Read Casuarina Coast Asmat LUKAS 23 Bible Online

LUKAS 23 - Casuarina Coast Asmat bible

LUKAS 23

¹Emesare. Era owe takes awasitesen. Are Yesus, Pilatus bipu atomasesen.

²Are Yesus ajaos pak atakam akoresen. “Dare ara aemema Ipit, pemerintah atakam baoo, ataane dasman aweomero aporom. Are owe, pemerintah atakam asakamtame uang, Kaisar batetam, atii ate. Are atakam akore, ‘Dere Allah Aeremtaere Ipit, Derare. Erarawa Dere owe baomep Ipit.’ Emes atakam aesime.” Era owe emes atakam aesimesen.

³Pilatus arawa, Yesus ajateporen. “Wore Yahudi owe araja ipit ape?” Emes atakam aesimen. Armat Ipit arawa, “Emesare, wonom emes atakam womba akoremarem.” Emes atakam aesimen.

⁴Pilatus arawa, atakam Allah Tame pak baem owe daytuam, owe tananeam, akoromen. “Ara aemema Ipit jaos ipit apok apormin.” Emes atakam aesimen.

⁵Era owe ere, atakam fiak akoresen. “Armat Ipit atakam era Yudea tapirmi owe takes aememtamum. Emesare Are era owe, daytinak aotutumum. Bonak ere, Are Galilea tapirmi owe atututume. Japen arawa, ara asan oweam atutume.” Emes atakam aesimesen.

⁶Pilatus emes atakam jane ajie ere, are ajateporen. “Ara aemema Ipit, Galilea Ipit ape?” Emes atakam aesimen.

⁷Emesare, Yesus Herodes tapirmi baomep Ipitin. Pilatusam emes aporen. Emes aporerawa, are Yesus Herodespu ambirimemomen. Era bare Herodesam Yerusalem aemapen.

⁸Herodes Yesus bi apore ere, jak akotnak aememen. Are Yesus aemaarir pak, jane emejien. Emesare, are Yesus bi bapor, jak tarai aseseromaaririn. Are Yesus jinim bae pak bapor jak aseseromaaririn.

⁹Emesare, Armat Ipit atakam Yesus daytinak ajateporen. Yesus ere, atep bajit apoknaken.

¹⁰Me Allah Tame pak baem owe daytuam, Musa Basakamtam Atakam baememtam oweam, era asan aememesen. Are Yesus jaos ipit, atakam daytinak akorea ajiesen.

¹¹Herodesam, atentara oweam, Yesus tame atakam akoromesen. Anom Armat Ipit wote awotomesen. Are raja baju, Armat Ipit ajiimemesen. Me Herodes arawa, Yesus Pilatuspu aofasimosomen.

¹²Emesare, era bare taka Herodes anama Pilatus dip ajamisiramemisen. Bonak ere, are bifane ajamfeamemisen.

¹³Emesare. Pilatus Allah Tame pak baem owe daytuam, kapar oweam, bambi oweam, ajarisimapomen.

¹⁴Are atakam era owe akoromen. “Tare ara aemema Ipit debipu atoomdaetamenkum. Tanom atakam akoromenkum, ‘Ara aemema Ipit owe aotutumum.’ Emes atakam aesimenkum. Denom atakam Armat Ipit era taatakam akoromenkum pota pak takes tabipu ajateporkoromey. Dere ere, ara Ipit emes jaos pak apoknak aporey.

¹⁵Herodesam emes taka aemar. Are Armat Ipit aofasimtamaro. Armat Ipit batatii, emes jokoman pak baem apoknak.

¹⁶Emesare dere owe Armat Ipit bambi wusup bata atakam asakamtamtemin, wanam ataejisimtamtemin.” Emes atakam aesimen. [

¹⁷Emesare. Tahuniin tahuniin, era pakambwi bare ere, owe, Pilatus, buji tame bomon baemap ipit taka bataejisimtam, atakam ajanima ajaiesen. Armat ipit arawa, era ipit taka ataejisimtama ajaien.]

¹⁸Era owe takes ere, atakam awar afaketaaesen. “Ara aemema Ipit batatiia. Me Barabas ataejisimtamaro.” Emes atakam aesimesen.

¹⁹Bonak ere, era kota owe pemerintah owentakam takan aemesen. Barabasam era owentakam ajamemen. Are owe atatiien. Me pemerintah emes apores, wanam Barabas buji tame bomon ataejiimesen.

²⁰Emesare, Pilatus, Yesus bataejisim, jak aseseromen. Ararawa atakam era owe aokoromen.

²¹Era owe ere, atakam aofaketaaesen. “Ara Ipit salib wus oup atatopomey! Ara Ipit salib wus oup atatopomey!” Emes atakam aesimesen.

²²Wanam Pilatus atakam era owe aokoromen. “Ara Ipit ere, apa pota pak eme? Dere ara Ipit batatii, emes potanak pak baem apok apormin. Emesare, dere owe Armat Ipit wusup bambi bata atakam asakamtamtemin, wanam asurumjisimtemin.” Emes atakam aesimen.

²³Era owe ere, atakam fiaknak Pilatus ajanima ajaiesen. Are atakam afaketaaesen. “Ara Ipit salib wus oup atatopomey!” Emes atakam aesimesen. Emesare, Pilatusam era owe atakam ji aeen.

²⁴Are era owe atakam fiak ajanimes pak baemtam, atakam asakamtiien.

²⁵Barabas ere, buji tame bomon ataejimes ere, are pemerintah owentakam aeme, wanam owe atatiie aren. Pilatus arawa, era atakam ajanimes ipit ataejisimtamen. Are Yesus era owe aotasimemomtamen. Are era owe abimak binip atakam jipu baem, emes aotasimemomtamen.

²⁶Era owe Yesus atomases ere, are kota Kirene ipit juas Simon ban akimomesen. Era ipit kebun aite wanam kota baesos aememen. Owe salib era ipit sep ataetiiesen. Are atakam asakamtamesen. “Wore salib bataerey! Yesus fe asaramey!” Emes atakam aesimesen.

²⁷Owe tananenakam Yesus fe asaramesen. Tapesam aren. Era tapes, Armat Ipit jier bate daytinak ambatomesen

²⁸Yesus ere, era tapes bimin awaiomen. “Tare Yerusalem tapese! Tanom bate Dera bamatom bas. Tare ere, tadamo jier anama tajii jier bate ambatay.

²⁹Baporay! Era aamsekunaoto bare ere, owe emes atakam akoretemas. ‘Era peree tapes, era jii bapeap apoknak tapes, era jii aoo bandam apoknak tapes, ere asan akot!’ Emes atakam aesimtemas.

³⁰Era baream owe atakam daytu fami akoromtemas. ‘Dapu asakendaeay!’ Emes atakam aesimtemas. Are atakam koser fami akoromtemas. ‘Andaepurimomparoay.’ Emes atakam aesimtemas.

³¹Emesare, Dere dati wus tamen. Tare ere, sa wus tamen. Ara owe ere, emes Dera ajurusumtanis, tare ere, daytinak ajurusumteman.” Yesus emes atakam aesimen.

³²Owe, wan ipit amnuk, Yesus takan batatii, atomasesen. Era ipit amnuk, jokoman ipit amnuken.

³³Emesare. Are asan juas Dambir Owe Kuus Emak Asan ambaremes ere, are Yesus salib wus era asan apautiiesen. Are era jokoman ipit amnuk, salib wus oup ataetopomesen. Are wan ipit Yesus bo poman apa salib wus oup ataetopomesen. Are wan ipit Yesus tamo poman apa salib wus oup ataetopomesen.

³⁴Yesusam atakam akoren. “Dot! Ara owe aemmas pak amsam apok. Emesare adosa bimak binip ajanimemtamey.” Emes atakam aesimen. Era oweam eka koser andaetaatiiesen. Era eka koser aemtas pak baporomtam pak. Erarawa are Armat Ipit apakaian, era eka koser aporomtame pak jipu, sai asaiamotesen.

³⁵Owe tananeam era asan aememesen. Are banamek asiromesen. Era kapar owe ere, Yesus tame atakam akoromesen. “Era ipit wan owe ajortaere. Are Allah Aeremtaere Ipit apaye, Are amba bajoremto.” Emes atakam aesimesen.

³⁶Era tentara oweam, Armat Ipit wote awotomesen. Are Yesus ambaromes, wanam asesa anggur bwi ajiromemtamesen.

³⁷Are atakam akoromesen. “Wore Yahudi owe araja Ipit apaye, Wonom womba ajorempem.” Emes atakam aesimesen.

³⁸Oweam juas aeapomes, wanam era juas Yesus kuuspu atemetetaapomes. “Ara Ipit Yahudi Owe Baomep Ipit arare.” Emes atakam aeapomesen.

³⁹Era owe salib wus oup ataetopomes jokoman ipit taka, pota atakam Yesus akoromen. “Wore Allah Aeremtaere Ipit apaye? Wonom Womba ajoremey! Wonom dara ajortaeraro!” Emes atakam aesimen.

⁴⁰Me wan ipit ere, era ipit ajatemotaeren. “Wore Allah ombare apoke? Owe wonom, Armat Ipitam, awar bajurusum, atakam asakamtiiares.

⁴¹Me dara bajurusum ere, akot. Are jokoman aemomum pak biti ajimmaroas. Ara Ipit ere, jokoman pak baem apok.” Emes atakam aesimen.

⁴²Era ipit arawa, “Yesus! Wore owe baomep Ipit andaetem, de bimak binip ajaniman.” Emes atakam aesimen.

⁴³Yesus arawa, “Atakamnak, wore waa era jiinenak baememaar tapirmi De takan aemaptemarem.” Emes atakam aesimen.

⁴⁴Emesare. Jok ere, jam 12 apaye aememesen. Era tapirmiam jiiti atamtiien. Jiiti atamtiie, jam 3 ajiiren.

⁴⁵Jeeam basaramapom apoken. Allah Tame jimsap kainam, jamnuk aketepen.

⁴⁶Wanam Yesus atakam daytu afaketaeren. “Dot! Dere deanakot ipit Wora atetammin.” Emes atakam aesimen. Are emes atakam akorerawa, dambir aemen.

⁴⁷Tentara komandan ipit era pak apore, are Allah tere aeomen. “Atakamnak! Ara Ipit jokoman pak baem apoknak!” Emes atakam aesimen.

⁴⁸Era pak bapor ajarisiemes owe tanane, era aemes pak aporesen. Apores arawa, jak pota aptam, tame aesosteteresen.

⁴⁹Bonak ere, Yesus, Galilea tapirmi ajinaoe ere, wan tapesam ajamkaiesen. Era tapesam, Yesus amsam owe takesam, era pak takes banamek setep apok asiromesen.

⁵⁰Emesare. Owe juas Yusufen. Armat ipit, Yahudi Agama Atakam Bajamsakamamtii Owe wan ipit taka araren. Are owe turu anama owe akoten.

⁵¹Are Yahudi Agama Atakam Bajamsakamamtii Owe era atakam ajamsakamamtiies pakam, era aemes pakam, pota ajien. Armat ipit kota Arimatea ipitin. Era kota, Yudea tapirmi kota. Are Allah aowe aomepto, banamek apermaaririn.

⁵²Armat ipit Pilatus bipu ambaromen. Are dambir ipit bataer atakam ajanimen.

⁵³Are era dambir ipit asurumdaeme, wanam akot kain biramo ajikitiien. Bonak ere, are fami eka jipa dambir asan asisien. Oweam dambir owe era eka jipa bomon bajiitaetiipor apoken. Emesare, Yusuf era dambir ipit era eka jipa bomon ajiitaetiien.

⁵⁴Era bare, Yahudi Owe Samayen Bare pak bafaafamapom baren. Era Yahudi Owe Samayen Bare, ere setepnaken.

⁵⁵Me Yesus Galilea tapirmi takan ajinaoes tapesam Yusuf fe asaramesen. Are era dambir asan aporesen. Are Yusuf era dambir ipit ajiitaetiie aporesen.

⁵⁶Ararawa, atame aesosesen. Tame aesoses arawa, pinim akot pakam, pinim akot minyak am, afaafamapomesen. Yahudi Owe Samayen Barerawa, are Musa Basakamtam Atakam jipu kais andesen.