Read Casuarina Coast Asmat AEMAARIS PAK 17 Bible Online

AEMAARIS PAK 17 - Casuarina Coast Asmat bible

AEMAARIS PAK 17

¹Emesare. Paulus anama Silas kota Amfipolisam, kota Apoloniaam, aofeosemis, wanam kota Tesalonika ambarememisen. Era asan Yahudi owe asamayen tame aemansen.

²Emesare, Paulus era tame ajiien. Are era samaniin samaniin Yahudi owe samayen tame emes taka aema ajaien. Emesare, Yahudi Owe Samayen Bare bamintep ere, armat ipit Alkitab atakam era owe akoretamen.

³Are Alkitab atakam baso akoretamen. “Allah, era Aeremtaere Ipit bajurusum, atakam akukuretiie. Are era Ipit bajaorwasit atakam akukuretiie. Era akoretammin Ipit juas Yesus, ere Allah Aeremtaere Ipite.” Emes atakam aesimen. Are emes atakam Alkitab ayat baca aetamen.

⁴Wan owe emes atakam, atakamnak apores, wanam Paulus anama Silas ajamkaiesen. Allah basitim fiak Yunani owe tananenakam, duturu tapes tananeam, Paulus anama Silas ajamkaiesen.

⁵Era Yahudi owerawa, bet asisimomesen. Are bapaparejar asan pota owe ataeres, wanam era owe jokoman pak baem jitop bajit atakam akoresen. Emesare, Yahudi oweam, era jitop ajites oweam, era kota basawuam daytinak aemesen. Are Paulus anama Silas andimaresen. Erarawa are Yason tamepu aesosesen. Are era ipit amnuk tasan batoomjis, wanam owe tanane bipu batoomtin, akoten.

⁶Emesare, are era ipit amnuk bandimartaer apoken. Ararawa, Yasonam, wan Yesus bajamkai oweam, era kota pemerintah owe bipu atomasesen. Are atakam afakeesen. “Ara owe era tapirmi takes atutumemmas. Are ara asan ajinaoes.

⁷Yasonam era owe atame atoomjiie. Era owe takes Roma Daytinak Owe Baomep Ipit basakamtam atakam aoomas. Are atakam akoremas. ‘Wan raja ipit juas Yesus aapeta,’ emes atakam aesimmas.” Era owe emes atakam aesimesen.

⁸Era ajarisiemes oweam, era kota pemeritah oweam, emes atakam jane ajies, are jak potanak aememesen.

⁹Era pemerintah owerawa, atakam Yasonam, wan oweam, asakamtamesen. “Tare uang atakamtetamtaroakam, dararawa, tara basurum are.” Emes atakam aesimesen. Erarawa, era owe, uang, pemerintah owe atetamesen. Era pemerintah owerawa, ara owe asurumtamesen.

¹⁰Emesare. Eam ere, Yesus bajamkai owe, Paulus anama Silas, kota Berea ametebirimesen. Era asan ambarememis, are Yahudi owe asamayen tame ajiiemisen.

¹¹Era Berea owe ere, owe akotnaken. Era Tesalonika owe ere, Berea owe tamen apoken. Erarawa era Berea owe, era atakam, jane akot ajiesen. Are juiin afaafeajie Alkitab aoorporesen. Are Paulus akore atakam, atakamnak apaye baporkorom aren.

¹²Erarawa, owe tanane Yesus ambesemesen. Yunani duturu owe tananeam, duturu tapes tananeam, Yesus ambesemesen.

¹³Era Tesalonika Yahudi owe ere, “Paulus Allah atakam, Berea owe akoretammar,” emes atakam jane ajiesen. Ararawa, era asan aesoses, wanam are era owe tanane jokoman baem, jak ajitinesen.

¹⁴Emesare, Yesus bajamkai owe Paulus era jupima ametetoomdaesen. Silas anama Timotius ere, Berea taka aemapemisen.

¹⁵Paulus bametetoomdae owe, kota Atena ajiire, takan ajiritesen. Paulus arawa, “Tare Silas anama Timotius ara asan fefnak bajinao atakam aesimtamay.” Emes atakam aesimen. Era owerawa, aesosesen.

¹⁶Emesare. Paulus era owe Atena bajinao banamek taotaimape, are era kota eto tananenak aporen. Erarawa are jak pota aemapen.

¹⁷Erarawa, are era Yahudi Owe samayen tame bomon, atakam era Yahudi owe ajamkoramesen. Are juiin afaafeajie, era kota owe bajarisiap asan aesosa ajie, wanam atakam era asan aemapa ajaies owe ajamkorama ajaiesen.

¹⁸Era Epikuros atakam baememtam oweam, Stoa atakam baememtam oweam, atakam Paulus ajamkoramesen. Wan owe atakam ajamkorames, “Ara janda ipit bambi baporomtaer atakam apa koreme?” Wan ere, “Are kaaowe juein owe atakam bakore aemar apeno.” Emes atakam aesimesen. Are Paulus, Yesus atakamam, era bojaorwasit atakamam, akorome apores aren.

¹⁹Era owerawa, Paulus ataeres, wanam era atakam basakamtii asan juas Areopagus, atomasesen. Ararawa, atakam Paulus ajanimesen. “Dare era ai atakam akoremarem atakam jane bajiekorom akot.

²⁰Era akoremarem atakam jinim aemarom. Dare era atakam, wama atakamaye, emes jane bajie akot taka.” Emes atakam aesimesen.

²¹Juiin afaafeajie, Atena oweam, era asan jaki ajites oweam, ai atakam takes akoreaaris aren. Are ai atakam takes jane ajiaaris aren. Are wan pak baem apoken.

²²Emesare, Paulus era Areopagus asan waut awasite, wanam atakam akorome. “Ara aemapakam Atena owee! Era pak kupis aememmakam ere, tare agama bajamkai fiak owe apormin.

²³Dere ara asan atawejarmapo, dere era tasamayen aeommakam pak, aporjaro. Denom tajuein owe kupis pak bataetiitam asan aporo. Wan joo taka ere, wao aporo. ‘Are Damsam Apok Juein Owe, aapak.’ Emes atakam era joo wao aporo. Emesare, dere era tamsam apok asitimmakam juein owe juas Allah, atakam tara akoretammin.

²⁴Allah ara tapirmiam, ara pakiin pakiinam, akenemapomen. Emesare, Armat Ipit era wonamo oupam, ara tapirmiam, Are Ju Armat Ipit. Are asamot owe akenemapomem Yahudi owe samayen tame bomon baemap apok.

²⁵Asamot owe, Armat Ipit, pak baemefaafetam asan apok. Are pak apok ipit emes tamen apok. Armat Ipit ere, era jiineam, era jesesam, era pakiin pakiin takesam, era asamot owe takes, amba atetammar.

²⁶Armat Ipit asamot ipit taka akenemapomen. Era saman takes arawa, era asamot ipit taka ajiapesen. Allaham, era owe, era tapirmiin tapirmiin apatamapomen. Bonak ere, Are era samane takes poreemapa, poreemapa ajies bawasit bare, asakamtiien. Are era samane takes poreemapa, poreemapa ajies bajanios bare, atakam asakamtiien. Are era samane takes poreemapa, poreemapa ajies baemap asan, atakam asakamtiien.

²⁷Allah, era samane takes Ara bandimar akoten. Era owe, Allah amba aportas, are Armat Ipit ataertemas apeno. Allaham emes akoten. Emesare Are era samane takes akenemapomen. Me Allah ere, dare poreemapa ajiom damo setep aometa.

²⁸Me wan owe atakam akores, ‘Allah jiine atetammaro. Are damo jati pak atetammaro. Emesare dare aemomom.’ Emes atakam aesimes. Emesare, ere atakamnak. Era tasa bajisem oweam emes atakam akores. ‘Dare Armat Ipit arereis.’ Emes atakam aesimes.

²⁹Emesare, dare Allah arereis. Emesare dare, Allah, emas eto tamen, emes bimak binip batetaram bas. Danom perak eto tamen apaye, eka eto tamen apaye, emes bimak binip batetaram bas. Dare, Armat Ipit, asamot owe akenemapomes pak tamen, emes bimak binip batetaram bas.

³⁰Bonak ere, Allah, asamot owe janda aemapaaris pak, bapor apok tamen aemaarir. Waa ere, Armat Ipit era samaniin samaniin owe takes dosa bamakem atakam asakamtamum.

³¹Emesare, Allah, era owe takes adosa, atakam basakamtii bare, atakam asakamtiie. Are era dosa atakam basakamtii Ipit taka ataeme. Are emes atakam, atakamnak, owe baporomtam aememe. Erarawa Are era Ipit ajaoromwasumtume. Emesare, era Ipitam atakamnak jipu atakam asakamtiitem.” Paulus emes atakam aesimen.

³²Era owe, era ipit bojaorwasit atakam jane ajies, wan owe wote awotesen. Wan owe ere, “Asep bare, dare wore emes atakam bokoretam, jane aojitemarom.” Emes atakam aesimesen.

³³Emesare, Paulus, era owe beken ajiosen.

³⁴Wan owe ere, armat ipit ajamkaiemesen. Are Yesus eemnak ambesemkoromesen. Me wan Yesus ambeseme ipit juas Dionisiusen. Armat ipit era Areopagus atakam basakamtii wan ipit taka araren. Me wan Yesus ambeseme taot juas Damarisen. Wan oweam aren.