Read Casuarina Coast Asmat LUKAS 17 Bible Online

LUKAS 17 - Casuarina Coast Asmat bible

LUKAS 17

¹Yesus arawa, atakam abajamkai owe akoromen. “Dosa baem batatapimtaa owe ajinaotemas. Emesare, dosa baem atatapimtaatas owe, asan potanak aemaptemas.

²Owe, eka daytu, era dosa baem atatapimtaatas owe afemak ajikitopomtas, wanam are era owe itimbup bwi ajurumpuumtas, ere era bwi ajurumpuumtas owe asan akot aemaptemas. Me, era dosa baem batatapimtaa owe, ara aemema jii dosa baem atatapimtaatas, era owe asan potanak aemaptemas.

³Tanom turuar! Me tajoo ipit asan pota pak aemto, era ipit bajatemotaeray. Wanam are era asan pota pak bamakemto, tare era ipit aeme pak, bimak binip ajanimemtamay.

⁴Era ipit, bare taka asan pota pak poman ban jamnuk tara aemtan apaye, wanam are, bare poman ban jamnuk ajiire, ‘Dere asan pota pak wora aemo,’ emes atakam aesimtan apaye, ere tare era asan pota aeme pak takes bimak binip ajanimemtamay.” Yesus emes atakam aesimen.

⁵Era Yesus atakam bakoretam bamirimemom owerawa, atakam Tuhan akoromesen. “Dare wofiak pak jiirey baeekorom, emes bimak binip pokakaimtamaro.” Emes atakam aesimesen.

⁶Me Tuhan arawa, “Kosernak wus eek ere kutukoser. Me, tare defiak pak, emes kutukoser jiirey aeetakam apaye, tanom atakam ara wus juas ‘murbei’ akoromtakam, ‘Basiewasitey! Era itimbup bwi ajirapey.’ Emes atakam ara wus akoromtakam, ere era wus taatakam ji aeteman.”

⁷“Tare wan ara aemapakam owe, karai baetam ipit aemomemmakam apaye. Era karai baetam ipit kebun tapirmi andanaesumtiitamtan apaye, domba banamek ataitamtan apaye, are emes karai asan aendaetem. Andaeto ere, tare, ‘De! Amos ato takamdosomey,’ emes atakam baesim apaye?

⁸Emesare, tare emes atakam bakore apok. Tare ere, ‘Amos bajaataman. pakaian bajiimomey, wanam banda pak debipu ataetiiey. Dere amos anama bwi, andakoromtey, worarawa asep andetemarem.’ Emes atakam aesimtemakam.

⁹Tanom era karai baetam ipit tabasakamtam atakam ji bae aportakam, tare, ‘terima kasih’ atakam ara bakorom apok aemtemakam.

¹⁰Tanom Allah karai baetam, ere emes taka are. Tare, Abasakamtam atakam ji aekoromtakam, tanom emes atakam akoromay. ‘Dare pota karai baetam owe ara aememom. Dare, Allah atakam asakamtamero pak taka aemom.’ Emes atakam aesimay.” Yesus emes atakam aesimen.

¹¹Emesare. Yesus, Yerusalempu ajareme ere, Are Samaria tapirmiam, era Galilea tapirmiam, era waut ajaremen.

¹²Yesus, samane taka atamsan ambareme ere, owe ombare bamarem damo pitini potanak owe ban amnuk, Armat Ipit bimnuk aemamtaeresen. Are setep apok aememesen.

¹³Era owerawa, atakam afaketaaesen. “Yesus! Guru! Dare seekot aoorporaro.” Emes atakam aesimesen.

¹⁴Armat Ipit era owe apore, wanam atakam akoromen. “Tare Allah Tame pak baem ipitpu aesosay. Armat ipit tara baoorportan.” Emes atakam aesimen. Era owe era waut aememes arawa, damo akot aoememesen.

¹⁵Me wan ipit takarawa, adamo daso akakapianse aporen. Ararawa, aofasien. Are atakam daytinak Allah tere aeomen.

¹⁶Emesare, are Yesus bipu kuus fop andaejiapen. Are, “terima kasih” atakam, Yesus akoromen. Era ipit ere, Samaria ipitin.

¹⁷Yesusam atakam akoromen. “Owe ban amnuk damo akot aoememes apaye? Me wan owe poman ban eak taka apok ere, eteperam?

¹⁸Me wan owe Allah tere baeom bofasi apoke? Me era wan saman ipit taka apay?” Emes atakam aesimen.

¹⁹Yesus arawa, atakam era ipit akoromen. “Bawasitey! Tamer! Wore Dera ambesemmanim. Erarawa wodamo daso akakapiamesteterem.” Emes atakam aesimen.

²⁰Bare taka, Parisi owe Yesus ajateporesen. “Me Allah owe aobaomep bare ete bare daeto?” Emes atakam aesimesen. Me Armat Ipit arawa, “Tare, Allah owe aobaomep bandae, baemepor asan apok.

²¹Oweam, ‘Emesare, Allah owe aobaomep ara asan are,’ wanam ‘Allah owe aobaomep era asan are,’ are emes atakam baemekore asan apok. Allah owe aobaomep ere, tawaut aapeta.” Emes atakam aesimen.

²²Armat Ipit arawa, atakam abajamkai owe, aokoromen. “Emesare, asep bare tare Asamot Anakot Ajaoreme Ipit bare takakope ta takan boemap, jak aseseromemtemakam. Me, Armat Ipit ta takan boemap asan apok.

²³Oweam atakam tara aokoromteman, ‘Armat Ipit era emema!’ wanam, ‘Armat Ipit ara emema!’ Emes atakam aesimteman. Tare ere, baesos bas. Tanom era owe bajamkai bas.

²⁴Emesare, bwer aran aetarem, wanam eman ataretepem. Asamot Anakot Ajaoreme Ipit emes baso ajisemtem.

²⁵Armat Ipit ere, bajirisem daytinak ato takamemtem. Ara ajaniemas oweam atakam akoretemas, ‘Era Ipit pota,’ Emes atakam akoretemas.

²⁶Me Asamot Anakot Ajaoreme Ipit ajisto bare pak, ere Nuh bonaknak aemapaarir bare pak awar aemtem.

²⁷Era owe ere, amos anama bwi andaaris. Are petae ajiema ajiaaris. Ooreyam ajuuta ajiaaris. Are, Nuh, era ti daytu tame aptam ajuue bare ajiire emes pak aemaaris. Era bwi dayturawa, ajinaoe. Are era owe takes asokome.

²⁸Me Lot aemapaarir bare pak, ere emes taka are. Era owe amos anama bwi anda ajiaaris. Are pak ajitamaromata ajiaaris. Are pak akene ajapoma ajiaaris. Tameam aeapoma ajiaaris.

²⁹Me, Lot kota Sodom beken ajiose bare, Allah jisimakam, ambapnak jirmwi pak aptamam, ataendaeme. Era pak arawa, era owe takes asokome.

³⁰Me Asamot Anakot Ajaoreme Ipit ajisto baream, ere emes tamen aemtemas.

³¹Era bare ere, tame oup kais banda asan aemaptas owe, aapak ato batakamjiitaer bas. Era kebun karai aememtas oweam, beken ajiostas pak, bofasietaer bas.

³²Me Lot aremo aeme pak bimak binip ajanimomay.

³³Owe, adamo bajorem jak aseseromemtas, are bajorem apoknak aemtemas. Me, jiine bajanios aemtas owe ere, ajoremtemas.

³⁴Atakamnak! Era eam ere, jipit amnuk, tapini taka ten ajamsestemamis. Malaikat arawa, jipit taka ataertemas. Me wan takarawa, beken ajiostemas.

³⁵Taot amnukam amos takan ajotemamis. Malaikat arawa, taka ataertemas. Me wan takarawa, beken ajiostemas. [

³⁶Jipit amnukam kebun aememtemamis. Malaikat arawa, taka ataertemas. Me wan takarawa, beken ajiostemas.]” Yesus emes atakam aesimen.

³⁷Era owerawa, Yesus ajateporesen. “Era pak ete asana emto?” Emes atakam aesimesen. Armat Ipit arawa, “Era wuru sakao kupis, dambir akamiamesmas pakpu ajukusiromaaremas.” Emes atakam aesimen.