Read Casuarina Coast Asmat AEMAARIS PAK 2 Bible Online

AEMAARIS PAK 2 - Casuarina Coast Asmat bible

AEMAARIS PAK 2

¹Emesare. Pentakosta Bare aemanse, era Yesus bajamkai owe takes, asan taka ajarisiapesen.

²Kuur bajum tamen pak wonamo oup ametedaen. Era kuur bajum tamen, aemapes tame bomon asan takes aemtepkoromen.

³Emesare, era owe, koman tamen pak tanane aporesen. Era koman, jisimak jee tamen aporesen. Era koman apatakuoses arawa, wanam era owe takes adamo ten aemapa, adamo ten aemapa, emes ajieteteresen.

⁴Allah Jipam era owe takes aemomemkoromteteren. Era owerawa, wan owe samaniin samaniin atakam kupis akoreteteresen. Allah Jip emes atakam era owe atetamteteren.

⁵Era barerawa, Yahudi saman owe Yerusalem aemapesen. Are agama bajamkai fiak oween. Are tapirmiin tapirmiin aejinaoes owe aren.

⁶Era owe kuur bajum tamen pak jane ajiesen. Jane ajies arawa, ajarisiemesen. Are Yesus eemnak bamesemkorom owe, ajarisiemes owe asaman atakam kupis akores, emes atakam jane ajieteteresen. Erarawa are bimak binip arke atetaramesen.

⁷Are jinim bay aeesen. Atakamam akoresen. “Ara atakam akoremas owe takes ere, Galilea owe arare.

⁸Wama tamenem? Era jane ajimarom atakam ere, owe dara ajisipetiieroes tapirmi atakam arare.

⁹Dare Partia oweam, Media oweam, Elam oweam, Mesopotamia tapirmi baemap oweam, Yudea oweam, Kapadokia oweam, Pontus oweam, Asia oweam,

¹⁰Frigia oweam, Pamfilia oweam, Mesir oweam, Libia tapirmi kota juas Kirene setep oweam, Roma aejinaom oweam, emes owe.

¹¹Dare Yahudi saman oweam, Yahudi agama damba afiom oweam, Kreta oweam, Arab oweam, emes owe aememmarom. Dare takes Allah era daytinak aemaarir pak, atakam jane ajimarom. Era atakam, dare poreemapa ajiom samaniin samaniin atakam kupis, emes atakam jane ajietetermarom.” Emes atakam aesimesen.

¹²Emesare, era owe takes jinim daytinak aeesen. Are bimak binip amsam apoken. Atakamam akoramesen. “Wama tamenem?” Emes atakam aesimesen.

¹³Wan owe ere, wote awotomesen. “Ara owe, ai anggur bwi daytinak andares. Emesare are jaytu.” Emes atakam aesimesen.

¹⁴Me, Petrusam, era Yesus atakam bakoretam bamirimemom owe 11am, awasitesen. Petrus arawa, atakam daytu akoromen. “Aememakam Yahudi owee! Yerusalem aemapakam owee! Tare ara akoretey atakam jane pajiekoromay.

¹⁵Tare aememes owe jokoman jaytu bwi banda emem, jiraomakam. Ere atakamnak apok. Waa ere, jam 9 tomnak arare.

¹⁶Era aemmas ere, Allah atakam bakoretam ipit juas Yoel akore atakam are:

¹⁷‘Allah atakam ere, Era asepnak bare ere, dere, DeJip, asamot owe takes atetamtemin. Emesare, tajii deatakam akoretamtemas. Ta ai oweam pak bambi aportemas. Ta duturu oweam ise atamwittemas.

¹⁸Emesare. Era baream Dere DeJip, bambi karai baetam oorey oweam, tapesam, atetamtemin. Ararawa, deatakam akoretamtemas.

¹⁹Dere jinim bae pak ara wonamo oup aporomtamtemin. Denom jinim bae pak ara aemansa tapirmi aporomtamtemin. Era jinim bae pak, eseeam, jisimakam, jisamun daytuam, are.

²⁰Emesare, era jee jiiti atamtiitem. Piram esakam esee tamen aemtem. Asep ere, Tuhan Bare aemamestem. Era bare, daytinakam, akotnakam, are.

²¹Era bare, atakam Tuhan ajanimtas owe takesam ajoremtemas.” Allah emes atakam are.’ Yoel emes atakam aeapomen.

²²Tare aememakam Israel owee! Deatakam jane pajiay! Yesus, Nasaret Ipit. Emesare, Allah, afiak pak, Yesus atetame. Emesare Yesus era jinim bae pak tawaut aemaarir. Era pak Allah Yesus ataeme, emes baporomtam pak erare. Tare emes tamsam.

²³Wanam, Are Yesus tara aotasimemtamen. Tararawa, jokoman owe, Armat Ipit, salibpu saifinumu bapaoapom atakam asakamtamekem. Erarawa tare Armat Ipit atatiiekem. Bonak ere, Allah, owe emes pak baem, atakam emesakamtiie. Are era pak takes amsam.

²⁴Allah ere, Yesus ajaoromwasumtume. Yesus dambir ateme, Are ajiriseme. Me, Allah Yesus dambir pak akimomepore asurumtaere. Emesare, era dambir pak, Yesus baemekimompaar asan apok.

²⁵Daut ere, Yesus emes atakam akoren: ‘Dere Tuhan debipu aporaaru. Are dedamopu aememem. Emesare owe dera baemejurusum asan apok.

²⁶Emesare dejak akotnak. Denom bwea Tuhan basitim so aemin. Dambir aemtey, dedamo, asan akot aemamestem.

²⁷Allah. Wore deanakot ipit, era dambir owe baemap asan, dera baputimtii apok aemtemarem. Wore waa era turunak Ipit, damo ofa boofames, emes batetam apok aemtemarem.

²⁸Emesare, Wore era jiinenak bokotpu aporomtamenim. Denom wodamopu akaiemtey, Wore jak akot atetamtemanim.’ Daut emes atakam aeapomen.

²⁹“Dejoo owe akotnak! Dere Daut atakam basonak tara akorommin. Armat ipit darerokor arare. Are dambir akamianse, wanam owe armat ipit awuapomesen. Waaam awuapomes asan daasan asinta.

³⁰Daut, jatiaptam aememe ere, are Allah atakam bakoretam ipit aememen. Allaham ataaji fiaknak Daut aetamen. ‘Asep bare Dere wurpis ipit taka, owe baomep ipit ataemomtemin.’ Emes atakam aesimen. Dautam emes atakam jane ajiekoromen.

³¹Are Allah aemto pak aporen. Erarawa are Allah Aeremtaere Ipit ajaorwasitto pak, atakam akoren. Erarawa are Allah ara Ipit dambir owe baemap asan baputimtii apokam, era damo ofa boofames apokam, emes atakam akoren.

³²Emesare, Allah Yesus ajaoromwasumtume. Danom takes emes taka aporom.

³³Allah anom, Armat Ipit abo poman atemetetaapomen. Are Allah Jip Armat Ipit atetamen. Bonaknak ere, Yesus Aritipit, era pak baem, ataaji aetamen. Emesare, waa apormarom pakam, jane ajimarom pakam, Yesus ataendaemar pak arare.

³⁴Daut ere, Surga oup batoomtemet apok. Are atakam amba akore: ‘Tuhan, atakam, ere deTuhan akore,

³⁵“Wore ere, debo poman aemapey— era wojokoman owe takes akumimosomtey bare ajiire.” Tuhan emes atakam aesimen.’ Daut emes atakam aeapomen.

³⁶Tare Yesus era salib wus oup atatopomekem. Allah anom, Armat Ipit, Tuhan ataeme. Are Armat Ipit aeremtaere. Emesare, era Israel owe takes emes pak baporkoromtas.” Petrus emes atakam aesimen.

³⁷Era owe emes atakam jane ajies arawa, are jak pota daytinak aememesen. Are atakam Petrusam, me wan Yesus atakam bakoretam bamirimemom oweam, akoromesen. “Aememakam owee! Dare wama pak emtam?” Emes atakam aesimesen.

³⁸Petrus arawa, atakam era owe aokoromen. “Tare dosa ambakemteteray. Wanam Allah atakam ji aeay. Owe Yesus Kristus juas bajiemtas, wanam bwi tara bakupimtaertan. Emesare, Allah tadosa, bimak binip ajanimemtem. Are aJip tara atetamteterteman.

³⁹Allah, aJip batetam, ataaji, tanom, tajiiam, setep apok oweam, aetame. Ere daTuhan Allah ajate owe takes arare.” Emes atakam aesimen.

⁴⁰Petrus, wan atakamam tanane era owe akoromen. Are ataane fiak era owe aweomen. “Tare ajoremteteray. Allah, tare, era jaos saman takan bajurusum-ombar.” Petrus emes atakam aesimen.

⁴¹Emesare. Wan owe era atakam ji aeesen. Owerawa, era atakam ji aees owe bwi akupimtaeresen. Erarawa era bare ere, Yesus bajamkai owe, owe 3.000, betema betema ajiesen.

⁴²Era oweam Yesus atakam bakoretam bamirimemom owe atakam, takan aememaarisin. Are asan taka ajaniapa ajiaarisin. Are Tuhan perjamuan takan anda ajiaarisin. Are atakam Allah ajanima ajiaarisin.

⁴³Era Yesus atakam bakoretam bamirimemom owe, jinim bae pak tanane aema ajiaarisin. Era owe takesam, ombare aemema ajiaarisin.

⁴⁴Yesus eemnak bamesemkorom owe takes takan aememaarisin. Are pak takes takan aemomataarisin.

⁴⁵Pak armat owe, pak, uang ajitittaeta ajiaaris, wanam era uang pak apok owe sai asaiamtama ajiaarisin.

⁴⁶Juiin afaafeaarir, are bimak binip takan, Allah Tame bomon ajarisiapa ajiaarisin. Ararawa, amos atame ajiidatia, atame ajiidatia, emes ajiaarisin. Jak akot aptamam amos sai asaiamtama ajiaarisin.

⁴⁷Are Allah tere aeomaarisin. Wan oweam, era owe, atakam akot akorea ajiaarisin. Juiin afaafeaarir, Tuhan ajortaera ajiaarir owe, era owepu betema betema ajiaaririn.