Read Casuarina Coast Asmat YOHANES 18 Bible Online

YOHANES 18 - Casuarina Coast Asmat bible

YOHANES 18

¹Yesus emes atakam akorerawa, Aare, abajamkai oweam, ju kope juas Kidron poman aokorjires. Era asan eek aptam wus kebunpu are. Armat Ipitam, abajamkai oweam, era kebunpu ambaremes.

²Bonak ere, Yesusam, abajamkai oweam, erapu takan aemjara ajaies. Erarawa Yesus era jokoman owe aotasimemomtamto ipit juas Yudas, erapu amsam.

³Me Allah Tame pak baem owe daytu anama Parisi owe Allah Tame banamek batai owe, atakam asakamtames. Me Yudas arawa, era banamek batai owe anama tentara owe tanane era kebunpu bonak ajaromatmape. Era owe, lentera tananeam, sese tananeam, fero pak tananeam, emes atoomemteteres.

⁴Yesusam era owe ara aemtas pak takes amsam. Erarawa Yesus ajise, wanam atakam era owe akorome. “Tare ta ipita dimarmakam?” Emes atakam aesime.

⁵Era owerawa, “Dare Nasaret ipit juas Yesus andimarmarom.” Emes atakam aesimes. Yesus arawa, “Dere ara aememey,” emes atakam aesime. Emesare, Yesus era jokoman owe aotasimemomtamto ipit juas Yudas, era owe ajamememe.

⁶Me Yesusam, “Dere ara aememey,” emes atakam aesime ere, era owe aotasies, wanam bap andaebuanses. Erarawa Armat Ipit era owe aojatepore. “Tare ta ipita dimarmakam?” Emes atakam aesime. Era owerawa, “Dare Nasaret ipit juas Yesus andimarmarom.” Emes atakam aesimes.

⁸Yesusam, “Dere atakam emeesimey. Dere ara aememey. Tare Dera andimarmankum apaye, ara ajamkaimanis owe, emes baesostas.” Emes atakam aesime.

⁹Bonak ere, Yesus atakam Allah akorome, “Era atetamenim owe bapakapios apoknak aemes,” emes atakam aesime. Erarawa Are, “Ara ajamkaimanis owe baesostas,” ere, era bonak akore atakam jipu.

¹⁰Me Simon Petrusam jii warim jirao atoome. Are era warim asumtaere, wanam are Allah Tame pak baem ipit daytu abambi karai baetam ipit bo poman janemak asakamdaeme. Era bambi karai baetam ipit juas Malkus.

¹¹Yesusam atakam Petrus akorome. “Era warim ese bomon aoeapomey. Deritipit, Dere emes bajirisem, atakam asakamtiie. Wobimak binip ere, ‘Yesus emes bajurusum pota,’ emes bimak binip atetarammarem apaye?” Yesus emes atakam aesime.

¹²Emesare, tentara oweam, akapar ipitam, Allah Tame banamek batai oweam, Yesus ajipirtaeres. Are Yesus ban banam ajikapomes.

¹³Are Yesus, Hanas bipu atomases. Are Hanas, Kayafas anapot apores. Era tahun ere, Kayafas, Allah Tame pak baem ipit daytu aememe.

¹⁴Me Kayafasam bonaknak atakam akore, “Jipit taka, are owe takes dambir atemtamto, wanam era dasaman owe takes dambir batem apok, ere akot.” Emes atakam akore.

¹⁵Simon Petrusam, wan Yesus bajamkai ipit takaam, Yesus fe asaramemis. Emesare, Allah Tame pak baem ipit daytu, era wan Yesus bajamkai ipit amsam. Erarawa era ipit, Yesus Allah Tame pak baem ipit daytu tamsan tiri bomon, takan ajamjiieme.

¹⁶Me Petrus ere, tasan aememe. Are jimsappu aememe. Me Allah Tame pak baem ipit daytu wan Yesus bajamkai ipit amsam. Me Yesus bajamkai ipit tasan ajise. Are atakam era jimsap banamek batai taot akorome. Ararawa, Petrus atoomjiie.

¹⁷Era jimsap banamek batai taot, atakam Petrus akorome. “Wonom era ipit abajamkai ipit worare apaye?” Emes atakam aesime. Me Petrus ere, “Sii! Dere emes apok.” Emes atakam aesime.

¹⁸Era tame karai baetam oweam, Allah Tame banamek batai oweam, damo jufu aememes. Erarawa are jis atookomes. Are jisis jisnam ajies. Me Petrusam era owe jisnam takan ajies.

¹⁹Emesare, Allah Tame pak baem ipit daytu, Yesus ajatepore. Are abajamkai oweam, era aememtame atakamam, Yesus ajatepore.

²⁰Yesus arawa, atep ajite. “Dere atakam owe bipu baso akoreaaru. Denom ju afaafeaarir, era Yahudi owe samayen tame bomonam, Allah Tame bomonam, atakam akoreaaru. Era asan Yahudi owe takes bajarisiap asan. Denom tiruu atakam bakore apoknak.

²¹Wore Dera ajatepormanim ere, wama tamenem? Deatakam jane ajiaaris owe ajateporay. Era owe era akoreaaru atakam amsam.” Yesus emes atakam aesime.

²²Yesus emes atakam akorerawa, era asan aememe Allah Tame banamek batai ipit, Yesus aake apakame. Era ipitam, “Wore Allah Tame pak baem ipit daytu emes atep apa jitmarem?” Emes atakam aesime.

²³Yesus arawa, “Dere pota atakam pakoreminaye, wonom era pota atakam baso ooesimtamman. Me, Dere akot atakam pakoreminaye, wore deake apa pakammanim?” Emes atakam aesime.

²⁴Emesare, Hanas, owe Yesus ban banam aptam, Kayafaspu batoomtin, atakam asakamtame. Me Kayafas, Allah Tame pak baem ipit daytu.

²⁵Emesare. Simon Petrus, era jisis jisnam taojimape, wan oweam armat ipit ajatepores. “Wonom ara aemema ipit bajamkai ipit apaye?” Emes atakam aesimes. Me Petrus ere, apatime. “Dere emes apok.” Emes atakam aesime.

²⁶Me Allah Tame pak baem ipit daytu akarai baetam ipit taka, erapu aememe. Are Petrus janemak asakamdaeme ipit ajoo ipit. Are atakam akorome. “Me kebunpu ere, dere wore Yesus takan aememismarem aporismin apaye?” Emes atakam aesime.

²⁷Me Petrus ere, aopatime. Aopatimerawa, ajomo ipit atakam akore.

²⁸Emesare, era Yahudi owe, Yesus, Kayafas tame atoomjises. Wanam are Armat Ipit gubernur tame atoomtines. Ere tomitimar. Me Yahudi owe ere, era tame bajii apok. Are Paskah Bare Pakambwi pak banda, akot ajies. Erarawa are aagama karao pak baem, potan.

²⁹Me Pilatusam emes apore. Armat ipit arawa, tasan ajise, wanam atakam era owe akorome. “Ara aemema ipit wama pota pak eme? Tare wama atakam koremakam?” Emes atakam aesime.

³⁰Era owerawa, “Ara Ipit pota pak baem apok ere, dare wora baemeotasimemomtam asan apok.” Emes atakam aesimes.

³¹Me Pilatus arawa, “Tanom era Ipit bataeray. Wanam apota pak aeme, tabasakamtam atakam jipu, atakam tamba ajamsakamamay.” Emes atakam aesime. Me Yahudi owe ere, atakam Pilatus akoromes. “Me dare Yahudi owe, owe batatii atakam basakamtii, ere karao.” Emes atakam aesimes.

³²Bonakam, Yesus atakam akore, “Dere emes dambir atemtemin,” emes atakam aesime. Era owe aemes pak arawa, Yesus akore atakam jipu.

³³Emesare, Pilatus atame aojiie. Ararawa, Yesus ajate. Are Armat Ipit ajatepore. “Wore Yahudi owe araja ipit ape?” Emes atakam aesime.

³⁴Yesus arawa, “Era ajatepormanim ere, wobimak binip atakam apaye? Owe deatakam wora bakorom apaye?” Emes atakam aesime.

³⁵Me Pilatusam, “Dere Yahudi ipit apok. Wosaman oweam, Allah Tame pak baem owe daytuam, Wore dera aotasimemomtamanis. Wore apa pak emem?” Emes atakam aesime.

³⁶Yesusam, “Dere ara aemansa tapirmi owe baomep ipit apok. Dere ara aemansa tapirmi owe baomep ipit aememo ere, dekarai baetam owe jii etejamomares. Owe Dere era Yahudi owe baotasimemomtam-ombar. Dere ere, ara aemansa tapirmi owe baomep owe emes tamen apok.” Emes atakam aesime.

³⁷Pilatus arawa, “Wore ere, raja ipit apaye?” Emes atakam aesime. Yesusam, “Wore Dere raja ipit atakam akorommanim, ere atakamnak. Dere, atakamnak, owe bakorom, ara aemansa tapirmi andaeo. Dere atakamnak, owe bakorom ajisamso. Era atakamnakto aememmas owe deatakam jane ajimas.” Emes atakam aesime.

³⁸Me Pilatus ere, “Atakamnak ere, wama tamenem?” Emes atakam aesime. Me Pilatus emes atakam akorerawa, are tasan aojise. Are atakam Yahudi owe akorome. “Dere ara aemema Ipit jokoman pak baem apok apormin.

³⁹Tahuniin tahuniin, era Paskah Pakambwi Bare ere, dere buji tame bomon baemap ipit taka, tara asurumtama ajaio. Ere tatarai pak jipu. Tare ere, dere Yahudi owe Raja ipit tara basurumjisimtam, akot ape?” Emes atakam aesime.

⁴⁰Era owerawa atakam afaketaaes. “Wore ara aemema Ipit basurumjisimtas bas. Me, Barabas asurumjisimtamey.” Emes atakam aesimes. Era Barabas ere, pak tasa baetaa ipit.