Read Casuarina Coast Asmat YOHANES 2 Bible Online

YOHANES 2 - Casuarina Coast Asmat bible

YOHANES 2

¹Emesare. Joon ere, owe, Galilea tapirmi kota juas Kana, ooreysai pakambwi aemes. Yesus arsootam era asan ajamememe.

²Owe, Yesusam, abajamkai oweam, era pakambwi bajameem ajates.

³Era pakambwi oweam, anggur bwi andakoromes. Yesus arsoot emes apore ere, are atakam Yesus akorome. “Aemapares owe anggur bwi emedakoromares.” Emes atakam aesime.

⁴Yesus arawa, “Ao! Atakam Dera basakamtam bas. Me De jinim bae pak baem, atokom.” Emes atakam aesime.

⁵Emesare, arsoot, atakam era karai baetam owe akorome. “Me Armat Ipit atakam tara asakamtamtan apaye, emes aemay.” Emes atakam aesime.

⁶Era asan, bwi pak poman ban taka aemapes. Emesare, Yahudi agama owe, banam, baiam, pakam, bwi baeosom basakamtam pak tai tanane. Era bwi pak Yahudi agama, emes bwi baeosom pak are. Era bwi pak, sekumkum ajateemes. Era bwi pak taka taka, bwi liter 80 ajiire apaye, emes baoweapomteter are.

⁷Yesusam atakam era karai baetam owe akorome. “Era bwi pak takes bwi baoweapomteteray.” Emes atakam aesime. Erarawa are bwi iimtipnak aoweapomteteres.

⁸Armat Ipit arawa, “Emesare, era bwi pak bomon bwi bajirtaeray. Wanam era pakambwi armat ipit atoomtinay.” Emes atakam aesime. Era owerawa, era bwi, pakambwi armat ipit atoomtintames.

⁹Emesare, era bwinak anggur bwi ajaorese. Era pakambwi armat ipitam era anggur bwi andapore. Era bwi etepu eetoomtinaoares, are bapor apok. Me, era bwi ajirtaeres karai baetam owe amsam. Emesare, era pakambwi armat ipit, era petae ajieme ipit ajate.

¹⁰Are atakam era ipit akorome. “Owe takes akot anggur bwi bonak ato tetamemas. Wanam owe anggur bwi daytu emes andetas, era pota pepe anggur bwi atetamemas. Me, wore ere, akot anggur bwi atukumapommarem, wanam japen ajisitaapommarem.” Emes atakam aesime.

¹¹Yesus era pak Galilea tapirmi kota juas Kana aeme. Ere bonaknak aeme jinim bae pak erare. Era jinim bae pak ere aakotipitnak aememe baporomtam are. Emesare, abajamkai oweam, Armat Ipit eemnak ambesemkoromes.

¹²Emesare. Yesusam, arsootam, abajamkai oweam, Kapernaum aesoses. Are ise arke baes apok.

¹³Emesare, Yahudi Paskah Pakambwi Bare setep aemanse. Yesus arawa, Yerusalem aesose.

¹⁴Are pak jow bauumamtaer owe, Allah Tame bomon apore. Era owe sapiam, dombaam, pari sakaoam, jow auumamtaera ajaies. Yesusam, uang jow bauumamtaa owe amejapu aemapteteres apore.

¹⁵Armat Ipit arawa, dem wusup pak akenemapome. Are era owe takesam, idombaam, asapiam, Allah Tame bomon ambirimjisime. Are era uang jow bauumamtaa owe era uang bambi apatakumdaeme. Are ameja takes bipare awasimtaera awaimosoma ajaie.

¹⁶Are atakam era pari sakao jow bauumamtaa owe akorome. “Ara pak takes bataeray. Tare Deritipit Tame, pak bajit tame baferemtii bas.” Emes atakam aesime.

¹⁷Me abajamkai oweam Alkitab atakam bimak binip ajanimomes. “Dere Deritipit Tame daytinak afaimmin. Erarawa jak ambap aememmin.” Alkitab emes atakam akorem.

¹⁸Emesare, Yahudi owe Armat Ipit ajatepores. “Allah Wore emes baem atakam Wora asakamtamen apaye, Wore wama jinim bae pak poromtamtaroam?” Emes atakam aesimes.

¹⁹Yesus arawa, “Allah Tame atietiiay. Derarawa, bare bamintep era tame aoeapomtemin.” Emes atakam aesime.

²⁰Me Yahudi oweam, “Owe, tahun 46 ara tame aeapomaaris. Worarawa, ara tame bare bamintep boeapom are” Emes atakam aesimes.

²¹Armat Ipit ere, Allah Tame atakam akore ere, Are era Yahudi owe samayen tame daytu atakam apok. Me, Are adamo atakam akore.

²²Asep barerawa, Yesus ajaorwasite ere, abajamkai owe, Yesus akore atakam, bimak binip ajanimomes. Era owerawa, Alkitab atakam eemnak ambesemkoromes. Anom Yesus akore atakam eemnak ambesemkoromes.

²³Emesare. Yesus Paskah Pakambwi Bare Yerusalem aememe. Are era asan jinim bae pak tanane aeme. Oweam tanane era jinim bae pak apores, wanam Armat Ipit eemnak ambesemkoromes.

²⁴Yesus ere, asamot owe takes amsam. Erarawa Are era owe bamesem apok.

²⁵Anom asamot owe jak bomon pak takes amsam. Erarawa Are owe era asamot owe aememas pak, atakam Ara bakoretam apok.