Read Casuarina Coast Asmat YOHANES 5 Bible Online

YOHANES 5 - Casuarina Coast Asmat bible

YOHANES 5

¹Emesare. Yahudi owe pakambwi aemes. Yesusam Yerusalem aesose.

²Me Yerusalem ere, era jimsap juas “Domba” setep, take daytu aemese. Ibrani atakam ere, era take juas Betesda. Era take poman poman tasanko daytu ban taka aemaptetere.

³Era tame bomon, owe tanane apakeamses. Era damo oweam, banamek kapie oweam, jindi kamwe oweam, kam oweam, emes owe are. [Are malaikat, era bwi bau bapuupum, banamek apemes.

⁴Tuhan malaikat, era bwi bau bapuupum, andaea ajaie. Are bare taka andaea, emes aema ajaie. Are era bwi bambwi afafasima, ajaie ere, era bwi bonak andaesa ajaie jipit apaye, taot apaye, era damo pak takes ajaorema ajaie.]

⁵Emesare, era asan aemanse ipit taka, tahun 38 asan pota aemansaarir.

⁶Yesusam era ipit era asan aemanse apore. Are era asan tarainak aemansaarir apore. Armat Ipit arawa, “Wore damo bakokoem akot ape?” Emes atakam aesime.

⁷Era damo ipit arawa, “Dot! Era bwi bambwi afafasimto ere, bwi, dera bandaetaesem owe apok. Dere era bwi bandaes aemaptey, wan owe era bwi bonak tandaesa ememas.” Emes atakam aesime.

⁸Yesus arawa, “Bawasitey! Wotapiniam bataerey, wanam bajarey.” Emes atakam aesime.

⁹Emesare, era ipit damo ametejaoreme. Are atapini ataere, wanam aesose. Emesare, era aemes pak, Yahudi Owe Samayen Bare afeamse are.

¹⁰Emesare, Yahudi owe atakam era damo ajaoreme ipit akoromes. “Waa Yahudi Owe Samayen Bare afeamsar. Erarawa wore wotapini bataer bas. Wore daagama basakamtam atakam aoomarem.” Emes atakam aesimes.

¹¹Era ipit arawa, “Dedamo ajaoroman ipit atakam aoesimtaman. ‘Wotapini bataerey, wanam bajarey.’ Emes atakam aesiman.” Era ipit emes atakam aesime.

¹²Era owerawa, era ipit ajatepores. “Me wotapini bataer wanam bajar atakam wora asakamtaman ipit tanam?” Emes atakam aesimes.

¹³Me Yesus ere, era asan owe tanane apore, wanam aotasieme. Erarawa era damo ajaoreme ipit emes atakam asakamtame Ipit amsam apok.

¹⁴Emesare. Yesus era ipit Allah Tame bomon, bimnuk aemamtaere. Are atakam era ipit aokorome. “Emesare, wore damo akokoemmarem. Erarawa wore dosa bamompimey. Wore asan potanak baemap-ombar.” Emes atakam aesime.

¹⁵Era ipitam Yahudi owepu ambareme, wanam atakam era owe aokorome. “Era damo ajaoromtaeran Ipit, ere Yesus are.” Emes atakam aesime.

¹⁶Emesare, Yahudi owe Yesus era pak Yahudi Owe Samayen Bare apores. Erarawa Yesus bajurusum era bare aeetaeres.

¹⁷Yesus ere, atep era owe ajite. “Waa ajiiream Deritipit karai aeaareme. Erarawa Denom karai aemin.” Emes atakam aesime.

¹⁸Emesare, Yahudi owe, Armat Ipit, Yahudi agama Samayen Bare basakamtam aooe apores. Wanam, are, “Allah Deritipit.” Emes atakam aesime. Emes atakam, Are Allah awar aememe atakam are. Erarawa Yahudi owe, Armat Ipit batatii, jati daytinak aees.

¹⁹Yesus atakam era owe aokorome. “Atakamnak, Allah Andep pak amba baemeem asan apok. Andep Aritipit aememar pak apormar, wanam Are emes pak taka aemum. Me Andep, Aritipit aememar pak jipu aemum.

²⁰Me Aritipit Andep afaimum. Are era aemmar pak takes Andep aporomtamum. Me, waa aporomtammar pak koser. Asep bare, Are daytinak pak Andep aporomtamtem. Era pak tare jinim bae pak erare.

²¹Aritipit, dambir owe ajaoromwasumtumum, wanam jiinenak era owe atetamum. Emesamare, Andep, jiinenak, era aereremartaamar owe atetamum.

²²Aritipitam owe adosa atakam basakamtii apoknak aemum. Me, Are, owe adosa atakam basakamtii fiak pak, Andep atetame.

²³Are owe takes Andep basitim akot— era owe Aritipit asitimmas emes tamen are. Erarawa Are era fiak pak Andep atetame. Me Andep basitim apok owe, Aritipitam basitim apok aemmas. Me Aritipit, ere Andep ambirimemome Ipit arare.

²⁴Atakamnak, owe deatakam jane ajimas, wanam dera ambirimemomen ipit eemnak ambesemkorommas, are jiinenak atoomemas. Denom era owe era aemes dosa atakam basakamtii apok aemtemin. Era oweam dambir baem apok aemtemas. Me, are jiinenak owe aememmas.

²⁵Atakamnak, era aemamesto bare, dambir aemes owe, Allah Andep era akoreto atakam, jane ajitemas. Era atakam jane ajitas owe, jiinenak owe aememtemas. Era baream, ere ememanse.

²⁶Aritipit, era jiinenak batetamaar Ipit. Erarawa Are era jiinenak batetam fiak pak Andep atetame.

²⁷Me Andep, ere Asamot Anakot Ajaoreme Ipit are. Aritipitam, dosa atakam basakamtii fiak pak, Andep atetame.

²⁸Tare ara atakam jinim bae bas. Era aemamesto bare era dambir asan owe takes, Andep akoreto atakam, jane ajitemas.

²⁹Wanam era owe era dambir asan ajisemtetertemas. Era akot pak aemes owe, ajaorwasittemas, ararawa jiinenak aememaartemas. Era pota pak aemes oweam ajaorwasittemas. Ararawa, era bajirisem asan aemapaartemas.”

³⁰“Denom pak dema baemeem asan apok. Me, Dere owe adosa atakam asakamtiitey, Dere Deritipit atakam jane ajitey pak jipu atakam asakamtiimin. Dere era akot aportey pak jipu baem apok. Me, Dera ambirimemomen Ipit akot apormar pak jipu aemmin. Erarawa era asakamtiitey atakam ere, akot.

³¹Dere era aemmin pak, ateman dema atamomtey, owe era ateman atamtey atakam baemebesem asan apok.

³²Me, wan ipit deateman atamomatem. Era ipit, deateman atamomatmar atakam, ere atakamnak. Emes pak demsam.

³³Tare owe Yohanespu ambirimemomekem. Me Yohanes arawa, atemannak atame.

³⁴Emesare, Dere asamot ateman batam atakam bajanim apok. Me, Dere Yohanes atame ateman, atakam tara akorommin. Era ateman, tare eemnak Dera bamesemkorom are. Tanom eemnak Dera ambesemkoromtankum ajoremtemakam.

³⁵Me Yohanes, asareape lampu tamen asareape. Me akoretame atakam, lampu tamen are. Me aatakam jane bajie, jak akot baemapom are. Tanom jirao bajateemem apok, aatakam jane bajie akot ajiekem.

³⁶Yohanes deateman atame atakam, ere fiak apok. Era ateman atammin atakam ere, fiaknak. Deritipit, Dere jinim bae pak baem, ataendaemen. Denom era jinim bae pak aemmin. Era jinim bae pak ere, Deritipit Dera ataendaemen, emes aporomtamum. Erarawa, owe Deritipit Dera ataendaemen apormas.

³⁷Me Deritipit ataendaemen. Armat Ipitam deateman atame. Tare ere, aatakam jane bajie apoknak. Tanom abi bapor apoknak.

³⁸Tare Armat Ipit ataendaeme Ipit bamesem apok. Erarawa Deritipit atakamam tajak bomon baemapaar apok.

³⁹Tabimak binip ere, ‘Era Alkitab, jiinenak baememaar atakam,’ emes atakam aesimemakam. Erarawa tare Alkitab aoorporaaremakam. Emesare, Alkitabam deatakamkor akoremara.

⁴⁰Tare Dera ajamkaitankum, tare jiinenak aememaartemakam. Me, tare Dera bajamkai pota ajimakam.

⁴¹Denom asamot owe, ‘Yesus akotnak,’ emes bajie, jak baseseromem apok.

⁴²Me, tare takes demsam. Tajak bomon, tare Allah bafaim apoknak apormin.

⁴³Deritipit ataendaemen. Me, tare Dera bamesem apoknak. Wan ipit ere, bambi ajinaoto, tare era ipit eemnak ambesemkoromtemakam.

⁴⁴Tare tarmamon, ‘Are owe akotnak,’ emes bajie, jak aseseromemakam. Allah, ere takakor. Me, tare Allah, ‘Are akotnak,’ emes bajie, jak baseseromem apoknak. Erarawa tare Dera baemebesem asan apok.

⁴⁵Dere tare Deritipit bipu batamsem, emes bimak binip batetaram bas. Dere emes baem apok. Tare ere, Musa jiirey aeeaarukum. Emesare, armat ipit tara atamsemteman.

⁴⁶Me Musa, deatakam, buku aeapome. Erarawa tare Musa buku aeapome atakam bamesem ere, tanom Dera ambesemmankuma.

⁴⁷Tare ere, Musa atakam bamesem apok apaye, tanom era akoremin atakam baemebesem asan apok.” Yesus emes atakam aesime.