Read Casuarina Coast Asmat LUKAS 14 Bible Online

LUKAS 14 - Casuarina Coast Asmat bible

LUKAS 14

¹Emesare. Yahudi Owe Samayen Bare taka ere, Yesus, Parisi kapar ipit taka atame, amos takan banda, aesosen. Me era asan aemapes owe, banamek Yesus asirompesen.

²Emesare, damo bore ipit Yesus abipu aememen.

³Yesusam Musa Basakamtam Atakam baememtam owe anama Parisi owe ajateporen. “Yahudi Owe Samayen Bare, asan pota owe damo baoromtam, Musa Basakamtam Atakam bataetiostam pak apaye? Apok apaye?” Emes atakam aesimen.

⁴Me owe ere, atakam apoknak aemapesen. Yesus arawa, era damo bore ipit ban ajimompen. Are era ipit ajaoromtaeren.

⁵Yesus arawa, atakam era owe akoromen. “Tare takes, tarereis apaye, tasapi apaye, Yahudi Owe Samayen Bare, kakote take bwi ajurpuutas apaye, tare ere, are fef apuutaeremakam.” Emes atakam aesimen.

⁶Era owe ere, aatakam atep baemejit asan apoken.

⁷Yesusam, era pakambwi bajameem owe aporen. Erarawa are baetaa atakam era owe akoromen.

⁸“Owe tare oorey bajuut pakambwi takan banda ajatetan, tare era juas aptam owe asan baemap bas. Era ajatetan ipit wan juas aptam owe ajate apeno. Tararawa, juas apok owe emes apeno.

⁹Me tara ajatetan ipit, tabipu bamaromem-ombar. ‘Wore bawasitey. Ara aemema ipit ara asan baemapto.’ Are emes atakam tara bakorom-ombar. Emes atakam tara aokoromtan, tare era pota asan aemaptemakam. Wanam damke akemtemakam.

¹⁰Emesare, owe tare pakambwi takan banda ajatetan, era pota asan aemapay. Era tame armat ipit arawa, atakam tara bokorom ambaromemteman apeno. “Dip! Era juas aptam owe daytu asan aemapey.” Emes atakam aesimteman apeno. Erarawa are tare era wan pakambwi bajameem owe takes bipu tere aeomteman.

¹¹Allah era amba baemetemtem owe damke akamemomtem. Me, are era amba baemetemtem apok owe atemtemtem.” Yesus emes atakam aesimen.

¹²Yesusam atakam era amos takan banda ajate ipit aokoromen. “Wore pakambwi jok aemtem apaye, pakambwi eam aemtem apaye, wojoo owe bajate bas. Worepotaisam, woreotaisam, wotame setep oweam, bajate bas. Me wan wotame setep owe, pak daytu owe apeno. Era oweam bajate bas. Era owe biti wora bojie-ombar.

¹³Me, wore pakambwi aemtem, era pak apok oweam, era kam oweam, era bai wajie oweam, era banamek kapie oweam, emes owe taka ajatey.

¹⁴Era owe biti wora baemejie asan apok. Erarawa wore asan akot aemaptemarem. Turunak owe ajaorwasittas bare, Allah biti wora ajiteman.” Emes atakam aesimen.

¹⁵Era amos takan ande ipit taka era atakam jane ajie ere, are atakam Yesus akoromen. “Allah Ai Tapirmi amos andetas owe, ere asan akotnak.” Emes atakam aesimen.

¹⁶Yesus ere, atakam era ipit akoromen. “Era bare ere, jipit taka, pakambwi daytinak aemen. Are owe tanane ajaten.

¹⁷Era pakambwi setep kope apore, are akarai baetam ipit, ajate owe atakam baesimtam, ambirimemomen. ‘Tanom de! Pakambwi pak emefaafamapomkoromarom, emes atakam aesimey.’ Emes atakam aesimen.

¹⁸Era ajate owe takes ere, pir aemteteresen. Era bonak ipit, atakam era karai baetam ipit akoromen. ‘Dere tapirmi ajitito. Dere era tapirmi basiepor baesos aemin. Dere era pakambwi bajinao apok. Emes atakam aesimtamey.’ Emes atakam aesimen.

¹⁹Me wan ajate ipitam atakam akoromen. ‘Dere sapi ban amnuk ajitito. Dere era sapi baempor aemin. Dere bajinao apok. Emes atakam aesimtamey.’ Emes atakam aesimen.

²⁰Me wan ajate ipitam atakam akoromen. ‘Dere petae japen ajiiemmin. Erarawa dere baemejinao asan apok.’ Emes atakam aesimen.

²¹Me karai baetam ipit arawa, aofasien. Are emes atakam era karai armat ipit akoromen. Me tame armat ipit arawa, jak ambap apumapen. Are atakam akarai baetam ipit akoromen. ‘Wore ara aemansa kota daytu bokot takesam, era koser bokot takesam, aesosey, wanam era pak apok oweam, era kam oweam, era banamek kapie oweam, era damo bore oweam, ara asan atoomtinaoey.’ Emes atakam aesimen.

²²Era karai baetam ipit aofasie, wanam atakam aokoromen. ‘Dot! Era akorearem atakam, ere emeemey. Me, wotame, baemap asan aosinta.’ Emes atakam aesimen.

²³Me tame armat ipit arawa, atakam, era karai baetam ipit aokoromen. ‘Wonom te! Me kota tasan bokotam, era wasen bokotam, aesosey. Era asan owe, detame bajii, atakam fiak akoromey. Dere detame, owe tananenak bapitap akot.’

²⁴Wore deatakam jane pajiey. Bonak ajateo owe, depakambwi pak banda apoknak aemtemas. Emes atakam aesimen. Emes atakam aesimen.” Yesus emes baetaa atakam akoromen.

²⁵Emesare. Owe tananenak Yesus takan aemjaresen. Armat Ipitam era owe, bimin awaiome, wanam atakam akoromen.

²⁶“Jipit taka Dera bajamkai akot aporto, are daytinak Dera bafaimtan. Are Dera ambaromemtan apaye, wanam daytinak era aritipitam, arsootam, aremoam, arereisam, arepotaisam, areotaisam, ataratapesam, afaimto apaye, ere are debajamkai ipit baemeemem asan apok. Wanam adamo daytinak afaimto, are debajamkai ipit, baemeemem asan apok.

²⁷Owe asalib bataateter apok aemtas, wanam Dera bajamkai apok aemtas, ere are debajamkai owe baemeemem asan apok.

²⁸Emesare, tare tame daytu baeapom aememtakam, tare ato takampakiapmakam, wanam era tame baeapomkorom pak bajit uang, tanane apaye ato takampormakam.

²⁹Tare emes baem apok aemtakam, wanam era tame fesis ajirimdaemkoromtakam, tare era tame baemeeapom asan apok are. Era pak aportas owerawa, wote tara asawuomteman.

³⁰Are atakam akoremas. ‘Ara aemema ipit tame fesis etejirimapome. Me, are era tame baemeeapomkorom asan apok.’ Emes atakam aesimmas.

³¹Wanam raja ipit, wan raja ipit jii bajamom aemto, are ato takamdaepakiapem. Wanam bimak binip atetaramum. Me atentara owe 10.000. Era jii bajamom ajinaoto raja ipit atentara owe ere, 20.000. Emes aporto, are bimak binip atetaramum. ‘Dere era raja bakumimosom apaye? Apok apaye?’ Emes bimak binip ato takamtetaramum.

³²Apok aporto, are wan raja setep apok aporto, are atakam bakorepor owe era rajapu ambirimemomum. ‘Dere pai bae akot. Dere wore wama pak tetamtey?’ Emes atakam aesimum.

³³Emesamare, owe, apak takes beken bajios apok aemtas, are Dera bajamkai owe baemeemem asan apok.”

³⁴“Garam ere akot. Me, garam jame apok aemamesto, owe era garam jame pak boemapom asan apok.

³⁵Me pota garam, ere pak akene bajaorom pak apok. Are wan pak akene bajaorom pak bartam pak apok. Owe era garam akoromosomemas. Emesare, jane fero owe ara atakam jane bajitas.” Yesus emes atakam aesimen.