Read Casuarina Coast Asmat YOHANES 1 Bible Online

YOHANES 1 - Casuarina Coast Asmat bible

YOHANES 1

¹Owe juas “Atakam” aememe. Bonaknak, Allah, tapirmi bakenemtii apok ere, era owe juas “Atakam” taemema ememaaririn. Era “Atakam”, Allah takan aemapaarisin. Era “Atakam”, Allah aren.

²Bonaknak ere, era “Atakam,” Allah takan aemapaarisin.

³Era “Atakam,” pakiin pakiin takes akenemapomen. Era pak ji amba baereap apoknak.

⁴Era “Atakam,” jiinenak, owe batetamteter Ipit eraren. Era jiinenak aemomemmas owe, bimak binip baso atetaramemas. Are sare damon ajaremas.

⁵Era sare jiiti asan asaramtiim. Era jiiti ere, era sare baemesapimapom asan apok.

⁶Emesare, Allah jipit taka ambirimemome. Era ipit juas Yohanes.

⁷Era ipit era sare atakam bakoretam ajinaoe. Are owe takes era atakam jane bajie, wanam era atakam eemnak bamesemkorom, ajinaoe.

⁸Yohanes, era sare basaramapom Ipit apok. Me, are era sare basaramapom Ipit atakam bakoretam ajinaoe.

⁹Era sare basaramapom Ipit, ere anakot. Are ara aemansa tapirmi andae. Are owe takes asaramapomum.

¹⁰Armat Ipit ara aemansa tapirmi aemapaarir. Are ara tapirmi akenemtiie. Me, ara tapirmi owe Armat Ipit amsam apok aemapes.

¹¹Armat Ipit asamane ambareme. Me, ajoo owe Armat Ipit bataet apok aemes.

¹²Me wan owe ere, Armat Ipit ataetes. Are Armat Ipit eemnak ambesemkoromes. Armat Ipit arawa, era owe, Allah arereis ataemome.

¹³Era owe Allah arereis aememes ere, are asamot jii tamen bajisames apok. Aritipit, ere asamot ipit apok. Aritipit ere Allah.

¹⁴Me “Atakam” asamot ipit ajaoreme. Are da takan ajamememero. Danom aakotipitnak aememe aporom. Era akotipitnak aememe, Aritipit Andep takakope atetame akotipitnak aememe are. Emesare dare Allah dara afaimero aporom.

¹⁵Yohanesam era Ipit atakam afaketaae. “Era atakam akoretamaaru Ipit aemeta. Era akoretamaaru atakamam, ‘Armat Ipit defe asep andaetem. Me, dere bajisames apok aemo, Armat Ipit bonak taemema ememaaririn. Erarawa Armat Ipit juas aptam ipit. Dere ere, juas apok ipit.’ Emes atakam akoreaaru.” Yohanes emes atakam aesime.

¹⁶Emesare, era “Atakam,” daytinak dara afaimomaarir. Are asan akotnak dara atetamaarir.

¹⁷Emesare, Allah abasakamtam atakam Musa atetamen. Musarawa, era basakamtam atakam wan owe aotetamen. Me, Allah Yesus Kristus ambirimemome. Armat Ipit ere, Allah asan akotam, aatakammakam aporomtamero.

¹⁸Oweam Allah bi baemepor asan apoknak. Me Andep takakope, ere Allah takan aemapa. Armat Ipitam Allah bi baso aporomtamkoromero.

¹⁹Emesare, Yerusalem Yahudi owe, Allah Tame pak baem oweam, Lewi saman oweam, Yohanespu ambirimemomes. “Yohanes ta ipitmaye?” Emes bajatepor ambirimemomes. Yohanes arawa, atakam basonak akorome. “Dere Allah Aeremtaere Ipit apok.” Emes atakam aesime.

²⁰

²¹Era oweam aojatepores. “Wore ere, ta ipitim? Bonaknak ere, Allah atakam bakoretam ipit juas Elia aememen. Wore Elia ape?” Emes atakam aesimes. Yohanes arawa, “Denom Elia apok.” Emes atakam aesime. Era oweam, “Wore Allah Ambirimemomto Atakam Bakoretam Ipitkor ape?” Emes atakam aesimes. Yohanes ere, “Denom era ipit apok.” Emes atakam aesime.

²²Era owerawa, “Wore ere, ta ipitim? Wore apa pak ememmarem? Dare era ambirimaroas owe emes atakam bokore.” Emes atakam aesimes.

²³Armat ipit arawa, “Dere tame apok asan atakam bafaketaa ipit. ‘Tuhan andaetem. Tare Armat Ipit ajarto bokotpu imtuu akenemtiiay.’ Emes atakam aesimmin.” Yohanes emes atakam aesime. Emesare, era atakam, bonaknak aemaarir Allah atakam bakoretam ipit juas Yesaya, era akoretame atakam jipu.

²⁴Emesare, Yohanes ajinaomes owe Parisi owe ambirimes owe are.

²⁵Are armat ipit ajatepores. “Wore Allah Aeremtaere Ipit apok apaye, wore Eliam apok apaye, wore Allah Ambirimomem Atakam Bakoretam Ipitam apok apaye, wore owe bwi akupimtaermarem wama tamenem?” Emes atakam aesimes.

²⁶Yohanes arawa, “Dere owe bwi akupimtaermin. Me, ara aememtakam owe bomon ere, jipit taka aemeta. Tanom era Ipit tamsam apok.

²⁷Are defe asaramtan Ipit are. Are juas aptamnak Ipit. Dere ere, juas apok ipit. Erarawa dere asendal dem baemesurumtam asan apok.” Emes atakam aesime.

²⁸Emesare, era pak takes Betania tapirmi aemes. Era tapirmi Yordan ju poman are. Ere Yohanes owe bwi akupimtaere asan are.

²⁹Ajoferawa, Yesus Yohanespu ambareme. Yohanesam Armat Ipit apore. Ararawa, “Baporay! Era ambarommar Ipit, Allah Domba Jii! Are asamot dosa bimak binip bajanimemtam Ipit.

³⁰Era atakam akoreaaru Ipit ara emema. Era akoreaaru atakamam, ‘Armat Ipit defe asep andaetem. Me, dere bajisames apok aemo, Armat Ipit bonak taemema eme. Emesare era Ipit juas aptamnak Ipit. Dere ere, juas apok ipit.’ Emes atakam aesimaaru.

³¹Denom era Ipit demsam apok aememo. Dere ere, ajinao. Denom owe bwi akupimtaero. Era pak ere, Israel owe era Ipit amsam baporemap are.” Yohanes emes atakam aesime.

³²Emesare, Yohanes atakam akore. “Dere Allah Jip, wonamo oup aendae aporo. Are pari bapindae tamen, Armat Ipit damo ten andaeape. Are emes atamemape.

³³Denom era Ipit demsam apok aememo. Me, era owe bwi bakupimtaer ataejinaomen Allah, atakam dera aesimtamen. ‘Wore Allah Jip, jipit taka damo ten bandaeap aportemarem. Emesare, era Ipit Allah Jip, asamot owe akupimtamtem.’ Emes atakam aesimen.

³⁴Emesare, denom era pak emeporo. Denom atakam emekoromo. ‘Armat Ipit Allah Andep.’ Emes atakam aesimo.” Yohanes emes atakam aesime.

³⁵Emesare. Ajofe ere, Yohanesam, abajamkai ipit amnukam, aememes.

³⁶Yohanes Yesus era asan aokorefejinaoe apore, are atakam akore. “Baporay! Ara aemema Ipit, Allah Domba Jii.” Emes atakam aesime.

³⁷Abajamkai ipit amnuk era akore atakam jane ajiemis. Ararawa, Yesus ajamkaiemis.

³⁸Yesusam asep banep aoorpore, wanam era ipit amnuk ara asaramomemis apore. Ararawa, ajatepore. “Tare apa dimarmakam?” Emes atakam aesime. Era ipit amnuk arawa, “Rabi! Wore ta tame jamememem?” Emes atakam aesimemis. (“Rabi,” daatakam jow bauumtaer “Guru”.)

³⁹Armat Ipit arawa, “De! Tanom baporami!” Emes atakam aesime. Era ipit amnuk arawa, takan aesoses. Are Armat Ipit aememe asan aporemis. Ere poro jam 4 apaye. Are era bare Armat Ipit takan aemapemis.

⁴⁰Emesare. Jipit amnuk Yohanes atakam jane ajiemis, wanam Yesus ajamkaiemis. Me wan ipit taka juas Andreas. Are Simon Petrus areot.

⁴¹Armat Ipit arepot juas Simon ametedimartaere. “Dare Allah Aeremtaere Ipit andimartaerom.” Emes atakam aesime. (Me “Allah Aeremtaere Ipit,” wan juas “Kristus”.)

⁴²Are Simon, Yesuspu atoomtine. Yesus arawa, Simon banamek apemjateme, wanam. “Wore Simon, Yuna andep. Me, wojuas Kefas aemin.” Emes atakam aesime. (Me Yunani atakam ere, juas “Petrus”. Me daatakam jow bauumtaer, juas “Eka”.)

⁴³Emesare. Ajofe ere, Yesus Galilea tapirmi baesos atakam asakamtiie. Are Filipus andimartaere, wanam atakam armat ipit akorome. “Dera jamkaian!” Emes atakam aesime.

⁴⁴Filipus kota Betsaida ipit. Andreas anama Petrus, kota Betsaida ipit amnuk.

⁴⁵Filipus arawa, Natanael andimartaere, wanam atakam armat ipit akorome. “Me Musa, jipit taka atakam, Musa Basakamtam Atakam buku bomon aeapomen. Allah atakam bakoretam oweam, era Ipit atakam, buku aeapomesen. Emesare. Danom era Ipit andimartaerom. Ere Nasaret ipit juas Yusuf andep. Ajuas Yesus.” Emes atakam aesime.

⁴⁶Me Natanael ere, “Era akot pak Nasaret aeejinaotem are?” Emes atakam aesime. Filipus arawa, “De! Baporey!” Emes atakam aesime.

⁴⁷Emesare, Yesus Natanael andae apore, wanam atakam akore. “Baporay! Ara ipit Israel ipit anakot. Are turunak ipit.” Emes atakam aesime.

⁴⁸Me Natanael arawa, “Debi womsam wama tamenem?” Emes atakam aesime. Yesusam, “Filipus wora bajate apok aeman, Denom wore era wus juas “ara” bapan aemaparem aporey.” Emes atakam aesime.

⁴⁹Me Natanael arawa, “Guru! Wore Allah Andep! Wore Israel owe araja Ipit.” Emes atakam aesime.

⁵⁰Me Yesusam, “Dere atakam wora akorommin, ‘Dere wore era ara wus bapan aemaparem aporey,’ emes atakam aesimey. Wore emes atakam apormarem, wanam Dera ambesemmanim apaye? Era akoromey atakam ere, jinim bae pak, kope tamen. Asep bare wonom daytu pak aoportemarem.” Emes atakam aesime.

⁵¹Yesus arawa, wan atakamam akorome “Atakamnak, tare wonamo oup ambuapto aportemakam. Tararawa, Allah malaikat owe, Asamot Anakot Ajaoreme Ipitpu, bap jow auundaea, oup jow aotemeta, emes aemtas aportemakam.” Yesus emes atakam aesime.