Read Casuarina Coast Asmat YOHANES 4 Bible Online

YOHANES 4 - Casuarina Coast Asmat bible

YOHANES 4

¹Emesare. Era Parisi owe emes atakam jane ajies. “Owe tanane Yesus ajamkaimas. Armat Ipitam owe tanane bwi akupimtaereme. Me, Yohanes ajamkaimas owe ere, tanane apok. Yohanes bwi akupimtaermar oweam tanane apok.” Emes atakam jane ajies.

²(Yesus ere, owe bwi bakupimtaer apok aeme. Me abajamkai owe, owe bwi aokupimtaeres.)

³Yesusam era Parisi owe emes atakam jane ajies apore. Erarawa Are Yudea tapirmi beken ajiose, wanam Galilea tapirmi aofasie.

⁴Era waut aemjare ere, Are Samaria tapirmi aokorefe.

⁵Yesus era Samaria tapirmi ajare ere, Are kota juas Sikar ambarape. Bonaknak ere, Yakub, tapirmi, andep juas Yusuf atetamen. Emesare, Sikar era tapirmi setep.

⁶Bonaknakam, Yakub bwi afairesemen. Era bwiam era asan aemese. Emesare, Yesus era tapirmi jirao ajareme, Are damojip aememe. Erarawa Are era bwi dasman aemape. Era pak jok jam 12 apaye aeme.

⁷Samaria taotam bwi bajir andae. Yesus arawa, atakam era taot akorome. “Bwi sayir.” Emes atakam aesime.

⁸(Yesus bajamkai owe, amos bajitin, era kota bonak aesoses.)

⁹Me Samaria taotam, “Wore Yahudi ipit. Dere ere Samaria taot. Erarawa bwi atakam dera ajanimmanim wama tamenem?” Emes atakam aesime. (Emesare, Yahudi owe, Samaria owe atakam bajamkorame apok.)

¹⁰Me Yesus arawa, “Wore Allah bambi atetammar pak womsam apok. Wonom era bwi atakam ajanimmar Ipit womsam apok. Wore era pak womsam ere, wore era Ipit atakam ajanimtemarem. Era Ipit arawa, jiine bwi wora atetamteman.” Emes atakam aesime.

¹¹Era taotam, “Dot! Wore ember apok. Era bwi kakotenak. Wore era jiine bwi ete asan ajirtaertem?

¹²Me darerokor juas Yakub abwi ataesemtameroen. Bonaknak ere, armat ipit ara bwi ajirtaenen. Me arereisam, abinatangam, ara bwi andesen. Me, Wore juas aptamnak Ipit. Me darerokor Yakub juas apok ipit. Emes are?” Emes atakam aesime.

¹³Me Yesus arawa, “Ara bwi andetas owe takes, bwito aoememtemas.

¹⁴Me, era atetammin bwi andetas owe, bwito boemem apoknak aememtemas. Era atetammin bwi, era owe jak bomon eojafa bakapie apok bwi tamen aemestem. Erarawa era oweam jiinenak aememaartemas.” Yesus emes atakam aesime.

¹⁵Era taotam, “Dot! Era bwi dera pajirtetaman. Dere bwito boem-ombar. Denom bwimar ara asan bafafasie bas.” Emes atakam aesime.

¹⁶Me Yesusam, “Emesare, wonom wormo ipit bajate, wanam ara asan aofasiey.” Emes atakam aesime.

¹⁷Era taot ere, “Dere oorey apok.” Emes atakam aesime. Yesus arawa, “ ‘Dere oorey apok,’ atakam aesimmarem ere, atakamnak.

¹⁸Wore oorey owe ban taka ajuuta ajiem. Wanam aemomepmarem ipit, wormo ipit apok. Emesare, era akoremarem atakam, ere atakamnak.” Emes atakam aesime.

¹⁹Era taotam, “Dot! Wore Allah atakam bakoretam ipit apormin.

²⁰Darfaiskor, Allah ara fami oup, asitimaaris. Me. tare Yahudi oweam, ‘Allah basitim asan, Yerusalem taka,’ emes atakam aesimemakam.” Era taot emes atakam aesime.

²¹Yesus arawa, Ara akoremin atakam ambesemey. Asep bare, Allah asitimtakam asan, ara fami oup apok. Me Yerusalemam apok.

²²Tare Samaria owe era asitimmakam pak tamsam apok. Me, asamot owe Bajortaer Ipit Yahudi saman Ipit. Erarawa dare Yahudi owe asitimmarom pak damsam.

²³Me, asep bare, waaam tair aro, Allah Jip, afiak pak, owe atetamtem. Erarawa era owe Allah basitimkorom aemtemas. Era oweam anakotnak Allah asitimtemas. Allaham owe emes basitim andimarem.

²⁴Emesare, Allah, ere Jip. Erarawa Allah Jip afiak pak ataetmas owe taka, Allah basitimnak aemtemas. Wan owe Allah basitimnak baemeem asan apok.

²⁵Era taotam, “Allah Aeremtaere Ipit andaetem. Emesare, dere emes demsam. Era Ipit wan juas ‘Kristus’. Andaeto ere, era atakam takes akoretamtemaro.” Emes atakam aesime.

²⁶Yesusam, “Woratin atakam ajamkorammarem Ipit, era Ipit are. Dere Allah Aeremtaere Ipit ara aemapey.” Emes atakam aesime.

²⁷Emesare, Yesus bajamkai owe fef afasies. Are Yesus taot taka atakam ajamkoramemis apores, wanam jinim aees. Me, are, “Wore wama tamenem?” Emes ara taot bajatepor apok aememes. Are, “Wore ara taot atakam ajamkorammarem, ere wama tamenem?” Yesus emes bajatepor apok aememes.

²⁸Emesare, era taot abwi pak beken ajiose, wanam era kota aesose. Are atakam era kota owe aesimtame.

²⁹“Jipit taka, era aemaaru pak takes, atakam dera akoroman. Tanom de! Era Ipit baporay. Are Allah Aeremtaere Ipit apeno.” Emes atakam aesime.

³⁰Emesare, era oweam kota beken ajioses, wanam Armat Ipitpu awarimoses.

³¹Era owe waut aememes, Yesus bajamkai oweam, atakam fiak Armat Ipit akoromes. “Guru! Amos bandey!” Emes atakam aesimes.

³²Me Armat Ipit ere, “Dere banda pak ara aemompey. Me, tare ara banda pak tamsam apok.” Emes atakam aesime.

³³Me abajamkai owerawa, atakam armamon ajateampores. “Owe, banda pak, Armat Ipit atoomdaetamaresane?” Emes atakam aesimes.

³⁴Me Yesus arawa, “Dere era ataendaemen Ipit akot apormar pak jipu aemtey, wanam era atakam asakamtamen karai afaafetiikoromtey, jak akot aememtemin. Ere owe amos jak batukuap jak akot aememmas tamen are.

³⁵Tanom atakam akoremakam, ‘Pir eak taka apok aemaptam, era pak taso eek pii asaromteptem. Owerawa, era pii eek asesakamtaatemas.’ Emes atakam aesimemakam. Dere ere, atakam tara akorommin. Era pak taso baporay. Emesare, pii etesaromtepe. Me basesakamtaa bare, ere ememanse.

³⁶Allah gaji era eek basesakamtaa owe atetamum. Era asesakamtaatas pak, ere jiinenak batoomem are. Erarawa era eek ajapomtas oweam, era eek asesakamtaatas oweam, jak akot takan aememtemas.

³⁷Owe atakam akoremas, “Wan owe pak taso eek ajapomemas. Wan owerawa, era eek asesakamtaaemas.” Emes atakam aesimemas. Era atakam, ere atakamnak.

³⁸Dere tare pak taso eek basesakamtaa emes tamen ambirimemomo. Tare ere, era pak taso eek bajapom apok aemekem. Wan owe era eek bajapom karai daytu aees. Erarawa tare asan akot aememmakam.” Yesus emes atakam aesime.

³⁹Emesare, era taot, atakam era kota owe aesimtame, “Jipit taka era aemaaru pak takes, atakam dera akoroman.” Emes atakam aesime. Samaria owe tananerawa, era atakam apores, wanam Yesus eemnak ambesemkoromes.

⁴⁰Era Samaria oweam Armat Ipitpu ambaremes ere, are Armat Ipit takan baemem atakam ajanimes. Armat Ipitam bare jamnuk era owe takan ajamememe.

⁴¹Wan owe tananeam Yesus atakam jane ajies, wanam Armat Ipit eemnak ambesemkoromes.

⁴²Are atakam era taot akoromes. “Bonak ere, wore Armat Ipit atakam dara akoromeroem. Erarawa dare Armat Ipit ambesemom. Waa ere, dare Armat ipit atakam jane damba ajimarom. Danom Armat Ipit asamot Bajortaer Ipit anakot apormarom.” Emes atakam aesimes.

⁴³Emesare. Yesus atakam akore. “Asaman owe, Allah atakam bakoretam ipit basitim apok aememas.” Emes atakam aesime. Erarawa Yesus bare jamnuk era asan aemape, wanam Galilea tapirmi aoesose.

⁴⁴

⁴⁵Bonak ere, wan Galilea owe era Paskah Bare Pakambwi Yerusalem ajamemes. Are Yesus aeme pak takes apores. Erarawa Armat Ipit Galilea ambareme, era owe asan akot Armat Ipit aemomes.

⁴⁶Emesare, Armat Ipit Galilea tapirmi kota juas Kana aofasie. Bonak ere, era asan, bwinak, anggur bwi ajaoromeseme. Era asan ere, raja karai baetam ipit taka aememe. Me andepam kota Kapernaum damo aemanse.

⁴⁷Era ipit, Yesus Yudea tapirmi aejinaoe, wanam Galilea tapirmi ambareme, emes atakam jane ajie. Ararawa, Yesuspu ambareme. Are Armat Ipit andep aemanse asan bajinao, wanam andep damo baoromtaer, atakam ajanime. Me andep, ere dambir baemken aemanse.

⁴⁸Yesusam atakam era ipit akorome. “Tare jinim bae pak daytu bapor apok aemtakam, tanom Dera bamesem apoknak aemtemankum.” Emes atakam aesime.

⁴⁹Me raja karai baetam ipit ere, “Tuhan! Fef ajinaoey. Me dejii dambir baem-ombar.” Emes atakam aesime.

⁵⁰Yesus arawa, “Te! Emesare, baesosey. Wondep ajaoremmara.” Emes atakam aesime. Emesare, era ipit, Yesus era akorome atakam eemnak ambesemkorome. Ararawa, aesose.

⁵¹Are era waut aememe ere, akarai baetam owe, bimnuk aemamtaeres. “Emesare, wondep asan akot eteemapa.” Emes atakam aesimes.

⁵²Me armat ipit arawa, “Era jii asan akot aoemape, ete jamum?” Emes atakam aesime. Era owerawa, “To jok jam satu, era damo ambap ajufame.” Emes atakam aesimes.

⁵³Emesare, to ere, era jam satuam, Yesus, “Wondep ajaoremmara,” emes atakam akore. Era jii aritipitam emes apore. Erarawa are, atame owe takesam, Yesus eemnak ambesemkoromes.

⁵⁴Yesus Yudea tapirmi aejinaoe, wanam Galilea tapirmi ambareme, Are era pak aeme. Era aeme jinim bae pak kedua arare.