Read Casuarina Coast Asmat AEMAARIS PAK 18 Bible Online

AEMAARIS PAK 18 - Casuarina Coast Asmat bible

AEMAARIS PAK 18

¹Emesare. Era pak aemkoromes, Paulus kota Atena aite, wanam kota Korintus aesosen.

²Era asan ere, are Yahudi ipit juas Akwila bi aporen. Era ipit Pontus tapirmi ajisamsen. Japen arawa, Klaudius, Yahudi owe takes, era kota Roma bajis, atakam asakamtamen. Erarawa, Akwila aremotin Italia tapirmi aejinaoemisen. Aremo juas Priskilaen. Paulusam jaki era owe tame ajitemen.

³Akarai pak takan apore, erarawa are era owe tame aemapen. Are karai takan aeesen. Are pitini tame bakenemapom oween.

⁴Era Yahudi Owe Samayen Bareiin, Paulus era Yahudi owe samayen tame bomon, atakam akoreaaririn. Are Yahudi oweam, Yunani oweam, Yesus bamesem atakam akoromporaaririn.

⁵Me Silas anama Timotius, Makedonia tapirmi aejinaoemisen. Ajinaoemis arawa, Paulus Yesus atakam taka akoretamaaririn. “Yesus, Allah Aeremtaere Ipit.” Emes ateman era Yahudi owe atamaaririn.

⁶Era owe ere, era atakam aooesen. Are tame atakam akoromesen. Erarawa, Paulus apakaian apatapipime, wanam atakam fiaknak akoromen. “Tare neraka ajiiaptakam, tanom tamba. Emesare, dere atakam tare emekoretamey. Emesare, dere waa era Yahudi apok owepu aesosmin.” Emes atakam aesimen.

⁷Armat ipit arawa, era asan aite, wanam Allah basitim ipit juas Titus Yustus atame ajiiapen. Era tameam, era samayen tameam aip amnuk aotomamtiiesen.

⁸Era Yahudi owe samayen tame kapar ipit juas Krispusam, atame oweam, Tuhan ambesemesen. Korintus owe tananeam era atakam jane ajies, wanam Tuhan ambesemesen. Are Tuhan ambesemes arawa, owe era owe bwi akupimtaeresen.

⁹Emesare. Eam ere, Paulus pak taka bambi aporen. Tuhanam atakam Paulus akoromen. “Wore ombare bas. Atakam akoromey. Atakam apok baemem bas.

¹⁰Denom takan wora ajamememmin. Owe wora baemesokom asan apok. Ara kota owe tanane ere, emesare, deowe apormin.” Tuhan emes atakam aesimen.

¹¹Emesare, Paulus era asan pir 18 aemapaaririn. Are Allah atakam era owe aememtamaaririn.

¹²Me, Akaya tapirmi gubernur ipit juas Galio aememe, era Yahudi owe, Paulus bootapem awarimwasites taka aren. Are Paulus era baoorpor asan atoomjiiesen.

¹³Are atakam akoresen. “Era ipit, owe Allah basitim, apa atakam jipu ajomtame. Era atakam ere, Musa Basakamtam Atakam jipu apok.” Emes atakam aesimesen.

¹⁴Me Paulusam atakam bakore aeme. Me, Galio, atakam era Yahudi owe, bonak akoromen. “Era ipit pota pak aeme apaye, jokoman pak aeme apaye, ere dere taatakam jane bajie erare.

¹⁵Me, era akoremakam atakam, pak juas atakam ajamkoramakam. Owe juasam atakam ajamkorammakam. Taagama basakamtam atakam ajamkorammakam. Emesare, dere era pak, atakam basakamtii pota.” Emes atakam aesimen.

¹⁶Armat ipit arawa, era owe era baoorpor asan aombirimjisimen.

¹⁷Era owe takes arawa, Yahudi owe samayen tame kapar ipit juas Sostenes ajipirtaeres, wanam are armat ipit, era baoorpor asan, wusup atesen. Me Galio ere, bapor apok tamen aemapen.

¹⁸Emesare. Paulus era Korintus ise tanane aoemapen. Ararawa, atakam Yesus bajamkai owe akoromen. “Dere aake. Dere baesos.” Emes atakam aesimen. Armat ipit arawa, Siria tapirmi bajir andaejuuen. Priskila anama Akwila, takan andaejuuesen. Bonak ere, Paulus kota Kengkrea aememe, are ataaji Allah aeen. Erarawa are kuus fini wakan ajakuemen.

¹⁹Emesare, era owe kota Efesus asetesen. (Asep bare, Paulus Priskila anama Akwila, era asan beken ajiosen.) Asetes arawa, Paulus Yahudi owe samayen tame ajiien. Are era Yahudi owe atakam ajamkoramesen.

²⁰Era oweam Paulus, era asan ise jirao boemap, atakam ajanimesen. Paulus ere, potan.

²¹Armat ipit arawa, “Dere aake. Dere baesos. Allah akot aporto, dere tara aofasiomemtemin.” Emes atakam aesimen. Emesare, armat ipit Efesus andaejuuen.

²²Ararawa, kota Kaisarea aseten. Aseterawa, asokuen. Are Yesus basitim bajarisiap owe, selamat atakam akorome, wanam kota Antiokia aesosen.

²³Are era asan ise tanane aemape, wanam aoesosen. Are Galatia tapirmiam, Frigia tapirmiam, afafasiejaren. Era asan ere, are Yesus bajamkai owe takes jak fiak aemtamen.

²⁴Emesare. Yahudi ipit juas Apolos kota Efesus ajinaoen. Are kota Aleksandria ajisamse ipit araren. Are atakam tastu ipitin. Are, Alkitab atakam amsam takesen.

²⁵Bonak ere, owe era ipit Tuhan bokotpu atakam eteememtamesen. Armat ipitam, Yesus atakam, fiak akoromen. Era atakamam turu akoromen. Me, armat ipit, Yohanes abwi bakupimtaer atakam taka amsamen.

²⁶Armat ipit, era Yahudi owe samayen tame bomon atakam jak fiaknak akoretamen. Priskila anama Akwila ere, armat ipit aatakam jane ajiemis, are era ipit atame atoomjiiemis, wanam Allah asamot owe bajortaer akukuretiie atakam, atakam, armat ipit aesimtamkoromemisen. Ere Yesus atakam are.

²⁷Emesare, Apolos, Akaya tapirmi bajir, atakam akoren. Yesus bajamkai owerawa, “Emesare. Akaya tapirmi ajirey.” Emes atakam aesimesen. Are Akaya tapirmi Yesus bajamkai owe, Apolos atame batoomjii, surat aetamesen. Bonak ere, Allah, asan akot, wan Akaya owe atetamen. Erarawa bonakam, era owe Yesus ambesemesen. Emesare, Apolos Akaya asete ere, are era owe Yesus bajamkai fiak aemtamen.

²⁸Armat ipitam Alkitab atakam baso akoretamkoromen. “Allah Aeremtaere Ipit, ere Yesus are.” Emes atakam aesimen. Erarawa are era Yahudi owe, era owe tanane bipu, atakam pomat akumimosomen.