Read Casuarina Coast Asmat AEMAARIS PAK 10 Bible Online

AEMAARIS PAK 10 - Casuarina Coast Asmat bible

AEMAARIS PAK 10

¹Emesare. Kota Kaisarea ere, owe juas Kornelius aemapen. Armat ipit tentara kapar ipitin. Era tentara owe, juas “Italia tentara Oween”.

²Armat ipit agama bajamkai fiak ipitin. Are, atame owe takesam, Allah asitimaarisin. Are uang daytu era Yahudi pak apok owe, atetamaaririn. Are atakam Allah ajanimaaririn.

³Emesare, era bare, jam 3 poronak, armat ipit, Allah malaikat bambi aporen. Era malaikat abipu basonak ajateome aporen. Era malaikatam atakam akoromen. “Kornelius!” Emes atakam aesimen.

⁴Armat ipit arawa, era malaikat banamek aorome wanam, “Tuhan wore apa pakem?” Emes atakam aesimen. Era malaikat arawa, “Allah era atakam ajanimarem pak jane ajim. Are uang era pak apok owe atetama ajiaaremarem aporem. Are wobimak binip ajanimome.

⁵Emesare wonom, owe kota Yope pambirimemey. Owe juas Simon bajatey. Are wan juas Petrus.

⁶Armat ipit binatang pitini karai ipit juas Simon atame aapeta. Era tame jupima emanse.” Malaikat emes atakam aesimen.

⁷Emesare. Kornelius atakam aesimtame malaikat, aesosen. Aesoserawa, Kornelius, akarai baetam ipit amnukam, tentara ipit takaam, ajaten. Era tentara ipit agama bajamkai fiak ipitin. Are Kornelius karai baetamaar ipitin.

⁸Emesare, Kornelius era atakam takes era owe aesimtamen. Aoesimtamerawa, are era owe Yope ambirimemen.

⁹Ajoferawa, era owe era waut ajaresen. Are Yope setep asisiomes, Petrusam era tame oup kais banda asan, atakam Allah bajanim atemetemen. Ere jok, jam 12 aren.

¹⁰Emesare. Petrus amostoen. Are amos banda akoten. Wan owe amos bajaatam aememes, armat ipit pak bambi aporen.

¹¹Are wonamo oup ambuape aporen. Wanam to pak bap andae aporen. Era pak, daytinak pitini tamen. Are jap paaro eak taka apok andaeemtepen.

¹²Bai eak taka apok binatang kupisam, tapirmi afafasiejarmas pak kupisam, wonamo oup apipimas sakao kupisam, era to pak bomon taka aren.

¹³Petrusam atakam jane ajien. “Bawasitey! Era pak batatiiey. Era dasa bandey.” Emes atakam jane ajien.

¹⁴Petrus arawa, “Tuhan! Emes bas! Dere ere karao pak apaye, pano pak apaye, banda demsam apok.” Emes atakam aesimen.

¹⁵Emesare, Petrus era atakam jane aojien. “Wore Allah banda pak akenemapome pak, karao pak bajie bas.” Emes atakam jane ajien.

¹⁶Era pak bare bamintep aeme, wanam era to pak wonamo oup fef aotemeten.

¹⁷Emesare. Petrus era bambi apore pak bimak binip arke atetaramen. “Ere wama pakem?” Emes bimak binip atetaramen. Emes bimak binip taotetaramape, Kornelius ambirimeme owe era tame aporesen. Ararawa, era tame tiri jimsappu aememesen. Bonak ere, are owe ajateporesen. “Simon tame etepum?” Emes atakam aesimesen.

¹⁸Emesare, era owe era tame tiri jimsappu aememes, are atakam daytu akoresen. “Ara tame, owe juas Simon Petrus aapetar ape?” Emes atakam aesimesen.

¹⁹Petrus ere, era bambi apore pak bimak binip taotetaramape, Allah Jip, atakam armat ipit aokoromen. “Baporey! Owe bamintep wora dimarmanis.

²⁰Wore bawasitey! Bandae! Era owe ajamkaiey. Wonom ombare bas. Dere era owe dobirimemomo.” Allah Jip emes atakam aesimtamen.

²¹Emesare, Petrus era owe bipu bap andaeapen. Atakamam akoromen. “Tanom baporani. Dere era andimarmankum ipit, derare. Are asan apa daemakam, apamarem?” Emes atakam aesimen.

²²Era owerawa, atakam akoromesen. “Kornelius tentara kapar ipit. Are turu ipit. Are Allah ombare ipit. Era Yahudi saman owe takes era ipit asitimes. Turunak malaikatam atakam armat ipit akoromen. ‘Wore Petrus bajatey. Are bajinaoto. Wanam wotame baemapto. Worarawa, aatakam jane pajiey.’ Malaikat emes atakam aesimen.” Emes atakam aesimesen.

²³Emesare, Petrus, era owe, era tame atoomjiien. Ajoferawa Peterus awasiten. Are era owe ajamesosen. Yope wan Yesus bajamkai oweam ajamesosesen.

²⁴Petrusam, era oweam, era waut ise taka aememes, wanam kota Kaisarea ambaremesen. Korneliusam, era owe banamek apeemen. Bonak ere, Kornelius aokaaoweam, ajoo oweam, ajate ajaresisimen.

²⁵Petrus era tame bajii aememe, Kornelius, armat ipit bimnuk aemamtaeren. Kornelius arawa, Petrus baipu jindi andaepuapen. Are Petrus asitimen.

²⁶Petrus ere, Kornelius awasimemen. “Bawasitey! Dere asamot ipit!” Petrus emes atakam aesimen.

²⁷Are Kornelius atakam akorome, wanam era tame ajiien. Are era ajarisiapes owe tanane aporen.

²⁸Are atakam era owe akoromen. “Tanom tamsam. Yahudi saman owe, Yahudi apok saman owe, bajamkaiap karao. Are era Yahudi apok saman owe atame jaki karao. Ere Yahudi owe agama pak tai jipu. Allah ere, dere owe, karaoam, potaam, bajie bas, emes aporomtamen.

²⁹Emesare, tare ajateenkum, dere bimak binip arke apok aemo. Dere ere, tara bajatepora. Tare apa jateenkum?” Petrus emes atakam aesimen.

³⁰Kornelius arawa, “Tojoon ere, jam 3 joknak, dere detame bomon, atakam Allah ajanimo. Ere emes tamen jam are. Jipit taka pakaian sare aptamam debipu ameteememen.

³¹Armat ipitam atakam akoromen. ‘Kornelius! Allah era atakam ajanimaaremarem pak jane ajim. Are uang era pak apok owe atetamaaremarem, emes bimak binip atoommem.

³²Wore owe Yope pambirimemey. Wonom owe juas Simon Petrus bajatey. Armat ipit binatang pitini karai ipit juas Simon atame emapa. Era tame jupima emanse.’ Era ipit emes atakam akoromen.

³³Derarawa, wore akan ajateo. Wore jak akot aememem. Emesare wore ara asan ajinaoem. Emesare, dare takes, Tuhan atakam wora asakamtamen atakam takes jane bajie, Allah bipu aemapom.” Kornelius emes atakam aesimen.

³⁴Emesare. Petrus atakam era owe akoromen. “Allaham, ‘emes owe akot, emes owe pota,’ bajie apok. Are takes afaimum. Dere emes apormin.

³⁵Allaham era samaniin samaniin aombare oweam, akot pak baem oweam, akot aporem.

³⁶Allaham owe aatakam era Israel owe bakoretam ambirimemome. Allah Akot Atakam, emes are: ‘Yesus Kristus aeme pak, Allaham, asamot oweam, ajak ji baem pak. Yesus Kristus, ere owe takes aTuhan.’ Are owe emes atakam era Israel bakoretam ambirimemomen. Tanom era atakam tamsam.

³⁷Bonak ere, Yohanes owe bwi bakupimtaer atakam akoretame. Asep ere, Yesus, daytinak pak, era Galilea tapirmi aeme. Wanam era pak wan Yudea tapirmi takes aeme. Tanom emes pak tamsam.

³⁸Emesare, Yesus Nasaret Ipit. Allaham, aJip, Armat Ipit atetame. Are fiak pak Armat Ipit atetame. Are Armat Ipit takan aemaaririn. Erarawa Armat Ipitam samaniin samaniin aesosaarir. Are akot pak aemaarir. Emesare, Bii Kapar Ipit wan owe aemoma ajaie. Yesus ere, era owe ajaoromtaera ajaie. Tanom emes tamsam.

³⁹Emesare, dare Yesus era Yahudi owe tapirmi aeme pak takesam, Yerusalem aeme pak takesam, damba aporom. Oweam, Armat Ipit salib wus oup ataetopomes. Erarawa are Armat Ipit atatiies.

⁴⁰Bare bamintep, Allah, Armat Ipit ajaoromwasumtume. Are Armat Ipit basonak aporomtame.

⁴¹Wan owe ere, Yesus bi bapor apok. Me, Allah bonak aereremartaaero owe taka, Yesus bi aporom. Allah, Armat Ipit ajaoromwasumtumerawa, dare amosam, bwiam, Armat Ipit takan andom.

⁴²Armat Ipitam Yesus Akot Atakam bakoretam, atakam asakamtamero. Allah, Armat Ipit, era jatiaptam oweam, era dambir oweam, adosa, atakam basakamtii Ipit ataeme. Are emes ateman batam atakam asakamtamero.

⁴³Bonaknak ere, Allah atakam bakoretam owe takes, Armat Ipit atakam akoromes. ‘Allah Armat Ipit aemto pak aportem. Erarawa Are Armat Ipit ambesemtas owe takes, adosa bimak binip ajanimemtamtem.’ Emes atakam aesimes.” Petrus emes atakam aesimen.

⁴⁴Petrus atakam basakampim apok ere, Allah Jip, era atakam jane ajies owe takes jak bomon ajiiapteteren.

⁴⁵Era owerawa, wan owe samaniin samaniin atakam kupis akoreteteresen. Are Allah daytinak apores, wanam Armat Ipit asitimesen. Bonak ere, wan Yahudi saman Yesus bajamkai owe, Petrus Yope takan ajinaoesen. Are era Yahudi apok saman owe akores atakam jane ajiesen. Erarawa are Allah aJip, era Yahudi apok samanam atetame aporesen. Ararawa, jinim daytu aeesen. Emasare, Petrusam atakam aokoretamen.

⁴⁶

⁴⁷“Ara owe, Allah Jip ataetares. Are da tamen aemares. Erarawa ara owe bwi bakupimtaer, atii bata owe ape?” Emes atakam aesimen.

⁴⁸Petrus arawa, owe Yesus juas bajiem, wanam era owe bwi bakupimtaer, atakam asakamtamen. Era owerawa, Petrus, bare bamintep era asan takan baemap, atakam ajanimesen.