Read Casuarina Coast Asmat MARKUS 9 Bible Online

MARKUS 9 - Casuarina Coast Asmat bible

MARKUS 9

¹Yesusam atakam era owe akoromen. “Atakamnak, ara aememmakam wan owe dambir baem apok, Allah afiaknak pak aptam owe aomepto aportemakam.”

²Emesare. Bare poman ban taka aemapesen. Aemapes arawa Yesus, Petrusam, Yakobusam, Yohanesam, oupnak fami apa atoomtemeten. Erapu, Armat Ipit era owe bipu wan bi ajaoremen.

³Me apakaianam fasarnak ajaoremen. Pakaian bwi baeosom owe, pakaian bwi emes fasarnak baemeosom asan apok.

⁴Musa anama Elia era owe bipu ajisomemisen. Are atakam Yesus ajamkoramesen.

⁵Petrusam atakam Yesus akoromen. “Guru! Dare ara asan aememmarom, ere akot. Dare eetam bamintep paeapomamo. Wan taka wor. Wan taka Musa. Me wan taka ere Elia.” Emes atakam aesimen.

⁶Me Yesus bajamkai owe bamintep ombare daytinak aememesen. Erarawa Petrus wama tamen atakam pakoretoye, emes bimak binip apoken.

⁷Erarawa wonamo fasar era owe apurimompen. Atakamam era wonamo fasar bomon akorejisimen. “Ara aemema Ipit, deTii. Dere Armat Ipit afaimommin. Tanom aatakam jane pajiay.” Emes atakam aesimen.

⁸Me Yesus bajamkai owe bamintepam, banamek afemepeepemporesen. Are wan owe bi bapor apoken. Are Yesus taka takan aememes aporesen.

⁹Emesare. Are fami oup aendaesen. Aendaes arawa, Yesus atakam era owe bamintep aokoromen. “Tare era apormakam pak owe boesimtam bas— Asamot Anakot Ajaoreme Ipit ajaorwasitto bare ajiire.” Emes atakam aesimen.

¹⁰Erarawa, are era atakam owe boesimtam apoken. Me, armamon atakam ajamkoramesen. “Ara bajaorwasit atakam akoremar, ere wama tamenem?” Emes atakam aesimesen.

¹¹Are Yesus ajateporesen. “Musa Basakamtam Atakam baememtam oweam, ‘Elia bonak ato takamemamestem. Me Allah Aeremtaere Ipit ere asep andaetem.’ Emes atakam aesimemas. Me, era owe emes atakam ere wama tamenem?” Emes atakam aesimesen.

¹²Me Yesusam, “Emesare, Elia bonak ato batakamdae. Are atakam takes bakenemtii bajinao are. Me, Alkitabam, ‘Asamot Anakot Ajaoreme Ipit bajirisem daytu aememtem. Oweam Armat Ipit awotapemtemas.’ Emes atakam akorem. Alkitab emes atakam ere wama tamenem?

¹³Emesare, Elia emejinaoe. Oweam armat ipit ajurusumes. Are ajak asinomes pak jipu armat ipit aemes. Me Elia atoome atakam ere Alkitab atakam jipu taka.” Yesus emes atakam aesimen.

¹⁴Emesare. Yesusam, abajamkai owe bamintepam, wan Yesus bajamkai owe aememespu, ambaremesen. Owe tananenak era owe ajarisiomes aporesen. Musa Basakamtam Atakam baememtam oweam, Yesus bajamkai oweam atakam ajamkorames aporesen.

¹⁵Era owe tanane takes Yesus aporesen. Are jinim bay ameteeesen. Are Yesus bawotomamtaer ja akukoses, wanam selamat atakam Armat Ipit akoromesen.

¹⁶Yesusam era owe ajateporen. “Tare ara owe apa atakam jamkorammakam??” Emes atakam aesimen.

¹⁷Era owe tanane bomon, jipit taka atep ajiten. “Guru! Dere detii Wora atoomdaetammin. Bii era jii jak bomonar. Erarawa era jii okor.

¹⁸Bii era jii aemomemar, are era jii andaebumtiieme. Era jiiam bwea besep apiramjisimeme. Sisiam jow auumamtaereme. Are damo afekepepeamseme. Dere wobajamkai owe era bii bamirimjisim atakam ajanime. Me, are era bii baemebirimjisim asan apok.” Emes atakam aesimen.

¹⁹Me Yesus arawa, “Tare Dera bamesem apok ajaniemekem owe tarare. Dere tare takan wama tamen bare ememtey? Dere jak jirao tara boem wama tamen bare emtey? Emesare, era jii arapu atoomtinaoay.” Emes atakam aesimen.

²⁰Emesare, are era jii Yesuspu atoomtinesen. Era bii Yesus bi apore, are era jii jis daytinak apietepen. Erarawa era jii bap andaebuansen. Are aansepaparen. Aokoneam besep apiramjisimen.

²¹Yesusam, era jii aritipit ajateporen. “Ara jii emes tamen baem tarai ape?” Emes atakam aesimen. Aritipit arawa, “Are jii kope emes taka aema ajaie.

²²Bii ara jii jisimak aisapimapoma ajaie. Anom ara jii bwi aijurumpuuma ajaie. Emesare, are ara jii atatiipora ajaie. Me, Wore fiak ipit apaye, seekotnak aoorporaro. Wore ara jii pi ajatey.” Emes atakam aesimen.

²³Me Yesusam, “‘Wore fiak ipit ape,’ emes atakam aesimmanim ere, wama tamenem? Allah ere, eemnak Ara bamesemkorom owe takes aemtamtem.” Emes atakam aesimen.

²⁴Era jii aritipitam atakam ametefaketaeren. “Dere Allah ambesemmin. Me, dere Allah eemnak bamesemkorom apok apaye, Wore eemnak Ara bamesemkorom bimak binip patetaman.” Emes atakam aesimen.

²⁵Erarawa Yesus, owe tanane erapu ja akukendaes aporen. Erarawa atakam fiak era bii asakamtamen. “Wore ara jii jane biream, okoram, aemapomem. Emesare wore ara jii jak bomon ajisey, wanam ajak bomon botuk bas.” Emes atakam aesimen.

²⁶Erarawa, era bii era jii jis daytinak apimen, wanam are era jii jak bomon aejisen. Era jiiam dambir tamen aemansen. Erarawa owe tanane atakam akores, “Are dambir.” Emes atakam aesimesen.

²⁷Yesus arawa era jii ban atapimtaere, wanam awasumtumen. Erarawa era jii awasiten.

²⁸Erarawa Yesus era tame ajiiemen. Tame ajiiemerawa, abajamkai owe, Yesus apa ajateporesen. “Dare era bii bamirimjisim aemporarom apok, ere wama tamenem?” Emes atakam aesimesen.

²⁹Me Yesusam, “Tare atakam Allah bajanim apok aemtakam, tare emes bii baemebirimjisim asan apok.” Emes atakam aesimen.

³⁰Emesare. Yesusam, abajamkai oweam, era asan aesosesen. Ararawa, Galilea tapirmi aofeefesen. Armat Ipitam, atakam abajamkai owe aememtamen. Emesare Are owe era aemapes asan bapor potan. Yesus atakam abajamkai owe aokoromen. “Jipit taka Asamot Anakot Ajaoreme Ipit, jokoman owe aotasimemomtamtem. Era owerawa era Ipit atatiitemas. Atatiitas arawa bare bamintep Armat Ipit ajaorwasittem.” Emes atakam aesimen.

³¹

³²Me abajamkai owe arawa, era atakam jane bajiekorom apoken. Me, are Yesus bajatepor ombare aememesen.

³³Emesare. Are Kapernaum ambaremesen. Tame bomon aemapes, Yesus, abajamkai owe ajateporen. “Waut ajararom, tare apa atakam jamkoramakam?” Emes atakam aesimen.

³⁴Era owerawa, era waut atakam ajamkoramesen. Dare ara aememom owe, juas aptam owe, ere tanam? Emes atakam aesimesen. Erarawa Yesus era owe ajatepore, are atakam atep bajit apok aememesen.

³⁵Emesare Yesus aemapen. Are abajamkai owe 12 abipu baemap ajaten. Ararawa, atakam akoromen. “Tare juas aptam owe baemem jak aseseromemtakam, ere juas apok owe paememay. Tare wan owe takes karai paetamay.” Emes atakam aesimen.

³⁶Emesare, Yesus jii kope taka ataeren. Are era jii era owe waut ataemomen. Ararawa, era jii batir ajipirome, wanam atakam era owe akoromen.

³⁷“Owe Dera afaimtanis, wanam are emes jii kope tamen Dere atame atoomjiitamtanis, era oweam Dere atame atoomjiiemmanis. Dere atame atoomjiiemmanis owe, De taka batoomjii apok. Are Dera ambirimemomen Ipitam atame atoomjiiemmas.” Emes atakam aesimen.

³⁸Emesare. Yohanesam atakam Yesus akoromen. “Guru! Dare jipit taka aporom. Armat Ipit wojuas ajietaere, wanam owe jak bomon bii ambirimjisime. Dare era ipit dara bajamkai apok aporom. Erarawa dare armat ipit era pak baem atii atom.” Emes atakam aesimen.

³⁹Me Yesus arawa, “Tare era ipit era pak baem atii bata bas. Owe dejuas ajietaertas, wanam jinim bae pak aemtas, ere are pota atakam Dera baemekore asan apok.

⁴⁰Owentakam dara baem apok owe, dajoo owe erare.

⁴¹Atakamnak, owe tare Kristus bajamkai owe aportan, are bwi tara atetamtan, ere Allah asan akot era owe aemtem.

⁴²Wan jii koser Dera ambesemmanis. Owe emes jii taka asan pota pak baem atapimtaatas, are era owe asan potanak aemaptemas. Wan owe, eka daytu era owe femak banam bajikapom, wanam era owe era bupnak bwi bajurumpuum, ere emes bonak ato batakameem, ararawa, era owe asan akot baemap amaye.

⁴³Wanam, taban tare dosa aoemtan apaye, ere era ban basakamosomay. Tare poman ban taka apaye, wanam Allah takan ajamememaartakam, ere asan akot aememtemakam. Me, taban amnuk takes apaye, wanam Allah jisimak asan ataejiimtan apaye, ere asan potanak aememtemakam. Era jisimak asan, ere basapie apok jisimak asan erare.

⁴⁴(Era jisimak asan era owe damo dasa andeto afin, ere dambir apoknak. Jisimak anom basapie apoknak.)

⁴⁵Wanam, wobai wore dosa aoemtan apaye, ere era bai basakamosomey. Wore poman bai taka aememtem, wanam jiinenak aememaartem apaye, ere asan akot aememtemarem. Me, wobai jamnuk takes aememtem apaye, wanam Allah wore jisimak asan bomon ataejiimtan apaye, ere asan potanak aememtemarem.

⁴⁶[Era jisimak asan, era owe damo dasa andeto afin, ere dambir apoknak. Era jisimakam basapie apoknak.]

⁴⁷Me, wobanamek dosa aoemtan apaye, ere era banamek basumtaerey. Wore poman banamek taka aememtem apaye, wanam Allah Ai Tapirmi ajiitem apaye, ere asan akot aememtemarem. Me, wobanamek amnuk takes aememtem apaye, wanam Allah wore jisimak asan akoromtukumtan apaye, ere asan potanak aememtemarem.

⁴⁸Jisimak asan era owe damo dasa andeto afin, ere dambir apoknak. Era jisimakam basapie apoknak.

⁴⁹Owe garam, era pak ten atakamtaetiiemas. Garam, era pak akot pak aemapomum. Emes tamen Allah owe aememayes bajurusum pak atetamtem. Ere owe turunak baememom are.

⁵⁰Garam ere akot. Me, garam jame apok aemamesto apaye, owe era garam jame pak baemeokenemapom asan apok. Emesare, tare era akot garam jipu pak aememay. Tare tarmamon ajamkipimamay.” Yesus emes atakam aesimen.