Read Casuarina Coast Asmat LUKAS 5 Bible Online

LUKAS 5 - Casuarina Coast Asmat bible

LUKAS 5

¹Emesare. Yesus jupima aememen. Jupima aememe ere, owe tanane Allah atakam jane bajie, Armat Ipit damo akukurumamtaaesen. Era jupima fo daytu juas Genesareten.

²Ti jamnukam era ju pima aemesemisen. Armat Ipitam era ti aporen. Bonak ere, jimi bapie owe, bwi apuesesen. Are ajimi bwi aeosomesen.

³Armat Ipit wan ti asojuuen. Ere Simon atiren. Yesus, owe, era ti, buppepe bajirisisimesem, atakam ajanimen. Ararawa, era ti bomon andaepakiape, wanam atakam era owe aememtamen.

⁴Are atakam era owe tanane akoretamen. Ararawa, atakamam Simon akoromen. “Era kakotepu jiresay, wanam tajimi, enamo bapietaer, ataepuumay.” Emes atakam aesimen.

⁵Simon arawa, atep ajiten. “Guru! Eam ju jirao ere, aemporismarom apok. Danom jimi enamo bojuames apoknak. Me, Wore atakam wosakamtammanim. Erarawa dere jimi bwi ataepuummin.” Emes atakam aesimen.

⁶Era owe era pak aemes arawa, enamo tananenak apietaeresen. Me ajimiam bapipikimken takan.

⁷Emesare, ajoo owe wan ti aemesesen. Are, era owe, era jimi takan bajimtaertam, ban bwe aetaeresen. Era owerawa, ajinaoesen. Era ti jamnuk, enamo apitimkoromesen. Era tirawa, bwi bafawumompuken aemesesen.

⁸Me Simon Petrusam, takan aememes oweam, era pak takes aporesen. Erarawa jinim daytu aeesen. Sebedeus andep amnuk juas Yakobus anama Yohanes, jinim daytu aeemisen. Are Petrus karai takan owe araren. Emesare, Simon Petrus, Yesus bipu jindi andaepuapen. Ararawa, atakam akoromen. “Tuhan! Dere dosa ipit! Wore debipu baemem bas. Wopa asan aesosey.” Emes atakam aesimen. Yesus arawa, atakam Simon akoromen. “Ombare bas! Waa bare ajiire aemansar ere, wore asamot owe enamo tamen bapietaa ipit aememtemarem.” Emes atakam aesimen.

¹¹Emesare, era ti wasen ajesesimtiiesen. Are aapak takes beken ajioses, wanam Yesus ajamkaiesen.

¹²Emesare. Yesus, era asan kota taka aememe, owe ombare bamarem damo pitini potanak ipit ambaromen. Armat ipit Yesus apore, wanam abipu bap andaepareamsen. Ararawa, atakam fiak ajanimen. “Wore fiaknak! Wore akot aportem, Wore damo akot dera petetaman.” Emes atakam aesimen.

¹³Yesus arawa, ban ajiraome, wanam era ipit damo ten ataetiien. “Dere emes akotnak. Wore damo akot ajaoremey.” emes atakam aesimen. Yesus emes atakam akorerawa, era damo pitini potanak, era ipit damo ameteesosen.

¹⁴Yesusam atakam asakamtamen. “Wore ara pak atakam wan owe baesimtam bas. Worarawa, Allah Tame pak baem ipit akan ajakosey. Are wora baoorportan. Worarawa, Musa basakamtam atakam asakamtame pak, Allah atetamey. Era pak wore damo akot aememarem, emes baporomtam are.” Yesus emes atakam aesimen.

¹⁵Emesare, era samaniin samaniin, Yesus atakam andi afufuosen. Owe tananenak, aatakam jane bajie ajarisia ajaiesen. Damo oweam, Armat Ipit, damo baoromtam ajarisia ajaiesen.

¹⁶Armat Ipit ere, aotasieme, wanam tame apok asan aesosen. Are atakam Allah ajanimen.

¹⁷Emesare. Era bare, Yesus atakam aememtamen. Parisi oweam, Musa Basakamtam Atakam baememtam oweam, era asan aemapesen. Era owe, Galilea owe saman takesam, Yudea owe saman takesam, kota Yerusalem aejinaoesen. Tuhan, era damo pota owe bajaoromtaa fiak pak, Yesus atetamaaririn.

¹⁸Owerawa, kam ipit atapini aptam atoomtinesen. Are era ipit tame bomon batoomjii, wanam Yesus bipu bandaetaetii aemporesen.

¹⁹Me, era asan ere, owe tananenaken. Erarawa are era ipit baemetoomjii asan apoken. Ararawa, era ipit era tame wone beak oup atoomtemetesen. Are era tame wone jafa atakamapomesen. Are era ipit tapini aptam, era owe tanane bomon, ataramdaemesen. Yesus bipu andaetaetiiesen.

²⁰Yesus arawa, era owe eemnak Ara bambesemkorom apore, wanam atakam akoromen. “Dere wodosa bimak binip ajanimemtammin.” Emes atakam aesimen.

²¹Me Musa Basakamtam Atakam baememtam oweam, Parisi oweam, bimak binip atetaramesen. “Are ta ipitim? Are Allah awar ememe? Emesare Are pota atakam daytu akorem. Dosa bimak binip bajanimemtam, ere Allah taka erare.” Emes bimak binip atetaramesen.

²²Yesus era owe bimak binip atetarames apore, wanam atakam akoromen. “Tare emes bimak binip apa tetarammakam?

²³Tene atakam ere, wama tamen atakamum? ‘Dere ere wodosa bimak binip ajanimemtammin,’ emes atakam are? ‘Bawasitey! Wonom bajarey,’ emes atakam are?

²⁴Me Asamot Anakot Ajaoreme Ipit, ara aemansa tapirmi owe dosa bimak binip bajanimemtam fiak aoemome. Dere tare emes pak baporkorom akot.” Emes atakam aesimen. Armat Ipit arawa, atakam era kam ipit akoromen. “Bawasitey! Wonom te! Wotapini bataerey!” Emes atakam aesimen.

²⁵Era ipit arawa, era owe bipu ametewasiten. Are era aemansaarir tapini ataere, wanam atame aesosen. Are Allah tere aeomen.

²⁶Era owe takes, ere, jinim daytinak aeesen. Are Allah tere aeomesen. Ombaream aememesen. “Dare waa akotnak pak apormarom.” Emes atakam aesimesen.

²⁷Emesare. Era pak aemkorome, Yesus aesosen. Are pemerintah uang bajanimtam karai ipit juas Lewi uang bajanimtam tame bomon aemape aporen. Armat Ipit arawa, atakam era ipit akoromen. “Dera jamkaian!” Emes atakam aesimen.

²⁸Emesare, era ipit awasite, wanam Yesus ajamkaien. Are aapak takes beken ajiosen.

²⁹Wanam, Lewi, atame, pakambwi daytu, Yesus aemtamen. Pemerintah uang bajanimtam karai owe tananeam, wan owe tananeam, era owe amos takan andesen.

³⁰Me Parisi oweam, Musa Basakamtam Atakam baememtam oweam, itim Yesus bajamkai owe akeomesen. “Tare, pemerintah uang bajanimtam karai oweam, era Yahudi agama pak tai aooes oweam, amos anama bwi takan andemakam, ere wama tamenem?” Emes atakam aesimesen.

³¹Yesus arawa, era owe atep ajiten. “Damo akot owe, dokter bajate apok aememas. Me damo pota owe taka, dokter ajateemas.

³²Dere, turu owe, dosa bamakem bajate bandae apok. Dere ere, jaos owe, adosa bamakem, me Allah atakam ji bae, bajate andaeo.” Emes atakam aesimen.

³³Emesare. Era owe, atakam, Yesus akoromesen. “Yohanes bajamkai owe, bare tanane, banda pak ambaseemas. Are bare tanane, atakam Allah ajanimemas. Me Parisi bajamkai oweam emes aememas. Me wobajamkai owe ere, amos anama bwi andeemas.” Emes atakam aesimesen.

³⁴Yesus arawa, atakam era owe aokoromen. “Ai petae ipit ajoo owe takan aemapmas apaye, owe ajoo owe amos bamase atakam basakamtam ape?

³⁵Asep bare ere, owe era ai petae ipit, ajoo owe waut aeresumtaertemas. Me ajoo owerawa, banda pak ambasetemas.” Emes atakam aesimen.

³⁶Yesus baetaa atakam era owe akoromen. “Owe, ai baju aip basakamtaer, wanam era aip, tarai baju ten bakekemapom, emes baempor apok. Are emes aemtas apaye, are era ai baju akamtaeremas. Me, era tarai baju aip awar apok aemamsem.

³⁷Owe, ai anggur bwi, tarai pitini bwi ese bomon baoweapompor apok. Owe, ai anggur bwi, tarai pitini bwi ese bomon aoweapomtas, era ai anggur bwi, era pitini ese, ataramomjisim. Anggur bwiam aokoameskoromum. Era pitini eseam andanaesuamsem.

³⁸Me, owe ai anggur bwi ai pitini ese bomon aoweapomemas.

³⁹Owe tarai anggur bwi andeemas, are ai anggur bwito apok aemememas. ‘Era tarai pak akot.’ Emes atakam aesimemas.” Yesus emes atakam aesimen.