Read Casuarina Coast Asmat YOHANES 12 Bible Online

YOHANES 12 - Casuarina Coast Asmat bible

YOHANES 12

¹Emesare, Paskah Pakambwi Bare baem apok bare poman ban taka aemanse, Yesus kota Baitani aesose. Era Baitani, Yesus dambir aeme ipit juas Lasarus ajaoromwasumtume asan erare.

²Era asan ere, owe banda pak Yesus ajaatames. Lasarusam, wan oweam, Yesusam, banda pak takan banda aemapes. Martarawa, banda pak era owe ataatame.

³Mariaam, pinim akot pak anakot juas narwastu, setengah kilogram apaye, atoomjiie. Era minyak harga daytinak. Emesare, Maria ere minyak Yesus bai beak ten akukume, wanam akuum fini era bai ajiime. Me minyak pinimam era tame bomon daytinak aemtepe.

⁴Wan Yesus bajamkai ipit juas Yudas Iskariot era asanam aemape. Ere Yesus jokoman owe aotasimemomtamto ipit erare. Are atakam akore.

⁵“Era minyak harga, uang perak 300. Owe, era minyak, wan owe batetam, wanam era minyak uang bataet, emes baemtas. Ararawa, era uang pak apok owe batetam. Are emes baem apok ere, wama tamenem?” Emes atakam aesime.

⁶Are emes atakam akore ere, are pak apok owe seis akot baoorpor apok. Me, are wosom ipit. Are Yesus anama abajamkai owe uang ese banamek bataitam ipit. Are era uang wosom aea ajaie.

⁷Yesusam atakam akorome. “Armat taot emes baemto. Era aemman pak, ere Dere dambir atemtey bare pak erare.

⁸Era pak apok owe tadamo setep aemapaaremas. Dere ere, tadamo setep baemapaar apok.” Emes atakam aesime.

⁹Yahudi owe tananenakam, “Yesus Betani aemeta,” emes atakam jane ajies. Ararawa, Armat Ipit bi bapor aesoses. Me, are Yesus bi bapor taka baesos apok. Are Yesus ajaoromwasumtume ipit juas Lasarus bi bapor aesoses.

¹⁰Yahudi owe tanane Lasarus ajaorwasite atakam, atakamnak apores. Erarawa are Allah Tame pak baem owe daytu atakam ji boe apok aemes. Me, are Yesus eemnak ambesemkoromes. Allah Tame pak baem kapar oweam emes apores, wanam Lasarus batatii atakam akukuramtiies.

¹¹

¹²Emesare, ajofe, era pakambwi baem ambaremes owe tananenak, atakam jane ajies. “Yesus Yerusalem waut aemdaemara.” Emes atakam jane ajies.

¹³Era owerawa, jisini enese tamen pak atoomemteteres, wanam Yesus bimnuk baemamtaer aesoses. Are atakam afaketaera ajaies. “Allah, tere aeomamo! Tuhan asan akot ataendaemmar Ipit baemto! Armat Ipit Israel owe Baomep Ipit arare. Owe ara basitimtas!” Emes atakam aesima ajaies.

¹⁴Yesusam ai keledai taka andimartaere, wanam Are era keledai beak ten atemetape. Ere Alkitab atakam jipu:

¹⁵“Kota Sion aemapakam owee! Tanom ombare bas. Baporay! Ta Raja Ipit andaemare. Are ai keledai beak ten aemapar.” Alkitab emes atakam akorem.

¹⁶Bonak ere, Yesus bajamkai owe, Yesus aeme pak amsamnak apok. Me, asep bare, Allah Yesus Surga oup aotoomtemete. Era bare ere, Yesus bajamkai owe Alkitab atakam, bimak binip ajinimtaeres. Ararawa, era owe Yesus aemes pak, Alkitab atakam jipu apores.

¹⁷Bonak ere, Yesus Lasarus dambir asan bomon bajis atakam asakamtame, wanam Are Lasarus ajaoromwasumtume. Yesus emes aeme, wan oweam takan aememes. Asep ararawa, era owe Yesus aeme pak, atakam era owe akoretama ajiaaris.

¹⁸Owe tananeam, Yesus era jinim bae pak aeme, atakam jane ajies. Erarawa era owe tanane Yesus bimnuk aemamtaeres.

¹⁹Parisi oweam armamon atakam ajamkorames. “Baporay! Dare fiak apok apeno. Owe takes Armat Ipit ajamkaimas!” Emes atakam aesimes.

²⁰Emesare, Yerusalem pakambwi baem ambaremes owe, Allah basitim ambaremes. Wan owe, ere Yunani saman owe.

²¹Yunani owe, kota Betsaida ipit juas Filipus ambaromes. (Ere kota, Galilea tapirmi kota.) Era oweam atakam Filipus akoromes. “Dare Yesus bi bapor.” Emes atakam aesimes.

²²Filipus arawa, era atakam Andreas aesimtame. Me Andreas anama. Filipus arawa, Yesus ambaromemis, wanam era atakam Yesus akoromemis.

²³Yesusam atakam era owe akorome. “Asamot Anakot Ajaoreme Ipit batemtem bare, ere setep.

²⁴Atakamnak, owe gandum eek se bomon ajapomemas. Era eek, bajit apok aemapem. Era eek emes baem aemto, are taka taka eek takakope aemapaarem. Me, era eek bajit aemapto, are akene ajitem. Wanam eek tanane apeem.

²⁵Asamot oweam jatiaptam baememaar pak apa bataet bimak binip daytu atetaramtas, are jiinenak apok aememtemas. Me, owe ara aemansa tapirmi jatiaptam baememaar pak apa bataet bimak binip apok aemtas, are jiinenak aemapaartemas.

²⁶Owe karai Dera baetam akot ajitas, are Dera bajamkaitanis. Erarawa era owe, aememtey asan, Dere takan aememmarom. Deritipitam dekarai baetam owe, owe atemtemtem.”

²⁷“Emesare, Dere jak pota aemapmin. Dere ere, wama atakam okoretey? ‘Dot! Dere bajirisem bas,’ emes atakam bakore apaye? Dere ere, emes atakam bakore apoknak aemtemin. Denom bajirisem andaeo.

²⁸Dot! Owe, ‘Tuhan Allah akotnak,’ emes Wora batemtemaartanis.” Yesus emes atakam aesime. Allahrawa, wonamo oup, atakam akorendaeme. “Dere emes aemo. Emes owe, Dere akotnak, emes atemtemenis. Denom emes aoemtemin.” Emes atakam aesime.

²⁹Era asan aememes owe tanane, era atakam jane ajies. Ararawa, “Ere wur,” emes atakam aesimes. Me wan owerawa, “Malaikat atakam Armat ipit akoromum.” Emes atakam aesimes.

³⁰Yesusam, “Allah era akorendaemar atakam, depak apok. Ere tapak.

³¹Allah, asamot owe dosa aemes pak jipu bajurusum, emes atakam basakamtii bare, ere emeemansa. Are ara aemansa tapirmi aomepmar ipit akumimosomum.

³²Owe Dere salib wus oup ataetopomtanis, Dere owe takes Dera bamaromem atatapimtaatemin.” Emes atakam aesime.

³³Yesus emes atakam akore ere, Are salib wus oup atemto dambir, atakam era owe akorome.

³⁴Era owe tananeam atakam Yesus akoromes. “Dare daBasakamtam Atakam Buku atakam jane ajiom ere, ‘Allah Aeremtaere Ipit jiine aememaartem.’ Emes atakam jane ajiom. Era akoremarem atakam ere, ‘Owe Asamot Anakot Ajaoreme Ipit salib wus oup ataetopomtemas,’ emes atakam aesimmarem. Me Asamot Anakot Ajaoreme Ipit ere, ta ipitim?” Emes atakam aesimes.

³⁵Yesus arawa, “Waa era sare tadamopu aemapman. Me, are tadamopu baemap bare arke apok. Tare era sare taasan apormakam, tanom bajaray. Tare era waut jiiti bomon baemem-ombar. Era jiiti bomon ajaremas owe, era ajaremas asan baemepor asan apok.

³⁶Waa era sare tadamopu aemapman. Me, Are aesostem. Erarawa tanom waa era sare ambesemay. Tararawa, jiiti bomon boemap apok owe aemaptemakam.” Emes atakam aesime. Yesus emes atakam akorerawa, aesose. Are asaieme.

³⁷Bonaknak ere, Armat Ipit jinim bae pak tanane era owe bipu aeme. Me, era owe Armat Ipit bamesem apoknak aemes.

³⁸Ere Allah atakam bakoretam ipit juas Yesaya akoretame atakam jipu: “Tuhan! Era ateman atamom atakam tao owe besemtas? Wofiak pak ta owe poromtamtam?” Yesaya emes atakam aesimen.

³⁹Me Yesayaam wan atakam akoren: “Allaham, ‘Dere owe banamek kapie aemapomo. Denom bimak binip jiiti era owe atetamo. Era owe abanamek, anakot pak bapor-ombar. Are bimak binip baso batetaram-ombar. Are era pota pak bamakem-ombar. Denom era owe bajortaer-ombar.’ Allah emes atakam aesime.” Yesaya emes atakam akoren. Erarawa era owe Yesus baemebesem asan apok.

⁴⁰

⁴¹Yesaya Yesus aakotipitnak aememe aporen. Erarawa are emes atakam akoretamen. Emesare, are Yesus atakam akoren.

⁴²Emesare, wan Yahudi kapar owe tananeam Yesus eemnak ambesemkoromes. Armat owe ere, Parisi owe apores. Erarawa are Yesus ambasemes, atakam owe boesimtam apok aemes. Me Parisi owe, are Yahudi owe samayen tame bajii, atii bata-ombar.

⁴³Emesare, era owe, asamot owe, ara basitim, bimak binip daytinak atetarames. Me are Allah ara basitim, bimak binip koser atetarames.

⁴⁴Emesare, Yesus atakam daytu afaketaere. “Dera ambesemmanis owe, De taka bamesem apok aemmas. Anom era ataendaemen Ipit ambesemmas.

⁴⁵Debi apormanis owe, Dera atandaemen Ipit bi apormas.

⁴⁶Dere sare anakot. Dere ara aemansa tapirmi andaeo, ere Dera ambesemmanis owe jiiti bomon boemap-ombar.

⁴⁷Wan owe deatakam jane ajimas, wanam are deatakam ji bae apok aemmas. Dere ere, owe adosa atakam basakamtii apok. Dere asamot dosa, atakam basakamtii bandae apok. Dere ere, asamot owe bajortaer andaeo.

⁴⁸Wan owe Dera awotapemmanis. Are deatakam ji bae apok aemmas. Me, era akoreo atakam, Ju Ajiire aemamesto, era owe adosa baso aporomtamtem.

⁴⁹Era akoreo atakam dema atakam apok. Me, Deritipit ataendaemen. Armat Ipit era akoreo atakamam, era afasimo atakamam, atakam Dera asakamtamen.

⁵⁰Owe Deritipit asakamtamen atakam ji aetas, are jiinenak aememaartemas. Dere emes demsam. Erarawa, Dere Deritipit akoromen atakam taka aokoremin.” Yesus emes atakam aesime.