Read Casuarina Coast Asmat LUKAS 16 Bible Online

LUKAS 16 - Casuarina Coast Asmat bible

LUKAS 16

¹Emesare. Yesus atakam abajamkai oweam akoromen. “Jipit taka pak daytun. Are aapak banamek bataitam ipit aemomen. Bare taka, owe, atakam, era pak armat ipit, akoromesen. ‘Wopak banamek bataitam ipit wopak apakapimo-sommar.’ Emes atakam aesimesen.

²Era pak armat ipit arawa, era ipit ajaten. Are atakam akoromen. ‘Atakam jane ajiey ere, wore depak apakapimosommarem. Emesare, wore depak banamek baemetai asan apok. Erarawa wore depak banamek ataiaarim pak takes, atakam boesimtamman.’ Emes atakam aesimen.

³Era pak banamek bataitam ipit arawa, bimak binip atetaramen. ‘Me dekarai armat ipit aapak banamek bataitam karai, dera ambirimjisimman. Dere wama pak emtey? Kebun karai ere, dere jati daytu apok. Dere owe, pak bambi dera batetam atakam bajanimam, ere dere damke.

⁴Emesare, dere aemtey pak atakam asakamtiimin. Erarawa dekarai armat ipit era karai ambirimjisimtan, wan owe dere atame atoomjiitemanis.’ Emes bimak binip atetaramen.

⁵Bonak ere, akarai armat ipit, pak, owe atetamen. Era owerawa, pak armat ipit asep botetam atakam ajamsakamamtiiesen. Erarawa era pak banamek bataitam ipit, era owe jipit taka, jipit taka ajateteteren. Are era bonak ajate ipit ajateporen. ‘Wore dekarai armat ipit wama pak otetamtem?’ Emes atakam aesimen.

⁶Era ipit arawa, ‘Dere minyak blek daytu 100 aotetamtemin.’ Emes atakam aesimen. Era pak banamek batai ipit arawa, ‘Emesare. Era bon buku erow. Bataerey! Wonom bapakiapey, wanam, “blek 50,” era buku bameteeapomey.’ Emes atakam aesimen.

⁷Ararawa, wan ipitam ajateporen. ‘Wore dekarai armat ipit wama pak otetamtem?’ Emes atakam aesimen. Era ipit arawa, ‘Dere gandum ese 100 aotetamtemin.’ Emes atakam aesimen. Era pak banamek bataitam ipit arawa, ‘Emesare. Era bon buku erow. Bataerey, wanam “ese 80,” era buku aeapomey.’ Emes atakam aesimen.

⁸Era karai armat ipit aapak banamek bataitam jaos ipit aeme pak, atakam jane ajien. Ararawa, ‘Era ipit bimak binip feronak,’ Emes atakam aesimen. Emesare, ara aemansa tapirmi pak jak aseseromemas owe, aapak atakam ajamsakamtas, are bimak binip feronak. Era sare bomon aemapmas owe ere, emes aemtas, are bimak binip fero apoknak.

⁹Jane pajiay! Ara aemansa tapirmi pak, owe atetamay. Era owerawa, wojoo owe aememtemas. Tapak atetamkorom-takam, Allah, tare jiine tame atoomjiiteman.

¹⁰Owe kope pak baem, turu aemtas, are daytu pak baem, turu aemtemas.

¹¹Tare owe ara aemansa tapirmi pak banamek bataitam, wanam owe jaos aememtakam, oweam era pak anakot banamek bataitam taban ten bootasimtiitam apok aemteman.

¹²Wanam, tare owe pak banamek batai, owe jaos aememtakam, owe tapak tara bootasimtiitam apok aemteman.

¹³Karai baetam ipit, karai armat ipit jamnuk, emes karai baemeetam asan apok. Are wan ipit bifane afeomemtem, wanam wan ipit afaimtem. Are wan ipit ajamkaitem, wanam wan ipit pota aportem. Tare, Allah karai baetamam, ara aemansa tapirmi pak bataet bimak binip daytu batetaramam, era jamnuk takes takan baemeem asan apok.” Yesus emes atakam aesimen.

¹⁴Emesare, Parisi owe, uang basenomem oween. Are Yesus akore atakam jane ajies, wanam wote Armat Ipit asawuomesen.

¹⁵Yesus ere, atakam era owe akoromen. “Tare turu owe tamen, asamot owe bipu aemememakam. Allah ere, tajak bomon pak amsam. Asamot owe, wan pak akotnak apormas. Allah ere, era pak bifane afeomem.

¹⁶Owe, Musa aeapome Basakamtam Atakamam, Allah aatakam bakoretam owe atakamam, Yohanes awasieme bare ajiire akoretamaaris. Era bare aetaeraaru taka ere, Dere Allah owe aobaomep Akot Atakam akoretammaaru. Allah aowe baemem jati daytinak aeemes.

¹⁷Era wonamo oupam, ara tapirmiam, bajanios, ere asan pota kope. Me, Musa aeapome Basakamtam Atakam buku kopenak hurufam bajanimosom, ere asan pota daytinak.

¹⁸Jipit aremo atuumjisimto, wanam wan taot aotaetto are pere bambe ipit aememem. Wanam jipit, wan ipit atuumjisime taot aoaetto, are pere bambe ipit aememem.”

¹⁹“Emesare. Jipit taka pak daytu ipit aememe. Era ipit apakaian takes, ere harga daytu pakaian. Are juiin afaafeaarir, pak akotnak andaarir.

²⁰Me atame jimsappu, pak apok ipit juas Lasarus aemansaarir. Adamo dasoam tananenak.

²¹Era ipit, pak daytu ipit aondaeremtiiaarir amos banda, jak aseserompaarir. Juuriam era ipitpu ambaroma ajiaaris, wanam adamo daso koman ambiminenda ajiaaris.

²²Bare taka, era pak apok ipit dambir aeme. Malaikat oweam, era ipit, Abrahampu atoomtemetes. Era pak daytu ipitam dambir aeme. Owerawa, era pak daytu ipit se awuapomes.

²³Era ipit dambir owe asan aemape, are damo asesa daytinak. Are banamek oup apemtemeteme. Are Abraham setep apok aemape apore. Are Lasarus, Abrahampu aemape apore.

²⁴Atakamam afaketaere. ‘Dot! Abraham! Seekot aoorporan. Dere ara jisimak jee bomon, damo asesa daytinak aemapmin. Emesare Lasarus atakam asakamtamey. Are ban bi bwi bakumto, wanam dekoman jufu bafumdaemportan.’ Emes atakam aesime.

²⁵Me Abraham ere, atakam akorome. ‘Detii! Jatiaptam aememaarim, wore asan akotnak aememaarim. Me Lasarus ere, jatiaptam aememaarir, are asan pota aememaarir. Era pak binip atoomey. Waa ere, Lasarus jak akot aemapem. Wore ere, damo asesa aemapmarem.

²⁶Wanam, daasanam, woasanam, era waut, takue daytinak aapeta. Owe baemeokorefejinao asan apok. Ara asan owe, woasan, baemejinaopor asan apok. Era asan oweam, daasan baemejinaopor asan apok.’ Emes atakam aesime.

²⁷Era ipit arawa, ‘Dot! Dere atakam fiak wora ajanimpormin. Wore Lasarus era deritipit tame ambirimemey.

²⁸Dereotais ban taka aomatisa. Lasarus atakam dereotais bakoretamto. Are ara damo asesa asan bandaeap-ombar.’ Emes atakam aesime.

²⁹Me Abraham ere, ‘Era owe, Musa aeapome atakamam, Allah aatakam bakoretam owe aeapomes atakamam, aemompes. Are era atakam jane bajitas.’ Emes atakam aesime.

³⁰Era ipit arawa, ‘Dot! Abraham! Emes bas! Jipit taka, ara dambir owe asan ajaorwasitto, wanam era owe ambaromemto, era owe dosa ambakemtemas.’ Emes atakam aesime.

³¹Abraham arawa, atakam era ipit akorome. ‘Are Musa atakamam, Allah aatakam bakoretam owe atakamam, jane bajie apok aemmas. Dambir ipitam ajaorwasitto, era owe, aatakam jane bajie apoknak aemtemas.’ Emes atakam aesime.” Yesus emes atakam akoretamen.