Read Casuarina Coast Asmat YOHANES 13 Bible Online

YOHANES 13 - Casuarina Coast Asmat bible

YOHANES 13

¹Emesare, era Paskah Pakambwi Bare setepkope asisiamse. Yesusam ara aemansa tapirmi beken bajios, wanam Aritipitpu bafasietemet setepkope apore. Me wan ara aemansa tapirmi owe, Yesus ajamkaiaaris. Yesusam era owe afaimaarir. Are era dambir aeme bare ajiire era owe afaimaarir.

²Emesare. Yesusam, wan oweam, eam amos andaismapes. Bonak ere, Bii Kapar Ipit, bimak binip Yudas atetame. Yudas arawa, Yesus jokoman owe baotasimemomtam bimak binip atetarame. (Yudas ere, Simon Iskariot andep.)

³Bonak ere, Allah, pak takes, Yesus ban ten baemomemkorom emetetame. Yesusam, emes amsam. Bonaknak ere, Are Allahpu eendae. Wanam, Are Armat Ipitpu aofasietemettem. Are emes amsam.

⁴Erarawa, Armat Ipit era amos andaismapes asan awasieme. Ararawa, abaju asumtiie, wanam handuk wusirmi ajikapome.

⁵Are, bwi, loyang, aokomeseme, wanam Are abajamkai owe bai bwi aeosomtetere. Ararawa, awusirmi ajikapome handuk, era bai ajiimtetere.

⁶Yesusam, Simon Petrus bipu aememe. Petrus arawa, “Tuhan! Wonom debai bwi baeosom ape?” Emes atakam aesime.

⁷Yesusam, “Wore waa aemmin pak womsam apok. Asep bare ere, wore emes womsam aememtemarem.” Emes atakam aesime.

⁸Me Petrusam, “Wore debai bwi baeosom bas!” Emes atakam aesime. Yesus arawa, “Dere wobai bwi baeosom apok aemtey, ere wore debajamkai ipit apok.” Emes atakam aesime.

⁹Me Simon Petrusam. “Tuhan! Wore bwi debai taka baeosom bas. Me deban anama dekuus bwi takes aeosomkoromman.” Emes atakam aesime.

¹⁰Yesus arawa, atakam armat ipit akorome. “Era bwi ambwiares owe, adamo takes bwi bombum bas. Me adamo anakot takes, ere asan akot are. Are bwi abai taka baeosomtas. Emesare, tare akot. Tare pano apok. Me, ta wan ipit taka, are akot apok.” Emes atakam aesime.

¹¹(Era wan ipit, Yesus jokoman owe baotasimemomtam aememe. Yesusam emes amsam. Erarawa Yesusam, “Tare akot. Me, ta wan ipit taka, are akot apok.” Emes atakam aesime.)

¹²Emesare, Yesus era owe bai bwi aeosomerawa, Are abaju aojiime. Wanam Are era amos andaismapes asan aondaepakiape. Are atakam era owe akorome. “Dere tara aemmin pak tamsam ape?”

¹³Tanom atakam Dera akorommankum, ‘Guru,’ emes atakam aesimmankum. Tanom, ‘Tuhan,’ emes atakam aesimmankum. Era akorommankum atakam, ere atakamnak. Dere emes aememey.

¹⁴Dere taTuhan aememe. Denom taGuru aememe. Emesare, Dere tabai bwi aeosommin. Erarawa tanom tabai bwi tarmamon ajameamosoma ajiaaray.

¹⁵Dere emes tara aemmin. Tanom, tara aemmin pak jipu taka, atawejomaaray.

¹⁶Atakamnak, bambi karai baetam ipit juas aptam, wanam era karai armat ipit juas apok, ere emes apok. Erarawa, era baesos ipit juas aptam, wanam era ipit bamirimemom ipit juas apok, ere emesam apok.

¹⁷Waa tare era pak tamsam. Emesare, tare era atakam ji aetakam, asan akot aemaptemakam.

¹⁸“Era akoremin atakam, tare takes apok. Dere era aereremartaao owe demsam. Me, Alkitabam, ‘Era amos takan ajamdajiman ipit ajurusumen.’ Emes atakam akorem. Emesare, owe Alkitab atakam jipu atawejomtemas.

¹⁹Dere ara atakam bonak tara akoretammin. Wanam asep bare, era ipit era pak aemtan, tanom Dere Allah Aeremtaere Ipit, emes atakam eemnak ambesemkoromtemakam.

²⁰Atakamnak, owe dobirimemo owe atoomjiitas, are Dera atoomjiiemanis. Wanam, Dera atoomjiitanis owe, Dera birimemomen Ipit atoomjiiemas.” Yesus emes atakam aesime.

²¹Yesus emes atakam akorerawa, jak pota daytinak aememe. Are, “Atakamnak, ta wan ipit taka Dere jokoman owe aotasimemomtamteman.” Emes atakam aesime.

²²Me Yesus bajamkai owe, Armat ipit atakam akorome ipit amsam apok. Erarawa are ajamporamteteres.

²³Emesare, Yesus, wan bajamkai ipit taka daytu afaimaarir. Era baream, era ipit, Yesus takan aemapes.

²⁴Simon Petrusam banamek era ipit akapietame. Era pak era ipit, “Ere ta ipitim?” emes boporejatepor are.

²⁵Era ipit arawa, Yesus setep asisiape, wanam ajatepore. “Tuhan! Wore jokoman owe aotasimemomtamtan ipit tanam?” Emes atakam aesime.

²⁶Yesusam, “Dere ara amos ara piring bwi asetentaertey, wanam era ipit atetamtemin.” Emes atakam aesime. Emesare, Yesus, amos kope ataere, wanam amos era piring bwi asetentaere. Ararawa, era amos, Yudas atetame. (Era Yudas, Simon Iskariot andep.)

²⁷Emesare, Yudas era amos ande. Era amos ande, erarawa, Bii Kapar Ipit Yudas jak bomon ajiiape. Yesusam atakam Yudas akorome. “Era aemtem pak fef aemey.” Emes atakam aesime.

²⁸Me, era asan aemapes owe takes, Yesus Yudas akorome atakam, bimak binip arke atetarames. Yesus emes atakam wama atakam pakoromeye? Emesare, era owe amsam apok.

²⁹Yudas era owe auang ese banamek batai ipit. Erarawa era wan owe bimak binip atetarames. “Yesus Yudas pakambwi banda pak bajit apaye, uang era pak apok owe batetam apaye, emes atakam akorommar apeno.” Emes bimak binip atetarames.

³⁰Emesare, Yudas Yesus atetame amos ataene. Ataenerawa, tasan ajise. Ere aemar.

³¹Yudas ajiserawa, Yesus atakam akorome. “Waa, Allah, Asamot Anakot Ajaoreme Ipit akotipitnak aememe, emes atemtemtem. Asamot Anakot Ajaoreme Ipit aemto pakam, Allah akotipitnak aememe, emes atemtemtem.

³²Me Armat Ipit aemto pak, Allah akotipitnak aememe, emes atemtemto, ere Allaham Armat Ipit akotipitnak aememe, emes atemtemtem. Allaham era pak fef aemtem.

³³Tiparais! Dere ara asan, tara ajamememtey bare arke apok. Tararawa, Dera andimartemankum. Me, Dere era Yahudi owe akoromo atakam, waaam tara akorommin. ‘Tare era aesostey asan, baemeesos asan apok.’ Emes atakam aesimo.

³⁴Emesare, denom waa ai basakamtam atakam tara asakamtammin. Tare tarmamon ajamfaimamay. Ere Dere tara afaimmin emes tamen ajamfaimamay.

³⁵Owe, tare ajamfaimammakam aportas, are tare debajamkai owe aporteman.” Yesus emes atakam aesime.

³⁶Emesare, Simon Petrus atakam Yesus akorome. “Tuhan! Wore ete asan aesostem?” Emes atakam aesime. Yesus arawa, “Wore waa era aesostey asan, baemejamesos asan apok. Me, asep bare wonom era asan aesostemarem.” Emes atakam aesime.

³⁷Me Petrusam, “Tuhan! Dere waa Wora baemejamesos asan apok ere, wama tamenem? Owe dere wobajamkai ipit aportanis, wanam dera atatiitanis, ere akot.” Emes atakam aesime.

³⁸Yesusam, “Owe wore debajamkai ipit aportanis, wanam wora atatiitanis, wore emes akot ape? Atakamnak, wore ajomo ipit atakam bafimekores apok, ‘Dere Yesus demsam apok,’ emes atakam bonak akorestemarem.” Emes atakam aesime.