Read Casuarina Coast Asmat AEMAARIS PAK 1 Bible Online

AEMAARIS PAK 1 - Casuarina Coast Asmat bible

AEMAARIS PAK 1

¹Teofilus. Bonaknak aeapomo buku, Yesus era aemaarir pakam, era aememtamaarir atakamam, atakam are.

²Yesus aemaarir atakam, ere Allah, Yesus, Surga oup atoomtemete bare ajiire. Bonak ere, Yesus, Allah Jip fiak pak aemomen. Erarawa Yesus atakam aereremartaae owe asakamtamen. Are era owe era atakam bakoretam ambirimemomen.

³Bonak ere, Yesus ajiriseme, wanam owe bipu jatiaptam aoememen. Are jinim bae pak tanane era owe basonak aporomtamen. Erarawa owe Armat Ipit ajaorwasite atakam, atakamnak aporesen. Bare 40 Are owe bipu ajateoma ajaie, wanam Allah owe aobaomep atakam akoren.

⁴Yesusam era owe takan ajarisiemes, wanam atakam asakamtamen. “Tare Yerusalem beken bajie bas. Deritipit ataaji aee atakam bandae, banamek apeapay. Denom ara atakam tare etekoretamo.

⁵Yohanes, owe bwi akupimtaere. Bare arke apok ere, Allah Jip tara akupimtamteterteman.” Yesus emes atakam aesimen.

⁶Era ajarisiemes owerawa, “Tuhan! Wore, era Israel owe, owe baomep Ipit botaemom fef ape?” Emes atakam aesimesen.

⁷Yesus arawa, “Ara pakiin pakiin Deritipit ban ten taka are. Emesare Armat Ipit ara pakiin pakiin bare, atakam amba asakamtiie. Ere tamsam pak apok.

⁸Allah Jip tara aemomemtetertan, tanom ateman batam fiak pak aemomemtetertemakam. Tararawa, deatakam Yerusalem oweam, Yudea tapirmi owe takesam, Samaria oweam, me wan samaniin samaniin takesam, akoretamtemakam.” Yesus emes atakam aesimen.

⁹Armat Ipit emes atakam akorerawa, Allah, Armat Ipit Surga oup atoomtemeten. Era oweam banamek asiromesen. Erarawa, wonamo oup jisewonam Yesus apurimomtuken. Era owe Yesus booopor apoken.

¹⁰Yesus aesoserawa, era owe banamek oup apeomesen. Erarawa, jipit amnuk kain fasar aptam era owepu ameteemememisen.

¹¹Era ipit amnukam atakam akoreemisen. “Ara aememmmakam Galilea owee! Tare banamek oup apa sirommakam? Allah Yesus tawaut Surga oup atoomtemetar. Yesusam, aofasiendaetem. Tare ara apormakam tamen taka are.” Emes atakam aesimemisen.

¹²Emesare. Me Yesus atakam bakoretam bamirimemom owe fami juas “Saitun Wus Asan” aites, wanam Yerusalem aofasiesen. Era fami Yerusalem setep. Ere kilometer taka kope, emes setep are.

¹³Era owe kota aememes arawa, oup kamar atemetejiiesen. Era kamar ajaki kamaren. Era ajarisiapes owe Petrus, Yohanes, Yakobus, Andreas, Filipus, Tomas, Bartolomeus, Matius, Yakobus, Selot owe bajamkai ipit juas Simon, Yudas, emes owe aren. (Ara asep Yakobus, Alpius andepen. Ara Yudas, wan ipit juas Yakobus andepen).

¹⁴Emesare. Era owe takes, bimak binip taka, atakam Allah ajanima ajaiesen. Anom, tapesam, Yesus arsoot juas Maria, Yesus areotaisam, atakam Allah takan ajanima ajaiesen.

¹⁵Bare taka, Petrus Yesus bajamkai owe waut awasiten. Era ajarisiapes owe, 120 apayeen. Petrus arawa, atakam akoromen. “Dejoo owe akot! Bonaknak ere, Allah Jip Yudas aemto pak, atakam Daut akoromen. Daut arawa, era atakam, Alkitab bomon aeapomen. Emesare, Yudas Alkitab atakam jipu aeme. Yudas, Yesus ajipirtaeres owe, bonak ajareme ipit are.

¹⁷Yesusam era Yudas, karai dare takan bae aeremtaere. Emesare Yudas dare takan aememaarum.” Petrus emes atakam aesimen.

¹⁸“Yudasam era jokoman aeme pak, uang ajititen. Ararawa, era uang, tapirmi aojititen. Era asan ere, armat ipit bap andaebuansen. Ajakam apue, wanam jak bikini atefejisen.

¹⁹Yerusalem owe takesam era atakam jane ajiesen. Erarawa are tapirmi juas “Akeldama” aemtiiesen. Era juas aatakam juasen. Era juas daatakam “Esee Tapirmi” emes tamen aren.”

²⁰Petrusam atakam era owe akoromen. “Buku Masmur atakamam: ‘Atame, owe apoknak baemamesto. Owe tame bomon baemap bas.’ Wanam, ‘Wan ipit akarai jow bauumtaertas.’ Buku Masmur emes atakam are.

²¹Emesare, wan ipit, Yesus ajaorwasite, ateman dare takan bajamtamomattaro. Tuhan Yesus dare takan aememaarum, era ipitam dare takan aememaarum ipita. Yohanes, Yesus bwi akupimtaere baream, Allah, Yesus Surga oup atoomtemete baream, era ipit dare takan aememaarum ipita.” Petrus emes atakam aesimen.

²³Emesare, ara owe ipit amnuk aeremtaeresen. Wan ipit juas Yusufen. (Era ipit wan juas Barsabas. Anom wan juas Yustus.) Wan ipit, juas Matiasen.

²⁴Ararawa, atakam ajanimesen. “Tuhan! Wore owe takes ajak bomon pak womsam. Yudas era karai beken ajietiose, wanam apa bajirisem asan aesosen. Emesare, jipit amnuk aomatimisa. Wore era aeremtaermarem ipit taka baporomtamaro.” Emes atakam ajanimesen.

²⁶Erarawa, era owe, eka kutu andaetaatiiesen. Are ai Yesus atakam bakoretam bamirimemom ipit baeremtaer pak aemesen. Erarawa, Matias aeremtaeresen. Are Matias, wan Yesus atakam bakoretam bamirimemom owe 11, takan aotaemomesen.