Read Casuarina Coast Asmat YOHANES 6 Bible Online

YOHANES 6 - Casuarina Coast Asmat bible

YOHANES 6

¹Emesare, Yesus fo daytu juas Galilea apiire. Era foam wan juas Tiberias.

²Oweam Armat Ipit era damo pota owe ajaoromtaa ajaie apores. Erarawa owe tanane Armat Ipit fe asaramomases.

³Yesusam fami oup atemete, wanam era asan abajamkai owe takan aemapes.

⁴Era baream Yahudi owe pakambwi juas Paskah Pakambwi Bare setep asisiamse.

⁵Yesusam banamek atare, atare ajie. Are owe tananenak ajaresiisiejinaoes apore. Erarawa Are Filipus ajatepore. “Dare ara aememares owe tananenak banda pak ete asan ajitittamtam?” Emes atakam aesime.

⁶Emesare, Yesus Filipus baempor aeme. Erarawa Are ajatepore. Me, Yesus era banda pak aemto pak, atakam bonak emesakamtiie.

⁷Me Filipus atep ajite, “Jipit taka karai bare 200 aeemar apaye, era ataetmar gaji takes, ara aememares owe banda pak kutukoser bajitittam, ere janderes.” Emes atakam aesime.

⁸Me wan Yesus bajamkai ipit juas Andreas, Simon Petrus areot. Are atakam akorome.

⁹“Oorey jii taka ara asan aemeta. Are amos jise ban taka anama enamo jamnuk atooma. Era pak ere, janderes. Ara asanam owe tananenak ememares.” Emes atakam aesime.

¹⁰Yesus arawa, “Era owe bandaepakiaptetertas.” Emes atakam aesime. Emesare, era asan takapin ajukape. Erarawa era owe takes era takapin ten andaepakiapteteres. Me oorey owe 5.000 ajiire apaye. (Tapes anama jii bajititimar apok.)

¹¹Me Yesusam era amos ataere, wanam terima kasih atakam Allah aokorome. Ararawa, era amos era aemapes owe asaietame. Era enamoam emes aemtame. Emesare, era owe takes jak andatukuapteteres.

¹²Era owe takes jak andatukuapteteres arawa, Yesus atakam abajamkai owe akorome. “Era andatiimas banda pak bajaresisimay. Owe era banda pak bakoromosom-ombar.” Emes atakam aesime.

¹³Emesare, era owe era andatiies banda pak ajaresisimtiies. Are ese 12 aoweapomes. Ere era owe amos jise ban taka andatiies amos are.

¹⁴Era oweam Yesus aeme jinim bae pak apores arawa, are atakam akores. “Dare Allah Atakam Bakoretam Ipitkor ara aemansa tapirmi bandae, banamek apeapaarum. Atakamnak. Ara aemema Ipit, ere era Ipit are.” Emes atakam aesimes.

¹⁵Era oweam Yesus araja ipit baemem atakam fiak akikimtaaes. Armat Ipitam emes apore. Ararawa, era fami tapirmi wan asan baemap aoesose.

¹⁶Poro, ju atierawa, abajamkai owe jupima ambaremes.

¹⁷Are ti andaejuues, wanam kota Kapernaum bajir bin ajieses. Eam, Yesusam era owepu bamaromem apok.

¹⁸Bui daytuam afufume. Woam daytu aemese.

¹⁹Era owe, kilometer eak taka apok apaye, ban taka apaye, po itimbup emes ajireses. Ararawa, Yesus bwi ten aemjinaoe apores. Yesus era aemeses tipu ambareme. Era oweam ombare daytinak ambares.

²⁰Armat Ipit ere, “Ombare bas! Dere Yesus.” Emes atakam aesime.

²¹Era oweam jak akot aememes, wanam Yesus ti basojuu atakam akoromes. Emesare, are era akukuramtiies asan ametesetes.

²²Ajofe tom ere, era poman aememes owe tanane bimak binip atetarames. “To ere, ara asan ti takakope aemese. Yesus abajamkai owe bajamjuu apok aeme. Era owe apa andaejuues.” Emes bimak binip atetarames.

²³Emesare, Tiberias aejinaoes wan ti era asan asetes. Era asetes asan, Yesus terima kasih atakam Allah akorome, wanam owe tanane, amos andes asan setep.

²⁴Emesare, era asetes owe tanane, Yesus apaye, abajamkai owe apaye, era asan apok apores. Erarawa are era ti aondaejuues, wanam Kapernaum ajirites. Are Yesus andimares.

²⁵Emesare, era owe Yesus poman bimnuk aemamtaeres. Ararawa, atakam Armat Ipit akoromes. “Guru! Wore ara asan ete bare jinaoemem?” Emes atakam aesimes.

²⁶Me Yesus arawa, “Atakamnak, tare era aemo jinim bae pak aporekem, wanam Dera andimarmankum— ere, emes apok. Tare ere, era amos daytu andekem, wanam jak andatukuapteterekem. Erarawa tare Dera andimarmankum.

²⁷Tare era ofa aofamesto banda pak bataaen, jati daytinak bae bas. Me, era ofa baofames apok pak jati aeay. Ere tare jiinenak baememaar amos are. Era pakam, Asamot Anakot Ajaoreme Ipit, tara atetamtan amos are. Me Deritipit Allah, emes baem, Dera ataendaemen.” Emes atakam aesime.

²⁸Me oweam Armat Ipit ajatepores. “Dare Allah akot apormar pak baem, wama pak emtam?” Emes atakam aesimes.

²⁹Yesus arawa, “Tare Allah ataendaeme Ipit eemnak ambesemkoromay. Allah era pak akot aporem.” Emes atakam aesime.

³⁰Era oweam, “Wama jinim bae pak paememmaremaye? Dare Wore jinim bae pak aportam apaye, dare Wora ambesemtemarom. Wama pak paemtemaye?

³¹Me darfaisomar banda pak juas manna era tame apok asan andesen. Ere Alkitab atakam jipu. ‘Allah, Surga oup banda pak, era owe ataendaeme.’ Alkitab emes atakam are.” Emes atakam aesimes.

³²Yesus arawa, “Atakamnak, era Surga oup aendae banda pak atetame Ipit, ere Musa apok. Deritipit era Surga oup aendae banda pak anakot tara atetamman.

³³Allah atetammar banda pak, ere era Surga oup aendae Ipit are. Era Ipit, jiinenak, asamot owe atetamum.” Emes atakam aesime.

³⁴Era oweam, “Dot! Era banda pak aitetama ajaro.” Emes atakam aesimes.

³⁵Yesus arawa, “Era jiinenak baememaar banda pak, ere Derare. Me Dera ambaromemtanis owe, amosto apoknak aememaartemas. Me Dera ambesemtanis owe bwito apoknakam aememaartemas.

³⁶Era pak Dere tara akorommin atakam jipu. Tanom Dera apormankum. Me, tare Dera bamesem apoknak aemmakam.

³⁷Deritipit atetaman owe takes Dera ambaromemtemanis. Denom era ataendaemen Ipit era akot apormar pak jipu baem, Surga oup aendaeo. Dere, deakot apormin pak jipu baem bandae apok. Erarawa Dera ambaromemtanis owe takes bawotapem apoknak aemtemin.

³⁸

³⁹Me Dera ataendaemen Ipit, era atetamen owe takakopeam bapakapios potan. Are Dere era owe takes Ju Ajiirenak aemamesto bajaoromwasumtum akoten.

⁴⁰Wan owe, Dere Allah Andep aportas, ararawa Dera ambesemtemanis. Deritipitam emes owe takes jiinenak baememaar akoten. Denom era owe ju ajiirenak aemamesto bajaoromwasumtum akoten.” Yesus emes atakam aesime.

⁴¹Bonak ere, Yesus atakam akore. “Era Surga oup aendae banda pak, ere erare.” Emes atakam aesime. Erarawa Yahudi owe, Yesus atakam pota bi era edunukumamtaateteres.

⁴²Era oweam, “Ara aemema ipit Yesus. Are Yusuf andep. Dare aritipit anama arsoot damsam. Erarawa Are, ‘Dere Surga oup aendaeo,’ ere wama tamenem?” Emes atakam aesimes,

⁴³Yesus arawa, “Tanom atakam pota bi banunukumamtaa bas.

⁴⁴Deritipit Dera ataendaemen. Armat Ipit, owe Dera bamaromem bimak binip batetam apok aemto, owe Dera baemebaromem asan apok aemtemas. Me, Dere era ambaromemtanis owe, Ju Ajiirenak aemamesto ajaoromwasumtumtemin.

⁴⁵Me Allah atakam bakoretam owe wan buku aeapomes atakamam, ‘Allah era owe takes atakam aememtamtem,’ emes atakam aeapomes. Emesare, wan owe Deritipit atakam jane ajimas. Are aatakam ataetmas. Era owe takesam dera ambaromemtemanis.

⁴⁶Me, owe Allah bi bapor apok. Allah ataendaeme Ipit taka ere, Allah bi apa apore.

⁴⁷Atakamnak, Dera ambesemmanis owe jiinenak atoomemas.

⁴⁸Era jiinenak banda pak, ere Derare.

⁴⁹Tarfaisomar era banda pak juas manna era owe apok asan andes. Me, era owe dambir aemes.

⁵⁰Ara atakam akoremin banda pak ere, Surga oup aendae banda pak are. Owe era banda pak andetas, are dambir batem apoknak aemtemas.

⁵¹Me Surga oup aendae banda pak, jiinenak atetamum. Era banda pak, ere Derare. Owe era banda pak andetas, are jiinenak aememaartemas. Emesare, era atetamtey banda pak, dedamo dasa. Dere dedamo dasa atetamtemin. Ere asamot owe jiinenak baememaar are.” Emes atakam aesime.

⁵²Emesare, Yahudi owe armamom atakam daytinak ajamkorames. “Ara aemema Ipit adamo dasa dara batetam wanam dare adasa banda, ere wama tamenem?” Emes atakam aesimes.

⁵³Yesusam atakam era owe akorome. “Atakamnak, tare Asamot Anakot Ajaoreme Ipit damo dasa banda apok aemtakam, wanam aesee banda apok aemtakam, ere tare jiinenak baemeemomem asan apok.

⁵⁴Owe dedamo dasa anama deesee andetas, are jiinenak aememaartemas. Denom era owe Ju Ajiirenak aemamesto are ajaoromwasumtumtemin.

⁵⁵Emesare, dedamo dasa, ere banda pak anakotnak. Me deeseeam, banda bwi anakotnak.

⁵⁶Owe dedamo dasa anama deesee andetas, are takan Dera ajamememaartemanis. Denom era owe takan ajamememaartemin.

⁵⁷Deritipit jiinenak Ipit. Are Dera ataendaemen. Are jiine Dera atetaman. Emesare, Denom jiine dedamo dasa andemas owe atetammin.

⁵⁸Dere Surga oup aendae banda pak. Era banda pak darfaisomar andes banda pak tamen apok. Darfaisomar banda pak andes, me, asep bare are dambir ates. Me, ara aemansa banda pak andetas owe, jiinenak aememaartemas.” Emes atakam aesime.

⁵⁹Yesus Kapernaum Yahudi owe samayen tame bomon atakam aememtame ere, Are emes atakam akoromen.

⁶⁰Me wan Yesus bajamkai owe tanane, emes atakam jane ajies ere, are atakam akores. “Emes atakam bomonnak. Owe era atakam jane bajie, ere wama tamenem?” Emes atakam aesimes.

⁶¹Are armamon ajamkorames atakam, Yesus bakorom apoknak aemes. Me, Armat Ipit abajamkai owe, era pak atakam pota bi andunukumamtaaes amsam. Ararawa, “Tare era akorey atakam pota apormakam apaye?

⁶²Tare ere, Asamot Anakot Ajaoreme Ipit era bonak aemapaarir asan botemet aportakam wama tamenem?

⁶³Allah Jip, jiinenak baememaar, owe atetamum. Asamot owe ere, emes baemetetam asan apok. Tare dokorey atakam ji aetakam, jiinenak atetamemar Jip tara andaememteman.

⁶⁴Me, tare wan owe Dera bamesem apok.” Emes atakam aesime. Emesare, bonak ere, Yesusam Ara bamesem apok aemtas owe amsam aememe. Are era jokoman owe aotasimemomtamto ipit amsam aememe.

⁶⁵Yesusam, “Erarawa, Dere atakam tara akoromey. ‘Allah, owe, Dera bamaromem bimak binip batetam apok aemto, era owe Dera baemebaromem asan apok,’ emes atakam aesimey.” Yesus emes atakam aesime.

⁶⁶Me wan Yesus bajamkai owe tanane emes atakam apores, wanam ambompimes. Are Yesus bojamkai apok aemes.

⁶⁷Me Yesusam atakam era bajamkai owe 12 akorome. “Tanom beken Dera bajiane?” Emes atakam aesime.

⁶⁸Me Simon Petrus arawa, “Tuhan! Dare ta ipita ojamkaitam? Owe jiinenak batetam, ere Wo taka erare.

⁶⁹Dare Wora ambesemom. Wore Allah ataendaemen turunak Ipit aporom.” Emes atakam aesime.

⁷⁰Yesusam, “Dere ara aememmakam owe 12 aereremartaao. Me, tare wan ipit taka, ere bii.” Emes atakam aesime.

⁷¹Are Simon Iskariot andep juas Yudas atakam akore. Era ipit, Yesus aereremartaae owe 12 wan ipit taka are. Me, asep bare, Yudas, Yesus, jokoman owe aotasimemomtame.