Read Casuarina Coast Asmat YOHANES 8 Bible Online

YOHANES 8 - Casuarina Coast Asmat bible

YOHANES 8

²Ajofe tomnak, Armat Ipit Allah Tame aoesose. Owe takesam afojomes. Armat Ipit arawa, andaepakiape, wanam atakam era owe aememtame.

³Me Musa Basakamtam Atakam baememtam oweam, Parisi oweam, taot taka atoomjiies. Are era taot owe tamane ande aporesen. Emesare, are era taot era owe bipu baemem atakam asakamtames.

⁴Ararawa, atakam Yesus akoromes. “Guru! Owe, ara taot, owe tamane andar, banamek amba aporaresen.

⁵Emesare, Musa Basakamtam Atakam, emes atakam aeapome: ‘Tare, eka, owe tamane andar taot asampirimay.’ Musa Basakamtam Atakam, ere emes atakam akorem. Wore ere, wama atakam bimak binip emommarem?” Emes atakam aesimes.

⁶Era owe, Yesus Allah pota atakam bakore, akot ajies. Ere Armat Ipit Allah pota atakam korem baporeji aren. Erarawa are emes Armat Ipit ajatepores. Yesus ere, peter andaepuape, wanam banbi wao tapirmi aeapome.

⁷Era owe ere, Armat Ipit ajatepora ajaies. Yesus emes apore, wanam jimas awasie. Are atakam akorome. “Me tarmamon dosa apok ipit apaye, are eka era taot bonak bakorompirimto.” Emes atakam aesime.

⁸Armat Ipitam jimas aojirape, wanam wao tapirmi aoeapome.

⁹Era owe emes atakam jane ajies, are taka esosa, taka esosa, ajies. Me emak fiak parat owe bonak atakamesoses. Era ai owerawa, asep aesoses. Erarawa Yesusam, era taotam, me wan owe tanane bipu apa aemememis.

¹⁰Yesus arawa, awasite. Are atakam era taot akorome. “Era owe ete? Wopere ambeanis atakam bakore owe apoknake?” Emes atakam aesime.

¹¹Era taotam, “Emesare. Depere ambeanis atakam bakore owe apok.” Emes atakam aesime. Yesus arawa, “Denom woemarem potanak pak atakam bakore apok. Wonom, te! Wonom dosa boem bas.” Yesus emes atakam aesime.]

¹²Emesare. Yesus atakam era owe akorome. “Dere owe atakam aememtamtemin. Dere ara aemansa tapirmi sare anakot Derare. Dere sare Dera ajamkaimanis owe atetammin. Erarawa era owe jiiti bomon bojar apok aemtemas. Denom jiinenak era owe atetammin.” Emes atakam aesime.

¹³Me Parisi oweam atakam Armat Ipit akoromes. “Wonom wodamo atakam Womba akoremarem. Emesare era atakam, atakamnak apok.” Emes atakam aesimes.

¹⁴Yesus arawa, “Dere aendaeo asan demsam. Denom aesostey asan demsam. Erarawa Denom dedamo atakam Dema akoretey, era atakamam atakamnak. Me, tare era aendaeo asan tamsam apok. Tanom era aesostey asan tamsam apok.

¹⁵Me owe apota pak atakam asakamtiimakam, ere asamot bimak binip taka. Dere ere, waa owe apota pak atakam basakamtii apok.

¹⁶Denom depa apok. Deritipit ataendaemen. Armat Ipitam dedamo setep aemeta. Erarawa Dere owe apota pak atakam asakamtiitey apaye, era asakamtiitey atakam, ere atakamnak.

¹⁷Me Musa Basakamtam Atakam Buku emes atakam are: ‘Owe jamnuk atakam awar akoretamis, aatakam atakamnak.’ Era Buku emes atakam aeapoma.

¹⁸Emesare, Denom dedamo atakam dema akoremin. Deritipit Dera ataendaemen. Anom dedamo atakam akorem.” Emes atakam aesime.

¹⁹Era owerawa, “Me Wuritipit etepuram?” Emes atakam aesimes. Yesusam, “Tare Dere tamsam apok. Tanom Deritipit tamsam apok. Tare Dere tamsam ere, Deritipitam tamsam.” Emes atakam aesime.

²⁰Yesus ara atakam takes Allah Tame bomon akoretame. Are Allah Tame uang bataapom asanpu aememe. Owe Armat Ipit bajipirtaer bare baemames apok. Erarawa owe Armat ipit bajipirtaer apok.

²¹Yesus atakam era owe aokorome. “Dere aesostemin. Tanom Dera andimartemankum. Me, tare dambir tadosa aptam aemtemakam. Tanom era aesostey asan baemeesos asan apok.” Emes atakam aesime.

²²Me Yahudi owerawa, “Armat Ipitam, ‘Tanom era aesostey asan baemeesos asan apok,’ ere wama tamenem? Are sanao amba baeames apeno.” Emes atakam aesimes.

²³Yesusam, “Tare ara bap tapirmi owe tarare. Dere ere, Surga oup Ipit. Tanom ara aemansa tapirmi owe. Dere ere, ara aemansa tapirmi ipit apok.

²⁴Denom atakam tara akoromey, ‘Tare dambir tadosa aptam aemtemakam,’ emes atakam aesimey. Dere Allah Aeremtaere Ipit ara aememey. Tare ere, emes atakam bamesem apok aemtakam, tanom dambir tadosa aptam aemtemakam.” Emes atakam aesime.

²⁵Era owerawa, “Wore ere, ta ipitim?” Emes atakam aesimes. Yesusam, “Emesare, Dere era pak atakam tarainak tara akoretamaarin.

²⁶Denom era aemmakam pak, wan atakam tanane aemomey. Dere dosa tanane aemmakam pak, atakam basakamtii. Me, ataendaemen Ipit, ere atakamnak Ipit erare. Dere Armat Ipit akore atakam jane ajio. Derarawa, era atakam taka, ara aemansa tapirmi owe aokoretammin.” Emes atakam aesime.

²⁷Emesare, Yesus Aritipit atakam akore. Me, era owe era atakam amsam apok.

²⁸Me Yesusam, “Tare Asamot Anakot Ajaoreme Ipit salib wus oup ataetopomtakam, tanom Dere Allah Aeremtaere Ipit, emes aportemankum. Tanom era akoremin atakam depa atakam apok aportemakam. Me, Dere Deritipit aememtamen atakam taka akoremin. Tanom emes aportemakam.

²⁹Denom era ataendaemen Ipit akor apormar pak jipu taka atawejommin. Erarawa Armat Ipit dedamo setep aemeta. Are beken Dera bajiem apok.” Emes atakam aesime.

³⁰Me Armat Ipit emes atakam akore, owe tananenak Armat Ipit eemnak ambesemkoromes.

³¹Emesare, wan Yahudi owe Yesus eemnak ambesemkoromes. Armat Ipitam atakam era owe akorome. “Tare deatakam ji aeaartakam, ere tare Dera bajamkai owe anakot aememtemakam.

³²Tanom atakamnak jane ajiekoromtemakam. Era atakamnak jane ajiekoromtakam, wan owe tara baemeemomem asan apok.” Yesus emes atakam aesime.

³³Era owerawa, “Dare Abraham arurupis darare. Oweam dara baemomem apoknak. Erarawa era akoremarem atakamam, ‘Owe tara baemeemomem asan apok,’ ere wama tamenem?” Emes atakam aesimes.

³⁴Yesusam, “Atakamnak, owe dosa aemaartas, era dosa pak era owe aemomem.

³⁵Bambi karai baetam ipit, wan owe aemomemto, era owe, era ipit arereis emes baemapaar apok aemmas. Me, era ipit andepnak, aritipit andep, emes aemapaartem.

³⁶Me, Allah Andep tara asurumtamtan apaye, ere wan pak tara baemeemomem asan apoknak.

³⁷Tare Abraham arurupis tarare. Dere emes demsam. Me, tare deatakam ji bae apok. Erarawa tare Dera batatii aememmakam.

³⁸Dere Deritipit aporomtamen pak, atakam tara akorommin. Tare ere, taritipit jane ajiekem atakam jipu atawejomakam.” Yesus emes atakam aesime.

³⁹Era owerawa, “Abraham ere, darerokor.” Emes atakam aesimes. Yesus arawa, “Tare Abraham arurupis anakot aememmakam ere, tare Abraham aemaarir pak jipu atawejomakam. (Me, tare emes apok.)

⁴⁰Me Allah akoromen atakam, ere atakamnak. Denom era atakam tara aokoretammin. Me, tare Dera batatii aememmakam. Emesare, Abraham emes baem apoknak.

⁴¹Tare taritipit aememar pak jipu atawejomakam.” Emes atakam aesime. Era oweam, “Darisare tanane apok. Allah taka daritipit erare.” Emes atakam aesimes.

⁴²Yesus arawa, “Allah taritipit aememmar ere, tare Dera afaimmankuma. Dere Allahpu eendaeo. Emesare, Dere ara asan dema bandae apok. Allah aotaendaemen.

⁴³Tanom era akoremin atakam tamsam apok aememmakam, ere wama tamenem? Erarawa tare ara atakam jane bajie pota aememmakam.

⁴⁴Taritipit ere, Bii Kapar Ipit are. Tanom taritipit akot pak jipu, emes atawejomakam. Bonaknak are owe batatii ipit aememaarir. Waa aemansaram, owe batatii ipit aememem. Are atakamnak bakore amsam apok. Erarawa are era atakamnak bifane afeomem. Are era pote atakam ipit anakotnak. Erarawa are pote atakam akorem. Era pak ajak bomon pak jipu.

⁴⁵Dere ere, atakamnak akoremin. Erarawa tare deatakam bamesem apok.

⁴⁶Tanom, ‘Yesus dosa ipit,’ emes atakam baemekore asan apok. Emesare, Dere atakamnak akoremin. Tare ere, deatakam bamesem apok, ere wama tamenem?

⁴⁷Me Allah aowe, Allah atakam jane ajimas. Me, tare Allah aowe apok. Erarawa tare Allah atakam jane bajie apok.” Yesus emes atakam aesime.

⁴⁸Me Yahudi owerawa, “Era akoremarom atakam, atakamnak. Wore Samaria saman ipit. Wojak bomon, ere bii aapeta.” Emes atakam aesimes.

⁴⁹Me Yesusam, “Dejak bomon bii apok. Dere Deritipit asitimmin. Tare ere, bifane Dera afeomemmankum.

⁵⁰Dere owe Dera basitim atakam bajanim apok. Me, jipit taka owe Dera basitim atakam ajanimum. Era Ipitam, owe adosa atakam basakamtii Ipit.

⁵¹Atakamnak, owe deatakam ji aetas, are dambir bata apok aemtemas.” Yesus emes atakam aesime.

⁵²Era Yahudi owerawa, “Emesare, wojak bomon biinak. Me Abraham dambir aeme. Allah atakam bakoretam oweam dambir aemes. Me, Wore, ‘Owe deatakam ji aetas, are dambir baem apok aemtemas,’ emes atakam aesimmarem.

⁵³Emesare, Allah atakam bakoretam owe dambir aemes. Abrahamam dambir aeme. Me, Abraham, juas apok ipiti? Wore ere, juas aptamnak ipiti? Wore ere, ta ipitkorem?” Emes atakam aesimes.

⁵⁴Me Yesus arawa, “Dere dema aemetemtemtey apaye, emes pota. Me, Deritipit Dera atemtemman. Are era atakam akoremakam Ipit are. ‘Armat Ipit daAllah.’ Emes atakam aesimmakam.

⁵⁵Tare Armat Ipit tamsam apoknak. Dere ere, Armat Ipit demsam. Denom aatakam akoretey apaye, ‘Dere Armat Ipit demsam apok,’ emes atakam aesimtey apaye, ere Dere pote ipit ta tamen aememtemin. Me, Dere Armat Ipit demsam. Denom aatakam ji aemin.

⁵⁶Tarerokor juas Abraham, Dere ara bap tapirmi bandaeap, atakam jane ajie. Erarawa jak akot aemape. Are era atakam atakamnak apore, wanam jak akot aemape.” Yesus emes atakam aesime.

⁵⁷Yahudi owerawa, “Wore umur, tahun 50 apok. Me, Wore Abraham bi aporemi?” Emes atakam aesimes.

⁵⁸Yesus arawa, “Atakamnak, Abraham bajisames apok aeme, Dere ere, taemema emo.” Emes atakam aesime.

⁵⁹Emesare, era owe eka tanane ataeres. Are eka Yesus basampirim aememes. Me, Armat ipit asaieme. Wanam Are Allah Tame ajise.