetaa atakam Armat Ipit ajateporesen.

¹⁸Me Yesusam, “Tare ara atakam jane bajiekorom apokane? Emesare, banda pak takes, owe okone ajiito, era pak era owe, dosa baem pak apok. Tare emes tamsam apokane?

¹⁹Emesare, era pak jaknak bajii apok. Are jak bomon ajiim, wanam ajisim.” Emes atakam aesimen. (Yesus emes atakam akore ere, are “banda pak takes akot,” Emes atakam akoren.)

²⁰Me Yesusam, “Emesare, era okone ajisto atakamam, era owe aememas pak, era owe dosa baem pak.

²¹Era owe ajaknak pak ere pota. Erarawa era owe jokoman bimak binip atetaramemas. Are jokoman pak aememas. Wosoman aeemas. Owe atatiiemas. Tani tamaneam ajamdamatemas.

²²Are owe pak asinomemas. Pota pak aememas. Pote atakam akoremas. Jokoman pakam aememas. Itimam akememas. Tame atakam akoremas. Are amba aemetemtememas. Are jane sake aemememas.

²³Emes pota pak takes, owe jaknak pak erare. Era pak, owe dosa baem pak.” Emes atakam aesimen.

²⁴Emesare. Yesus era asan beken ajiosen. Are kota Tirus dasman aesosen. Era asan tame ajiiapen. Are apa bajiiap aememen. Wan owe Ara bapor-ombaren. Me, Are baemesaiem asan apoken.

²⁵Taot taka aememen. Bii era taot arerep jak bomon aemapaaririn. Era taotam, “Yesus ara tamear” emes atakam jane ajien. Emes atakam jane ajierawa, are Armat Ipitpu fef ambaremen. Are Armat Ipit bipu jimas andaejirapen.

²⁶Are, Yesus arerep jak bomon bii bamirimjisim atakam ajanimen. Armat taot aatakam, ere Yunani atakamen. Asaman ere Siro Fenisia samanen.

²⁷Emesare, Yesus atakam era taot akoromen. “Ara Yahudi samanam ere desaman. Dere asan akot desaman ato batakameem akot. Dejii amos, juuri bakoromtam ere pota.” Emes atakam aesimen.

²⁸Era taot arawa, “Dot! Ara akoremarem atakam, ere atakamnak. Me, jii amos andemas, juuriam, ara meja bomon aemememas. Are jii amos bimisi andeemas.” Emes atakam aesimen.

²⁹Me Yesus ere, “Ara akoremarem atakam ere akotnak. Wore tame aesosey. Era bii worerep jak bomon emejisar.” Emes atakam aesimen.

³⁰Erarawa, era taot tame aesosen. Are arerep tapini ten asan akot aemanse aporen. Are bii aesose aporen.

³¹Emesare. Yesus Tirus tapirmi beken ajiosen. Are Sidon tapirmi ataejien. Dekopolis tapirmiam ataejien. Ararawa, Galilea bwipu ajaren.

³²Era asan ere, owe jipit taka, Armat Ipitpu atoomtinesen. Ara ipit jane bireen. Are okor ipitin. Ara oweam Yesus atakam ajanimesen. “Wore ban ara ipit damo ten bataetiiporey.” Emes atakam aesimesen.

³³Yesus era asan aememes owe, tananenak aporen. Erarawa Are era ipit apa asan atomasen. Are baneak era ipit jane jafa jamnuk asintukumen. Are besa ajien, wanam aban era ipit koman akurumen.

³⁴Erarawa, Yesus banamek apemtemetemen. Are jeses afetaeren, wanam atakam era ipit akoromen. “Efata.” Emes atakam aesimen. “Efata” daatakam jow bauumamtaer “Jane jafa bafiosey,” emes tamen are.

³⁵Erarawa era ipit jane jafa fef afiosen. Akomanam akot aemapen. Are atakam akot akoren.

³⁶Yesusam atakam era owe takes asakamtamen. “Tare era pak atakam wan owe boesimtam bas.” Emes atakam aesimen. Are era atakam owe baesimtam, atii aten. Me anom apok. Era owerawa, atakam aokoretama ajaiesen.

³⁷Oweam jinim daytu aeesen. “Armat Ipit aemmar pak takes, ere akotnak. Are jane bire owe jane akot aemtamum. Are okor owe, koman akot aemtamum.” Emes atakam aesimesen.