Read Casuarina Coast Asmat AEMAARIS PAK 14 Bible Online

AEMAARIS PAK 14 - Casuarina Coast Asmat bible

AEMAARIS PAK 14

¹Emesare, Paulus anama Barnabas Ikonium aemememis, are era Antiokia aememis pak, emes taka aoememisen. Are era Yahudi owe samayen tame ajiiemisen. Are atakam fiaknak akoretamemisen. Erarawa Yahudi owe tananeam, Yahudi apok saman owe tananeam, Yesus eemnak ambesemkoromesen.

²Yesus atakam aooes Yahudi owe ere, era Yahudi apok saman owe atakam awotamaresen. Era wan Yahudi apok saman owerawa, bifane era Yesus bajamkai ipit amnuk afeomesen.

³Emesare, era Yesus atakam bakoretam bamirimemom ipit amnuk, tarai bwinak aememaarimisin. Are jak fiak aememaarimis, wanam Tuhan atakam akoretama ajiaarimisin. Are, “Tuhan, asan akot boem Ipit,” emes atakam aesima ajiaarimis. Tuhanam fiak pak era ipit amnuk atetama ajiaaririn. Emesare era ipit amnuk jinim bae pak aema ajiaarimisin. Oweam era jinim bae pak apora ajiaaris, are era ipit amnuk atakam, atakamnak apora ajiaarisin.

⁴Era kota owe tanane ere, bimak binip awar apoken. Wan owe era Yahudi owe akoten. Wan owerawa, era Yesus atakam bakoretam bamirimemom ipit amnuk akoten.

⁵Era Yahudi apok saman oweam, era Yahudi oweam, era duturu oweam, era Yesus atakam bakoretam bamirimemom ipit amnuk bajurusum bawasiomit, atakam akoresen. Are eka, era Yesus atakam bakoretam bamirimemom ipit amnuk damo basampirim, atakam akoresen.

⁶Era Yesus atakam bakoretam bamirimemom ipit amnuk ere, emes atakam jane ajiemisen. Ararawa, era Likaonia kota jamnuk juas Derbe anama Listra era dasmanam, ombare aesosemisen.

⁷Era asan are Yesus Akot Atakam akoretamemisen.

⁸Emesare. Kota Listra, bai kam ipit aemapen. Armat ipitam bai kam jak bomon aemomjise taka aren. Are batawejar amsam apoknaken.

⁹Armat ipitam Paulus akoreajie atakam jane ajia ajaien. Paulusam banamek era ipit aorome, wanam are era ipit abai akot baemtam eemnak ambesemkorome aporen.

¹⁰Ararawa, atakam daytu akoromen. “Imtuu awasiemey,” emes atakam aesimen. Armat ipit arawa, emetewasite, wanam atawejaren.

¹¹Era owe tananeam Paulus aeme pak aporesen. Apores arawa, era Likaonia atakam, daytu afaketaaesen. “Juein owe jamnuk, asamot bi ajaoremes. Are dabipu andaes.” Emes atakam aesimesen.

¹²Era owerawa, Barnabas wan juas “Seus” aemesen. Are Paulus atakam bakore ipit apores, erarawa are armat ipit juas “Hermes” aemesen.

¹³Emesare, juein ipit juas Seus asamayen tameam era kota setep aemansen. Era Seus kapar ipit, sapi jipit bamintepam, wus taeam, era kota tiri jimsappu atoomtinen. Armat ipitam, era owe tananeam, sapi Paulus anama Barnabas bambi bataetiitam aemesen. Are era wus tae bambi batetam aemesen. Era pak, era ipit amnuk basitim paken.

¹⁴Era Yesus atakam bakoretam bamirimemom ipit amnuk juas Barnabas anama Paulus, emes atakam jane ajiemisen. Emes atakam jane ajiemis arawa, are apakaian akaakamosomemis, wanam era ajarisiapes owe tanane damon, ja akukosemisen. Are atakam afakeemisen.

¹⁵“Ara aememakam owee! Wama tamen pak emmakam? Dare asamot owe, ta tamen aemapmarom. Dare Allah Akot Atakam tare ara akoretammarom. Ere tare era bambi pak bawaiem atakam. Anom tare era jiinenak Allah bajamkai atakam. Bonaknak ere, Armat Ipit era wonamo oupam, ara tapirmiam, era itimbup bwiam, era pakiin pakiin takesam, akenemapomen.

¹⁶Bonaknak ere, Armat Ipit era samane takes apa bokotpu batawejar, atetamaarir.

¹⁷Armat Ipit ere, aakot pak, tara aporomtamaaririn. Are wonamo oup te ataendaemaaririn. Are pak akene eek bwi bajanim atetamaaririn. Are banda pak tara atetamaaririn. Are jak akot tara aemtamaaririn.” Emes atakam aesimemisen.

¹⁸Emes atakam akoretamemis ere, era owe tanane, era pak are bambi bataetiitamken.

¹⁹Emesare. Wan Antiokia Yahudi oweam, wan Ikonium Yahudi oweam, ajinaoteteresen. Are era owe tanane atakam awotamaromteteresen. Era owerawa, eka Paulus damo asampirimesen. Are armat ipit era kota tasane ajimomjisesen. Armat ipit dambir jiraoemesen.

²⁰Yesus bajamkai owe ere, Paulus afojomesen. Armat ipit arawa, awasite, wanam kota aojiien. Era barerawa, are Barnabasatin kota Derbe aesosemisen.

²¹Are Yesus Akot Atakam era kota owe akoretamemisen. Are owe tanane Yesus bajamkai aememtamemisen. Erarawa, are Listraam, Ikoniumam, Antiokiaam, aofasiemisen.

²²Are Yesus bajamkai owe jak fiak aemapomemisen. “Yesus bamesem, bamompim bas. Dare takes ajirisemtemarom. Erarawa, asep ere, dare Allah Ai Tapirmi ajiiemtemarom.” Emes atakam aesimemisen.

²³Are Yesus basitim bajarisiap owe samaniin samaniin, Yesus basitim bajarisiap armat baemem owe ataemomemisen. Are era owe atakam Allah takan ajanimes, wanam banda pak ambasesen. Paulus anama Barnabas arawa, era owe, era ambesemes Tuhan ban ten, atetamemisen.

²⁴Emesare. Are Pisidia tapirmi aofemis, wanam Pamfilia tapirmi ambarememisen.

²⁵Are Allah atakam era kota Perga owe akoretamemis, wanam kota Atalia aoesosemisen.

²⁶Are era asan kapal andaejuuemis, wanam Antiokia ajiremisen. Bonakam, era Antiokia owe, era ipit amnuk, Allah ban ten atetamesen. Bonakam, are Allah, era ipit amnuk, asan akot batetam, atakam ajanimesen. Era ipit amnuk Allah karai aetamkoromemis, wanam era Antiokia ajiremisen.

²⁷Emesare, are Antiokia ambarememisen. Antiokia ambarememis arawa, are Yesus basitim bajarisiap owe ajarisiapesen. Are Allah atakam aemes pak afasimtaeremisen. Allaham, era Yahudi apok saman, Yesus eemnak bamesemkorom bimak binip atetame, emes atakam afasimtaeremisen.

²⁸Emesare, are Yesus bajamkai owe ise tanane ajamemapemisen.