Read Casuarina Coast Asmat LUKAS 24 Bible Online

LUKAS 24 - Casuarina Coast Asmat bible

LUKAS 24

¹Emesare. Are Hari Minggu aemapesen. Tomnak, are era dambir asan aesosesen. Are era afaafamapomes pinim akot pakam atuomasesen.

²Are owe era eka jipa dambir asan jimsap eka aparamosomes aporesen.

³Me, are era eka jipa bomon ajiies ere, era dambir ipit era asan apok aporesen.

⁴Era tapes era pak bimak binip arke taometetaramapes, jipit amnuk abipu ameteemememisen. Apakaianam sarenaken.

⁵Era tapes, ere ombare aememesen. Are jimas ajiremesen. Era ipit amnukam, atakam era tapes akoromemisen. “Tare jatiaptam ipit ara dambir owe asan andimarmakam, ere wama tamenem?

⁶Armat Ipit ara asan apok. Etejaorwasita! Armat Ipit Galilea aememe ere, Are atakam tare emekoretamen. ‘Owe, Asamot Anakot Ajaoreme Ipit, dosa owe aotasimemomtamtemas. Owe, Armat Ipit, salib wus oup atatopomtemas. Bare bamintep arawa, ajaorwasittem.’ Emes atakam aesimtamen. Tanom era pak bimak binip ajanimomay!” Emes atakam aesimemisen.

⁷

⁸Era tapes arawa, Yesus akore atakam, bimak binip ajanimtaeresen.

⁹Are era dambir asan aitesen. Ararawa, era pak takes atakam abajamkai owe 11am, wan owe takesam, aesimtamesen.

¹⁰Era tapesam, kota Magdala taot juas Maria. Yohana. Yakobus arsoot juas Maria. Emes tapes are. Me wan takan aememes tapesam, era pak atakam takes, Yesus bajamkai owe aesimtamesen.

¹¹Era Yesus bajamkai owe ere, emes atakam pote atakam jiraoemesen. Are era atakam atakamnak apok jiraomesen.

¹²Petrus ere, awasiten. Are era dambir asanpu ja akukosen. Are bap asaitendae, wanam era dambir asan jimsap asieporen. Are erakain taka aporen. Ararawa, aoesosen. Are era aemes pak takes bimak binip arke atetaramen.

¹³Emesare. Era bare taka, Yesus bajamkai ipit amnuk, samane juas Emaus tamsanpu ajaremisen. Era tamsan baemem, wanam Yerusalem baesos, era bokot jirao kilometer poman bai taka.

¹⁴Are era owe aemes pak takes atakam ajamkoramemisen.

¹⁵Atakam taomekoremapemis, Yesus era ipit amnuk ambaromen. Are era owe takan ajaresen.

¹⁶Era ipit amnuk ere, Yesus aporemisen. Me, are Yesus apok jiraoememisen.

¹⁷Yesusam atakam era ipit amnuk akoromen. “Tare apa atakam korejarmankum?” Emes atakam aesimen. Era ipit amnuk arawa, asememisen. Are bi wuturu aemememisen.

¹⁸Wan ipit juas Kleopas arawa, atep ajiten. “Toam, joonam, Yerusalem aemes pak, wo taka womsam apoke? Me wan jaki owe takes ere, amsam.” Emes atakam aesimen.

¹⁹Yesus arawa, era ipit amnuk ajateporen. “Era aemes pak apa pakem?” Emes atakam aesimen. Era ipit amnuk arawa, “Nasaret Ipit juas Yesus atakam. Armat Ipit Allah atakam bakoretam ipit aememe. Are Allah bipuam, era owe takes bipuam, daytinak pak aemaarir. Atakam fiaknakam akoretamaarir.

²⁰Me daAllah Tame pak baem owe daytuam, dakapar oweam, era Ipit era Roma pemerintah aotasimemomtames. Ararawa, Armat Ipit batatii atakam ajamsakamamtiies. Are Armat Ipit salib wus oup atatopomes.

²¹Danom, era Ipit ara aememom Israel samane bajortaer, jiirey aeemaarum. Era pak ere, joon aemes.

²²Wanam, dajoo tapes bamintep jinim aetamaroas. Tomnak are dambir asan aesosares.

²³Are era dambir ipit era asan apok aporares. Ararawa, aofasiendaeares. Atakamam aokoromaroas. ‘Dare pak bambi aporarom. Ere malaikat. Era malaikatam, “Yesus jatiaptam aemeta,” Emes atakam aesimares.’ Era tapes emes atakam aesimtamaroas.

²⁴Me wan takan aemapmarom owerawa, era dambir asan aesosares. Are era tapes atakam, atakamnak aporaresen. Me, are Armat Ipit bi bapor apoken.” Era ipit amnuk emes atakam aesimemisen.

²⁵Me Yesus arawa, “Tare bimak binip janda owe aememmakam! Bonaknak ere, Allah atakam bakoretam owe, asep bare aemto pak, atakam aeapomes. Tare ere, era atakam airumnak ambesemmakam!

²⁶Allah Aeremtaere Ipit bajirisem, wanam Allah daytu Ara atemtemtem, emes atakam bonak asakamtiie.” Emes atakam aesimen.

²⁷Me Musa aeapome atakamam, Allah atakam bakoretam owe aeapomes atakam takesam, Alkitab wan atakamam, ere Yesus atakam are. Armat Ipitam emes atakam takes era ipit amnuk baso akoromen. Are Musa aeapome atakam bonak akoren. Era wan atakam arawa, asep akoren.

²⁸Emesare. Are bin ajiemes tamsan setep asisiomesen. Yesus ere, akan bajakos aememen.

²⁹Era ipit amnuk ere, Yesus atakam fiak ajanimemisen. “Me datame pajamsesey. Emesare, jiiti setep. Ju basapiendaem.” Emes atakam aesimemisen. Erarawa Yesus atame ajamjiie ise ajamisiten.

³⁰Emesare, Armat Ipit amos banda era owe takan aemapesen. Are amos ataeren. Amos ataererawa terima kasih atakam Allah akoromen. Are era amos akookome wanam era owe sai asaietamen.

³¹Era ipit amnuk arawa, banamek awaremisen. Are Armat Ipit amsamen. Armat Ipit arawa, apakapiosen.

³²Era ipit amnuk arawa, atakam ajamkoramemisen. “Me Armat Ipit era waut, atakam dara akoromaro. Are Alkitab atakam baso akoromaro. Emesare, danom jak tuku ajiemamum.” Emes atakam aesimemisen.

³³Era ipit amnuk arawa, ametewasitemis, wanam Yerusalem aofasiemisen. Are abajamkai owe 11am, takan aememes oweam, ajarisiapes aporemisen.

³⁴Era oweam atakam era ipit amnuk aesimtamesen. “Tuhan, ere etejaorwasita! Are Simon bipu ajisomar!” Emes atakam aesimesen.

³⁵Era ipit amnuk arawa, era waut ajaremis pak atakam akoremisen. Are Armat Ipit era amos akookome pakam, are Armat Ipit amsam aemapemis pakam, emes atakam akoremisen.

³⁶Era owe emes atakam taomekoremapes, Yesus era owe bomon ametejateomen. “Selamat! Asan akota!” Emes atakam aesimen.

³⁷Era owerawa, atamipiapesen. Are ombarenak ambaresen. Are tasir ipit jiraoemesen.

³⁸Armat Ipit ere, atakam era owe akoromen. “Era ajirisemmakamam, era bimak binip arke atetarammakamam, apa pakem?

³⁹Me deban anama debai baporani. Dere Yesus, ere Derare. Baososomporani. Tare, Dere damo dasa aptamam, embak aptamam, apormakam. Tasir owe ere, emes apok.” Emes atakam aesimen.

⁴⁰Emes atakam akorerawa, Are aban anama abai era owe asumpirimen.

⁴¹Era oweam jak akotnak aememesen. Are jinim daytinak aeesen. Me, Are era atakam eemnak bamesemkorom apoken. Armat Ipit arawa, “Tare ara asan banda pak ape?” Emes atakam aesimen.

⁴²Era owerawa, enamo dasa jise kope Armat Ipit atetamesen.

⁴³Armat Ipitam enamo dasa era owe bipu ataenen.

⁴⁴Armat Ipit atakam era owe aokoromen. “Dere tare takan aemapaarum, Dere japen aemo pak, atakam tare emekoretamo. Emesare, Musa aeapome Basakamtam Atakam wan atakamam, Allah atakam bakoretam owe aeapomes buku wan atakamam, Masmur buku wan atakamam, ere deatakam. Denom era buku deatakam akoremar pak takes jipu aemmin.” Emes atakam aesimen.

⁴⁵Armat Ipit arawa, Alkitab atakam bimak binip bajanimomem, bimak binip baso era owe atetamen.

⁴⁶Are atakam era owe aokoromen. “Me Alkitabam, ‘Allah Aeremtaere Ipit ajirisemtem. Bare bamintep arawa, ajaorwasittem.

⁴⁷Oweam emes atakam bakoretamtas: “Armat Ipit aeme pak baporay. Emesare, tare dosa bamakemtakam, wanam Allah atakam ji aeemtakam, Allah tadosa, bimak binip, ajanimemtamteman.” Emes atakam baesimtas. Are era atakam Yerusalem bonak ato batakamkoretamtas. Wanam are era atakam era samane takes bakoretamtas.’ Alkitab emes atakam aeapoma.

⁴⁸Tare era pak takes aporekem. Ateman batam owe tarare.

⁴⁹Dere, Deritipit ataaji aee pak, tara ataendaemtamtemin. Tare ere, ara kota emes aemapay— Allah afiak pak tara atetamtan era bare ajiirea.” Yesus emes atakam aesimen.

⁵⁰Armat Ipit arawa, era owe kota tasan atoomjise— era Betania tamsan setep ajiire aren. Are ban oup ataetopomen. Ban oup ataetopomerawa, Are Allah, era owe, asan akot baem, atakam akoromen.

⁵¹Emes atakam akoromerawa, Are era owe beken ajiemen. Are Surga oup atemeten.

⁵²Era oweam, Armat Ipit tere aeomesen. Are jak akot aptam Yerusalem aofasiemesen.

⁵³Are Allah Tame bomon, Allah akot, emes atakam akoretamaarisin.