Read Casuarina Coast Asmat YOHANES 20 Bible Online

YOHANES 20 - Casuarina Coast Asmat bible

YOHANES 20

¹Emesare, Hari Minggu tomitim, Maria Magdalena era eka jipapu ambaremen. Ere jo bapuames apok aren. Armat taotam, era eka jipa iim akapimapomes eka, apa asan aemape aporen.

²Erarawa are Simon Petrusam, wan Yesus bajamkai ipitam, era aemapes asanpu ja akukose. Era wan bajamkai ipit taka ere, Yesus daytu afaimaarir. Era taotam atakam era ipit amnuk akorome. “Owe Tuhan dambir ipit era eka jipa bomon atoomjises. Danom era owe era dambir ipit ataeres, me era ataetiies asan damsam apok.” Emes atakam aesime.

³Emesare, Petrus anama wan Yesus bajamkai ipit ajisemis, wanam era eka jipapu aesosemis.

⁴Era ipit amnuk ja takan atosemis. Me, wan Yesus bajamkai ipit ja fero ate. Erarawa are era eka jipapu bonak atakambareme. Me Petrus arawa, asep ambareme.

⁵Me wan ipit jimas ajiramse, wanam eka jipa banamek apemjiime. Are Yesus dambir ipit biramo ajikitiies kain, bambi asuramse apore. Are ere, era eka jipa bajit apok.

⁶Emesare, Simon Petrus era ipit fe asarame. Anom era asan ambareme, wanam era eka jipa ajiieme. Are era kain bambi asuramse apore.

⁷Are Yesus kuus biramo ajikitiies kain asuramse apore. Era kain ere, era wan kain takan baemames apok apore. Are apa asan afofoamse.

⁸Me wan Yesus bajamkai ipitam era eka jipa ajiieme. Are era eka jipapu bonak ambareme ipit are. Are era kain bambi asuramse apore, wanam are Yesus ajaorwasite atakam eemnak apore.

⁹(Alkitab Yesus bajaorwasit atakam akorem. Me, era owe, era atakam jane bajiekorom apok aemes.)

¹⁰Emesare, era Yesus bajamkai ipit amnuk tame aoesosemis.

¹¹Emesare. Maria era eka jipa tasan aememen. Are bate ambaten. Bate taomebatmape, are jimas ajiramse, wanam era eka jipa bomon banep apemjiime.

¹²Are malaikat jamnuk pakaian fasar ajiimompemis aporen. Are Yesus bonak aemanse asanpu aemapemisen. Wan malaikat Yesus kuus aemansepu emapen. Me wan arawa, kamtan aemansepu emapen.

¹³Era malaikat owe jamnukam atakam Maria akoromemisen. “Wore apa bate batmarem?” Emes atakam aesimemisen. Armat taotam, “Owe deTuhan dambir ipit ataerares. Denom era dambir ipit ataetiiares asan demsam apok.” Emes atakam aesimen.

¹⁴Emes atakam akorerawa, bimin awaiemen. Are Yesus era asan aememe aporen. Me, are era aememe Ipit, Yesus apok jiraoemen.

¹⁵Yesus arawa, atakam era taot akoromen. “Wore apa bate batmarem? Wore ta ipita dimarmarem?” Emes atakam aesimen. Me Armat taot ere, era ipit, era kebun karai ipit jiraoemen. Erarawa, “Wore Yesus dambir ipit ataetiiarem apaye, wore era ataapomarem asan, atakam baesimtaman. Derarawa, era dambir ipit aotaertemin.” Emes atakam aesimen.

¹⁶Yesus arawa, atakam armat taot akoromen. “Maria!” Emes atakam aesimen. Armat taot, bimin awaieme, wanam Ibrani atakam Yesus akoromen. “Rabuni!” Emes atakam aesimen. (“Rabuni” daatakam jow bauumtaer, “Guru”.)

¹⁷Yesusam, “Dere Deritipitpu batemet apok. Erarawa wonom ban Dera baosomomem bas. Me, wore debajamkai owepu aesosey, wanam atakam era owe aesimtamey. ‘Yesusam, “Dere Deritipitpu atemettemin. Dere deAllahpu atemettemin. Armat Ipit Taritipit anama taAllah,” emes atakam aesima.’ Wore emes atakam aesimtamey.” Yesus emes atakam aesimen.

¹⁸Emesare, Maria Magdalena Yesus bajamkai owepu aesose, wanam, “Tuhan bi eteporey,” emes atakam aesime. Are Yesus atakam armat taot akorome atakam era owe aokorome.

¹⁹Emesare. Era Hari Minggu eam ere, Yesus bajamkai owe, tame takakor aemapes. Are Yahudi owe ombare ememes. Erarawa are era jimsap takes banam fiak akamkamimapomes. Yesusam ambarome, wanam era owe waut ajiitarameme. Are atakam era owe akorome. “Allah asan akot tara baemtan.” Emes atakam aesime.

²⁰Emes atakam akorerawa, Armat Ipit aban anama awusirmi, era owe aporomtame. Me Armat Ipit ajamkaies owe Tuhan bi apores, are jak akot aememes.

²¹Emesare, Yesus atakam era owe aokorome. “Allah, asan akot tara baemtan. Emesare, Deritipit Dera ambirimemomen. Denom emes tamen taka tare era samaniin samaniin ambirimemommin.” Emes atakam aesime.

²²Armat Ipit emes atakam akorerawa, bwea fo era owe afufumpirime. Are atakam era owe akorome. “Allah Jip ataetteteray.

²³Tare owe adosa, bimak binip ajanimemtamtakam, Allaham era owe adosa bimak binip ajanimemtamtem. Tare ere, owe adosa, bimak binip bajanimemtam apok aemtakam, Allaham era owe adosa, bimak binip bajanimemtam apok aemtem.” Emes atakam aesime.

²⁴Tomas, Yesus bajamkai owe 12 wan ipit taka arare. (Me wan juas ere, “Kapom Ipit”.) Bonak ere, Yesus era owe ambarome, Tomas erapu aam apok.

²⁵Me wan Yesus bajamkai oweam atakam Tomas akoremes. “Dare Tuhan bi eteporarom.” Emes atakam aesimes. Me Tomas ere, “Dere era ban saifinumu jafa bapor apok aemtey, wanam dere debanefe era saifinumu jafa basimtukum apok aemtey, wanam deban era awusirmi jafapu basimtukum apok aemtey, ere dere Yesus ajaorwasitar atakam, eemnak apok aportemin.” Emes atakam aesime.

²⁶Emesare, bare poman ban bamintep aemapes, Yesus bajamkai owe, era tame bomon aoemapes. Tomasam era owe takan aemapes. Era tame jimsap takesam fiak akamkamimapomes. Me, Yesus ajinaoe, wanam era owe waut atarameme. “Allah asan akot tara baemtan.” Emes atakam aesime.

²⁷Armat Ipit arawa, atakam Tomas akorome. “Wobanefe arapu asimtukumey. Deban baporey. Woban bajiraoomtopomey, wanam woban dewusirmi jafapu asimtukumey. Wonom bimak binip arke bas. Era ajaorwasitey atakam eemnak ambesemkoromey.” Yesus emes atakam aesime.

²⁸Tomasam, atakam Yesus akorome. “Wore deTuhan. Wonom deAllah.” Emes atakam aesime.

²⁹Yesus arawa, “Wore debi apormarem, erarawa ambesemmaremi? Wan owe debi bapor apoknak aemtemanis. Emesanare, me, anom Dera ambesemtemanis. Era owe, ere, asan akotnak aemaptemas.” Emes atakam aesime.

³⁰Emesare, Yesus wan jinim bae pak tanane abajamkai owe bipu aeme. Dere ere, era jinim bae pak takes ara buku baeapomkorom apok.

³¹Me Allah Aeremtaere Ipit, ere Yesus are. Are Allah Andep. Tare Yesus eemnak ambesemkoromtakam, tanom jiinenak atoomemakam. Era pak Armat Ipit aeme pak are. Dere tare jiinenak baememaar akot. Emesare, dere ara jinim bae pak atakam, ara buku aeapommin.