Read Casuarina Coast Asmat LUKAS 4 Bible Online

LUKAS 4 - Casuarina Coast Asmat bible

LUKAS 4

¹Emesare. Yesus, Yordan ju aefasien. Me Allah Jipam, Yesus aoemomemkoromen. Me Allah Jip arawa, Yesus, tame apok asan, ise 40 ajitinomasen. Era asan, Bii Kapar Ipit Yesus, aemporen. Era asan aememaarir, Yesus, banda pak ambaseaaririn. Me ise 40 aememkoromerawa, Armat Ipit amosto aememen.

³Bii Kapar Ipitam atakam Armat Ipit akoromen. “Wore Allah Andep apaye, ara aemansa eka, amos bajaorames, atakam asakamtampem.” Emes atakam aesimen.

⁴Yesus arawa, “Alkitabam, ‘Asamot owe jatiaptam baemem, are banda pak taka apok.’ Emes atakam akorem.” Yesus emes atakam aesimen.

⁵Bii Kapar Ipit arawa, Armat Ipit oupnak fami atoomtemeten. Are tapirmiin tapirmiin takes ameteporomtamen.

⁶Are atakam Yesus aokoromen. “Dere ara tapirmiin tapirmiin takesam, ara akot pak takesam, doemomey. Dere ara pak, owe batetam akot ajitey, ere atetamtemin. Emesare, dere ara pak Wora batetam.

⁷Wore, tere dera aeomtanim, ara pak takes aoemomemtemarem.” Emes atakam aesimen.

⁸Yesus arawa, “Alkitabam, ‘Tuhan woAllah. Wore Armat Ipit tere baeomey. Karai A taka aeetamey.’ Alkitab emes atakam akorem.” Emes atakam aesimen.

⁹Bii Kapar Ipit arawa, Yesus, Yerusalem aesomase, wanam are Armat Ipit Allah Tame oupnak wone biak atemetetaemomen. Are atakam aokoromen. “Wore Allah Andep apaye, Wore era bap ajondaey.

¹⁰Emesare, Alkitabam, ‘Allah amalaikat tanane, banamek Wora bataiomem, atakam asakamtamtem.’

¹¹Wanam, ‘Malaikat owe tanane, ban Wora atoomemtemanis. Me wobai, eka bapakam-ombar.’ Alkitab emes atakam are.” Bii Kapar Ipit emes atakam aesimen.

¹²Yesus arawa, “Alkitabam, ‘Tuhan woAllah. Wore Armat Ipit baempor bas,’ Emes atakam akorem.” Yesus emes atakam aesimen.

¹³Emesare, Bii Kapar Ipit, Yesus aemporkoromerawa, are Yesus beken ajiosen. Are ere, asep bare, asan akot aporto, are Yesus boempor aren.

¹⁴Emesare. Yesus, Allah Jip fiak pak aptam, Galilea tapirmi aofasiendaen. Era tapirmi owe takes, aatakam akoresen.

¹⁵Armat Ipitam, era owe asamayen tame bomon, atakam, owe aememtamen. Era owe takesam, Armat Ipit, owe akotnak, atakam akoresen.

¹⁶Armat Ipit, kota Nasaret aesosen. Bonak ere, Are sira erapu awotemen. Armat Ipit, era Yahudi Owe Samayen Bare asamayen tame, ajiiapa ajaien. Emesare, era Yahudi Owe Samayen Baream, Are era tame aojiiapen. Are Alkitab baca baem awasiten.

¹⁷Era Yahudi owe samayen tame banamek batai ipit, Allah atakam bakoretam ipit juas Yesaya aeapome buku, Yesus atetamen. Yesus arawa, era buku awaramome, wanam atakam taka andimartaeren. Era atakam ere:

¹⁸“Tuhan Jip, Dere takan aememman. Armat Ipit, Allah Akot Atakam, era pak apok owe bakoretam ataemomen. Armat Ipit, atakam bakoretam ataendaemen. ‘Owe tare tau ataaen. Me, aoesostemakam. Me tabanamek kapie owe, banamek awawaramemtemakam. Tuhan dare asan akot aemtaro tahun, ere ememanse.’ Tuhan emes atakam bakoretam Dera ataemomen. Oweam asan pota wan owe aemas. Tuhan ere, Dere era asan pota owe, asan akot baememom ataemomen.” Emes atakam baca aemtamen.

²⁰Yesus arawa, era buku akapimtiie, wanam era Yahudi owe samayen tame banamek batai ipit aotetamen. Aotetamerawa, andaepakiape atakam era owe baememtam aren. Era Yahudi owe samayen tame bomon aemapes owe takes, banamek, Armat Ipit asirompesen.

²¹Armat Ipitam atakam era owe akoromen. “Dere waa era jane ajimakam Alkitab atakam jipu aemmin.” Emes atakam aesimen.

²²Era owe takes arawa, “Emesare, Armat Ipit atakamnak.” Emes atakam aesimesen. Are era atakam akotnak akore, jinim daytu aeesen. “Armat Ipit ere, Yusuf andep apaye?” Emes atakam aesimesen.

²³Yesus arawa, atakam, era owe akoretamen. “Tanom emes atakam Dera akoromtemankum: ‘Dokter! Wodamo womba ajaoremey. Era Kapernaum aemem pak, atakam jane ajiom. Ara asan ere, wotapirmi. Wonom era pak ara asan aemey.’ Emes atakam aesimtemankum.

²⁴Atakamnak, asaman owe, Allah atakam bakoretam ipit tere baeom apok aememas.

²⁵Dere atakamnak tara aokorommin. Elia aememe ere, era Israel tapirmi tano tapes tanane aemapesen. Tahun 3 setengah te apoken. Era tapirmi owe takesam amosto daytinak aemapesen.

²⁶Allah ere, Elia, Sidon tapirmi kota juas Sarfat tano taotpu ambirimemomen. Are, Elia, wan owepu bamirimemom apoken.

²⁷Wanam, Elisa aememe ere, owe ombare bamarem damo pitini potanak owe tanane aememesen. Era damo akot aoememes owe ere, era Siria tapirmi ipit juas Naaman taka aren.” Emes atakam aeapomen.

²⁸Era Yahudi owe samayen tame bomon aemapes owe, emes atakam jane ajies, are jak ambapnak aemapesen.

²⁹Are awarimwasites, wanam Yesus era kota tasan awotapemjisimesen. Era kota ere, fami oupen. Era owe Yesus era fami oup foppu awotapemesen. Are Armat Ipit, era asan bajumdaem aememesen.

³⁰Me, Armat Ipit ere, era owe waut atarame, wanam aesosen.

³¹Yesus arawa, Galilea tapirmi kota juas Kapernaum aesosen. Yahudi Owe Samayen Bare ere, Are atakam aememtamen.

³²Era oweam, era aememtame atakam, fiaknak aporesen. Erarawa jinim daytu aeesen.

³³Era Yahudi owe samayen tame bomon, bii jak bomon aemanse ipit aemapen. Are atakam daytu afaketaeren.

³⁴“Yesus! Wore Nasaret Ipit. Wore wama pak emtaroam? Wore dara bajurusumosomkorom ape? Wore demsam. Wore Allah ataendaeme turunak Ipit.” Emes atakam aesimen.

³⁵Yesus ere, atakam era bii asakamtamen. “Atakam bas! Wonom era ipit jak bomon ajisey!” Emes atakam aesimen. Biirawa, era ipit era owe waut, bap andaebumtiien. Are era ipit jak bomon aekejisen. Anom era ipit bajurusumapom apoknaken.

³⁶Era owe takesam, jinim daytu aeesen. Anom atakam ajamkoramesen. “Emes atakam wama tamenem? Armat Ipit atakam fiaknak Ipit arare. Emesare Are atakam era bii asakamtamum. Era biirawa, ajismas.” Emes atakam aesimesen.

³⁷Emesare, era tapirmi ere, era samaniin samaniin owe, Armat Ipit atakam akoresen.

³⁸Emesare. Armat Ipit awasite, wanam era Yahudi owe samayen tame ajisen. Are Simon tame ajiien. Simon anapot damo daytinak aemansen. Era oweam Yesus era taot damo baoromtam atakam ajanimesen.

³⁹Armat Ipit era taot ise asanpu ajieme, wanam era damo ambap bakari atakam asakamtamen. Emesare, era taot damo ajifamapen. Are ametewasite, wanam banda pak era owe atetamen.

⁴⁰Emesare. Ju atie ere, owe takes ajoo owe damo pota owe, Yesuspu atoomtinesen. Era owe atat kupis damo potan. Armat Ipit arawa, ban era damo pota owe damo ten ataetiia ajaien. Are era owe ajaoromtaera ajaien.

⁴¹Wanam, bii, owe tanane jak bomon aewarimjisesen. Are atakam afaketaaesen. “Wore Allah Andep aememem!” Emes atakam aesimesen. Armat Ipit ere, era bii ajatemotaeren. “Tare atakam bas!” Emes atakam aesimen. Armat Ipit, era bii, are Allah Andep amsam aporen.

⁴²Jo apuerawa, Armat Ipit, era kota beken ajiosen. Are tame apok asan aesosen. Me owe tanane ere, Armat Ipit andimarporesen. Are Armat Ipit ambetemesen. Ambetemes arawa, akekemporesen. Armat Ipit wan asan baesos-ombaren.

⁴³Armat Ipit ere, atakam era owe aesimtamen. “Dere, Allah owe baomep Akot Atakam, wan kota takes bakoretam aemin. Allah Dere emes baem ataendaemen.” Emes atakam aesimen.

⁴⁴Emesare, Armat Ipit era Yudea tapirmi Yahudi owe samayen tame tanane bomon akoretama ajaien.