Read Casuarina Coast Asmat YOHANES 3 Bible Online

YOHANES 3 - Casuarina Coast Asmat bible

YOHANES 3

¹Emesare. Parisi ipit juas Nikodemus. Are Yahudi owe kapar ipit.

²Era ipit eam Yesuspu ambareme. Are atakam Yesus akorome. “Guru! Wore Allah atakam asakamdaemtamen guru apormarom. Allaham Wore takan aemomemman apormarom. Allah Wore takan baemomem apok ere, Wore era aemem jinim bae pak baemeem asan apok.” Emes atakam aesime.

³Yesusam atakam era ipit akorome. “Atakamnak, owe bare jamnuk bajisames apok aemtas, are Allah aobaomep owe baemeemem asan apok.” Emes atakam aesime.

⁴Nikodemus arawa, “Owe duturu ipit bare jamnuk bajisames ere, wama tamenem? Are arsoot jak bomon botukames, wanam bojisames ape?” Emes atakam aesime.

⁵Yesus arawa, “Atakamnak, owe bare jamnuk bajisames apok aemtas, are Allah aobaomep owe baemeemem asan apok. Era bare jamnuk bajisames, ere bwi aptam. Anom Allah Jip aptam.

⁶Asamot owe asamot jii takes ajisipetiimas. Me, Allah Jip, ai jak, era bare jamnuk bajisames owe atetamtetereme.

⁷Emesare, owe bare jamnuk bajisamestetertas. Wonom era akoremin atakam jinim bae bas.

⁸Bui era asaniin asaniin afufumomasem. Tare era bui afummar, jane ajimakam. Me, era bui ete asan apaejinaommaraye, wanam ete asan apaesosmaraye, tanom tamsam apok. Emesare, Allah Jip, ai jak, era bare jamnuk bajisames owe atetamteterto, are emes taka are. Tanom era pak baemeporkorom asan apok.” Yesus emes atakam aesime.

⁹Me Nikodemus arawa, “Era pak ere, wama tamenem?” Emes atakam aesime.

¹⁰Yesusam, “Wore Israel owe baememtam ipit. Me, wore era pak womsam apokane?

¹¹Atakamnak, dare era damsam pak atakam akorommarom. Dare era apormarom pak ateman atamomatmarom. Me, tare era ateman atamomatmarom atakam jane bajie apok.

¹²Dere ara aemansa tapirmi pak atakam tara akorommin. Tare ere, era atakam jane bajie apok. Derarawa, era Surga oup pak atakam tara akoromtey apaye, tare era atakam jane wama tamen ojitakam?

¹³Me owe Surga oup batemetpor, ere apoknak. Me, Asamot Anakot Ajaoreme Ipit taka, era Surga oup aendae.

¹⁴Emesare, bonaknak ere, Musa, amber era tame apok asan wus oup ataetemeteme. Oweam Asamot Anakot Ajaoreme Ipit oup emes taka atemetetaetopomtemas.

¹⁵Erarawa Armat ipit eemnak ambesemkoromtas owe takes, jiinenak aememaartemas.

¹⁶Allah asamot daytinak afaimome. Erarawa Are Andep takakope atetame. Emesare, Andep eemnak ambesemkorommas owe danais baemap apok aemtemas. Are jiinenak atoomemas.

¹⁷Allah, Andep ara aemansa tapirmi ambirimemome ere, ‘Asamot owe jaos,’ emes atakam basakamtii apok. Ere Andep asamot owe bajortaer are.

¹⁸Allah Andep eemnak ambesemkorommas owe, ‘Tare owe jaos,’ emes atakam basakamtii apok aemum. Me, wan owe, Allah Andep bamesem apok. Erarawa Allah, ‘Era owe, owe jaos,’ emes atakam emesakamtiie.

¹⁹Emesare, sare ara aemansa tapirmi emedae. Me, owe era aememas pak, ere jirsat pak taka. Erarawa are era jiiti pak jak akot aemomemas. Are era sare jak akot baemomem apok aememas. Erarawa Allah, ‘Era owe, owe jaos,’ emes atakam asakamtiie.

²⁰Me pota pak aememas owe takes, era sare bifane afeomememas. Are era sarepu bamaromem apok aememas. Era pota aememas pak baso baem-ombar.

²¹Me, era atakamnak jipu aememas owe era aememas pak, ere Allah atakam ji bae pak. Are era aememas pak baso baporomtam akot ajiemas. Erarawa are era sarepu ambaromemas.” Yesus emes atakam aesime.

²²Emesare, Yesus anama abajamkai owe, Yudea tapirmi aesoses. Are tarai paratakopak era asan takan aememes. Era asan, Yesus, owe, bwi akupimtaera ajaie.

²³Era baream, owe Yohanes buji tame bomon bajiitaapom apok aemes. Me Yohanesam, era asan juas Ainon, bwi daytu apore. Erarawa are owe bwi akupimtaera ajaie. Era asan Salim setep. Oweam Yohanespu ambaroma ajaies. Armat ipit arawa, era owe bwi akupimtaera ajaie.

²⁵Emesare. Wan Yohanes bajamkai owe bamintepam, Yahudi ipit takaam, atakam ajamkorames. Are era Yahudi agama, pak, bwi baeosom pak tai atakam ajamkorames.

²⁶Me oweam Yohanespu ambaremes, wanam atakam akoromes. “Guru! Era Yordan poman tapirmi takan aememem Ipit, owe bwi akupimtaereme. Ere era ateman atamem Ipit are. Emesare, owe takes Armat Ipitpu ambaremes.” Emes atakam aesimes.

²⁷Yohanes arawa, “Allah, fiak pak, asamot owe batetam apok aemto, asamot owe era fiak pak baemeemomem asan apok.

²⁸Denom atakam emekoretamo. ‘Dere Allah Aeremtaere Ipit apok. Allah ere, dere bonak ataendaemen. Me Armat Ipit ere asep are.’ Emes atakam aesimo. Tare era atakam jane emejiekem.

²⁹Jipit petae ajiemto, are era taot armo ipit aemapem. Wanam era ipit ajoo ipit, era ipit atakam jane ajito, are jak akotnak aememem. Denom emes are. Dere waa jak akotnak aememmin.

³⁰Emesare, Yesus, juas aptamnak ipit baememto. Derarawa, juas apok ipit baemem.” Yohanes emes atakam aesime.

³¹Era oup andae Ipit, juas aptamnak Ipit. Wan owe takes ere, juas apok owe. Asamot owe ere, ara aemansa tapirmi owe. Are ara aemansa tapirmi atakam akoremas. Me Surga oup aendae Ipit ere, juas aptamnak Ipit. Wan owe takes juas apok owe.

³²Armat Ipit, era apore pakam, era jane ajie pakam, ateman atam eme. Owe ere, era ateman atakam jane bajie apoknak aememas.

³³Me aateman atakam ambesemmas owe ere, atakam akoremas. “Allah, ere anakot.” Emes atakam aesimemas.

³⁴Emesare, Allah, aJip, aptam, era ambirimemome Ipit atetamum. Erarawa era Ipit, Allah atakam akorem.

³⁵Me Aritipit Andep afaimum. Are pak takes Andep ban ten baemomemkorom atetame.

³⁶Me Andep eemnak ambesemkorommas owe, jiinenak atoomemas. Me, Andep atakam ji bae apok owe, era jiinenak batoomem apoknak aemmas. Allaham era owe jokoman aemomem.