Read Casuarina Coast Asmat AEMAARIS PAK 12 Bible Online

AEMAARIS PAK 12 - Casuarina Coast Asmat bible

AEMAARIS PAK 12

¹Emesare. Era bare, raja Herodes wan Yesus basitim bajarisiap owe ajurusumen.

²Are tentara ipit, Yakobus, warim bajatetatii atakam asakamtamen. Yakobus, Yohanes arepoten.

³Herodes era owe ajurusume, era Yahudi owe jak akot aememesen. Armat ipitam emes apore, are wan owe aojurusumen. Are Petrus ajipirtaeren. Ere pakambwi damon aren. Era pakambwi juas Eek Apok Roti Pakambwin.

⁴Are Petrus ajipirtaererawa, buji tame ataejiimen. Are tentara owe 16, banamek Petrus batai atakam asakamtamen. Tentara owe eak taka apok aemema, aesosa, wanam eak taka apok aemema, aesosa, emes banamek batai owe aereremartaaen. Herodesam atakam asakamtiien. “Paskah Bare Pakambwi atitas, dere Petrus, era owe bipu baoorpor ataejisimtemin.” Emes atakam aesimen.

⁵Erarawa, owe, Petrus, buji tame bomon akimapomesen. Yesus basitim bajarisiap owe, ere Petrus, atakam fiak Allah ajanimesen.

⁶Herodes, Petrus, owe bipu bataejisim bare aemansen. Era eam, Petrus ise, tentara ipit amnuk waut, aemansen. Bonak, tentara owe rantai jamnuk Petrus ajikitaeresen. Wan tentara oweam, buji tame banamek batai, jimsappu aememesen.

⁷Emesare, Tuhan malaikat era asan ameteememen. Saream era kamar bomon asaramtiien. Malaikatam Petrus damo awawaime ajietamen aeme, wanam armat ipit ajitinen. “Bawasitey! Fefar!” Emes atakam aesimen. Erarawa, ban banam ajikitaeres rantai asurendaen.

⁸Malaikat arawa, “Era asemak banam pak bajikapomey. Era sendalam bajiimomey.” Emes atakam aesimen. Petrusam emes taka aemen. Era malaikat arawa, “Baju bajiimomey. Wore fe asaraman.” Emes atakam aesimen.

⁹Emesare, Petrus era malaikat fe asaramomjisen. Are malaikat aeme pak, paknak bapor apoken. Are pak taka bambi apore emes jiraoemen.

¹⁰Emesare, are era setep banamek batai owe asan aofemis, wanam waut banamek batai owe asan aofemisen. Ararawa, era tasanenak besi jimsappu ambarememisen. Ere kota baemjis jimsapen. Emesare, era jimsap amba ambuemen. Era ipit amnuk arawa, era jimsap awarimjisemisen. Are bokot taka ajaremisen. Bokot taka ajaremis arawa, malaikat armat ipit beken ametejiosen.

¹¹Emesare, Petrus, era aeme pak, basonak aporkorome, wanam atakam akoremen. “Tuhan malaikat, dera bajortaer atakam asakamtame. Erarawa Herodes dera baemejurusum asan apok. Are era malaikat Yahudi owe aemtanis pak takes dera bajortaer, atakam asakamtame. Dere waa emes aporkorommin.” Emes atakam aesimen.

¹²Armat ipit emes aporkoromerawa, are Maria tame aesosen. Maria, Yohanes arsooten. Yohanes arawa, wan juas Markusen. Era asan owe tanane atakam Allah bajanim bonak ajarisiapesen.

¹³Petrusam tasan jimsap, akokomen. Karai baetam taot juas Roderawa, era jimsap bapaimtam ajisen.

¹⁴Are Petrus atakam jip apore, are jak akot aememen. Erarawa jimsap bapaimtam apoken. Armat taot era tame bomon akukejie, wanam atakam era owe akoromen. “Petrus era jimsappu aemeta.” Emes atakam aesimen.

¹⁵Era owerawa, “Wore jaytu.” Emes atakam aesimesen. Armat taot ere, “Pote tamen apok. Petrus era tasan aometa.” Emes atakam fiak aokoromen. Era owerawa, “Ijee, are malaikat.” Emes atakam aesimesen.

¹⁶Petrus ere, jimsap aokokomen. Era owerawa, era jimsap apaimtames, wanam Petrus bi aporesen. Emesare, are jinim aeesen.

¹⁷Petrusam era owe atakam apok baem ban sos asoen. Wanam are Tuhan era buji tame bomon ataejisimar pak, atakam era owe akoromen. “Emes atakam Yakobus anama wan Yesus bajamkai oweam, boesimtamay.” Emes atakam aesimen. Petrus ere, wan asan aesosen.

¹⁸Emesare. Jo apuen. Jo apuerawa, era tentara owe atakam bay akoramesen. “Petrus ete?” Emes atakam aesimesen.

¹⁹Herodesam, Petrus bandimartaer, aempore apoken. Ararawa, era buji tame banamek batai owe aoorpore, wanam era owe batatii atakam asakamtamen. Emesare, Herodes, Yudea tapirmi aewasite, wanam kota Kaisarea aesosen. Are era asan aemapaaririn.

²⁰Emesare. Herodes, jokoman atakam kota Tirus oweam, kota Sidon oweam, akoroma ajaien. Are banda pak sai asaietama ajaien. Erarawa, era owe Herodes bipu atakam bajamkoram atakam ajanimesen. Are pai bae akoten. Owe juas Blastusam aememen. Are raja tame pak banamek bataitam ipitin. Era oweam Blastus, atakam Herodes takan bojamkoram, atakam ajanimesen. Blastusam emes akoten.

²¹Emesare, Herodes era owe atakam bajamkoram bare asakamtiien. Era bare aemanse, armat ipit araja pakaian ajiimen. Are araja fe baemap asan ten aemape, wanam atakam akoren.

²²Era owerawa, atakam afaketaaesen. “Era atakam, asamot ipit atakam apok. Are Allah ipit atakam.” Emes atakam aesimesen.

²³Herodes ere, Allah bamesem apok. Erarawa Tuhan malaikat, era ipit wusup ajaperen. Jak bomon dimaam era ipit andakoromen. Erarawa era ipit dambir aemen.

²⁴Emesare. Owe tanane, Tuhan atakam, owe akoretamesen. Owe tananeam, era atakam jane ajiesen.

²⁵Barnabas anama Saulus, era asan karai takes aetiikoromemisen. Aetiikoromemis arawa, are Yerusalem beken ajiememisen. Are Yohanes Markus ataeremisen.