Read Casuarina Coast Asmat LUKAS 6 Bible Online

LUKAS 6 - Casuarina Coast Asmat bible

LUKAS 6

¹Emesare. Yahudi Owe Samayen Bare ere, Yesus anama abajamkai owe gandum kebun aemjaresen. Me abajamkai owe ajares ere, anom era gandum eek, ametekokomtaaesen. Are era eek ban awururumes, wanam era eek andesen.

²Wan Parisi owe ere, atakam akoresen. “Era Yahudi owe Samayen Bare aemmakam pak, ere Musa Basakamtam Atakam aoomakam. Era aemmakam pak wama tamenem?” Emes atakam aesimesen.

³Yesus arawa, “Tare, Daut aeme pak, baca baem apok apaye? Are, atakan ajamememes oweam, amosto aememesen.

⁴Armat ipit kota juas Nob aememe ere, are era asan Allah Pitini Tame ajiiemen. Ajiiemerawa, Allah bipu ataetiitames amos ataenen. Wanam wan amos abajamkai owe sai asaietamen. Era amos ere, Allah Tame pak baem owe abanda amosen. Bambi owe, era amos bande apoken. Daagama basakamtam atakam emes atakam are.

⁵Me Asamot Anakot Ajaoreme Ipit, ere era Yahudi Owe Samayen Bare Armat Ipit aememem.” Emes atakam aesimen.

⁶Emesare. Wan Yahudi Owe Samayen Bare ere, Yesus Yahudi owe samayen tame ajiieme, wanam atakam aememtamen. Era asan ere, bo poman ban tapip ipit aemapen.

⁷Me Musa Basakamtam Atakam baememtam owe anama Parisi owe, Yesus, era ipit, Yahudi Owe Samayen Bare, bajaoromtaer apaye, banamek asiromesen. Are, “Yesus potanak pak aemum,” emes atakam bokore jak aseseromesen.

⁸Armat Ipit ere, era owe bimak binip amsamen. Ararawa, atakam era ban tapip ipit akoromen. “Bawasitey! Wore ara aememares owe takes bipu aememey.” Emes atakam aesimen. Emesare, era ipit awasite, wanam aememen.

⁹Yesusam atakam era owe akoromen. “Dere tara bajatepora. Dare era Yahudi Owe Samayen Bare Basakamtam Atakam ji aetam, dare wama pak emtam? Dare akot pak baem apaye? Pota pak baem apaye? Dare owe bajortaer apaye? Owe batatii apaye?” Emes atakam aesimen.

¹⁰Armat Ipit arawa, era afojeapes owe takes banamek atara atara ajien. Ararawa, atakam era ban tapip ipit aokoromen. “Ban bajiraomey!” Emes atakam aesimen. Era ipit emes aemerawa, aban ajaoremen.

¹¹Era owe ere, jak ambapnak apumapesen. Are atakam armamon ajamkoramesen. “Dare Yesus wama pak emtam?” Emes atakam aesimesen.

¹²Emesare. Era bare, Yesus, atakam Allah bajanim, fami oup atemeten. Are, era eam ju jirao, atakam Allah ajanimismapen.

¹³Jo apuameserawa, Armat Ipit, abajamkai owe ajaten. Are owe 12 aereremartaaen. Are era owe juas “Allah Akot atakam bakoretam bamirimemom owe” ajamemen.

¹⁴Era owe 12, Simon are. (Yesus, wan juas Petrus era ipit aemen.) Simon areot juas Andreas are. Yakobus are. Yohanes are. Filipus are. Bartolomeus are.

¹⁵Matius are. Tomas are. Alfeus andep juas Yakub are. Simon are. (Owe, Simon, agama fiak ipit, emes atakam akoresen.)

¹⁶Yakobus andep juas Yudas are. Yudas Iskariot are. Emes owe are. (Asep bare ere, Yudas, Yesus, jokoman owe aotasimemomtamen.)

¹⁷Emesare. Yesus, era owe takan andaesen. Andaes arawa, fami apok tapirmi asan aememesen. Me abajamkai owe tananenakam takan aememesen. Wan owe tananenak Yudea tapirmiam, kota Yerusalemam, kota jamnuk juas Tirus anama Sidon jupima tapirmiam, aejinaoesen.

¹⁸Era owe, Armat Ipit atakam jane bajieam, Armat Ipit era asan pota owe baoromtaaam, ajinaoesen. Armat Ipit jak bomon bii oweam ajaoromtaaen.

¹⁹Damo baorom fiak pakam Yesus damo aejisa ajien. Erarawa are era damo pota owe takes ajaoromtaa ajaien. Era owe tanane takes emes apores, wanam Armat Ipit damo ban bakurum aemporesen.

²⁰Emesare. Yesus abajamkai owe, banamek apeome, wanam atakam akoromen. “Tare pak apok owe, asan akot aemapmakam. Me tara baomep Ipit, ere Allah are.

²¹Me tare waa amosto aemapmakam owe, asan akot aemapmakam. Asep bare, ere, jak atukuaptemakam. Me tare waa bate ambatmakam owe, asan akot aemapmakam. Asep bare, ere, wote awotetemakam.

²²Wan owe tare Asamot Anakot Ajaoreme Ipit bajamkai owe aportan, are bifane afeomemteman. Are tara awotapemjisimteman. Are tame ateteman. Are tajuas pota aemtemas. Erarawa tajuas bojie apok aememtemas. Emes aemtan apaye, ere tare asan akot aemapmakam.

²³Era owe arfaisomar, Allah atakam bakoretam owe, emes taka aemesen. Tare ere, baporay! Allah era Surga oup, asan akotnak tara atetamteman. Emesare, era owe emes aemtan bare, ere jak akot aptam asopiay.

²⁴Tare pak daytu owe ere, asan potanak aemapmakam. Tare ere, tajak akot pak etetaetekem.

²⁵Tare waa jak atukuapmakam owe, asan potanak aemapmakam. Asep bare, amosto aememtemakam. Tare waa wote awotmakam owe, asan potanak aemapmakam. Asep bare, jak pota aemaptemakam. Tanom bate ambattemakam.

²⁶Owe takes atakam akot tara akoromtan apaye, tanom asan potanak aemapmakam. Era owe arfaisomaram, akot atakam, Allah atakam bakoretam pote owe, akoromesen.”

²⁷“Me deatakam jane ajimakam owee! Baporay! Me tajokoman owe afaimomay. Me bifane afeomememan owe, asan akot aemomay.

²⁸Tare, Allah, asan akot, era asan pota aeman owe batetam, atakam ajanimay. Me tara ajurusumtan owe, atakam Allah ajanimay.

²⁹Owe, era poman ake apakamtan apaye, wore poman akeam bowaiemtamey. Owe, wobaju kemeja ataertas, wore wobaju kausam atii bata bas.

³⁰Me atakam ajaniman owe takes, pak atetamey. Owe wopak ataertas, era pak botetam atakam bajanim bas.

³¹Tare, owe, asan akot tara baem akot aportakam apaye, tanom emes asan akot era owe aemomay.

³²Tare, tara afaimomman owe taka afaimomtakam, owe, tare owe akot, emes atakam bakore ape? Emesare, dosa oweam, aofaimemmas owe, afaimomemas.

³³Wanam, tare, asan akot tara aemman owe, asan akot aemtakam, owe, tare owe akot, emes atakam bokore ape? Emesare, dosa oweam emes taka aememas.

³⁴Wanam, tare, pak, owe atetamtakam, wanam tare era owe, pak, tara botetam banamek ataiaptakam, owe, tare owe akot atakam bokore ape? Emesare, dosa oweam, pak, dosa owe atetamemas, wanam era owe, emes daytu pak botetam, banamek ataiapemas.

³⁵Allah ere terima kasih atakam bakorom apok oweam, dosa oweam, asan akot aemum. Emesare, tanom tajokoman owe afaimomay. Era owe asan akot aemomay. Pak, owe atetamay. Wanam era owe, pak, tara botetam, banamek bataiap bas. Emes aemtakam, Allah asan akotnak tara atetamteman. Tanom era oupnak Allah arereisnak baem pak aemtemakam.

³⁶Me Taritipit, ere owe soro Ipit. Tanom owe soro, emes aememay.”

³⁷“Tanom, owe apota pak, atakam basakamtii bas. Allahrawa, tapota pak, atakam basakamtii apok aemtem. Tanom, ‘Wore pota pak aempem,’ emes atakam wan owe bakorom bas. Allahrawa, ‘Wore pota pak aempem,’ emes atakam tara bokoromteter apok aemteman. Owe pota pak tara aemtan apaye, era pota pak, bimak binip ajanimemtamay. Allahrawa, tapota pakam, bimak binip ajanimemtamteman.

³⁸Pak, owe atetamay. Allahrawa, pak tara aotetamteman. Are ese daytu pak aptam emes tamen atetamteman. Era ese bomon pak aotasisimdaemtem. Are era ese pak aptam aokokoendaetem. Tare pak daytu apaye, pak kope apaye, owe atetamtakam, Allah daytu pak aotetamteman.” Emes atakam aesimen.

³⁹Yesus baetaa atakamam era owe akoromen. “Banamek kapie ipit, wan banamek kapie ipit batoomatpor ape? Emes aemtamis, era ipit amnuk takes jafa takan andaetakafiaptemamis.

⁴⁰Bajamemem ipit ere juas aptam, wanam ara baememtam ipit ere juas apok, ere emes apok. Me, era bajamemem owe takes aememkoromtas, are abaememtam ipit, awar aememtemas.

⁴¹Tare pano kopenak, tajoo ipit banamek bomon apormakam. Me, tabanamek bomon balok bapor apok aemmakam, ere wama tamenem?

⁴²Tare tabanamek bomon balok bapor apok aemtakam, wanam atakam tajoo ipit akorommakam, ‘Dere wobanamek pano kopenak baemosomtam.’ Tare emes atakam bakore ere, wama tamenem? Tare pir bae owe! Tabanamek bomon balok ato takamemosomay. Wanam tajoo ipit banamek pano kopenak baemosomtam, banamek akot aportemakam.”

⁴³“Akot wus, eek pota baemepeomtep asan apok. Wanam, kasu wus, eek akot baemepeomtep asan apok.

⁴⁴Owe, wus eek apormas, are era wus, wus akot apaye, pota apaye, emes aporemas. Owe, wus eek juas ‘ara’, fa aptam wus kari baemekomtaer asan apok. Are anggur eek, fa aptam wus baemekomtaer asan apok.

⁴⁵Akot owe, ajak bomon baemomem pak, ere akot pak taka. Erarawa are akot pak aememas. Pota owe ere, ajak bomon baemomem pak, ere pota pak taka. Erarawa pota pak aememas. Owe, ajak bomon aemommas pak jipu atakam akoremas.”

⁴⁶“Tare atakam Dera akorommankum, ‘Tuhan! Tuhan!’ Emes atakam aesimmankum. Me, tare era akoremin atakam ji bae apok aemmakam, wama tamenem?

⁴⁷Wan owe Dera ambaromemmanis, wanam deatakam jane ajimas. Are era atakam ji aeemas. Era owe awar taoweem? Emesare, Dere era pak atakam baso tara akoretammin.

⁴⁸Are tame baeapom ipit awar. Armat ipit, fesis bomonnak ajirimdaemen. Era fesis, sekumkum ajiire andaejirimapomen. Te eombwi daytinak aemesen. Era bwi bwea daytuam, era tame awawarimen. Me, era ipit, era tame fiaknak aeapomen. Emesare era bwi bwea, era tame baemewawarim asan apoken.

⁴⁹Wan owe, deatakam jane ajimas. Era owe ere, era atakam ji bae apok aemmas. Era owe wan tame baeapom ipit awar. Era ipit, fesis apok tame se ten bambi aeapomen. Era bwi bwea daytu era tame awawarimen. Era tamerawa, ametepakeamsen. Are danaisnak aemansen.” Yesus emes atakam aesimen.