Read Casuarina Coast Asmat AEMAARIS PAK 15 Bible Online

AEMAARIS PAK 15 - Casuarina Coast Asmat bible

AEMAARIS PAK 15

¹Emesare. Yudea tapirmi owe era Antiokia ambaremesen. Are atakam era Yesus bajamkai owe aememtames. “Bonaknak ere, Musa tamane pitini basakamosom pak tai ataetiitamen. Owe tamane pitini basakamosom apok aemtan, Allah tara bajortaer apok.” Emes atakam aesimesen.

²Paulus anama Barnabas ere, era owe atakam daytinak ajamkoramesen. Era Yesus bajamkai owerawa, atakam asakamtiiesen. Are Paulusam, Barnabasam, me wan oweam, Yerusalem baesos, wanam era Yesus atakam bakoretam bamirimemom oweam, era Yesus basitim bajarisiap armat baemem oweam, era tamane pitini basakamosom Yahudi pak tai bajatepor, emes atakam asakamtiiesen.

³Emesare, Yesus basitim bajarisiap owe era owe ambirimemomesen. Era waut, are Fenisia tapirmiam, Samaria tapirmiam, aofeosesen. Era asanam, are era Yahudi apok saman Allah ajamkaies atakam era owe akoromesen. Erarawa are, Yesus bajamkai owe, jak akotnak aemapomesen.

⁴Emesare, are Yerusalem ambaremesen. Era Yesus basitim bajarisiap oweam, era Yesus atakam bakoretam bamirimemom oweam, era Yesus basitim bajarisiap armat baemem oweam, era owe atoomjiiesen. Era owerawa, Allah aeme pak takes, atakam akoresen.

⁵Me, wan Yesus eemnak ambesemkoromes Parisi owe awasites, wanam atakam akoresen. “Yesus eemnak bamesemkorom Yahudi apok saman owe tamane pitini basakamosomtas. Era pak baem ere, Musa Basakamtam Atakam jipu erare.” Emes atakam aesimesen.

⁶Yesus atakam bakoretam bamirimemom oweam, Yesus basitim bajarisiap armat baemem oweam, era pak atakam basakamtii ajarisiapesen.

⁷Are atakam jirao ajamkoramesen. Atakam jirao ajamkorames arawa, Petrus awasite, wanam atakam akoren. “Dejoo owe akot! Bonak ere, Allah dere tawaut aeremtaeren. Are Yesus Akot Atakam Yahudi apok saman bakoretam aeremtaeren. Ere, era oweam Yesus bamesem are. Tare emes tamsam.

⁸Emesare, Allah owe ajak bomon pak takes amsam. Are era Yahudi apok saman oweam ataate. Are emes pak aporomtame. Emesare Are aJip era oweam atetame. Are aJip dara atetamero emes tamen are.

⁹Me, ‘Era Yahudi saman apas. Me Yahudi apok saman apas,’ emes bajie apok. Era oweam Yesus ambesemes. Emesare Allah era owe jak bomon dosa bimak binip ajanimemtame.

¹⁰Emesare, tare Allah baempor aemmakam, wama tamenem? Tare wuturu pak ara Yesus bajamkai owe saia ten ataetiimakam. Me, tanom, tarfaisomaram, era pak baemetaer asan apok.

¹¹Tuhan Yesus dare bambi ajortaermaro. Are era oweam bambi emes ajortaertem. Dare emes atakam eemnak ambesemkorommarom.” Petrus emes atakam aesimen.

¹²Emesare. Era owe tanane takes atakam apoknak aemapesen. Barnabas anama Paulus, Allah aeme pak, atakam era owe akoromemisen. Bonak ere, Allah afiak pak era ipit amnuk atetamen. Erarawa are jinim bae pak era Yahudi apok saman bipu aememisen. Are emes atakam era ajarisiapes owe akoromemisen.

¹³Era ipit amnuk emes atakam akorekoromemis arawa, Yakobusam atakam akoren. “Dejoo owe akot! De atakam jane pajiay.

¹⁴Allah era Yahudi apok saman bajom apok aeme. Are wan Yahudi apok owe, abajamkai owe baemem aereremartaae. Simonam era atakam akorear.

¹⁵Era bonaknak Allah atakam bakoretam oweam, emes atakam taka aeapomes:

¹⁶‘Tuhanam,’ Owe era pak aemkoromtas, aofasitemin. Dere Daut andaepupuamse tame aoeapomtemin. ‘Dere era danais tame aoeapomtemin. Dere era tame aotaakenemapomtemin.

¹⁷Emesare era wan owe takes Tuhan andimartemas. Me deowe baemem ajateo Yahudi apok saman owe are.’

¹⁸Tuhan emes atakam akorem. Are tarainak emes atakam akoreaarir.” Me bonaknak Allah atakam bakoretam owe emes atakam aeapomesen.

¹⁹“Emesare, wan Yahudi apok saman owe, bimin awaiemmas, wanam Allah ajamkaimas. Debimak binip ere, dare era owe bajurusum bas.

²⁰Wanam dare surat era owe pataejirimamo. Era suratam, ‘Owe, pak, eto bipu ataetiitamemas. Erarawa are eto asitimemas. Emesare, tare era pak banda bas. Tare tani tamane bajamdamat bas. Esee aptam dambir aemes binatang dasa banda bas. Eseeam banda bas.’ Emes surat pataejirimamo.

²¹Emesare, tarainak, owe era kotaiin kotaiin, Musa Basakamtam Atakam akoretamaaris. Era Yahudi Owe Samayen Bare takes, owe era Yahudi owe samayen tame bomon ara basakamtam atakam baca aemas.” Yakobus emes atakam aesimen.

²²Emesare. Yesus atakam bakoretam bamirimemom oweam, Yesus basitim bajarisiap armat baemem oweam, Yesus basitim bajarisiap owe takesam, atakam ajamsakamamtiiesen. Are armamon owe bataemom, wanam era owe Paulus anama Barnabas takan, era Antiokia bamirimemom, emes atakam ajamsakamamtiiesen. Are Yudas aeremtaeresen. Are wan juas Barsabas. Are Silas aeremtaeresen. Emesare, era ipit amnuk Yesus bamesem owe akapar owe araren.

²³Are emes surat aeapomes, wanam ataejirimesen: “Tare kota Antiokiaam, Siria tapirmiam, Kilikia tapirmiam, Yahudi apok saman Yesus bajamkai owe aemapmakam. Dararawa, Yesus atakam bakoretam bamirimemom oweam, Yesus basitim bajarisiap armat baemem oweam, aemapom. Danom Yesus bajamkai owe. Dare selamat atakam tara akorommarom.

²⁴Atakam jane ajiom ere, wan daowe atakam tara akoretamman. Era akoremas atakam jane ajimakam, tanom jak pota aememmakam. Tanom bimak binip arke atetarammakam. Dare ere, era owe emes atakam tara bokore, atakam basakamtam apok.

²⁵Emesare, danom ajarisiapom. Ajarisiapom, danom bimak binip awar atetaramom. Emesare, dare atakam bakoromattam owe aereremartaaom. Era owe Barnabas anama Paulus taasan takan aesostemas. Emesare, dare Barnabas anama Paulus daytu afaimmarom.

²⁶Era ipit amnukam, Yesus Kristus daTuhan karai aetamemis ere, are poman damo dambir etetememis.

²⁷Emesare. Dare Yudas anama Silas tara ataendaemtamtemarom. Are, era surat aeemarom atakam, amba akoretamteman.

²⁸Dare Allah Jipajie bimak binip awar atetarammarom. Emesare dare wuturu pak tasaia ten bataetii apok aemmarom. Danom ara aemansa atakam taowenak bamintep tara asakamtamom.

²⁹Emesare, tare owe, eto bipu ataetiitammas pak, banda bas. Tare esee banda bas. Tanom esee aptam dambir aeme binatang dasa banda bas. Tanom tani tamane bajamdamat bas. Tare emes pak baem apok aemtakam, tare akot aememtemakam. Dare aake.” Emes surat atetamesen.

³⁰Emesare. Are era owe ambirimemomesen. Era owerawa, Antiokia aesosesen. Are Yesus basitim bajarisiap owe takes ajarisimtaeres, wanam era surat era owe atetamesen.

³¹Era owe era surat baca aemes, wanam jak akot aememesen. Era surat atakam jak fiak baemapom pak apores aren.

³²Ara Yudas anama Silas, Allah atakam bakoretam owe araren. Are atakam jirao, era owe akoromemisen. Are Yesus bajamkai owe jak akotam, jak fiakam, aemapomemisen.

³³Are tarai paratakopak era asan aemapemisen. Era Antiokia Yesus bajamkai owe ere, Yudas anama Silas asan akot ambirimemomesen. Emesare, Yudas anama Silas bonak ambirimemomes owe bipu, aoesosemisen.

³⁴Me Paulus anama Barnabas ere, Antiokia aoemapemisen. Are, wan owe tananeam, Tuhan atakam era owe aememtamesen. Are Allah atakam akoretamesen.

³⁶Asep barerawa, Paulus atakam Barnabas akoromen. “De! Dare Tuhan atakam akoretamom kota takes boesosasi. Yesus bajamkai owe, asan akot apaye baporasi.” Emes atakam aesimen.

³⁷Emesare, Barnabas, Yohanes Markus bataer atakam aesimen.

³⁸Bonak ere, are Paulus anama Barnabas Pamfilia tapirmi beken ajien. Are era karai takan bae apok. Paulus era pak aporen. Emesare are Yohanes botaer potan.

³⁹Me Paulus anama Barnabas atakam daytu ajamkoramemisen. Erarawa apamamtaeremisen. Emesare. Barnabas, Markus ataere, wanam Siprus ajiremisen.

⁴⁰Paulus arawa, Silas aeremtaeren. Are aesosemisen. Me Yesus bajamkai oweam, era ipit amnuk, Allah ban ten atetamesen.

⁴¹Paulus arawa, Siria tapirmiam, Kilikia tapirmiam, aofeosesen. Are Yesus basitim bajarisiap owe, jak fiak aemapomen.