Read Casuarina Coast Asmat LUKAS 7 Bible Online

LUKAS 7 - Casuarina Coast Asmat bible

LUKAS 7

¹Emesare. Yesus atakam era owe aokoromkoromen. Ararawa, kota Kapernaum aesosen.

²Era asan ere, tentara komandan ipit, bambi karai baetam ipit aemomen. Are era ipit afaimomen. Era ipit ere, damo ajaue, wanam dambir baemken aemansen.

³Era komandan ipitam Yesus atakam jane ajien. Yesus atakam jane ajierawa, are Yahudi duturu owe Yesuspu ambirimemomen. “Tare Yesus ara asan bandae, wanam debambi karai baetam ipit damo baoromtam, atakam bajanimporay.” Emes atakam aesimen.

⁴Emesare, era owe Yesus ambaromes, wanam atakam fiak ajanimesen. “Era komandan ipit, ere, owe akot. Emesare Wore era pak armat ipit baemtamey.

⁵Armat ipit dasaman afaimum. Are dasamayen tame aoeapomtamero.” Emes atakam aesimesen.

⁶Emesare, Yesus era owe takan aesosesen. Are era tame setep emes aememe, era komandan ipit, ajoo owe, Yesuspu ambirimemomen. Era owerawa, era komandan ipit aatakam Yesus akoretamesen. “Dot! Dere Wora baemetumtaer asan apok. Dere Wore awar apok. Emesare Wore detame baemetoomjii asan apok.

⁷Emesamare, dere wobipu baemebarem asan apok. Wore ere, atakam bambi pakorey. Ere debambi karai baetam ipit arawa, ajaoremtem.

⁸Denom owe basakamtam atakam ji aemin, wanam dere detentara owe atakam asakamtammin. Dere wan tentara ipit, ‘Baesosey,’ emes atakam aesimtey, armat ipit aesostem. Denom wan ipit, ‘Bajinaoey,’ emes atakam aesimtey, armat ipitam ajinaotem. Denom dekarai baetam ipit, ‘Emes pak paemey,’ emes atakam aesimtey, ere armat ipit emes pak aemtem.” Emes atakam aesimen.

⁹Yesus emes atakam jane ajierawa, Are era ipit jinim aeen. Are fe asep asarames owe tanane, bimin awaiomen. Are atakam era owe akoromen. “Baporay! Ara aemema ipit Allah eemnak bamesemkorom ipit. Dere Israel owe damon, ara aemema ipit awar owe, bi bapor apoknak.” Emes atakam aesimen.

¹⁰Era komandan ambirimemome owe, tame aofasiosesen. Tame aofasioses arawa, are era bambi karai baetam ipit asan akot aporesen.

¹¹Emesare. Ajofe ere, Yesus kota juas Nain aesosen. Abajamkai oweam, wan owe tananeam, takan aesosesen.

¹²Armat Ipit era kota afojimes tiri jimsap setep ambareme ere, owe, dambir ipit, tasane atoomjisesen. Era ipit tano taot andep taka kopenak eraren. Era kota owe tananeam era taot takan ajaresen.

¹³Tuhan era taot apore, Are seekot aoorporen. Are atakam era taot akoromen. “Bate bas!” Emes atakam aesimen.

¹⁴Armat Ipit arawa, era dambir ipit ko pak ambarekaimen. Are era ko ban akurumen. Era ko atoomes oweam asemesen. Yesus arawa, atakam akoromen. “Detii! Bawasitey!” Emes atakam aesimen.

¹⁵Era dambir ipit arawa, awasiapen. Are atakam aokoromen. Yesus arawa, era ipit, arsoot aotetamen.

¹⁶Era owe takesam ombare aememesen. Are Allah tere aeomesen. “Allah atakam bakoretam ipit daytu, dawaut emesite. Are Yesus are.” Wanam, “Allah aowe bajortaer andaear.” Emes atakam aesimesen.

¹⁷Emesare. Yesus andi Yudea tapirmi saman takesam, era akakaiapes saman takesam afufuosen.

¹⁸Yohanes abajamkai owe, era atakam takes Yohanes aokoromesen.

¹⁹Armat Ipitam abajamkai ipit amnuk ajaten. Are era ipit amnuk Yesuspu ambirimemomen. “‘Wore Allah ataendaemmar Ipit ape? Dare wan ipit bandae bantem banamek bapem ape?’ Tare Yesus emes ajateporami.” Emes atakam aesimen.

²⁰Emesare era ipit amnuk Yesuspu ambaromemisen. Ambaromemis arawa, atakam Armat Ipit akoromemisen. “Yohanes Owe Bwi Bakupimtaer Ipit, dare Wora bajatepor, ataendaemmaro. ‘Wore Allah ataendaemmar Ipit ape? Dare wan ipit bandae bantem banamek bapem ape?’ Wore emes bajatepor ataendaemmaro.” Emes atakam aesimemisen.

²¹Era baream, Yesus damo pota owe tananeam, ajirisemes owe tananeam, jak bomon bii aemapa ajaies owe tananeam, ajaoromtaera ajaien. Are banamek kapie owe tananeam, banamek awaramema ajaien.

²²Armat Ipit arawa, atakam Yohanes ambirimemome ipit amnuk akoromen. “Tare baesosami, wanam era apormankum pakam, era jane ajimankum atakamam, atakam Yohanes aesimtamami. Banamek kapie owe, banamek awaremmas. Bai kumiti owe ajarmas. Owe ombare bamarem damo pitini potanak oweam damo akot aememmas. Jane bire owe jane ajimas. Dambir owe ajaorwasitmas. Owe Allah Akot Atakam era pak apok owe akoretammas. Emes atakam aesimtamami.

²³Me, Dera bajamkai bamompim apok owe, asan akot aemapmas.” Yesus emes atakam aesimen.

²⁴Era Yohanes ambirimeome ipit amnuk aoesosemisen. Yesus arawa, Yohanes atakam, era owe tanane akoromen. “Tare era tame apok asan, wama pak bapor aesosekem? Tare bui firka bawawarim bapor aesosekemi?

²⁵Tare ere, wama pak bapor aesosekem? Pakaian akot ajiimome ipit bapor aesosekemi? Baporay! Wan owe pakaian akotnak ajiimomaaremas. Are pakiin pakiin aemomaaremas. Era owe, ere raja tame bomon aemapaaremas.

²⁶Tare ere, wama pak bapor aesosekem? Allah atakam bakoretam ipit bapor aesosekemi? Ijee! Wan Allah atakam bakoretam owe, ere juas apok. Me Yohanes ere, ere juas aptam.

²⁷Me Alkitab ere Yohanes atakam akorem: ‘Baporay! Dere deateman ipit bonak ambirimemomtemin. Worarawa, asep are. Armat ipit, ere wobai asan akenemtem.’ Alkitab emes atakam akorem.

²⁸Baporay! Me Yohanes, ere juas aptam. Me wan tapes era ajisipetiies owe, juas apok. Me, Allah aobaomep owe aemapmas juas apoknak owe, ere juas aptam. Me Yohanes ere, juas apok.” Yesus emes atakam aesimen.

²⁹Emesare, era bambi owe takesam, era pemerintah uang bajanimtam karai oweam, emes atakam jane ajiesen. Are atakam akoresen. “Allah, ere turunak.” Emes atakam aesimesen. Bonak ere, Yohanes era owe bwi emekupimtaeren.

³⁰Emesare, Parisi oweam, Musa Basakamtam Atakam baememtam oweam, Yohanes bwi ara bakupimtaer potan. Allah ere, era owe bwi bakupimtaer, atakam emesakamtiien. Era owe ere, era atakam aooesen.

³¹Yesus, ere, atakam akoren. “Dere ara ajaniemmas owe awar, emes wama atakam okoretey? Era owe awar wama oweem?

³²Ara owe, pasar asan baemap jii awar. Era jii atakam daytu asakamtamemas. ‘Dare embe tare etekurumtamarom. Tare ere, di bandie apoknak. Danom awan bate ambatom. Tare ere, bate apoknak.’ Era jii emes aememas.

³³Me Yohanes Owe Bwi Bakupimtaer Ipit ajinaoe ere, are amos anama anggur bwi banda apok. Me, tare atakam akoremakam. ‘Era ipit jak bomon bii aapeta.’ Emes atakam aesimmakam.

³⁴Me Asamot Anakot Ajaoreme Ipit andae ere, Are amos anama bwi andaarir. Me, tare atakam akoremakam. ‘Baporay! Era ipit amos paknam ipit. Are bir bwi banda jaytu ipit. Are, pemerintah uang bataajanimtam karai owe anama era Yahudi agama pak tai aooes owe, ajoo owe.’ Emes atakam aesimmakam.

³⁵Allah bimak binip ere, baso taka. Me Allah atakam ji bae owe, era pak atakamnak apormas.” Yesus emes atakam aesimen.

³⁶Emesare. Parisi ipit taka atakam Yesus ajanimen. “Wore de! Amos detame dasey.” Emes atakam aesimen. Yesus arawa, era ipit tame ajiien. Are amos banda ajipakiapen.

³⁷Emesare, era kota ere, dosa taot aemapen. Era taot, Yesus, Parisi Ipit tame amos banda, atakam jane ajien. Ararawa, burfi pinim akot pak aptam atoomtinen.

³⁸Era taot arawa, Armat Ipit beakpu aememen. Are bate ambaten. Abate manames, Yesus bai andaekokoamesen. Erarawa are era bai boto akuus fini ajatejiimosomen. Are era bai ake afapien. Me pinim akot pakam, era bai beak ten aokomdaemen.

³⁹Me Yesus atakam ajanime Parisi ipit, era pak apore, are bimak binip atetaramen. “Ara ipit, Allah atakam bakoretam ipit ere, are adamo akurummar taot amsam. Are era taot aemaarir pak amsam. Era taot, ere dosa taot.” Emes bimak binip atetaramen.

⁴⁰Yesus arawa, atakam armat ipit akoromen. “Simon! Dere atakam taka wora bakorom aemin.” Emes atakam aesimen. Armat ipit arawa, “Guru! Bakorey!” Emes atakam aesimen.

⁴¹Yesus arawa, baetaa atakam era ipit akoromen. “Uang armat ipit taka, uang, batoomemtam ipit amnuk, atetamen. Are perak 500 wan uang batoomemtam ipit atetamen. Are perak 50 wan ipit atetamen.

⁴²Asep bare ere, era ipit amnuk takes, uang apoken. Erarawa are uang era uang armat ipit baemeofasimtam asan apoken. Era uang armat ipit emes aporerawa, ‘Emesare, tare era uang bambi emes ataetami.’ Emes atakam aesimen. Era uang armat ipit daytu bafaim ipit, ere ete ipitim? Era kope bafaim ipit, ere ete ipitim?” Emes atakam aesimen.

⁴³Simon arawa, “Debimak binip ere, era uang daytu ataete ipit, daytu era ipit afaime.” Emes atakam aesimen. “Ere atakamnak!” Yesus emes atakam aesimen.

⁴⁴Yesus arawa, era taot bimin awaiompen. Are atakam Simon akoromen. “Wore ara taot apormarem ape? Dere wotame ajiiey. Wore ere, debai baeosom bwi, Dera batetam apoknak. Era taot ere, ambate manames, debai akookomdaemtiiman. Are debai boto, afini, ajiiman.

⁴⁵Wonom ake Dera bafapie apoknak. Dere ara tame ajinisapey ere, era taot, debai, ake bafapie bakari apok aemmar.

⁴⁶Wonom minyak dekuus bakokomdaem apok. Era taot ere, pinim akot pak, debai aokomdaemman.

⁴⁷Emesare, wonom baporey! Era taot adosa daytu bimak binip ajanimemtame. Erarawa are daytu Dera afaimman. Era kope dosa bimak binip bajanimemtam owe ere, kope afaimmas.” Yesus emes atakam aesimen.

⁴⁸Armat Ipit arawa, atakam era taot akoromen. “Dere wodosa bimak binip ajanimemtamo.” Emes atakam aesimen.

⁴⁹Me amos takan andes owe ere, atakam armamon ajamkoramesen. “Are ta ipitim? Are dosakor bimak binip ajanimemtammar.” Emes atakam aesimesen.

⁵⁰Armat Ipit arawa, atakam, era taot aokoromen. “Wore Dera ambesemmanim. Erarawa wore ajoremmarem. Wore ji baem jak aesosey.” Emes atakam aesimen.