Read Casuarina Coast Asmat AEMAARIS PAK 21 Bible Online

AEMAARIS PAK 21 - Casuarina Coast Asmat bible

AEMAARIS PAK 21

¹Emesare. Dare era owe beken ajiapomom. Danom andaejuuom, wanam woo juas Kos akan ajirom. Ajoferawa woo juas Rodos aseteom. Dararawa andaejuuom, wanam woo juas Patara andaeapom.

²Danom Fenisia tapirmi bajir kapal aporom, wanam era kapal ajamjuuom.

³Dare dabo poman, woo juas Siprus aporom. Dararawa, Siria tapirmi apiirom. Apiirom arawa, kota Tirus andaetamom. Era asan ere owe kapal pak tapirmi bajekum asan.

⁴Danom Yesus bajamkai owe ambarporom, wanam era asan bare poman ban jamnuk aemapom. Allah Jipam atakam bimak binip era owe atetame. Era owerawa, atakam Paulus akoromes. “Wore Yerusalem baesos bas.” Emes atakam aesimes.

⁵Me, dare boesos bare aemanse, danom aoesosom. Era owe takesam, atapesam, ajiiam, era kota tasan takan ajamesoseroes. Danom era jupima jindi andaepuapom, wanam atakam Allah ajanimom.

⁶Danom selamat atakam ajamkoramom, wanam era kapal andaejuuom. Era oweam tame aoesoses.

⁷Dare Tirus aendaejuuom, wanam kota Tolemais aondaeteapom. Danom era asan Yesus bajamkai owe selamat atakam ajamkoramom, wanam era owe bare taka ajamemapom.

⁸Ajoferawa, aoesosom, wanam Kaisarea ambaremom. Danom Yesus Akot Atakam bakoretam ipit juas Filipus atame aemapom. Bonak ere, era Yerusalem owe, owe poman ban jamnuk aereremartaaes. Me Filipus, era aeremtaeres ipit taka arare.

⁹Armat ipit awarais tano tapes eak taka apok. Era tapesam Allah atakam bakoretam tapes.

¹⁰Danom era asan bare bamintep aemapom ere, Allah atakam bakoretam ipit juas Agabus, Yudea tapirmi aejinaoe.

¹¹Are ere, daasan ajinaoerawa, armat ipit Paulus asemak banam pak ataere. Are abaiam, banam, banam ajikapome, wanam atakam akorome. “Allah Jip emes atakam akorem, ‘Era Yerusalem ere, Yahudi owe asemak banam pak armat ipit, emes banam ajikapomtemas. Are armat ipit era Yahudi apok saman aotasimemomtamtemas.’ Alah Jip emes atakam aesime.” Agabus emes atakam aesime.

¹²Emes atakam jane ajiom, danom, era asan aemapes oweam, atakam fiak Paulus akoromporom. “Wore Yerusalem baesos bas.” Emes atakam aesimom.

¹³Paulus arawa, atep ajite. “Tare wama tamenem? Era bate ambatmakam ere, dejak pota aememmankum. Owe banam dera ajikapomtanis apaye, dere Tuhan Yesus dambir baemtam apaye, ere akotnak.” Emes atakam aesime.

¹⁴Danom atakam Paulus bakore aemporom apok. Dare atakam apok aeamapom. “Tuhan akot aporto baemto.” Emes atakam aesimom.

¹⁵Danom era asan aemapkoromom arawa, danom pak atookenemapomom. Dararawa, Yerusalem aojarom.

¹⁶Me kota Kaisarea wan Yesus bajamkai oweam takan ajarom. Owe dare Siprus ipit juas Manason atame baemames, atakam akoromeroes. Erarawa are armat ipitpu atoomero. Armat ipit Yesus tarai ajamkaiaarir ipit arare.

¹⁷Danom Yerusalem ambaremom, Yesus bajamkai owe jak akot aptam atoomjieroes.

¹⁸Ajoferawa, Paulusam, danom, Yakobuspu takan ajarom. Yesus basitim bajarisiap armat baemem oweam takes era asan aemapes.

¹⁹Paulusam selamat atakam era owe akorome. Selamat atakam akoromerawa, are Allah Yahudi apok owe aeme pak takes, atakam era owe akoretame. Ere Paulus aeme pak are.

²⁰Era owe emes atakam jane ajies, are Allah asitimes. Ararawa, atakam Paulus akoromes. “Paulus, dareot akot! Yahudi saman owe tanane Yesus ambesemes. Era oweam, Musa Basakamtam Atakam ji fiaknak aemas.

²¹Oweam woatakam era owe emeesimtames. Me Paulus, atakam, era jokoman tapirmi aemapes Yahudi owe, aememtamaarir. “Tare Musa Basakamtam Atakam bamompimay. Tanom tajii tamane pitini basakamosom bas. Era Yahudi owe tarai atakam pak ji boe bas.” Paulus emes atakam aesimaarir. Era owe emes atakam aesimes.

²²Wore ara asan andaem, atakam jane ajitemas. Wore ere, wama tamenem?

²³Emesare. Wore era akoretammarom atakam ji taka aee. Ataaji Allah aeemas owe eak taka apok aomatisa.

²⁴Era owe Allah bipu atet apok baemem, emes tai asirtas, era tai basir takan ajamemey. Wonom era owe tai basir baem uang, ara tai basir baemtam owe atetamey. Erarawa owe, era owe bamintep era kuus fini wakan ajakuosomtemas. Owe wore emes baem aportas, are wan owe woatakam akores atakam takes, pote atakam takes aportemas. Are wore era Musa atakam ji aemarem aportemas.

²⁵Dararawa, era Yahudi apok saman Yesus ambesemes owe pak, ere atakam etejamsakamamtiiom, wanam era atakam surat etetetamom. Era surat atakamam, Tare, owe eto bipu ataetiitames pak, banda bas. Tanom esee banda bas. Tanom esee aptam dambir aeme binatang dasa banda bas. Tanom tani tamane bajamdamat bas. Emes surat atetamom.” Emes atakam aesimes.

²⁶Emesare, Paulus era owe eak taka apok ataere. Ajoferawa, are, era oweam, Allah bipu atet apok baemem, pak tai takan asires. Armat ipit arawa, Allah Tame ajiie, wanam atakam Allah Tame pak baem ipit akorome. Are era owe era atet apok aememkoromtas bare, atakam ara ipit akoromen. Emesare, era atet apok baememkorom bare, era owe poreemema ajies, pak Allah bipu bataetiitam bare erare.

²⁷Me atet apok aememkoromtas bare, bare poman ban jamnuken. Era bare poman ban jamnuk takes setep aemapes ere, Asia tapirmi Yahudi owe, Paulus Allah Tame bomon apores. Era owerawa, ara owe tanane pota pak baem awotamares, wanam Paulus ajipirtaeres.

²⁸Are atakam afaketaaes. “Ara aememakam Israel owee! Pi pajataroay! Ara aemema ipit, era atakam era samaniin samaniin owe takes aememtamaarir ipit arare. Are, ‘Era Israel owe pota. Musa Basakamtam Atakamam pota. Allah Tameam pota.’ Emes ajiaarir. Waaam Yahudi apok saman owe Allah Tame atoomjiieme. Erarawa are Allah turunak asan pota pak aeme!” Emes atakam aesimes.

²⁹(Bonak ere, era owe Efesus ipit juas Trofimus Paulus era kota takan ajares apores. Ararawa, Paulus era ipit Allah Tame batoomjii jiraoemesen. Erarawa are emes atakam akores.)

³⁰Emesare. Era kota owe takes emes atakam jane ajies, wanam awarimwasites. Are ametejarisiemes, wanam Paulus ajipirtaeres. Are armat ipit Allah Tame tasan ajimomjises. Owerawa, era jimsap takes ametekakapimapomes.

³¹Emesare, era owe tanane Paulus batatii aememes. Wanam Yerusalem owe takes basawuam daytinak aeames. Tentara kapar ipitam era pak jane ajie.

³²Armat ipit bambi tentara oweam, komandan oweam, ametetaere, wanam era owe tananepu ja atoses. Era owe tanane, era tentara kapar ipitam, era tentara oweam, apores. Ararawa, Paulus wusup bata akariemes.

³³Tentara kapar ipit arawa, Pauluspu aesose, wanam armat ipit ban akimome. Are owe Paulus rantai jamnuk banam bajikapom atakam asakamtame. Are ajatepore. “Armat ipit tanam? Apa pak emar?” Emes atakam aesime.

³⁴Era owe tanane damon ere, wan owe apa atakam afakea ajies. Wan oweam apa atakam afakea ajies. Are basawuam daytinak aemes, erarawa tentara kapar ipit era atakam aite bambi andimare. Armat ipit arawa, tentara owe Paulus tentara tame batoomjii atakam asakamtame.

³⁵Era owe tananeam Paulus fe asaramomes. Are atakam afaketaaes. “Ara aemema ipit batatiiey.” Emes atakam aesimes. Era tentara owe, Paulus, baisanpopu ataeres. Are era owe tanane jokoman daytu apores, erarawa are Paulus baisanpo atoomtemetes.

³⁷Tentara owe, Paulus, tentara tame batoomjii aememes. Me Paulus ere, atakam tentara kapar ipit akorome. “Dere atakam wora bakorompor akot ape?” Emes atakam aesime. Tentara kapar ipit arawa, “Wore Yunani atakam womsam ape?

³⁸Bonak ere, Mesir ipit, owe pemerintah bawotapem atakam ajomtame. Ararawa, jokoman owe 4.000, era tame apok asan, bonak ajaremtame. Wore era ipit apoke?” Emes atakam aesime.

³⁹Paulus arawa, “Dere Yahudi saman ipit. Denom Kilikia tapirmi kota juas Tarsus ipit. Owe takes era kota amsam. Denom ara aememares owe atakam bakoretama.” Emes atakam aesime.

⁴⁰Tentara kapar ipit arawa, “Emesare, atakam bakoretamey.” Emes atakam aesime. Erarawa, Paulus baisan oup aememe, wanam ban awawarime. Era owe atakam apok aememes, Paulus, Ibrani atakam era owe akorome.