Read Casuarina Coast Asmat AEMAARIS PAK 13 Bible Online

AEMAARIS PAK 13 - Casuarina Coast Asmat bible

AEMAARIS PAK 13

¹Emesare. Wan kota Antiokia Yesus basitim bajarisiap owe, Allah atakam bakoretam owe aememesen. Wan owerawa, atakam baememtam owe aememesen. Are Barnabas, Simeonam, Lukiusam, Menahemam, Saulusam, emes owe are. (Simeon wan juas Sesak Ipitin. Me Lukius, kota Kirene saman ipitin. Bonak ere, Menahemam, Herodesam, sira tame takan awotememisen.)

²Emesare, era owe Tuhan asitimes. Are banda pak ambases. Era owe emes taomapes, Allah Jip atakam era owe akoromen. “Barnabas anama Saulus, dekarai baetam aeremtaermin. Tare era ipit amnuk, era karai bae bataemay.” Emes atakam aesimen.

³Emesare, era owe banda pak aobasesen. Are atakam Allah ajanimesen. Are aban, era ipit amnuk damo ten ataetiies, wanam era ipit amnuk ambirimemesen.

⁴Emesare. Allah Jip, Barnabas anama Saulus, ambirimemomen. Era ipit amnuk arawa, kota Seleukia aesosemisen. Are era asan andaejuuemis, wanam woo juas Siprus ajiritemisen.

⁵Emesare, are kota Salamis ajiritemisen. Salamis ajiritemis arawa, are Allah atakam era Yahudi owe samayen tame bomon takes akoretamemisen. Are Yohanes pi ara bajat atoomjiremisen.

⁶Are era woo aemeses, wanam poman ambarefisesen. Are kota Pafos ambaremesen. Era asan ere, are bii aptam ipit juas Baryesus bimnuk aemamtaeresen. Era ipit Yahudi ipitin. Are Allah atakam bakoretam pote ipitin.

⁷Armat ipit, era woo gubernur juas Sergius Paulus takan aemapaaririn. Era gubernuram bimak binip aptam ipitin. Emesare, era gubernur, Barnabas anama Saulus ajaten. Are Allah atakam jane bajie akoten.

⁸Yunani atakam ere, era bii aptam ipit juas “Elimasen”. Elimas ere, Barnabas anama Saulus, atakam asesekamkoren. Eragubernur Yesus bamesem-ombaren.

⁹Saulusam wan juas Paulusen. Emesare, Allah Jip, armat ipit aemomemkoromen. Armat ipit, bii aptam ipit banamek asakasimompen.

¹⁰Atakamam akoromen. “Wore pote ipitam, asan pota ipitam, aememmarem. Wore Bii andep. Wore era turu pak takes bifane afeomemaaremarem. Wore Tuhan atakamnak afifirimaaremarem.

¹¹Baporey! Waa ere, Tuhan ajurusumteman. Wore, banamek kapie aememtemarem. Wore ise tanane, jee baemepor asan apok.” Emes atakam aesimen. Emesare. Are banamek ambunam, jiitiam, aememen. Ararawa, ban bakimomem owe, baporomtaer andimarjarmapen.

¹²Era gubernuram emes aporen. Aporerawa, are Yesus eemnak ambesemkoromen. Are Tuhan atakam jinim daytinak aeen.

¹³Emesare. Paulusam, takan aememes oweam, kota pafos andaejuuesen. Are Pamfilia tapirmi kota juas Perga ajiritesen. Era kota ere, Yohanes era owe beken ajiose, wanam Yerusalem aofasiosen.

¹⁴Era owerawa, Perga aites, wanam Pisidia tapirmi kota juas Antiokia ambaremesen. Yahudi Owe Samayen Barerawa, are asamayen tame ajiies, wanam aemapesen.

¹⁵Era Yahudi owe samayen tame kapar owe, Musa Basakamtam Atakam Bukuam, Allah Atakam Bakoretam Owe Bukuam, baca aeesen. baca aees arawa, owe, Paulusam, takan ajamemapes oweam, atakam bakoretampor, atakam asakamtamesen. “Ara aemapakam owee! Tare ataane ara aemapares owe baweom ape, atakam bakoretamay.” Emes atakam aesimesen.

¹⁶Emesare, Paulus awasite, wanam ban banim ajien. Are atakam akoretamen. “Ara aemapakam Israel owee! Ara aemapakam Allah basitim Yahudi apok owee! Atakam jane pajiay.

¹⁷Israel owe Allah asitimmas. Bonaknak ere, Allaham darfaisomar aereremartaaen. Era oweam Mesir tapirmi aemapes, Allah era owe, owe samane daytinak aemapomen. Ararawa, afiak pak aporomtamen. Are era owe Mesir tapirmi aewasiomiten.

¹⁸Era oweam pota pak era tame apok tapirmi aemaarisin. Allaham era pak tahun 40 jak bambi apepeaaririn.

¹⁹Ararawa, Kanaan tapirmi saman poman ban jamnuk akumimosomen. Akumimosomerawa, are era tapirmi darfaisomar sai asaietamen.

²⁰Are era pak takes tahun 450 aemaaririn. Allah era pak aemkoromaarir arawa, Are kapar owe era owe ataemomtama ajaien. Era kapar owe Alah atakam bakoretam ipit juas Semuel aememe bare ajiire, Allah karai aetamaarisen.

²¹Era owerawa, Semuel raja ipit aobataemomtam, emes atakam ajanimesen. Emesare, Allah, Kis andep juas Saul, ataemomtamen. Saul, Benyamin saman ipitin. Anom raja ipit tahun 40 aememaaririn.

²²Allah ere, Saul raja ipit baemem akoromdaemen. Akoromdaemerawa, Are Daut era raja ipit ataemomen. Are Daut atakam akoromen. ‘Dere Isai andep juas Daut afaimmin. Armat ipit, deakot apormin pak jipu aemkoromtem.’ Allah emes atakam aesimen.

²³Emesare, Yesus, Daut wurpis ipit. Allaham Yesus Israel Bajortaer Ipit ataemomtamen. Are Allah ataaji era owe aee pak jipu taka aren.

²⁴Bonak ere, Yesus bandae apok aeme, Yohanes atakam era Israel owe takes akoromen. ‘Tare dosa bamakemay. Allah atakam ji aeay. Oweam bwi tara bakupimtaertan.’ Emes atakam aesimen.

²⁵Emesare, Yohanes akarai pak takes bakoromtii bare setep aemanse, armat ipit era owe ajatepora ajaien. ‘Tabimak binip ere, dere ta ipitim? Dere banamek apeapaarukum ipit apok. Tanom baporay. Era Ipit defe asep andaetem. Armat Ipit turunak Ipit. Dere jaos. Emesare dere Armat Ipit sendal baemesurumtam asan apok.’ Yohanes emes atakam aesima ajaien.

²⁶Dejoo owe akot! Tare Abraham arurupis owe. Tanom wan owe Allah ombare owe. Allah, era bajortaer atakam, dara atetamero.

²⁷Owe, Allah atakam bakoretam owe aeapomes buku, era Yahudi Owe Samayen Bareiin aea ajimas. Me, Yerusalem oweam, akapar oweam, ara Allah atakam bakoretam owe atakam amsam apok. Are Yesus amsam apok. Emesare are Yesus batatii atakam asakamtiies, are era buku atakam jipu aemes.

²⁸Are Yesus batatii jokoman pak baem apok apores ere, me, are Yesus batatii atakam Pilatus ajanimesen.

²⁹Alkitab, owe Yesus aemomes atakam akorem. Emesare, era owe Alkitab atakam jipu aemkoromes, are Yesus dambir ipit salib bap ataendaemesen. Are Armat Ipit eka jipa bomon ataetiiesen.

³⁰Me, Allah ere, Armat Ipit ajaoromwasumtumen.

³¹Bonak ere, wan owe, Armat Ipit, Galilea tapirmi takan aites, wanam Yerusalem takan aemjaresen. Yesus ajaorwasiterawa, Armat Ipit, bare arke era owe bipu aojateoma ajaien. Emesare, waa era oweam emes ateman era Israel owe, atammas.

³²Bonak ere, Allah, ataaji darfaisomar aeen. Are era ataaji aee pak jipu taka aemtamero. Armat Ipit, Yesus ajaoromwasumtume. Emesare, Masmur pasal 2 atakamam: ‘Wore deTii. Dere waa Wuritipit aememmin.’ Allah emes atakam aesimen. Emesare, danom emes Akot Atakam tara akoretamom.

³³

³⁴Allah Yesus ajaoromwasumtume. Yesusam dambir boem apok aemtem. Allaham emes atakam aesimen: ‘Dere Daut ataaji aeeo pak tara atetamtemin. Era pak akotnak. Anom anakot.’ Emes atakam aesimen.

³⁵Wan ayatam emes atakam are: ‘Wore woBambi Karai Baetam Ipit damo dasa ofa baofames, emes baemejie asan apok.’ Emes atakam aesimen.

³⁶Emesare, Daut ajitemerawa, armat ipit, Allah atakam asakamtiie jipu aemkorome, wanam are dambir aemen. Owerawa, armat ipit arfaisomar dambir asan setep akaimapomesen. Adamo dasaam ofa aofamsen.

³⁷Allah ajaoromwasumtume Ipit adamo dasa ere, ofa baofames apoknaken.

³⁸Dejoo owe akotnak! Yesus aeme pak, owe dosa bimak binip bajanimemtamnak pak. Oweam era pak atakam tara akoretamman. Allah, Yesus eemnak ambesemkorommas owe, turunak owe, emes atakam asakamtiim. Are adosa bimak binip ajanimemtamum. Allah ere, Musa Basakamtam Atakam ji bae owe adosa bakokomosomtam apok aemum. Tanom emes atakam jane pajiay.

³⁹

⁴⁰Emesare, era bonaknak Allah atakam akoretames owe, emes atakam akoretamesen: ‘Allah atakam bifane afeomakam owee! Baporay! Tare waa jati aememmakam, Dere pak taka aemtemin. Oweam era aemtas atakam tara akoretamkoromtan apaye, tare era atakam owe eemnak apok ajitemakam. Emesare, tare era pak jinim aeay, wanam dambir akamiamsay.’” Emes atakam aesimesen. Emesare, tare bimak binip turuar. Tare era owe era akoretames atakam jipu baem-ombar. Paulus emes atakam aesimen.

⁴¹

⁴²Emesare. Paulus anama Barnabas ajisemis, era owe atakam fiak ajanimesen. “Era aamsekunaoto Yahudi Owe Samayen Bare, tanom emes atakam bokoretamaroami.” Emes atakam aesimesen.

⁴³Emesare, era Yahudi Owe samayen tame ajarisiapes owe, apawuosesen. Apawuoses arawa, Yahudi owe tananeam, Yahudiagama amba afies owe tananeam, Paulus anama Barnabas ajamkaiesen. Era ipit amnuk era owe ataane aoweomemisen. “Tare Allah etetaman asan akot bamompim bas.” Emes atakam aesimemisen.

⁴⁴Yahudi Owe Samayen Bare aemanse, era kota owe bambi tame bajamtii taka aemes. Are Allah atakam jane bajie ajarisiapesen.

⁴⁵Yahudi owe ere, era owe tanane apores, are itim daytinak akemesen. Are Paulus atakam aemekoresen. Are pota atakam akoresen.

⁴⁶Paulus anama Barnabas ere, jak fiak aemememisen. Are atakam era owe akoromemisen. “Allah tare aatakam jane bonak batakamjie atakam asakamtame. Tare ere, aatakam aoomakam. Emesare era jiinenak baememaar, tapak apok aporomtammakam. Erarawa, dare beken tara ajiostamum, wanam Yahudi apok samanpu aesostemamum.

⁴⁷Emesare, Tuhanam emes atakam asakamtamaro: ‘Dere, tare era sare, atakam Yahudi apok saman owe bakore ambirimmin. Emesare era samaniin samaniin takes, “Tuhan tara bajortaer,” emes atakam jane ajitemas.’ Tuhan emes atakam aesimtamero.” Paulus anama Barnabas emes atakam aesimemisen.

⁴⁸Emesare. Yahudi apok saman owe emes atakam jane ajies, are jak akot aememesen. “Allah atakam akotnak,” emes atakam aesimesen. Emesare, Allah jiinenak baememaar aereremartaae owe takes, Yesus eemnak ambesemkoromesen.

⁴⁹Oweam, Tuhan atakam era tapirmi samaniin samaniin takes akoretamesen.

⁵⁰Yahudi owe ere, era agama bajamkai fiak duturu tapesam, era kota duturu oweam, atakam awotamaraarisin. Era owerawa, wan owe, Paulus anama Barnabas bajurusum, atakam awotamaresen. Are era ipit amnuk era tapirmi aombirimosomesen.

⁵¹Emesare, Paulus anama Barnabas, sendal, tapirmi porsa, era owe bipu atatakumemisen. Ere era owe era pota pak aemes, baporomtam paken. Ere baseros pak. Emes aememis arawa, are kota Ikonium aesosemisen.

⁵²Emesare, Yesus bajamkai owe jak akotnak aememesen. Allah Jipam era owe aemomemkoromen.