Read Casuarina Coast Asmat YOHANES 19 Bible Online

YOHANES 19 - Casuarina Coast Asmat bible

YOHANES 19

¹Emesare. Pilatus, owe, Yesus wusup bata atakam asakamtame. Era owerawa, Yesus ataeres, wanam wusup ates.

²Tentara oweam fa aptam sinim ataeres, wanam kuus bajiimapom pi asiapomes. Ararawa, era pi Yesus kuus ajiimapomes. Are esakam baju jirao Yesus ajiimemomes.

³Era owerawa, Armat Ipit bipu ambaroma ajaies, wanam atakam akoroma ajaies. “Yahudi Owe Raja Ipit Akotnak! Selamato!” Emes atakam aesima ajaies. Are Yesus ake apakama ajaies.

⁴Me Pilatusam tasan aojise, wanam atakam era Yahudi owe aokorome. “Baporay! Dere ara aemema Ipit tapu aofasimjisimtemin. Tare, dere era Ipit jokoman pak baem apok apormin, emes aportemakam.” Emes atakam aesime.

⁵Emesare, Yesus tasan ajise. Are fa aptam kuus bajiimapom pi akuus ajiimomjise. Are esakam baju jirao ametejiimomjise. Me Pilatusam atakam era owe aokorome. “Baporay! Armat Ipit arare!” Emes atakam aesime.

⁶Era Allah Tame pak baem owe daytuam, Allah Tame banamek batai oweam, Armat Ipit apores. Ararawa, atakam afaketaaes. “Era Ipit salib wus oup atatopomey! Era Ipit salib wus oup atatopomey!” Emes atakam aesima ajaies. Pilatus arawa, atakam era owe aokorome. “Dere ara Ipit jokoman pak baem apok apormin. Emesare tanom salib wus oup tamba atatopomay.” Emes atakam aesime.

⁷Me Yahudi oweam, “Ara aemema Ipit atakam akore. ‘Dere Allah Andep.’ Emes atakam aesime. Dare ere, basakamtam atakam ara aemompom. Era basakamtam atakam, emes atakam bakore ipit batatii, atakam akorem.” Emes atakam aesimes.

⁸Me Pilatusam emes atakam jane ajie ere, ombare daytu aememe.

⁹Armat ipit arawa, Gubernur tame aojiie, wanam Yesus aojatepore. “Wore etepepu iitem?” Emes atakam aesime. Yesus ere, atep bajit apoknak.

¹⁰Pilatus arawa, “Wore atep dera bajit baose? Dere wora basurumjisimtam fiak pak ara aemomey. Denom wore salib wus oup batatopom fiak pak ara aemomey. Wore emes womsam apoke?” Emes atakam aesime.

¹¹Yesusam, “Allah wore Dera baem fiak pak wora batetam apok ere, wore emes fiak pak baemomem apoknak aemmarem. Emesare, Dere wora aotasimemomtaman ipit, ere jokomannak ipit. Worarawa, jokoman kope.” Emes atakam aesime.

¹²Pilatus emes atakam jane ajie ere, are Yesus basurumjisimtam bambi aempore. Me Yahudi owe ere, atakam afaketaaes. “Ara aemema Ipit ere, ‘Dere raja ipit,’ emes atakam aesime. Emes atakam bakore owe, Raja Kaisar ajokoman owe erare. Wore ara aemema Ipit asurumjisimtamtem, wore Kaisar ajoo ipit apok.” Emes atakam aesimes.

¹³Pilatus emes atakam jane ajie are, are Yesus tasan atoomjise. Pilatus arawa, era owe atakam basakamtii asan ajiiape. Era asan juas “Eka Fope Oup Asan.” Ibrani atakam, era asan juas “Gabata.”

¹⁴Era pak aemes, ere jee imtuu atemetape. Ajofe afeamesto, ere Paskah Pakambwi Bare. Me Pilatusam atakam era Yahudi owe akorome. “Baporay! Taraja ipit ara aememar!” Emes atakam aesime.

¹⁵Era owerawa, “Ara Ipit bataerey! Ara Ipit bataerey! Era salib wus oup atatopomey!” Emes atakam aesimes. Me Pilatusam, “Dere taraja ipit salib wus oup batatopom ape?” Emes atakam aesime. Me Allah Tame pak owe owe dayturawa, “Daraja ipit, ere Kaisar taka are. Dare wan raja ipit apok.” Emes atakam aesimes.

¹⁶Emesare, Pilatus, Yesus salib wus oup batatopom era owe aotasimemomtame. Era owerawa, Yesus ataeres.

¹⁷Yesusam era salib wus sep ataetiie, wanam asan juas “Dambir Owe Kuus Embak Asan” atoomtine. Ibrani atakam arawa, era asan juas “Golgota.”

¹⁸Era asan ere, owe wan ipit amnuk salib wus oup ataetopomes. Are wan ipit Yesus bo poman apa salib wus oup ataetopomes. Are wan ipit Yesus tamo poman apa salib wus oup ataetopomes. Yesus arawa, era ipit amnuk waut aemtepen.

¹⁹Pilatusam atakam aeapome, wanam are owe era aeapome pak salib wus oup bataetopom atakam asakamtame. Era aeapome atakam ere, “Ara Ipit Nasaret saman Ipit juas Yesus. Yahudi Owe Raja Ipit,” Emes atakam aeapome.

²⁰Me Yesus salib wus oup ataetopomes asan kota setep. Era juas aeapome atakam, Ibrani atakamam, Latin atakamam, Yunani atakamam, emes atakam are. Erarawa Yahudi owe tanane era juas baca aees.

²¹Emesare, era Yahudi Allah Tame pak baem owe daytu, atakam Pilatus akoromes. “Wore, ‘Yahudi Owe araja ipit,’ emes atakam baeapom bas. Me, ‘Ara Ipitam, “Dere Yahudi owe araja ipit,” emes atakam aesime.’ Emes atakam aeapomey.” Emes atakam aesimes.

²²Me Pilatus ere, “Era aeapomey atakam emes baemapto.” Emes atakam aesime.

²³Emesare, tentara owe, Yesus, salib wus oup ataetopomes, are apakaian ataaes. Ararawa, era pakaian, eak taka apok asaiamotes. Era tentara poreemema ajies, taka taeta, taka taeta ajies. Are era bomon baju jirao ataeres. Bonaknak ere, era baju asies owe, kain bino takanak asies. Erarawa era baju aip amnuk takan bakapom apok baju.

²⁴Era tentara oweam emes apores, wanam atakam armamon ajamkorames. “Dare era baju bakakam bas. Emesare, eka koser pandaetaatiiteteramo. Abaju ataetto ipit baporomtam pak are.” Emes atakam aesimes. Era pakam Alkitab atakam jipu: “Are depakaian sai asaiamotes. Are debaju bataet, eka koser andaetaatiiteteres.” Alkitab emes atakam akorem. Emesare, era tentara oweam emes taka aemes.

²⁵Yesus arsootam, arsoot armasiam, Klopas aremo juas Mariaam, Maria Magdalenaam, Yesus salib wus setep aememes.

²⁶Yesus, era daytinak afaimaarir abajamkai ipit taka, arsoot setep aememe apore. Ararawa, “Ao! Baporey! Ara ipit wondep baememto.” Emes atakam aesime.

²⁷Yesus arawa, atakam era bajamkai ipit akorome. “Baporey! Ara taot worsoot baemapto.” Emes atakam aesime. Emesare, era bare ajiire, era bajamkai ipit Yesus arsoot atame atoomjiie.

²⁸Emesare. Yesus, Allah asakamtame atakam takes, afaafetiikorome apore. Ararawa, “De bwito!” Emes atakam aesime. Era pak Alkitab atakam jipu.

²⁹Era asan, bwi baoweapom pak taka aemape. Era bwi baoweapom pak bomon asesa anggur bwi. Oweam bwi basetentaer pak ataeres, wanam era pak anggur bwi asetentaeres. Ararawa, era pak fira tamen pak juas hisop aip asimapomes, wanam era pak Yesus okonepu ataesumtemetemtames.

³⁰Yesusam era anggur bwi andapore. Ararawa, “Dere Allah asakamtamen atakam etefaafetiikoromey.” Emes atakam aesime. Armat Ipit arawa, jimas ajiretepe, wanam dambir aeme.

³¹Emesare, ere Hari Jumat. Era Yahudi Owe Samayen Bare pak bafaafetii bare. Era aamsekunaoto Yahudi Owe Samayen Baream, Paskah Pakambwi Bare. Ere adaytinak bare erare. Me Yahudi oweam, era bare, daytinak bare apores. Erarawa are era dambir owe, era salib wus oup baemtep potan. Ararawa, Pilatus, owe, era salib wus oup aemtepes owe kamtan bapakamtopomteter atakam basakamtam, atakam ajanimes. [Era pak era owe dambir fef baem pak.] Are Pilatus, owe, era dambir owe bataa atakam basakamtam, atakam ajanimes.

³²Erarawa era tentara owe ambaromes, wanam are Yesus salib wus oup takan aemtepe ipit taka kamtan amnuk takes apakamtopomes. Ararawa, era wan ipitam kamtan apakamtopomes.

³³Are Yesuspu ambaremes. Me, are Yesus dambir tair apores, wanam are akamtan bapakamtopom apok.

³⁴Me wan tentara ipit taka ere, wurini Yesus wusirmi ambititopome. Ambititopomerawa, eseeam, bwiam, ametebawumomjisemis.

³⁵Era pak apore ipit, emes ateman atame. Era atemanam, ere atakamnak. Armat ipitam era ateman atame atakam, atakamnak apormar are. Are tare era ateman atakam bamesem akot ajim. Erarawa are era pak ateman tara atamman.

³⁶Emesare, Alkitabam, “Are adamo emak bapakamtopom apoknak, aemtemas.” Wanam, “Are wurini ambititopomtas ipit aportemas.” Alkitab emes atakam akorem. Era owe aemes pakam Alkitab atakam jipu taka.

³⁷

³⁸Emesare, kota Arimatea ipit juas Yusuf, Pilatus ambarome. Are Yesus dambir ipit bataer, atakam armat ipit ajanime. (Yusuf, Yesus bajamkai ipit. Me, are Yahudi owe ombare aememe. Erarawa are tiruu ajamkaie.) Emesare, Pilatus Yusuf ajanime atakam atetame. Erarawa Yusuf Yesus salibpu ambarome, wanam dambir ipit ataere.

³⁹Nikodemusam era asan ajamesose. Bonak ere, armat ipit, wus tapi juas muram, wan pinim akot pak juas gaharuam, aartame. Are era pakam era asan atuomase. Era pak, kilogram 30 apaye. (Nikodemus, bonaknak Yesuspu eam ambaremismap ipit are.)

⁴⁰Emesare, era ipit amnukam Yesus dambir ipit ataeremis. Ararawa, akot kain era dambir ipitam, era pinim akot pakam, biramo takan ajikitiiemis. Yahudi owe aememas pak tai tamen aememis.

⁴¹Yesus salib wus oup atatopomes asan, ere eek aptam wus kebun are. Era kebun, japen asisies eka jipa aemape. Era eka jipa, owe, dambir owe, bajiitaetii asan. Me, ere ai dambir owe asan. Oweam dambir owe era eka jipa bomon bajiitaetii apok aemes.

⁴²Yusuf anama Nikodemus Yahudi Owe Samayen Bare setep kope aporemis. Anom era eka jipa setep aporemis. Erarawa are Yesus dambir ipit era asan ajiitaetiiemis.