Read Casuarina Coast Asmat LUKAS 19 Bible Online

LUKAS 19 - Casuarina Coast Asmat bible

LUKAS 19

¹Emesare. Yesus kota Yeriko ambaremen. Are era kota baofios baesoskorom aememen.

²Era asan ere, owe juas Sakeusen. Are pemerintah uang bataajanimtam karai owe akapar ipit araren. Anom pak daytu ipitin.

³Are Yesus ta ipitmaye bapor, aempore apoken. Are owe karokopeen. Oweam tananenaken.

⁴Emesare, are bonak ja akukosen. Are, Yesus era asan aefeto bi bapor, wus oup atemeten.

⁵Yesusam era asan aememe, wanam banamek oup apemtemetemen. Are atakam era ipit akoromen. “Sakeus! Fef andaey! Dere waa jimwi wotame ataemmin.” Emes atakam aesimen.

⁶Emesare, armat ipit fef ametedaen. Are jak akot aememe, wanam are Yesus atame atoomjiien.

⁷Era apores owe takes arawa, atakam binene andiesen. “Yesus jimwi dosa ipit tame ataemim.” Emes atakam aesimesen.

⁸Me Sakeus, ere awasite, wanam atakam Tuhan akoromen. “Tuhan! Baporey! Dere wan pak tanane, era pak apok owe batetam aemin. Wanam, dere owe pak wosom aetaeto apaye, ere dere emes pak eak taka apok era owe atetamtemin.” Emes atakam aesimen.

⁹Yesus arawa, atakam armat ipit aokoromen. “Wonom Abraham wurpis. Erarawa Dere waa ara tame owe takes ajortaermin.

¹⁰Emesare, Asamot Anakot Ajaoreme Ipit era apakapiosmas owe, bandimaram, bajortaeram, andae.” Emes atakam aesimen.

¹¹Era owe emes atakam jane ajiesen. Era owe abimak binip ere, “Allah owe aobaomep fef andaetem.” Emes bimak binip atetaramesen. Yesusam era owe abimak binip aporen. Are Yerusalem setep aporen. Erarawa Are baetaa atakam akoretamen.

¹²“Kapar daytu wurpis ipit, setep apok tapirmi baesos aememen. Era setep apok tapirmi owe, era ipit, owe baomep ipit bataemomen. Era ipitam, ‘Dere aobaomep ipit aememtey, aofasitemin.’ Emes atakam aesimen.

¹³Armat ipitam akarai baetam owe ban amnuk ajaten. Are uang juas mina taka oweo aememayes atetamen. ‘Tare ara uang pak ajititay. Era pak arawa jow auumamtaera ajiaaray— era aofasitey bare ajiirear.’ Emes atakam aesimen. Ararawa, setep apok tapirmi aesosen.

¹⁴Me atapirmi owe ere, era ipit bifane afeomesen. Ararawa, owe era setep apok tapirmi ambirimemomesen. ‘Tanom atakam era tapirmi owe aesimtamay. “Dare era ipit atakam dara basakamtam pota.” Emes atakam aesimtamay.’ Emes atakam aesimesen.

¹⁵Era ipit ere, owe aobaomep ipit aememen. Ararawa, atapirmi aofasien. Are atakam asakamtamen. ‘Era uang atetamo karai baetam owe bajateay.’ Emes atakam aesimen. Are era uang akakaimes apaye, bakakaim apok apaye, emes bapor aren.

¹⁶Emesare, era bonak karai baetam ipit armat ipit bipu ambaromen. Are atakam akorome. ‘Dot! Era atetamenim uang juas mina taka, ere ban amnuk aokaimo.’ Emes atakam aesimen.

¹⁷Me armat ipit arawa, atakam akoromen. ‘Wore karai baetam ipit akot aememem. Era aemem pak akotnak. Wore pak kope, turunak aemomem. Erarawa wore kota ban amnuk aemomemtemarem.’ Emes atakam aesimen.

¹⁸Me asep karai baetam ipitam ambaromen. ‘Dot! Era atetamenim uang juas mina taka, ere ban taka aokaimo.’ Emes atakam aesimen.

¹⁹Me armat ipit arawa, ‘Emesare. Wore kota ban taka aemomemtemarem.’ Emes atakam aesimen.

²⁰Emesare, era wan karai baetam ipitam ambaromen. ‘Dot! Era atetamenim uang juas mina taka aapeta. Dere era uang ban atoomatemas kain koser bomon bambi ataapomo.

²¹Wore atakam fiak ipit aporo. Wore, era wo bataapom apok pak, ataetmarem. Wonom, wo bajapom apok pak akene eek, ataermarem. Erarawa dere wo ombare aememo.’ Emes atakam aesimen.

²²Armat ipit arawa, atakam era karai baetam ipit akoromen. ‘Wore karai baetam ipit pota aememem. Wore dere atakam fiak ipit apormarem. Dere de bataapom apok pak ataetmin apormarem. Denom era de bajapom apok pak akene eek ataermin apormarem. Emesare, dere wokoremarem atakam jipu, atakam asakamtiimin.

²³Era uang banamek batai owe, owe uang ataeta ajiemas. Asep arawa, emes uang am, bokaim uangam, era owe aofasimtama ajiemas. Wore ere, deuang emes owe batetam apok aemem apa pakem? Wore emes aemeaw, aofasio ere, dere era atetamo uangam, era bokaim uangam botaeraw.’ Emes atakam aesimen.

²⁴Armat ipit arawa, atakam erapu aememes owe akoromen. ‘Era aemome uang taka botaeray, wanam era uang, uang mina ban amnuk aemome ipit atetamay.’ Emes atakam aesimen.

²⁵Era owerawa, ‘Dot! Era ipit, ere uang ban amnuk tair!’ Emes atakam aesimesen.

²⁶Armat ipit arawa, ‘Atakanak! Pak aptam owe, wan pak aotaettemas. Me, owe, era pak apok owe apaknak aotaertemas.

²⁷Me bifane dera afeomemanes owe, dere atakam ara basakamtam potan. Era owe arapu atoomdaeay, wanam debipu atatiiteteray.’ Emes atakam aesimen.” Yesus emes atakam akoren.

²⁸Emesare. Yesus emes atakam akorekoromerawa, are bonak ataseremen. Are Yerusalem bin ajiemen.

²⁹Armat Ipit, kota Betfage anama kota Betania setep asisiemen. Era kota fami juas Saitun aemansen. Yesusam atakam abajamkai ipit amnuk asakamtamen.

³⁰“Tare bonak aemansa tamsan aesosami. Era tamsan ambaremtankum, ai keledai banamek asiejatemtemankum. Era keledai tima pak aptam. Waa ajiire, owe era keledai beak ten batemetappor apok. Tanom era tima pak basurumami, wanam era keledai arapu atoomdaeami.

³¹Oweam tara bajatepor apaye, ‘Tare keledai tima pak apa surummankum?’ Emes atakam aesimtan, tararawa, ‘Tuhan era keledai beak ten baapejaren,’ emes atakam aesimami.” Yesus emes atakam aesimen.

³²Emesare, era atakam asakamtame ipit amnuk, era pak Yesus akore atakam jipu taka aporemisen.

³³Are era ai keledai tima pak basurum aememis, ararawa era keledai armat owe, ajateporesen. “Tare ai keledai tima pak apa surummankum?” Emes atakam aesimesen.

³⁴Ararawa, “Tuhan era keledai beak ten baapejaren.” Emes atakam aesimemisen.

³⁵Emesare, are era keledai Yesuspu atoomtinemisen. Are abaju era keledai beak ten atemetebuitiiemisen. Arawa, Yesus era keledai beak ten ban aosomtemetetaapomemisen.

³⁶Yesus era keledai beak ten aemjarmape, owe abaju tanane era bokot bup ambuitiia ajaiesen.

³⁷Emesare, Yesus, Yerusalem setep aememen. Era aememe asan, owe era fami Saitun aendaemas asan aren. Era asan ere, abajamkai owe takes jak akot aememesen. Are atakam daytinak Allah tere aeomesen. Are Yesus aemaarir jinim bae pak aporesen.

³⁸“Tuhan, asan akot, era ataendaemmar Ipit baemto! Are raja Ipit! Era Surga oup tapirmi, ere asan akot! Danom era oupnak Allah tere aeommarom.” Emes atakam aesimesen.

³⁹Era owe tanane damon, wan owe Parisi oween. Me wan Parisi oweam atakam Armat Ipit akoromesen. “Guru! Wobajamkai owe, bajatemotaerey.” Emes atakam aesimesen.

⁴⁰Armat Ipit arawa, “Atakamnak! Ara aememares owe atakam apok aememtas ere, ara aemanses eka atakam afaketaatemas.” Emes atakam aesimen.

⁴¹Emesare. Yesus, Yerusalem setep aememen. Are era kota apore ere, are era kota jier bate ambaten.

⁴²Are atakam akoren. “Allah tare ji baem jak tara batetam akoten. Tare waa era pak tamsam araw, asan akot aemapmakamma. Tare ere, era pak baemepor asan apok.

⁴³Tare Allah tara bajortaer bare tamsam apok. Erarawa asep bare, tajii owe, ara kota afojomeptemas wanam tapirmi oup atotokamapomteman. Are tare poman poman atataiomepteman. Are tiriam asiomemteman. Era tame owe takes atajimirtiiteman. Are tatame atietiikoromtemas. Era tame eka takakopeam bomonapas teneapas boerimapom apok aemtemas.” Emes atakam aesimen.

⁴⁴

⁴⁵Emesare. Yesus, Allah Tame ajiiemen. Ararawa, era pak jow bauumamtaa owe ambirimjisimen.

⁴⁶Are atakam era owe akoromen. “Alkitabam, ‘Detame, atakam Dera bajanim tame aemamestem. Tare ere, ara tame, wosom owe bajariap asan aemapomekem.’ Emes atakam akorem.” Yesus emes atakam aesimen.

⁴⁷Emesare. Yesus juiin afaafeaarir, Allah Tame bomon, atakam aememtamen. Me Allah Tame pak baem owe daytuam, Musa Basakamtam Atakam baememtam oweam, kapar oweam, Armat Ipit batatii aemporesen.

⁴⁸Me, are Armat Ipit baemetatii asan apoken. Era bambi owe takes, Armat Ipit atakam jane bajie akotnak aporesen. Erarawa wan owe, Armat Ipit baemetatii asan apoken.