Read Casuarina Coast Asmat YOHANES 15 Bible Online

YOHANES 15 - Casuarina Coast Asmat bible

YOHANES 15

¹“Dere eek akot apeomtepemar wus tamen awar. Deritipit arawa, era kebun karai ipit tamen.

²Me Dera ajamkaimanis owe, wus efe tamen. Deritipit, era wus efe, eek bapeomtep apok aporto, Are asesakamosomum. Are era wus efe, eek bapeomtep aporto, Are era koser wus efe takes asesakamosomum. Ere daytu wus efe, eek tanane bapeomtep are.

³Tare dokoreo atakam ji aeekem. Erarawa tare akot aememekem.

⁴Tanom takan Dera ajamjapaarani. Derarawa, ta takan ajamemapaartemin. Wus efe, wus anakot bamatap apok aemapaarto, are eek baemepeomtep asan apok. Tanom takan Dera bajamemapaar apok aemtakam, tare eek baemepeomtep asan apok.

⁵Dere wus anakot tamen. Tararawa, wus efe tamen. Owe takan Dera ajamemapaartanis, wanam Dere era owe takan ajamemapaartey, era owe, eek pii tanane ambwetemas. Tanom takan Dera bajamemap apok aemtakam, tare pak baemeem asan apoknak.

⁶Owe takan Dera bajamemapaar apok aemtanis, are pota wus efe tamen. Oweam era wus efe asesakamosomemas. Era wus eferawa, sa asam. Oweam era wus efe ajarisisimemas, wanam jis asapimapomemas. Era wus eferawa, jis amboameskurumum.

⁷Tare takan Dera ajamemapaartankum, wanam tare deatakam ji aetakam, ere era akot aportakam pak atakam Allah ajanimay. Armat Ipit arawa, era pak tara aemtamteman.

⁸Tare eek tanane apetakam, Deritipit atemtemtemakam. Ere, tare Dera bajamkainak owe aporomtamtemakam.

⁹Deritipit Dera afaimman. Denom emes taka tara afaimmin. Tanom deatakam ji aeaaray. Erarawa Dere tara afaimaartemin.

¹⁰Dere Deritipit atakam ji aeaaremin. Erarawa Deritipit Dera afaimaareman. Tanom debasakamtam atakam ji aeaartakam, Denom tara afaimaartemin.

¹¹Dere jak akot tara batetamteter, ere akot. Tanom jak akotnak baemem, akot. Erarawa, Dere ara atakam tara akorommin.

¹²Denom, atakam tara asakamtammin. Tare tarmamon ajamfaimamay. Ere Dere tara afaimemin emes tamen ajamfaimamay.

¹³Jipit taka, ajoo owe bajortaer, emes dambir aemto, are era owe daytinak afaimum. Emes baem, ere bafaim daytinak. Me wan bafaim, ere kope.

¹⁴Tanom era asakamtammin atakam ji aetakam, ere tare dejoo owe.

¹⁵Bambi karai baetam owe, karai armat ipit aemar pak amsam apok. Erarawa Dere, ‘Tare debambi karai baetam owe,’ emes bajie apok. Me, Dere Deritipit jane ajio atakam takes, atakam tara akoromo. Erarawa Dere, ‘Tare dejoo owe,’ emes atakam aesimmin.

¹⁶Tare, Dera baeremtaer apok. Me, Dere tara aereremartaatetero. Denom tare eek tanane bape ambirimemomtetero. Era apetakam eek, bakari apok eek. Emesare, tare atakam Deritipit ajanimtakam, Armat Ipit era ajanimtakam pak takes atetamteman.

¹⁷Emesare, tanom tarmamon ajamfaimamay. Dere emes atakam tara asakamtammin.”

¹⁸“Ara aemansa tapirmi owe bifane tara afeomeman apeno. Me, owe bifane bonak Dera afeomemenis, wanam bifane asep tara afeomemen. Tanom emes bimak binip bajanimem bas.

¹⁹Ara aemansa tapirmi owe, armamon ajamfaimamemas. Tare ara aemansa tapirmi pak ajamkaiekem ere, ara oweam tara afaimen. Me, tare ara aemansa tapirmi pak bajamkai apok. Erarawa ara owe bifane tara afeomemman. Me, Dere tare ara aemansa tapirmi pak beken bajios aereremartaatetero.

²⁰Era akoromo atakam bimak binip ajanimomay. ‘Bambi karai baetam ipit juas aptam, wanam karai armat ipit juas apok, ere emes apok.’ Emes atakam aesimo. Me wan owe Dera ajurusumenis ere, anom tara ajurusumteman. Me wan owerawa, deatakam ji aees ere, anom taatakam ji aetemas.

²¹Emesare, wan owe Dera ambirimemomen Ipit amsam apok. Me, tare dera ajamkaimankum owe tarare. Era oweam emes aportas, are tara ajurusumteman.

²²Dere atakam era owe bakorom bandae apok ere, era oweam dosa baem apok aemapes. Me, Dere atakam era owe etekoromo. Erarawa are era dosa aemmas pak, baemepatim asan apok.

²³Bifane Dera afeomemmanis owe, bifane Deritipitam afeomemmas.

²⁴Dere jinim bae pak era owe bipu aemo. Wan oweam era jinim bae pak baemeem asan apok. Dere era jinim bae pak baem apok ere, era owe dosa baem apok aemapes. Me, era owe era jinim bae pak apores, wanam bifane Denom, Deritipitam, afeomemeroes.

²⁵Era aemenis pak ere, era owe atoomes Basakamtam Atakam Buku atakam jipu. Era atakam ere, ‘Dere pota pak baem apok. Me, are bifane Dera afeomemenis.’ Emes atakam aeapoma.

²⁶Emesare Pi tara Bajat Ipit, Deritipit takan aemapes. Era Ipit Allah Jip are. Dere Allah Jip tadamopu ambirimemomtemin. Are Deritipit asan aendaetem. Me Allah Jip atakamnak tara aememtamteman. Armat Ipitam deatakam tara aokoretamteman.

²⁷Bonaknak takan aememom. Waa ajiiream takan aememmarom. Erarawa tanom deatakam wan owe aokoretamtemankum.”