Read Casuarina Coast Asmat LUKAS 21 Bible Online

LUKAS 21 - Casuarina Coast Asmat bible

LUKAS 21

¹Emesare. Yesus banamek apemen. Are pak daytu owe, Allah Tame uang, uang asan ataapomteteres aporen.

²Are pak apok tano taot uang sen kope jamnuk ataapome aporen.

³Armat Ipit arawa, atakam akoren. “Atakamnak, era owe tanane uang daytu. Are wan uang era Allah Tame uang asan ataapomtetermas. Me, ara aemema taot ere, pak apok. Are aapak bajitin uang takesam era uang asan ataapomum. Are wan uang apoknak. Emesare, ara aemema taot uang daytu emes ataapomum. Era wan owe takes, uang kope emes ataapomtetermas.” Emes atakam aesimen.

⁵Wan oweam, Allah Tame atakam akoramesen. Are era Tame eka akotnak atakam akoramesen. Are era Tame tasee pak atakamam akoramesen. Bonaknak ere, owe era Tame tasee pak, Allah bataetiitam pak, emes atetamesen. Yesus arawa, atakam akoromen.

⁶“Era apormakam pak, asep bare ara Tame eka wan eka ten baemames apoknak aemtemas. Jii owe ere, era eka takes atietiikoromtemas.” Emes atakam aesimen.

⁷Era owerawa, ajateporesen. “Guru! Era pak ere, ete bare emto? Era bare setep aemamesto, Allah wama jinim bae pak poromtamto?” Emes atakam aesimesen.

⁸Armat Ipit arawa, “Tare turuar! Owe potet tara batutum-ombar. Owe tanane ajinaotemas, wanam ‘Allah Aeremtaere Ipit, ere derare,’ emes atakam aesimtetertemas. Wanam, ‘Armat Ipit bofasie bare emeemansa.’ Emes atakam aesimtemas. Me, era owe atakam ji bae bas.

⁹Tare, owe jii bajamomam, owe pemerintah atakam baooam, emes atakam jane ajitakam, ere ombare bas. Era pak bonak aemtemas. Me asepnak bare ere, fef bafemeemames apok aemtem.” Yesus emes atakam aesimen.

¹⁰Armat Ipitam atakam era owe aokoromen. “Wan samane tanane jii wan samane tanane ajamoma ajitemas. Wan tapirmi tanane jii wan tapirmi tanane ajamoma ajitemas.

¹¹Ajieam daytinak tanane asisima ajitem. Asan tananeam owe amosto dambir aema ajitemas. Atairam asan tanane ajinaoa ajitem. Ombare baemem pak daytinakam, jinim bae pak daytinakam, wonamo oup aendaetemas.

¹²Me, era pak takes ere, asep aemtemas. Bonak ere, owe tare Dera bajamkai owe aporteman. Erarawa are ban tara akimomemteman. Are tara ajurusumteman. Are tare era Yahudi owe samayen tame atakam basakamtii owe aotasimemomteman. Are buji tame bomon ajiitaapomteman. Are tare raja owe bipuam, gubernur owe bipuam atatapimtaateman.

¹³Ere, tare Allah Akot Atakam era owe bakoretam, asan akotpu erare.

¹⁴Tare emes atakam asakamemteteray. ‘Dare era owe atep ajittam atakam, bimak binip arke batetaram apok aemtemarom.’ Emes atakam asakamtiiteteray.

¹⁵Denom bimak binip baso tara atetamtemin. Tararawa, atakam akot akoretemakam. Erarawa tapota baem pak atakam akoretas owe, taatakam baemeoo asan apok aemtemas. Are atep tara baemejit asan apok aemtemas.

¹⁶Tarisaream, tarepotaisam, tareotaisam, taofwe tame oweam, tajoo oweam, tare era jokoman owe aotasimemomtamteman. Are tare wan owe atatiiteman.

¹⁷Owe tare Dera bajamkai aporteman. Erarawa era owe takes bifane tara afeomemteman. Me, tare asan akot aemaptemakam.

¹⁸Me, takuus fini takakopeam bapakapios apok aemtem.

¹⁹Tare bamompim apok aemtakam, wanam jak jirao aememtakam, ajoremtemakam.”

²⁰“Tare jii tentara Yerusalem bafojomem aportakam, tare era kota danais baemames bare setepnak aportemakam.

²¹Era bare ere, Yudea tapirmi aemapmas owe, ombare era fami baesostas. Era kota aemapmas oweam baesostas. Era samaniin samaniin tamsan aemapmas oweam, kota boesos bas.

²²Era bare ere, Allah era owe Bajurusum Bare. Ere era Alkitab atakam jipu.

²³Era bare, jak aptam tapesam, jii aoo andamtas tapesam, asan potanak aemaptemas. Era tapirmi owe ajirisemtemas. Allah, ara saman ajurusumtem.

²⁴Me wan owe, jirao warim bande ajatetatiitemas. Jii owe wan owe tau ataatemas. Ararawa, era owe era samaniin samaniin takes atapirmi atuomastemas. Era Yahudi apok oweam Yerusalem danais aemtiikoromtemas— are era tapirmi baemomem ambompimtas bare ajiire.”

²⁵“Jee jinim bae pakam, pir jinim bae pakam, baet jinim bae pakam, ajistemas. Ara aemansa tapirmi ere, era samaniin samaniin jak pota aememtemas. Are bimak binip arke atetaramtemas. Are era itimbup wo daytinak ajumto pak jane ajitemas, wanam ombare aememtemas.

²⁶Allaham era wonamo oup sare pak akookomtem. Owerawa, ara aemansa tapirmi ajirisemto pak, banamek apemtemas. Erarawa are ombare daytinak ambartemas, wanam ajak ajirfinitemas. Damo fefeam aemamestemas.

²⁷Owerawa, Asamot Anakot Ajaoreme Ipit, wonamo bomon oup andaeto aportemas. Armat Ipit, fiaknak pak aptamam, akotipitnak aememe sare aptamam, pakambwi andaeomemtem.

²⁸Era pak takes aemtas, tare bawasitay. Tare bi oupa. Allah tara bajortaer bare, ere setepnak erare.” Yesus emes atakam aesimen.

²⁹Armat Ipit arawa, baetaa atakam era owe akoretamen. “Wus juas ‘ara’ am, wan wus takesam, bimak binip atetaramay.

³⁰Tare wus era jini pak bajis aportakam, ere jusue bwi setep aporemakam.

³¹Emesamare, tare ara akoremin atakam aememto aportakam, tare Allah aowe baomep bare setep aportemakam.

³²Atakamnak, ara tapirmi aememtas owe, dambir baem apok, era akoremin atakam takes bonak ato takamemkoromtem.

³³Era wonamo oupam, ara tapirmiam, ajaniostem. Deatakam ere, emes aemansaartem.”

³⁴“Tare ere, turuar! Tare pakambwiam, bir bwi banda jaytuam, ara aemansa tapirmi pakam, bimak binip daytu batetaram bas. Tanom bimak binip jiiti bas. Tuhan bare fef aemamesto, tare tamsam apok baemap-ombar.

³⁵Era bare aemto pak, ara aemansa tapirmi baemap owe takes fef aemamestem. Are siso wo fef andaekamimompemas emes tamen are.

³⁶Banamek ataiapaaray. Atakam Allah ajanimaaray. Erarawa tare era aemamestas pak takes, jak fiak aememtemakam. Tanom, Asamot Anakot Ajaoreme Ipit, bipu baemem, jak fiak aememtemakam.” Yesus emes atakam aesimen.

³⁷Emesare. Juiin afaafeaye, Armat Ipit, Allah Tame bomon atakam aememtama ajaien. Eam ararawa, Are era fami juas Saitun oup aesosa ajaie, wanam ise isita ajaien.

³⁸Tomnak ararawa, owe takes awasita ajaiesen. Are Allah Tame bomon ajiia ajaiesen. Are, aatakam jane bajie, Armat Ipitpu ambaroma ajaiesen.