Read Casuarina Coast Asmat YOHANES 14 Bible Online

YOHANES 14 - Casuarina Coast Asmat bible

YOHANES 14

¹“Tanom jak pota bas. Allah eemnak ambesemkoromay. Denom eemnak ambesemkorommani.

²Deritipit tamsan tame tanane. Era atakam atakamnak apok ere, Dere atakam tare etekoromo. Denom taasan bakenemtiitam aesostemin.

³Dere taasan bakenemtiitam aesostey, wanam Dere aofasiendaetemin. Tare deasan aofasiomtemettemin. Erarawa tanom era aemaptey asan takan aemaptemarom.

⁴Dere era aesostey asan era bokotpu tamsam.” Emes atakam aesime.

⁵Tomas arawa, “Tuhan! Dare era aesostempu damsam apok. Me, woatakamam, Era bokot tanom tamsam, emes atakam aesimmarem, ere wama tamenem?” Emes atakam aesime.

⁶Yesus arawa, atakam armat ipit akorome. “Dere owe Allah amsam bajaromat ipit ara aememey. Dere owe turunak baememom ipit ara aememey. Denom owe jiinenak batetam ipit ara aememey. Me Dera ambaromemtanis owe taka, Allahpu ambaremtemas. Wan owe Allahpu baemebarem asan apok.

⁷Tanom Dere tamsam apaye, Deritipitam tamsam. Emesare, waa ajiire tanom Armat Ipit tamsam. Tanom abi eteporekem.”

⁸Me Filipus arawa, “Tuhan! Wuritipit bi baporomtamaro. Erarawa dare jak akotnak aemaptemarom.” Emes atakam aesime.

⁹Yesusam, “Filipus! Dere tare takan tarainak aemapaarum. Me, Dere tamsam apoke? Emesare, debi aporenis owe, Deritipit biam emepores. Erarawa, ‘Wuritipit bi baporomtamaro,’ era atakam akoremarem, ere wama tamenem?

¹⁰Denom, Deritipitam, taka. Tare emes atakam eemnak bamesemkorom apoke? Me Dere tara akorommin atakam, ere depa atakam apok. Deritipitam, Denom, taka. Erarawa era aemmin pak Deritipit aemmar pak are.

¹¹Emesare, Denom, Deritipitam, taka. Tare era akorommin atakam bamesem apok apaye, era aemmin jinim bae pak aporay. Wanam Dere eemnak ambesemkorommani.

¹²Atakamnak, Dere eemnak ambesemkorommanis owe, era aemmin pak jipu atawejomtemas. Wanam, Dere Deritipit asan aoesostemin. Erarawa era owe aemtas pak, ere daytinak are. Era aemmin pak arawa, koser are.

¹³Tanom debajamkai owe aememmakam. Erarawa tare atakam Dera ajanimtankum, Dere era pak takes tara aemtamtemin. Dere era pak aemtamtey, owe, Deritipit atemtemas, emes aportemas.

¹⁴Tare debajamkai owe aememmakam. Erarawa Dera ajanimtankum pak takes aemtamtemin.”

¹⁵“Tare Dera afaimmankum apaye, tanom debasakamtam atakam ji aetemakam.

¹⁶Denom atakam Deritipit ajanimtemin. Armat Ipit arawa, wan Pi Bajat Ipit tara ataendaemtamteman. Era Ipitam tare takan ajamememaartem.

¹⁷Ere Allah Jip are. Armat Ipit, era atakamnak tara aememtamteman. Ara aemansa tapirmi pak jak asenomemmas owe Armat Ipit bapor apok aemmas. Anom Armat Ipit amsam apok. Erarawa Allah, Armat Ipit era owe baemetetam asan apok. Me, Armat Ipit tadamo setep aemema. Anom tajak bomon aemaptem. Erarawa tare Armat Ipit tamsam are.

¹⁸Dere tare barme jii tamen beken baemejios asan apok. Denom tadamopu aofasitemin.

¹⁹Bare arke apokkope, ara aemansa tapirmi owe, debi bopor apok aemtemanis. Tare ere, debi aoportemankum. Dere ajaorwasittemin. Erarawa tanom jiinenak aememaartemakam.

²⁰Denom, Deritipitam, taka. Taraye Deraye taka. Era bare, Allah Jip tare emes aporkoromtemakam.

²¹Owe debasakamtam atakam amsamnak aememmas apaye, wanam era atakam ji aeemmas apaye, are Dera afaimmanis owe erare. Deritipitam, Dera afaimmanis owe, afaimtem. Denom era owe afaimtemin. Denom era owepu ajateomemtemin.” Yesus emes atakam aesime.

²²Yudasam atakam Yesus akorome. “Tuhan! Wore dapu ajateomemtaroam, wanam Wore ara aemansa tapirmi pak jak asenommas owepu bajateomem apok, ere wama tamenem?” Emes atakam aesime. (Era Yudas, Yudas Iskariot apok. Are wan ipit juas Yudas.)

²³Yesus arawa, “Owe Dera afaimtanis apaye, are deatakam ji aetemas. Deritipitam era owe afaimtem. Deritipitam, Denom, era owe ambaromemtemamum, wanam Dare era owe takan aemaptemarom.

²⁴Me Dera bafaim apok owe, deatakam ji bae apok aememas. Era jane ajimakam atakam, ere deatakam apok. Ere Deritipit atakam are. Armat Ipitam Dera ataemomen.

²⁵Dere tare takan aemapmin, Dere ara atakam tara akorommin.

²⁶Denom atakam Deritipit ajanimtemin. Erarawa Armat Ipit era jak fiak baemapomtam Ipit ataendaemtem. Ere Allah Jip are. Me Allah Jip era atakam takes tara aememtamteman. Are, tara akoromo atakam takes, bimak binip tara aotetamteman.

²⁷Tanom ji baem jak aemapteteray. Dere era ji aeemin jak tamen pak tara ataatamtetermin. Era ataatammin ji baem jak, ara aemansa tapirmi ataatamemar pak tamen apok. Tanom jak pota bas. Ombaream bas.

²⁸Dere atakam tara akoromo. ‘Dere aesostemin, wanam tara aombaromemtemin,’ emes atakam aesimo. Tanom emes atakam jane ajiekem. Emesare, Deritipit ere, Ju Armat Ipit. Derarawa juas apok tamen. Denom Deritipitpu aesostemin. Erarawa tanom Dera bafaimnak aemenkum ere, tanom jak akot eteemapekem.

²⁹Dere era aemtey pak atakam bonak tara akoromo. Asep barerawa, Dere emes aemtey, tanom Dera ambesemtemankum.

³⁰Emesare, ara aemansa tapirmi aomepmar ipit ajinaotem. Erarawa Dere atakam tara bojamkoram jirao apok aemtemin. Era ipit ere, atakam Dera baemesakamtam asan apok.

³¹Dere Deritipit afaimmin. Denom Deritipit asakamtamman atakam takes ji aemin. Ara aemansa tapirmi oweam emes baportas. De! Baesosamo.”